گؤله گؤله آغلایان آلما…
حاضیرلایان:اکبرسعادت
آنادیلیمیز:بیری وارمیش بیری یوخوموش. اول زاماندا بیر پادشاه و اوچ اوغلو وارمیش. بونلار اولکه لرینده خوشبخت بیر حایات سوره رمیشلر.کیچک اوغلان بیر گون قصرینده اوتورورکن، کوچه‌د‌ه‌کی چشمه ده‌ن سو آلماق اوچون بیر قوجا قاری نین گلدیغینی گؤرموش. اوغلان قوجاقاری نین کوزه‌سی‌نه کیچیک بیر داش آتمیش و کوزه‌نی قیرمیش (سیندیرمیش) قوجاقاری بیر شئی دئمه دن ائوینه دؤنموش. بیر کوزه داها آلیب یئنه چئشمیه گلمیش. اوغلان بو سفر ده بیر داش آتیپ کوزهی قیرمیش. قوجاقاری سسسیزجه ائوینه گئری دؤنموش.صاباحی‌سی گون کوزه ائلینده گئنه چئشمئیه گلمیش. اوغلان، قوجاقاری نین گئلدیغینی یوخاریدان گؤروپ هئمن الینه بیر داش داها آلمیش. یاخشی بیر آندا آتیپ گئنه کوزه‌نی قیرمیش.قوجاقاری باشینی قالخیزمیش:…
-هئی اوغول، بیر شئی دئمیرم .. ایستره‌م مئولادان، آغلایان آلما ایله گولن آلمایا عاشیق اولاسان دئمیش، چئکیپ گیتمیش.اوغلان دا آرادان بیرنئچه گون گئچینجه قوجا قاری نین سؤیله دیغینی اوزونه درد ائتمه یه باشلامیش. دوغرودان آغلایان آلما ایله گولن آلمایا عاشیق اولموش. گونده ن گونه سارالیپ سولمایا باشلامیش.چوخ گئچمه‌دن پادیشاه، اوغلونون خسته لندیغینی ائشیتمیش. حکیملر هئچ جور دردینی آنلایامامیشلار. گونلرده ن بیر گون شهره بیر حکیم گلمیش. باخماسی اوچون سارایا چاغیرمیشلار. حکیم:-بونون خسته لیغی سئودادان باشقا بیر شئی دئیل دئمیش.اوغلان دا سونوندا آغلایان آلما ایله گوله ن آلمایا عاشیق اولدوغونو باباسینا سویله میش.باباسی چوخ اوزولموش:-ایندی نه ائیلیم، اوغلوم؟ بیز اونو هاردان تاپاریق، دئمیشاوغلان:- من گیدئب اونو تاپارام… فقط سیز فورصت وئرین دئیه، جواب وئرمیش.پادشاه:-اوغلوم، بو حال ایله هارایا گئده جکسن؟ اونون کیم اولدوغونو، هاردا اولدوغونو بیلمزسن. واز گئچ بو سئودادان.- حتماً گئدیب تاپاجاغام، دئمیش.قارداشلاریدا بابالارینا:-بیز ده اونونلا بیرلیگده گدیریک. قارداشیمیزی یالنیز (تک باشینا) بوراخماریق، بو آلمالاری حتماً تاپاریق دئمیشلر.بونلار یولا حاضیرلانمیشلار. اوچو بیرلیگده یولا دوشوب بیلمه دیکلری اولکه لره، شهرلره طرف گئتمه یه باشلامیشلار.آز گئتمیش چوخ گئتمیشلئر؛ دره تپه دوز گئتمیشلر… آخیردا بیر چئشمه باشینا گلمیشلر.چئشمه نین داشی نین اوستونده بیر یازی گؤرموشلر.داشدا بو سوزلر یازیلمیش:” قاباقداکی اوچ یولون بیرینه گئده ن گلیر،بیرینه گئده ن یا گلیر یا گلمز، او بیریسینه گئده ن هیچ گلمز “بویوک اوغلان:-گئده ن گلیر یولا من گئدیم دئمیش.اورتانجیل اوغلان دا:-گئده ن یا گلیر یا گلمز یولادا من گئدیم دئمیش.گئده ن گلمز یولا گئتمه ده کیچیک اوغلانا قالمیش.
