آنالار اوره یی ….
یازاری: ممد نامازوف
الیفبامیزا کؤچوره ن: محمد رضاشوکتی الوارعلیا
هر دفعه کنده گئده نده ایسته ییره م کی، آنامین یانینا الی بوش گئتمه ییم… هر دفعه ده…
من بالاجا ایکن آنام بویوما اوخشاییب الینی باشیما چکیب دئیردی: بالام بؤیوینده آناسینا یاخشی بیر یایلیق آلاجاق . قوی بیر اوغلوم کیشی اولسون ! اورتا تحصیلاتی قورتاریب شهره گئدیب عالی تحصیلاتا قبول اولوندوم . آنامین سؤزلری قولاغیمدان گئتمیردی: »قوی بیر اوغلوم کیشی اولسون ! آناسینا یاخشی بیر….«
همیشه ده آیلیغیمی آلاندا آناما یاخشی پارچادان یایلیق یا آیری گئییملیک آلماق ایسته ییردیم….
همیشه ده….همیشه ده کنده گئده نده آنامین یانینا چوخلو کیتاب …دفتر آپاراردیم. آنام اونا پالتار آلمادیغیم اوچون اوتاندیغیمی دویوب دئییردی:
- : آنان اؤلسون سنده ن هئچ نه ایسته میره م . درسیوی بیتیر، الین چؤره یه چاتسین اوندا منه پالتار آلارسان ، قاچمیرام کی!
عالی تحصیلاتی بیتیردیم. اللریم زحمتلره سیرداش اولدو. اؤزومه سؤز وئردیم کی، ایلک آیلیغیمی آناما پالتار آلاجاغام. یادیما آنامین اوشاق واختی بویوما اوخشایا- اوخشایا دئدییی سؤزلر دوشوردو:
»قوی بیر بالام کیشی اولسون…« ایلک آیلیغیمی آلدیم … آنام گؤزلریم اؤنونده دایانیب سانکی دئییردی: – : آبالا، هله ته له سمه ، احتیاجین چوخدور، اؤزونه فیکیر وئر، ایستی پالتار آل سویوقدان قورون ، من قاچمیرام کی…
کنده گئتمیشدیم. آنام بویومو اوخشادی . اللریمده ن اؤپدو : آنان اؤلسون ، اللرین قابار اولوب … بونون اوچون اوخویوردون؟!
آنامین آغ ساچلارینا باخا- باخا اوره ییمی یئدیم یئنه ده آناما پالتار آلماغی اونوتدوغوم یادیما دوشدو. آنام شالی نین اته یی ایله سئوینجده ن یاشارمیش گؤزلرینی سیلدی: – : آبالا قاچمیرام ها…او قده ر بولوز- پالتار آلارسان کی…قوی هله الین چؤره یه چاتسین…!
الیم چؤره یه چاتدی ، ائولندیم . اوغوللو- قیزلی اولدوم . بو دفعه کنده گئده نده آناما دؤرد نوه آپاردیم . آنام نوه لرینی بیر – بیر قوجاقلادی . صاندیغی آچیب اونلارا قوز، آلما ،نار پایلادی . سئوینجی ائویمیزه سیغمادی- قونشولاری داچاغیریب قوربان دئدییی توغلوسونو کسدیردی. منه ده ایپ کؤینک توخوموشدو. کؤینه یی گئینده دئدی: – : بونو الینده ن چیخارماها! سویوخدان قورخانسان ! گلینین کینی ده توخویاجاغام، نوه لریمه ده توخویاجاغام . آنام لاپ بالاجا نوه سینی قوجاغینا آلیب آتیب- توتدو:
-: قوی بیر بالام کیشی اولسون … قوی بیر بالام کیشی اولسون! نه نه سینه بیر بولوز آلسین کی….
نه نه سینین قوجاغیندا گوله- گوله اللرینی اوینادان اوغلوما باخیرام . منه ائله گلیر کی ، او منم….
بیرده آنامین نئچه ایل قاباق دئدییی سؤزلر یادیما دوشور: »قوی بیر اوغلوم کیشی اولسون…«
قایناق: آذربایجان قادینی ،نومره ۱۱، ۱۹۷۶
نوشته شده توسط admin در یکشنبه, ۳۱ فروردین ۱۳۹۳ ساعت ۴:۱۶ ق.ظ
