ایشسیزلیک

ایشسیزلیک

شهرام گلکار
آنادیلیمیز: بو آرتیق بیر ایش باشی باغلاماق اوچون اوندان بوندان اوتانا – اوتانا آلدیغیمیز یول کیره‌سی‌یله نئچه یاخین اوزاق شهرلره گئدیب یازیل گیریش سیناغیندان کئچدیییمیز نئچه‌نجی یوخلاما ایدی سایی‌سینی اونوتموشدوق. بو سیناغین بیزیم اوچون اؤلوم – قالیم ساواشی اولدوغونا باخمایاراق ایچیمه اییلی سویوق بیر آخینتی کؤکو بللی اولمایان آنلامسیزلیق وار ایدی. ائله‌بیل بوتون اوشاقلیغین، گنجلییین قاتی گوجونو گئجه‌نی گوندوزه، گوندوزو گئجه‌یه قاتیب چالیشا – چالیشا اوخویوب یازماقدان تا اوباشداناجان اویقویا قالان من دئییلدیم.
ائله‌بیل دؤیوش قاچیقینی توتوقلوسونون ایچه‌ریده یئدییی کؤتک قده‌ر، اوخولدا دؤیولوب سؤیولن من دئییلدیم. بونلار نه‌دی کی، چوخ سونرالار اؤیرندیم کی منیم ان سئودیییم یئمکلر سن دئمه هئچ یئمک سیاهی‌سیندا یئر آلماییب، آلسا بئله رئستورانلاردا مئنیولانان آت‌اوستو دئسئر یا دا قارنیتور بابیندا آتیشدیرماق اوچون یئیینتی‌کناری یئمک یا ساییلار یا ساییلمازمیش؛ اؤرنه‌یین سوتلو آش. بونلاری کئچسک بئله ذؤوقوم بولوندورولدوغوم صینیف‌لرده ان دورومسوزوندان آشاغیلاناجاق کؤکده ایدی چؤزگه‌سیز. شهر بیرآز بؤیوک ایسه دوشه‌بیله‌جه‌ییم گؤرمه‌میش آنی یازیق حاللاریمی یاخین یولداشلاریمین یانیندا اومورسامازمیشیم کیمی سایماز یانا کیچیک گولوش ایله کئچیشدیریردیم. اوخول زامانلاریمین سیناق گئجه‌لری‌نین تک بیر گونونون وئردییی جان‌سیخیجیلیغی دوشوننده چیلدیریردیم. هله سیناق کیتابی‌نین اوزونو او گونه قده‌ر آچمامیشدیم‌سا یاشادیغیم هر آن جهننمین اوووجونا بیر چؤمچه سیچیردی.
نه‌یسه کی گله‌جه‌ییمیزی قوروما آلتینا آلا‌بیله‌جک وئره‌جه‌ییمیز ایش گارانتیلی بو ایش سیناغی او اوره‌ییمیزی یئریندن چیخارداجاق اوخول سیناقلاری‌نین هئچ‌بیرینه بنزه‌میردی. بلکه تکجه منه ائله گلیردی. یا دا بئینیمین آلت قاتلاریندا نه‌بیلیم بیلینج‌آلتی آلقیلاریم ایداره دئییلن اوچ-بئش آداملا اؤرتولو یئرده چالیشماغا بیر تورلو راضی گله بیلمیردی. یوخسا بوللوق عؤمره بدل بیر سیناغی نه‌دن عادی بیر اوخول سیناغی‌ قده‌ر اؤنمسه‌مه‌سین کی!؟بیز هامیمیز بیر شهردن هامیسی‌نین اوره‌یی گیزیلده‌ین اون اون‌بئش کیشی تبریزده ایدیک. هئچ‌بیریمیزین سوی‌آدینی، بؤلگه‌سینی داشییان قوهوملاردان مملکتین کریتیک یئرلریندن اولان باخان، باخانلیق، قزئت، ژورنال، تئلئویزیون، رادیو، سفیرلیک داها نمه‌نه‌لرین نه‌لرین هارالاریندا ایشله‌‌یه‌نی یوخ ایدی. یانیمیزدان اوزاغیمیزدان کئچنلر ده اؤیله؛ آدیم کیمی بیلیردیم. نه باشینی آغریدیم چوخلو یوکسک سوییه‌لی ایش صینیفی‌نین باش‌کنددن باشقا شهرلرده اؤرنه‌یی آنالوگو بئله یوخدور. اینسانلارین چوخونلوغو قونشو اؤلکه‌ده تئلئویزیوندا پارا قازانیب عایله‌لرینی بسله‌ییب، باشقالارینا دا یاردیما قوشورلار. مینلر اینسان تک بیر تئلئویزیون دیزی‌سیندن چؤره‌ک یئییر. اوسته گل خبرلر، شولار، موسیقی وئرلیشلرینی فالان داها نه‌لر‌ نه‌لر… سیز اولوب کی هئچ دوستونوزدان تانیشینیزدان دویاسینیز کی: منیم داییم فیلان تئلئویزیون کانالیندا ایشله‌ییر؟ یا فیلان اوزاق قوهوموم فیلان قزئتده کوشه‌سی وار!؟
بو ایکینجی‌سینی اینانمیرام بو حئکایه‌نی اوخویان کیمسه بیزیم یئرلی‌لردن ائشیتسین. نئچه گون اؤنجه ایتالیان یازاری ایتالو کالوینو’دان هانسی‌سا فیزیکسل سورونو اولان اینسانلاردان سس آلماغا چالیشان بیر گروپ حاقدا دوشوندوروجو بیر داستان اوخویوردوم؛ چوخ ایلگینج بیر جومله‌یه راسلادیم: «هانسی دوزئی‌ده بیر جانلینی بیر جانلی‌نین تورو آدلاندیرماق اولار». اؤته‌سینی، داهاسینی دوشوننده، بیز نه‌قده‌ر نه‌یین نه‌یی‌ییک!؟.

نوشته شده توسط admin در شنبه, ۰۱ اردیبهشت ۱۴۰۳ ساعت ۸:۵۸ ق.ظ

دیدگاه


شش − 4 =