بویوک اوغلان:-گئتدییمیز یئرده ن هانچیمیز اؤنجه گلسه، اوبیریسی لرین گلیب گلمه دیغینی هاردان بیلسین؟ دئمیش
کیچیک اوغلان قاباغا آتیلمیش:-بارماقلاریمیزداکی اوزوکلری چیخاریب بو داشین آلتینا قویاق. کیم اؤنجه گلیرسه داشی قالخیزسین اوزوگونو آلسین.
سونرا گلن ده کیمین دونوب دونمه دیغینی بیلسین.بئله ائله دیلر. هر بیری ایستئدیگی یولا گیتمیش.بویوک اوغلان ” گئده ن گلیر ” یولونا چیخمیش.آز گئتمیش، چو گئتمیش؛ بیر اولکه یه یئتیشمیش. اوردا، (گیره ن چیخاندان بیر شئی لر اویره نرم) اومودویلا بیر حاماما گیرمیش. حامامدا دللاک اولاراق چالیشماغا باشلامیش.اورتانجیل اوغلان ” گئده ن یا گلیر یا گلمز ” یولونا گئتمیش. آز گئتمیش چوخ گئتمیش… گونلرده ن بیر گون بیر اولکه یه یئتیشمیش. اوردا بیر قهوه خانادا چالیشمایا باشلامیش. سونوندا قهوه چی اولوب اوردا قالمیش.کیچیک اوغلان دا ” گیدن گلمز ” یولونا دوشموش. او دا آز گئتمیش، چوخ گئتمیش. چوخ اوزون یوللاردا یوروموش. اوتورب دوروب، گئده گئده بیر گون بیر چئشمه باشینا گلمیش. باخمیش کی بیر قوجاقاری بو چئشمه ده ن سو دولدورویور. اوغلان اونون یانینا گیتمیش…-قاری ننه، منی بو آخشام ائوینده قوناق ائلرسن دئمیش.قوجاقاری دا:-آی اوغول، منیم بیر ائویم وار… یاتتیغیم زامان آیاقلاریم ائشیگه چیخار. من اوزوم یئرلشمیرم، سنی هاردا قوناق ائدیم دییه جواب وئرمیش.کیچیک اوغلان یاشلی قادینا بیر آووچ قیزیل وئرمیش:-آمان قوجا ننه، نه اولور منه یاتماق اوچون بیر یئر تاپ دئیینجه قوجاقاری قیزیل‌لارا خاطیر:-گل اوغول گل… ائویم ده وار اوتاغیم دا.. سنده ن سونرا کیمی قوناق ائله ییم؟ دئییپ، اوغلانی ائوینه گؤتورموش.ائوده بیر آز یئمیش- ایچمیشلر.اوغلان سوروشموش:- آمان قوجا ننه، بیر آغلایان آلما ایله گولن آلما وارمیش… اونلارین یئرینی بیلیرسن؟قوجاقاری بونو ائشیدیب، ائشیتمز اوغلانا بیر سیللی وورموش.-دینمه! اونلارین آدینی دئمک قدغن دیر…اوغلان چیخاردیب بیر آووچ آلتین داها وئرمیش. قوجاقاری سئوینه سئوینه:-اوغلوم، صاباح دورارسان، او قاباقداکی داغا گئدرسن. اورا بیر چوبان گلیر. او چوبان،آغلایان آلما ایله گولن آلمانین اولدوغو سارایین چوبانیدیر. اونون اوره گینی اله آلیب سارایا گیره بیلیرسن آلمالاری اوردا تاپابیلرسن. آما آلمالاری آلدیقدان سونرا بیرباش منیم یانیما گلرسن دئمیش.اوغلان دا سحر قالخمیش. قاری نین گورستدیگی داغا گیتمیش. باخمیش کی اوردا بیر چوبان قویون اوتاریر. گیدیب چوبانا سلام وئرمیش… اوتوروب دانیشمایا باشلامیشلار. سونرا اوغلان آغلایان آلما ایله گولن آلمانین ماجراسین چوبانا دئمیش.چوبان دا قوجاقاری نین ووردوغوکیمین اوغلانا بیر سیلی وورموش. سیللینی یین اوغلانین عقلی باشیندان گیتمیش.-آمان چوبان قارداش منی نیه ووردون؟ دئیینجه چوبان تازادان اوستونه یوگورموش.-دینمه، گینه دانیشیرسان؟ دییه بیر سیللی داها وورموش.-اونون دئمه سی بوردا قدغن دیر، دئمیش.اوغلان چوبانا یالوارمیش- یاخارمیش، بیر اووچ آلتین وئرمیش… چوبان آلتین لاری گؤرونجه یوموشانمیش..اوغلانا دئمیش کی:- من ایندی بیر قویون کسیرم. اونون دریسینی بوتون چیخاردیرام.
