قورداوغلونون داستانی
تاریخلره باخیلسا اصفهانین هم معماری، هم تاجری دونیادا معروف اولوبلار، اونا گؤره قدیم زامانلاردا اصفهاندا ایکی قارداش وار ایمیش بیری حسن تاجر باشی و او بیری حسین تاجر باشی. حسن تاجر و حسین تاجرین هرهسینین بیر ائولادی اولور حسن تاجر باشینین بیر اوغلو (شهری) آدیندا و او بیرینین بیر قیزی (مهری) آدیندا بو اوغلان ایله قیز، بئشیک کسمه اولموشدولار. آنجاق آتالارینین چوخلو ثروتی مالی حددن آشیب و اصفهاندا بؤیوک سرمایهدار بیر آدامین ائولادی ساییلیردیلار دونیادا جمیع یارانمیشلار اؤلهجکلر بونلارین آتا- آنالاری دا دونیادان کؤچوب و بئله بیر وصیت ائلهییرلر کی بالالار اگر اصفهاندا سیزین بیر زامان ایشینیز مشکله دوشسه سیزین عمهنیزین اری تورکمان ائلاتینین بؤیوگو تورکمان بگدیر، گئدیب اوندان امداد آلین و اونا آرخالانین بونلارین آتا و آناسی دونیادان گئدندن سونرا ایکی عم اوغلو عم قیزی چوخ دلخوش یاشاییردیلار و اوشاق اولدوقلارینا گؤره بیر نفر )(یارادان قول) آدیندا بونلارین حساب – کتابلارینا یئتیشیب و ایشلرین یئر به یئر ائلردی شهری بیر گون باخدی گؤردو بونلارین پوللارین، ماللارین یارادان قول چوخ اویان – بویان ائلهییر بیر نئچه دفعه (شهری) دئدی باشا گلمهدی آخیردا شهری اونا بیر دست کؤتک ووروب و اؤزون ده ایشدن ائشیگه بوراخدی یارادان قول دا ایستهدی اونلاردان عوض آچا هر نه ائلهدی اولمادی، آخیردا بو نقشهنی چکدی کی (مهری)نین بیر عکسین و بیر ده اونون دیلیندن بیر نامه یازیب عربستاندا قورداوغلویا گؤندره، او زامان قورداوغلو عربستانین حکمرانی ایدی آدی و سانی دونیایا یاییلمیشدی. یارادان قول قیزین دیلیندن بیر نامه یازدی کی ای قورداوغلو من سنین تعریفینی ائشیدیب بو نامهنی سنه گؤندریرم و سندن ایستیرم کی اگر مرد اولسان اصفهانا گلیب منی اؤزونه همسر قرار وئرهسن، و اگر گلمهسن او آد سنه حرام اولسون. نامهنی گؤتوروب گئجه گوندوز یول گئتدی دوز گلیب عربستاندا قورداوغلونون دربارینا، اذن آلیب گئتدی قورداوغلونون یانینا نامهنی وئریب و عکسی گؤستردی، قورداوغلو بیر نامهیه باخدی بیر عکسه، اوجور کی اوستادلار ائشیدیب او زامان مهری دلبرین گؤزللیگی مشهور ایدی. قورداوغلو بیر کؤنولدن مین کؤنوله گؤرمز بیلمز مهرییه عاشق اولدو. آیاغا قالخیب اؤز یئرینده بیر نفر قویوب، ۵۰۰ نفر سرباز ایله و بیرده یارادان قول ایله یولا دوشدو. قورداوغلو صاحب قلم و چوخ دا مردانه بیر ایگید ایمیش او بئش یوز آتلیایله اصفهانا منزل به منزل حرکت ائیلهییب و اصفهان شهرینین کناریندا اوردو قوروب چادیردان صف چکیب و دوزولوب ۲۵۰ چادر سولدا و ۲۵۰ ساغدا آنجاق قورداوغلو یارادان قولو چاغیریب یانینا بیر نامه یازیب وئردی یارادان قولا کی آپارسین و مهری خانیما یئتیرسین کی گلسین گئدک عربستانا و اورادا تویوموزو ائلهیک. یارادان قول گؤردو ای داد – بیداد، من گئتسم ایش خراب اولار. دئدی ای قورداوغلو من گئدنمرم. دئدی :نیه ؟
دئدی اگر من گئدم هامی منی تانیر او قیز کی سنه نامه یازیب یوزلر ائلچیسی وار فوری قیزی گیزلهدیب منه گؤرستمزلر آما من نشانین دئییم سن سربازلاردان بیرین گؤندر قیزا دئسین گلسین. هر حالدا قورداوغلو نامهنی سربازلارین بیرینه وئریب یولا سالدی. او نامهده مهری خانیما بئله یازمیشدی :
اسه – اسه قبلهگاهدان گلرسن مهریمه بیر سالام وئر صاباح یئلی ائله گیر باغینا باغبان بیلمهسین یاواشجا تئلینه دگ صاباح یئلی صاباح یئلی نه اسرسن اوجادان قاییتما سن پنجرهدن باجادان دئنه یاتمامیشام دونن گئجهدن مهریمه بیر سالام وئر صاباح یئلی قورداوغلو یالوارار صاباح یئلینه اسه – اسه دگمه یارین تئلینه آللاه حؤرمتینه تاری یولونا مهریمه بیر سالام وئر صاباح یئلی .
