باهار گلیر دونیامیزا
اکبرسعادت
آنا دیلیمیز:دئمک تام دوغایا(طبیعته) باغلی بیر اولای دیر. قیش بوتون قیشلیغیلا باشا چاتدیقدا یئرین جانلانماسینین خبری? بایراما بیر آی قالمیشدان یئر گویو بورویور. بو اولایی قوتلاماق? بئله بیر دورومو یاشایان یئرلرده یاشانار? یاشامادیقدا دوشونوب یاشادا بیلمز. اودون دیرینی سویوقدا یاشایان اینسانلار بیلر. کئچمیش زامانلار اوجاقلارینین سوندویونده یئنیدن اودو یاندیرماق چتین اولار? بو چتینلیک قیشدا ایکی قات آرتار? بلکه ده اونلارین حایاتلارینین سونونا آپاراردی. ائله اونا گوره ده اوجاق قوتسال بیر آنلام تاپیر. زومارین سونا چاتدیغیلا باغلی? قیشین قارقیشیندان قورتولوب بیر ایل داها یاشاماق ایمکانی تاپان اینسانلار تکجه بایرام آدینی بئله بیر اولایا وئره بیلرلر. بایرامی دوشوندوکده هر نه یئنیدن دوغولور? یئنیدن باشلانیر.
یاز گئدیر، یای گلیر. آرپا- بوغدا یئتیشیر. اوراقلاری ایتیلدیب بیچین ایشینه باشلاییرلار. بیچینی قورتاریب خالوارلاری خرمن یئرینه داشیدیقدان سونرا کیشی آرخایینلاشیر. پینکه¬سینی وئریب یئره ائودن چوله چیخمیر. آرواد بیر گون دوزور، ایکی گون دوزور اوچونجو گون تنگه گلیر. »آ کیشی!« دئییر، »نیه گونو گونه ساتیرسان، خرمن سال، درزلری دوی آذربایجان هاواسینین ایپینین اوستونه اودون ییغماق اولماز. بیر ده گوررسن، مئه- شئه باشلادی، خرمنی دویه بیلمه¬دین. آتالار بئچیزه دئمه¬ییبلر کی، کولش دوشدو، قیش دوشدو«.
کیشی مین ایللیک یوخودان آییلیرمیش کیمی دیک آتیلدی. خرمن یئری حاضیرلادی. درزلری دویدو، سووورماغا باشلادی. سووروغو سئیر ائدن خانیم اونا دا بیر تاپماجا قوشدو: دیلیم، دیلیم نار، دیزیمه¬جن قار، اوچدو بیر کهلیک، قوندو بیر دیلبار (دیلبر).
بئله¬لیکله قیشین دیرریگینی یایدا توپلاماغا باشلامیشدیر آتا- بابالاریمیز. شرقدن ساوالانا دوغرو شوتوین مئه دلی خزردن، سیخ مئشه¬لردن پاییز قوخوسونو اورمو دوزونه گتیریر. پاییزین سویوق، سیلیان گونلری قاباقدادیر دئیه سن محصوللارینی توپلاییر. قیشا حاضیرلیقلارینی تاماملاییرلار. انسانلارین، مال- قارانین آیاقلاری یاواش – یاواش چول – باییردان چکیلیر. قیشین یاناجاغی سووانمیش قالاقلاردا، مال- حیوانین یئمی تایالاردا، سامانلیقلاردا دئپو اولونور پاییزدا. آخی یئنه اولو بابالاریمیز »پاییز چیخدی، قیش چیخدی« دئیه بو موسومده¬کی حاضیرلیق ایشلرینین اهمییتینی وورغولامیشلار. ائه! قیشین اوزون گئجه¬لرینی ناغیل- تاپماجا ایله باشا وورماغا نه وار!