او درینین ایچینه گیررسن. آخشام اوستی من قویونلاری سوروپ سارایا گیدنده سن ده قویونلارین ایچینده سارایا گیررسن. چونکو سارایا گیرنده قویونلاری سایارلار. سن ده قویون کیمی یورویوپ اوزونو بیلیندیرمزدن سورویله بیرلیکده ایچری گیررسن. گئجه، هرکس یاتاندان سونرا، لاپ یوخاری مرتبه یه چیخیب سس سیزجه ساغ طرفده کی اوتاغا گیررسن.
پادشاهین قیزی تختینده یاتار، آلمالاری دا طاغچادا اولار. اونلاری، اویاندیرمادان گوتوره بیلیرسن آلیرسین… اگر قیز اویانیرسا های سالار… سنی توتسالار ایشین چتین اولار!چوبان بونلاری دئدیکدن سونرا قالخمیش بیر قویون کسمیش. قویونون چیخاردیغی دریسینه اوغلانی سوخموش. قویونلارین ایچینه قاتاراق بیرباش سارایا گئتمیش. نگهبانلار قویونلاری سارایدان ایچه‌ری گیرنده سایمیشلار. اوغلان دا سورویله بیرلیکده ایچری گیرمیش.گئجه اولموش، هامی یوخلامیش. ساعات دورد- بئش اولاندا اوغلان دریدن چیخمیش.. یاواش یاواش لاپ یوخاری مرتبه یه گئدیپ چوبانین دئدیگی اوتاغی تاپمیش.قاپی نی آچیپ باخمیش کی اوتاقدا بیر تخت، ایچینده آیین اون دؤردو گیبی گوزه ل بیر قیز یاتیر… اوغلان اونا باخارکن، تاخجادا اولان آلمالارین بیری قاهقاها ایله گولمه یه اوبیریسی ده هونگور هونگور آغلاماغا باشلامیشلار. بونلاری ائشیدن اوغلان فوری قاپییی باغلایب قاچیب، قویونلارین یانینا گئتمیش.آلمالارین گورولتوسونه قیز یوخودان اویانمیش. باخمیش کی کیمسه یوق. اوتاقدان ائشیگه چیخمیش، اویانا باخمیش، بویانا باخمیش… بیر کسی گورمه ینجه ایچئری گیرمیش:- یالانچی آلمالار… منی آلداتتینیز. دئییب آلمالارا آجیخلانمیش. تازاشدان یئرینده یاتمیش.آرادان بیر آز گئچدیکدن سونرا قیز گئنه یؤخلادی. اوغلان دا بیر دفعه ده یوخاری چیخمیش.