باراندوز

کوچوره ن:اکبرسعادت
آنادیلیمیز:آرخ قیراغیندا سئرایلا دوزولن قلمه،سئود آغاجلاری یئل ده اسیردی. گولزار اتورموشدو قاب-قاشیق یووردو. و اوزواوزونله فیکیرلشیردی :
» بیر گول کیمی قیشین شاختاسیندا قاریندا گره ک سولام. ائله بیل منیم کیده بئله گلیب دیر. یازگولو قیشدا بوندان آرتیق اولا بیلمز. بیلمیره م حیات نییه بئله دی ، نییه دیشمیر؟«
بو بیرسورقویدو کی اونون ذهنینده گزیردی. آیری طرفدن ده، اونون اوشاغی اولموردو، چوخ نیارانیدی: »یاشایش داش کیمی دیر.یوخسولوغون اوزو قره اولسون؛ قورلتولماغا گلمیر. یالقیزآدامین ، الیندن نه گلر؟ قوش قوشلوغوندا بالاسینان گزه ر ، من بیلمیره م نیه منیم بالام یوخدو؟…«
بو دوشونجه دیدی کی بیردن گوردو آغاج دالیندن بیر قیز اونو گودور:»آی گوزه ل ،سن کیمین سن؟« گولزار دئدی.
قیز اشیدیب اوزاخلاشدی. و بیر باشقا آغاجین دالیندا گیزلندی:»ندن قاچیرسان، گلر بورا گوروم کیمسن؟ اتا-آنان کیمیدیر؟ بو ایکیمجی دفعه دیر که سنی گوروره م.قورخما، گل بورا! استیره م سن له تانیش اولوم…چوخ تانیش گلیر، اله بیل بیزلردندیر. اوز-گوزو ، یئریش-دوروشو بیلمیره م کیمه اوخشاییر …« -گلزار دئدی.
و قیزا ساری گئتدی. امما او یوخودو. ائله بیر غیب اولمشودو! گولزار قاب-قاشیغین گوتوروب تله سیک ائوه قایتدی:
» او بیزه بنزیردی، کیچیک اوزو،قهوه یی شاچلاری ، پار-پالتاری، هامی سی منه تانیش گلدی…« -دوداق آلتی اوز-اوزونه دئدی.عباد عمی که قضییه دن خبری اولدو:
»بالا غصه ائله مه، اوشاقدا گله جک ، اوشاق صاحابیدا اولاجاقسان ، و بو آجی خیال لارین هامی سی گئچیب گئده جک «- دئدی…یونس بویویوب بیر گنج ایگیت اولمشوندو.امما قولاقلاری آغیر ایشیدیردی. عباد قولاجالمیشدی، و گولزار ایله علی اوشاق صاحابی اولمیشدولار. اونون آدی “سفر” ایدی. گولزار یالقیز لیغین اونودموشدو و چتینلیک لری اونملی سایمیردی . “سفر” ین قوش کیمی قئغیلتی لری اونا اومود وریردی. اوره گین محبت له جوشدوروب دوزومون آرتیرردی. ایندی اونون ان بیوک اومودو حیاتدا، بالاسیدی؛هرسئوگی لی آنا کیمین.
او گون کی علی اوشاغی آلدی دالینا، بیرگون تامام یول گئدندن سونرا ، بیر اوزاق کندده اونو دوکتورا یئتیردی ، قایئداندا گولزار ائله سئوینردی که آز قالمیشدی ارینی کوچه ده باغرینا باسیب اوپسون. امما اونلار یالقیز دیئلدی لر. هئچ واخت یالقیز اولمامیشدیلار. و اوزلری اوچون بیر خارابالاریدا یوخودو. بوناگوره ده مجبور اولموشدولار هر زامان اوز شخصی دیغو ماراقلارینی اؤلدورسونلر. بو دوروم بئله گلمیشدی بئله ده گئدیردی. دیغولاری قتله چاتدیرمان رسم ایدی. یوخسوللوق، دویغولاری اولدورمک، آغیر ایشلر سواد سیزلیق، چوخ آداملاری آغاج کیمی قورودوب کله-کوپباز، هیر-تیر قانمییان ائلمیشدی.»نیه یاشایش بئله چیرکیندی؟نیه گوزه لشمیر؟ نچون یوخسوللوغون سونو یوخدو؟ نچون هرکوزه یه ال آتیریق، قورپو گلیر الیمیزه؟ …«بو جاواب سیز سورغولار گون -به -گون گولزاری دیدیب داغیردیردی.