بیتکیلر، بعضی حیوانلار قیش یوخوسونا گئدیر. پاییزین آخیر آیی «که¬لوز» قاری ایله تاماملانیر. بو قار آرتیق اریمه¬یه-جک، وعده یئلینه کیمی بیر- بیرینین اوستونه ییغیلیب قالاجاق. اوزون گئجه¬لرده کورسولره سیغینان آغ¬ساققاللاریمیز و آغ-بیرچکلریمیز نوه نتیجه¬لرینی اوز تجربه¬لریله تانیش ائده¬جک
آمما قیش ائله ده آسان دئییل ها. قاری وار کوله¬یی وار، چووغونو وار بو فصلین. آخیر کی باهار گلیب بو چتینلیکلره، بو دورغونلوغا سون قویمالیدیر.سون گوجونو توپلایاراق طبیعته بیر فیرتینا سالیر کی، گل، گوره¬سن. هله دئسن قاباقدان گلن کیچیک چیله اوز قاباغیندان یئمیر: »من ائله بیر فیرتینا قوپاراجاغام، ائله بیر قیامت سالاجاغام کی، بویوک چیله¬یه رحمتلیک گلسین«. آمما آغ-ساققاللاریمیز امیدیمیزی ایتیرمه¬یه یول وئرمیر، »یامان گونون عومرو آز اولار بالا!« دئییرلر. بوتون چتینلیکلره سینه گه-رن جاماعاتیمیز ایسه بویوک چیله¬نین سون دورد گونونو و کیچیک چیله¬نین ایلک اوچ گونونو خیدیر پیغمبرین عشقینه خیدیر بایرامی کیمی قید ائدیر. قوود پایلاییر و بویوکلو کیچیکلی هر ایکی چیله¬یه غالب گلیر.
بویوک چیله کیچیک چیله¬یه گولور کی، »آده! نه های سالمیسان؟ یوزده¬نه سنین و منیم کیمی چیله¬لر آذربایجانلیلاری محو ائده بیلمز«. کیچیک چیله اوزونو سیندیرمیر و عاجزلیگینی اساسلاندیرماغا چالیشیر: »ایه! منیم عومروم سنیجک اولسایدی، گلینلرین الینی دوز بارداغیندا دوندوراردیم« دئییر.
قیشدان ایکی آی کئچنده کیچیک چیله¬نین ده عومرو سونا چاتیر. آمما قیشین سویوغو هله توکنمک بیلمیر. قارینین ایسته¬یی و تانرینین امریله چیله¬یه اون گون ده آرتیریر و »قاری ننه¬نین چیله بئچه¬سی« آدلاندیریر. آخیر آیین اون گونو سووشدوقدا هاوالار یومشالیر. آمما جاماعات حاضیرریغینی ایتیرمیر ها. ایین- باشینی برک ساخلاییر. بولودلارین آراسیندان گولن گونشه آلدانمیر. بو آرادا »کورد اوغلو« غره¬له¬نیر. قیش گئیمینی سویونور و سفره چیخیر. یولدا کولک باشلاییر. بیر آرشین قار یاغیر. آمما کورد اوغلو دا آتا- بابالاردان اویرنمیشدی کی، بئله سویوقلاردا دایانسان، اوتورسان، یاتسان اولرسن. اودور کی آتیلیب دوشور و بدنینین سویوماسینا یول وئرمیر. فیرتینانی گورن آداملار کورد اوغلونو آختارماغا چیخیرلار. اونو یاری جان تاپیب ائوه گتیریرلر. بئله لیکله بو اوچ گونو ده »کورد اوغلو« آدلاندیریرلار. نهایت قیشدان اون یئددی گون قالاندا یئره »نفس« گلیر و دورد گوندن سونرا وعده یئلی اسمه¬یه باشلاییر. قار- بوز اری¬ییر. کولک آغاجلارین قوروموش بوداقلارینی قیریب یئره توکور. جاماعات اونلاری ییغیب چرشنبه تونقالینا ساخلاییرلار.
باهارگلیر، دونیا تزه‌لنیر، طبیعت یئنی‌لشیر، اما بیز نئجه؟! تزه‌لیکده‌ن، یئنی لشمکده‌ن، دوزلوک ده‌ن دوغرولوقدان بیزیم‌ده خبریمیز وارمی؟ بیزده آغ بیرچک آنالارین صداقتلی اوره‌یی کیمی صاف بیر اوره‌یه صاحاب اولموشوق؟ یوخسا…! نه یه؟! باهار گلیر، دونیا میزا نئجه باخمیشیق. بوراجاخ نه ائتمیشیک؟!گله‌جک نسله‌نه توحفه میز واردیر؟ نئچه سرمایا…! نه جوره‌طبیعت! نه دوشونجه؟…باهار گلیر… هارداییق، کیمیک، …!؟
آرزیم وار کی ، یئر یوخوسوندان دوران کیمی بیزده بو غفلت یوخودان دوراق…تانری تکجه بیز اوچون یئر گویو یارادیب.من بویوک تاری دن استیریم که بیز انسانلارین اوره گ لرمیزده عشق ومحبت اوتین یانار ایلین کن محبت شعله لرین داهادا الولاندرسین.
نوشته شده توسط admin در دوشنبه, ۱۰ اسفند ۱۳۹۴ ساعت ۵:۵۰ ق.ظ