یاواش یاواشاوتاقین قاپیسینی آچمیش، ایچری گیرمیش. آلمالارا طرف بیر ایکی آدیم آتمیش. بو آرادا تازاشدان آلمالارین بیری گولمه یه، بیری آغلامایا باشلامیش. اوغلان قورخوسوندان گئنه قاچمیش. قیز اویانمیش، باخمیش کی کیمسه یوخ…- ادبسیزلر. ایکی دفعه دئیر منی یوخودان اویاندیریرسیز. یئنه بیر بئله ایش گورسز سیزی دووه‌رم، دئمیش و تازاشدان یاتمیش.قیز یاتینجا اوغلان یئنه گلمیش، قاپییی آچیپ آلمالارین یانینا یاخینلاشمیش.الینی اوزادیب تاخجادان آلمالاری گوتورنده آلمالار گینه گولوب آغلامایا باشلامیش و اوغلان یئنه قورخوب قاچمیش. قیز اویانیب باخمیش کی بیر کس یوخ:- آرسیز آلمالار بو گئجه ده لی اولموسوز؟ اوچ دفعه دیر منی یوخودان اویاندیریرسیز. بو نه جور ایشدیر؟ دئییب، بیر سیللی بیرینه، بیر سیللی ده اوبیریسینه وورموش. سونرا تازاشدان یئرینه گیریب یاتمیش.آرادان بیر آز زامان گئچمیش. اوغلان گینه اوتاغا گیرمیش و تاخجایا یاخینلاشمیش. آلمانین بیرینی الینه آلمیش… باخمیش کی سس یوخ… اوبیرینی ده آلیب ائشیگه چیخمیش. بیر باش قویونلارین آراسینا گیدیب درینین ایچینه گیرمیش. دئمه آلمالار قیزدان، اونلاری ووردوغو اوچون کوسوب، بو اوزدن سس چیخارمامیشلار.سحر اولموش… چوبان قویونلاری سارایدان چیخارمیش و داغا طرف گئتمیش.اوغلان، سارایدان اوزاقلاشینجا بیر کسین اولمادیغی بیر یئرده دریدن چیخمیش. چوبانا بیر اووچ آلتین داها وئرمیش.-آللاها تاپیشیردیم، دئییب قوجاقاری نین ائوینه گلمیش. قوجاقاری اوغلانی گورونجه فوری بیر لگنین ایچینه بیراز سو قویموش. بیر تویوق کسیب قانینی سویا آخیتمیش. سویون ایچینه بیر تخته قویوپ اوغلانی تخته نین اوستونه اوتورتموش.قیز سحر اولوب یوخودان اویانینجا، آشاغی باخمیش، یوخاری باخمیش کی تاخجادا آلمالار یوخ.- ایوای! بو گئجه آلمالاریم چالیندی.
اونلار منی اوچ دفعه اویاندیردیلار آما من بیلمه‌دیم؛ حتماً اوغرو گلمیش دییه آغلامایا باشلامیش.پادشاه بونو ائشیدینجه سارایین قاپیلارینی باغلاتدیرمیش. حتی شهرین اطرافینداکی قلعه نین قاپیلارینی دا باغلادیب گیره نی- چیخانی آخداردیتمیش.