بونلار ایکی عم اوغلو- عم قیزی اگلشیب صحبتدهایدیلر بیردن قاپی چالیندی مهری دلبر گئدیب قاپینی آچسین نه گؤردو؟ بیر سرباز تمام مسلح یاراقلی، یاساقلی بیر نفر ایدی. سلام وئردی سرباز سلامین آلیب دئدی: خانیم، مهری خانیمین قاپیسی بورادیر؟
مهری جاواب وئردی: بلی من اؤزوم مهرییم. نامهنی وئریب دئدی قورداوغلونون نامهسیدیر اوخو جاوابین وئر آپاریم .
بو حالدا شهری گلدی صحنهنی گؤروب رنگی آتدی دئدی عم قیزی نه نامهسیدیر. مهری خانیم شهرینی گتیردی ایچری و بیرلیکده نامهنی اوخودولار شهری دئدی عم قیزی پس سنین مندن خوشون گلمیر مندن گیزلین قورداوغلونا نامه یازیرسان. مهری آغلادی آند ایچدی کی منیم اصلاً خبریم یوخدور بیلمیرم بو قضا بیزیم باشیمیزا هاردان گلدی. آنجاق قورداوغلو آدلی سانلی بیر کیشیدیر گرک نامهسینین جاوابین وئرهک سونرا بیر چاره قیلاق.
نامهنین جاوابین یازیب قورداوغلویا دئدی: صاباح من اؤزوم گلرم. سرباز گئدندن سونرا ایکی عم اوغلو- عم قیزی بحث ائتدیلر چوخ سؤزدن سونرا مهری دئدی :عم اوغلو، قورداوغلو شعر، شاعرلیکدن باشی چیخماز بیر قاتار ائله سؤز سوروشارام کی جاوابین بیلمز، نه جور گلیب اوجور گئدر. اونلار بیر قاتار ائله سؤز یازدیلار کی هئچ کس تاپا بیلمهسین. آنجاق صاباح نامهنی سرباز گتیریب وئردی قورداوغلونا ایندی قورداوغلو منتظردی مهری خانیما. ائله کی صبح آچیلدی قورداوغلو اؤز لشکرینه دستور وئریب صف دوردولار، هامیسی آماده باش ال – ال اوسته. قورداوغلو چادرین قاباغیندا اگلشیب گؤزو یولدا، بو طرفدن مهری نئچه قیزی چاغیریب اؤزو ایله آپاردی، گلدیلر قورداوغلونون یانینا، آنجاق چادرلارا بیر آز قالاندا قورداوغلویا خبر وئردیلر مهری گلیر نئچه قدم قالاندا قورداوغلو مهرییه سلام وئردی، مهری سلامین جاوابین وئردی دئدی :آغا قورداوغلو خوش گلیبسن صفا گتیریبسن، قورداوغلو خانیمی گؤرنده بیره یوز محبّتی آرتدی و دئدی: اجازه وئر قاضی گلسین و صیغهمیزی اوخوسون تویوموزو باشلایاق. مهری دئدی :منیم ده اؤزومه گؤره شرایطیم وار، شرطیم ده بودور کی من عهد ائلهمیشم هر کس منی آلسا گرک بیر قاتار سؤز سوروشام جاواب وئره. قورداوغلو دئدی: مهری دلبر، سن مندن ایسته تاج – تختیمی سنه بخش ائیلرم شعر نهدیر. مهری گؤردو کی قورداوغلو شعره جاواب وئرمک ایستهمیر ایشی محکم ائتدی سؤزه جاواب وئرمک منیم شرطیمدیر گرک جاواب وئرهسن اگر جاواب وئرمهسن نه جور گلیبسن اوجور ده گئت. قورداوغلو ناعلاج قالیب سسلندی سؤزون نهدیر. بیر طرفدن قورداوغلونون لشگری، بیر طرفدن مهری نئچه قیز- گلینلر ایله و آیری طرفدن جماعت ائشیدیب تماشایا گلیبلر جمعیّت هامیسی منتظردیلر گؤرسونلر بونلارین هانسی باغلایاجاق. مهری خانیم اوّل سؤزو بئله سوروشدو :
او نه گولدور قیش فصلینده آچیلار وعدهسی یئتنده تار- مار اولور
او کیمایدی مرامیندا دایاندی اؤزو اؤز ایشینده گرفتار اولور ائله کی سؤزو سوروشدو قورداوغلو دئدی: مهری خانیم، بونلار ایله وقتینی تلف ائلهمه، من سندن هئچ بیر شئی ایستهمیرم هر نه واریندیر بوردا قالسین فقط سن اؤزون گل منله عربستانا گئدهک. مهری گؤردو کی قورداوغلو دونیا مالینا پایبند دگیل سؤزدن سونرا هئچ بیر شئی اونو قایتارانماز .