امما بونلا بئله اوشاق عایئله نین حیاتین شیرین لشدیرمیشدی: گولزار قادینلار ایله چایدا پارپالتا یووردو. “سفر” سینه سین قویموشدو چاین قیراغینا سویونان اوینوردو. بیردن اوشاق دیغیرلانیب دوشدو سویا؛ تا توتالار، سو بیلسین گوتوروب آپاردی: »ای وای ! اوشاغی سو آپاردی!« گولزار باغیردی.
و اوشاغین دالیجا چای قئیراغیندا قاچدی. اوزون سویا آتیب اونون قاباغین کسدی. و قوش بالیغی سودان قاپان کیمی اونو قاپدی. سفرین بیر یوموراغی دوگونلویدی:بالا آچ گوروم الینده نوار؟» قادینلارین بیرسی دئدی.سفر : »پول!« قادینلار:» اون شاهی!»گولزار:« اوغلوم، یوموراغین سودا نیه آچمادین؟»اوشاق:« پولوم گئدردی؛ دده م داها منه پول ورمزدی!»وهامی گولدو.بو حادثه اوچون علی ائوده بیردعواهنگامه سالدی یولا کی گل گوره سن!…یازیق گولزار علی نین پیش اخلاغین گوروردو بیر سوز دئمیردی. هرشئ یه دوزوردو. بیلیردی او بئله دییلدی؛ یاشایش اونو بوگونه سالیبدی.
روحونون کوکونه واقفیدی . حیاتین پیس وضعییتنه آجیقلانیردی امما علی دن بیر شئ اوره یینه آلمیردی. او ائولنمه دن اؤنجه سئوگی لرین اونوتمامیشدی. و همیشه گئچمشین خاطیره سی ایله بو گونکو حیاتینا باخیردی.
بوتون بونلار گوزوموم قاباغیندا اؤز وریردی امما الیمدن بیرایش گلمیردی؛ بودا بیله می چوخ اینجیدردی.ایستیردیم اونلارین حیاتینا گیریب یاردیمجی اولام …
بیلمیره م، بلکه ده یاردیمجی اولا بیلمزدیم و هئچ بیر دویون منیم الیم له آچیلمازدی. اونلار اوچون نه ایش الیمدن گلیردی؛بیلمیره م. بیرجه بونو بیلیردیم کی یاشایش عذاب دان باشقا بیر شئ دیلدی.
یالنیز گولزارین سسی منه شور-شوق وریردی. اوندا کی اوز و قونشونون اوشاغینا دؤشوندن سوت وریردی و اونلارا لای لای دییردی؛ منیم باغلی دنیامین دربچه سی آچیلیردی. آنا لای لایئ، دنیانین ان گوزه ل اوره ک نغمه سیدیر. دنیادا بوندان گوزه ل بیر نغمه تاپیلارمی؟ بوندان گوزه ل بیر ایش اولارمی کی یاردیمجی اولاسان آنالارین لای لایئ دینجده، دنیادا جینگیلدیه؟ گولزارین روحو تیتیره دن سسی هله ده قولاغیمدادیر: گون گئدر باتان یئره -ملک لر یاتان یئره -لای لای بالام لای لای-آنالار قربان اولار بالا لار یاتان یئره -لای لای بالام لای لای
لای لای دئدیم یاتاسان- قیزیل گوله باتاسانقیزیل گولون ایچینده شیرین یوخی تاپاسان
لای لای بالام لای لای-لای لای بئشیگیم لای لای -ائویم ائشیگیم لای لای
سن یات شیرین یوخودا -چکیم کئشیگین لای لای- لای لای اومودوم بالا دوز چوره یئم بالا گوزلره م بوییه سن -گوره م کؤمه یئن بالا