شهرین ایچینی ده آختارمیشلار، تاپانمامیشلار. فالچی لار فالا باخمیشلار. سونوندا گورموشلر کی آلمالاری آلان بیر قان دریاسیندا گئمیه مینیب گئدیر- پادیشاهیم، بو آدام چوخ اوزاقلارا گئتمیش. بو قانلی دریا هاردادیر بیلمیریک …سونوندا بو آلمالاری آختارماقدان واز گئچدیلر. قالانین قاپیلاری اولدوغو کیمی آچیلمیش. اوغلان قوجا قاریه بیرآز دا آلتین وئرندن سونرا اوندان آیریلیب اوردان گئتمیش.گلدیغی یولدان دونمئیه باشلامیش. گئده گئده بیر گون، قارداشلاریندان آیریلدیغی چئشمه باشینا گلمیش. اوزوکلرینی قویدوخلاری داشی قالخیزیب باخمیش کی هیچ بیری گلمه میش. اوز اوزوگونو آلمیش و اورتانجیل قارداشی نین گئتدیغی یولا گیتمیش.آز گئتمیش چوخ گئتمیش، دره- تپه دوز گئتمیش… بیر گون بیلمه دیی بیر اولکه یه یئتیشمیش. یولونون اوستونده کی بیر قهوه خانایا گیرمیش. یورغونلوق چیخارماق اوچون بیر چای ایچمیش. باخمیش کی قارداشی اوردا قهوه چیلیک ائدیر.یاخینلاشمیش یانینا، آما قهوه چی اولان قارداشی اونو تانیمادی. بیر آرا اوغلان قارداشینی یانینا چاغیرمیش. سؤز آراسیندا:- سن هارالیسان؟ قهوه چی بیلدی کی اوننان دانیشان قارداشیدیر.سونرا بیرلیکده قالخمیشلار ائوه قایتماق اوچون یولا چئخمیشلار.دانیشا-دانیشا گئنه او چئشمه یه گلمیشلر. داشی قالخیزیب باخمیشلار کی، قارداشلاری گلمه میش. اورتانجیل اوغلان دا اوزوگونو آلمیش. قارداشلارینی آختارماق هدفیله اونون گیتدیغی یولا گئتمیشلر. سونوندا قارداشلارینی تاپیب اوز اؤلکه لرینه قایتماغا باشلامیشلار. یولدا بویوک قارداش ایله اورتانجیل قارداش هوسلنیب کئچیک قارداشلارینا:- قارداش، بونلار (آلمالار) بیرآز بیزده قالسین، سونرا گئنه سنه وئرریک، دئمیشلر.او دا:-اولسون، دئییپ وئرمیش.سونرا بو ایکی قارداش بیربیرلرینه:-بیز بونو اؤلدورک؛ بو آلمالارین بیری سنده بیری منده قالسین دئمیشلر.یول اوستونده بیر قهوه خانایا راست گئلمیشلئر. او قهوه خانانین باخچاسیندا بیرآز اوتوروب یئمک یییاق دئمیشلر. قهوه چی دن بیر حصیر ایسته میشلر، قهوه چی ده همن گتیرمیش.باغچادا آغزی آچیق بیر قویو واریمیش. حصیری او قویونون اوستونه سالمیشلار. کیچیک اوغلان قویونو گؤرمه میش… حصیرین اوستونه اوتوردوغوندا اوزونو قویونون دیبینده گورموش.قارداشلاری بیرآز اوتورموشلار. یئمک یییب قارینلارینی دویورموشلار. چای چوره ک یئیب ایچمیشلر. آز سونرا گئنه یولا دوشوب اولکه لرینه طرف گیتمیشلر.قویودا سو اولمادیغی اوچون، آشاغییا دوشن اوغلان اؤلمه میش، آما هوشدان گئدیب و اوردا قالمیش. قارداشلاری گئدیب اولکه لئرینه یئتیشمیشلر.بابالاری کیچیک قارداشلری نین هاردا اولدوغونو سوروشموش. اونلاردا:- بیز گئتدیک، آغلایان آلما ایله گولن آلمانی تاپیب گتیردیک. او، بیر گئدن گلمز یولا گئتمیشدی، بیر داها گلمدی، دئدیلر. بابالاری دا ناراحت اولوب آغلادی:- حتماً اودا گلیر دییب اوزونه توخداقلیق وئرمیش.اونلار بابالاری نین یانیندا اوتورمادا اولسون، بیرآز سونرا، قویویا دوشن اوغلانین عقلی باشینا گلمیش.
