” هود ” نبی نین داستانی

علیرضا ذیحق.
چئشید لی تانری لاری عیبادت ائده ن ” عاد ” خَلْقی نین قصرلری ، ائله جیلوه لی و ایشیل – ایشیل پارلایان داش لاری نان گؤی اوزه رینه بوی آتمیشدی کی اونلاری گؤرمه ین بیری ، گؤردوک ده گؤزلرینه اینانماییب هرزاد نظرینه اینانیلماز بیر رویا گلیردی . ”
عاد ” خلقی چوخ ساغلام ، بوی بوخونلو و بیلیک لی بیر ائل ائلاراق ، اَکینه جک ، معمارلیق و داش یونما ایش لری ایله مشغول اولارکن عصرین اَن زنگین آداملاری حسابلانیردیلار .
اونلار بت لارا سجده قیلاراق یاغیش ، تورپاق و سَفَر تانری لارینا اینانان بیری ایدیلر. ”
هود ” کی بیرجه آللاها ایمانی اولان و گوناه لاردان اوزاق گزن مهربان و دوغروجیل بیر اینسان ایدی تانری نین امری ایله ائل طایفاسینی باشینا ییغاراق دئدی :
” واختی دیر کی بیرجه تانری یا ایناراق اوندان باغیش دیله رکن توبه ائده سیز . نییه کی بئله لیک له آللاه تعالا نین رحمتی داها آرتیق سیزلرین سعادتینه سبب اولاجاق دیر و بُت لاری سییتاییش ائتمک تانری یا قارشی عصیان دئمک دیر.”
” عاد ” خلقی هود نبی نین سؤزلرینی سایمادان دئدی لر :
” بیرجه گؤرونمز تانری نین معجزه لرین گؤرمه دن ، نئجه بیز ایمان گتیره بیل لیک ؟”
“هود ” ائلی تانری نین معجزه لرینی گؤرسه لرده یئنه دوز یولا هیدایت اولمادان تانری نین غضبینه اوغرادیلار.
قارا بولود لار گؤی اوزه رینی چولقارکن ” عاد ” اهلی ائله بیلدی کی”یاغیش تانری سی” یای فصلی نین بو قیزقین و قوراقلیق واختیندا اونلارا یاغیش یوللارکن اؤز برکتینی هدیه ائدیری. آمما هود نبی آلدیقی وحی اوزره ، اونلاری بیر داها توبه ائتمه یه دعوت ائده رک دئدی :
” تانری نین بیر لی یینه اینانین کی اونون عذابی یاخین دیر !”
عاد جَماعتی گولومسه رکن هود نبی نی مضجکه یه توتدولار وَلی اونلارین قَهقَهه لری کسیلمه دن بؤیوک بیر توفان قوپوپ یئددی گئجه گوندوز گور یاغیش لار یاغدی. جوشغون سئل لر و سولار ” عاد” اولوسونو پریشان ائده رک چوخ لاری بوغولوب اؤله رکن هرنه ده سارای وار ایدی سئل لر اونلاری یویوب آپاردی .
بو فلاکت دن سونرا یئددی ایل تامام گؤی دن بیر داملا یاغیش گلمه دن ، قیت لیق و دیدرگین لیک جماعتی اوساندیراراکن ” عاد ” خلقی باشقا یئرلره کؤچمه لی اولدی.
آنجا ق ائل آغ ساققال لاری بیرگون ” عود نبی” نین حضورونا گئده رک ،بیرجه آللاها ایمان گتیرمک لرین سؤیله مک له تانری نین رحمت یاغیشینی دیله دیلر.
هود نبی تانری یا سجده قیلاراق بو عذابین بیتمه سین دیله دی آمما اونون خانیمی کی بیر گؤزدن کور ایدی دئدی :
” اونون اَلین دن بیر ایش گسه یدی کی بیزده سیزله برابر بو فلاکته دوشمَزدیک و ایندی بوتون اَکین لریمیز گؤم گؤی ایدی !”
جماعت آمما دینمه دن دؤزدولر کی گؤره لر هود نبی نین دوعاسی مستجاب اولور یا یوخ کی چوخ چکمه دن بوتون یئر گؤی یاشیل دون گئییب هر یئر آبادانلیق اولدی. خلق ، شن لیک و سئوینجه دالارکن ” هود ” ون گؤستریشی له جماعت، انصاف و عدالت له داورانیب گونو گون دن برکت لری چوخالدی.
بیر گون جماعت ” هود ” نبی دن سوروشدولار :
” ندن دیر کی آروادینی بوشاییب آیری سینی آلمیرسان کی اونون سنه ایینه اوجو جادا حؤرمتی یوخدور!” هودنبی دئدی :
” من هم مه شه اونا اوزون عؤمور دیله رکن اونسوز یاشاماغی هئچ ایسته مه میشه م . نییه که تانری هئچ مؤمینی دوشمَن سیز یارداماز و بوقادین دا منیم دوشمَنیم دیر . اینسانین د وشمَنی اؤر اَلی آلتیندا اولورسا ، چوخ – چوخ اوندان یاخشی دیر کی اونو تانی می دان، بیرگون دالدان خنجر له نه !”
بوللوق و زنگین لیک تانری نین توکَنمَز هدیه سی اولاراق ، عاد خلقی ده بئله لیک له یئنه سعادته قاووشدی. ایل لر اؤتوب اوزون بیر زامان کئچه رک عاد خلقی نین اؤلکه سین ده حئیرت لر ایچره بیر یئر شوملادی و عصرین سولطانی نا بئله خبر وئردی لر :
” شوملایان یئرین آلتیندا سئحیرلی بیر آبادانلیق واردی آمما حئییف لر اولسون کی او قصر لر ده اولان قیزیل لارا، گوموش لره و جواهیر لره اَل ووردوقدا هامیسی قوم کیمی اَله نیب توزا دؤنورلر. ”
بوسؤز دیل دن دیله یاییلاراق بوتون خلق تانری نین عذابینی یادا سالیب و کئچمیش گونلر بیر داها تکرار اولماسین دییه ، هود نبی نین خاطیره سینی و سؤزلرینی عزیز سایاراق ، تانری یا داها دا چوخ عیبادت ائتمه یه چالیشدیلار .