دئدی: آغا قورداوغلو یا گرک سؤزلریمین جاوابین وئرهسن یا قاییدیب گئدهسن. اودور کی قورداوغلو گؤردو جاوابدان سونرا آیری یولو یوخدور دئدی :
قار گولودور قیش فصلینده آچیلیر وعدهسی یئتنده تار- مار اولور او شیطاندی مرامیندا دایاندی اؤزو اؤز سؤزونده گرفتار اولور
مهری خانیم اوّل کلمهنین جاوابین آلدی قورداوغلو دئدی: مهری خانیم بو سؤزلر ایله وقتی تلف ائلهمه گل گئدهک. شهری باخدی مهری دلبرین اوزونه دئدی عم قیزی نئیلهیک؟ قیز دئدی قورخما ایندی ائله سؤز سوروشارام کی داها جاواب وئرنمز. مهری دئدی آغا قورداوغلو ایندی او بیریسینه جاواب وئر .
نه چشمهدی هر چشمهدن سولودور نه بادهدی یاری دگیل دولودور او نهدیر کی اون بئشینده اولودور اوتوزوندا طفیل اولور تار اولور قورداوغلو دئدی :
گؤز بولاغی هر چشمهدن سولودور عشق بادهسی یاری دگیل دولودور او دا آیدی اون بئشینده اولودور اوتوزوندا طفیل اولور تار اولور
احسن، مرحبا سسی گؤیلره قالخیب شهرینین اومودو کسیلدی هئچ بیر سؤز دانیشماغا دیلی توتمادی فقط اومودو قالدی آللاها. قورداوغلو دئدی :مهری خانیم دوزدور؟ دئدی: البتده کی دوزدور آما جواب وئر سؤزون اوچونجو بندینه :
نه اووچودور داغی – داشی یئریییر نه پولاددیر اود دگمهمیش اریییر نه آینادیر باخسان جمال گؤرونور نه اطلسدی هردن لاله زار اولور قورداوغلو دئدی :
کؤنول اووچو داغی – داشی یئریییر او انساندی اود دگمهمیش اریییر سو آینادیر باخسان جمال گؤرونور گون اطلسدیر هردن لاله زار اولور آلدی مهری خانیم آخر سؤزونو :
مهری دئیهر نئچه باغدی قورولور نه شهریدیر هم ییخیلیر، هؤرولور او نهدیر کی یئردن گؤیه ساریلیر او نهدی کی گونده مین تهر اولور آلدی قورداوغلو :
قورداوغلو دئر قوینون باغدی قورولور کؤنول شهری هم ییخیلیر هؤرولور او سببدیر یئردن گؤیه ساریلیر خیالیندا گونده مین تهر اولور. ائله کی سؤز قورتولدو مهری گؤردو داها سؤزو قالمادی باخدی گؤردو عم اوغلوسونون آز قالیر باغری چاتداسین گؤزلری دولوب اوزون توتدو گؤی طرفینه دئدی: ای عالملری یوخدان وجودا گتیرن پروردگار اؤزون عم اوغلوما رحم ائله، بو فیکیرده داها ماجال وئرمهدی قورداوغلو سؤزون دئیه، سسلندی آغا قورداوغلو بیر بوجور مجلسیمیز ده قالدی صاباحا. آما قورداوغلو دئدی :مهری یار قراریمیز بوجور دگیل ایدی. داها مهری ماجال وئرمهدی دستور وئردی قیزلار حرکت ائتسینلر گلدی منزله لباسلارین عوض ائیلهدی فیکیر ائدیردی کی صاباح نئیلهسین، بو زاماندا قولاغینا آغلاماق سسی گلدی، باخدی گؤردو کی عم اوغلوسو شهری های – های آغلاییر. مهری قولون سالدی شهرینین بوینونا دئدی عم اوغلو نه اولوبدور؟ شهری آغلار گؤز ایله دئدی عم قیزی قولاق آس بو سؤزلره: حق تعالا بئله یازمیش قلمی گئدرمیسن مهری یاریم؟ گئتمه سن ؟
قورداوغلونون سنه واردیر سلامی گئدرمیسن مهری یاریم؟ گئتمه سن ؟
مهری دئدی :
اوخوموشام قورآن کتاب کلامین قورخما عم اوغلو ایلقاریمیز بئلهدی من آلمارام قورداوغلونون سلامین قورخما عم اوغلو ایلقاریمیز بئلهدی
نوشته شده توسط admin در پنجشنبه, ۰۷ شهریور ۱۳۹۲ ساعت ۹:۰۹ ق.ظ