قویونون ایچیندن یوخارییا باغیرمایا باشلامیش.او زامان قهوه چی باخچادا گزیردی. گوردو کی قویودان بیر سس گلیر. سونرا قویویا بیر آدام سالیب و اوغلانی چیخارتمیشلار.- سن بورا نئچه دوشدون، دییب سوروشاندا اوغلان دا باشینا گلنلری بیر بیر اونلار دئمیشدی. سونرا قالخیب اوز اولکه سینه گیتمیش. آما باباسی نین سارایینا گیتمه میش. باشینا بیر ایشکمبه گئچیتمیش و کل اوغلان قیلیغینا گیریب بیر قالایجی توکانیندا چالیشمایا باشلامیش.گل زامان گیت زامان، هرکس اوز حایاتینی یاشاماغا دوام ائتمیش… آما آغلایان آلما ایله گولن آلمانین صاحیبی اولان قیز چوخ بویوک ناراحتچیلیق ایچیندئیمیش. قیزین پادشاه باباسی مین دانالی بیر تئسبیح دوزولتدیریب و آداملارینا وئرمیش:- بو تئسبیحی آلین، اولکه اولک گزین. کیم باشینا گلنی دیه-دیه بو تئسبیحی قورتارانا قدر چکه بیلسه آلمالاری او آلمیشدیر… اونو توتوب منه گتیرین، دئمیش.آداملار تئسبیحی آلمیشلار. موختلیف اولکه لره گئتمیشلر. گزمیشلر، دولانمیشلار آما هئچ کیم او تئسبیحی چکنمه میش. لاپ آخیردا بو آلمالاری چالان اوغلانین اولکه سینه گلمیشلر.قالایجی نین توکانینین قاباغیندان گئچنده، اوغلان اوستاسینا:- اوستا، من باشیما گلنلری بونلارا دئیب تئسبیحی چکه جگم.اوستاسی آداملارا خبر وئرمیش. اونلار دا تئسبیحی گتیرمیشلر:-باشلا گورک، هم آنلات همده چک دئمیشلر.اوغلان او زامان:- من بونو چکره م آما بورانین پادیشاهی نین یانیندا چکره م دئمیش.اورادان اوغلانی گوتوروب پادیشاهین یانینا گتیردیلر. اولان بیتنی پادیشاها دئدیلراوغلان اوتورموش، باشینا گلنلری بیر بیر دئمیش. بو آرادا تسبیحی چکمه یه ده باشلامیش. قارداشلاری نین اونو قویویا آتدیقلارینی سویلئدیغی زامان تئسبیح قورتولموش.پادشاه دا بو اوغلانین اوز کیچیک اوغلو اولدوغونو آنلاییب، همن قالخمیش اونون بوینوندان آسلانمیش- آی اوغلوم، سنین باشینا بو قدر ایشلر گلیب منیم خبریم اولمامیش دئیب آغلاماغا باشلامیش.آداملار اوغلانی گوتوروب او بیریسی پادشاها آپارماق ایسته میشلر. آما اول آلمالاری آلان ایکی بویوک اوغلانین جللاد ائلینده جزالاری وئریلمیش. سونرا دا کیچیک اوغلانی آلمالارلا باهم او بیریسی پادیشاهین اولکه سینه گؤندرمیشلر.آز گیتمیشلر، چوخ گیتمیشلر… گده-گده بیر گون گئنه، آلمالارین چالیندیغی اولکه یه یئتیشیب، بو اوغلانی پادیشاهین یانینا گؤتورموشلر. پادیشاه اوغلانی گؤرور گؤرمز اونا قانی قئینمیش. او تئسبیحی بیرده اوز یانیندا چکمه سینی ایسته میش.اوغلان یینه تئسبیحی آلیب باشینا گلنلری باشدان آخیرا قدر دئمیش و تئسبیحیده چکمیش.پادشاه:-اوغلوم، سن بو آلمالاری عاشیق اولدوغون اوچون اوغورلادین.آما منیم قیزیم دا بونلارا عاشیقدیر. گل، قیزیمی سنه وئریم، ایکیز ده بو آلمالاردان آیریلمایین دئمیش.اوغلان دا:-باش اوسته دئییب پادشاهین دئدیغینی قبول ائتمیش.کیچیک اوغلانلا قیز ائولنمیشلر. قیرخ گون- قیرخ گئجه توی توتموش ؛ اوز مورادینا چاتمیشلار
نوشته شده توسط admin در چهارشنبه, ۱۴ آبان ۱۳۹۳ ساعت ۵:۴۴ ق.ظ
