شور گولوموز گوله جک

اکبرسعادت
آنادیلیمیز: گولوموز،گولوردو، قوناق‌لارینی گولدوروردو. دریایا دوشن، باتمیردی. دریا کیمسه‌نی باتیرمیردی. هردن گوز-قولاغا دولوب آجیشدیریردی.
بلکه ده دریا اویاریردی. چاراسی بیر خییار ایدی، سورتوردون گوزه، آجیلیغین آلیردی. چوخ دا دریا دا قالماق اولموردو، دوزلو سو، بیر ده گونش درینی فیریق چیخارداردی..
من اورمو گولونون اولومونو اینانماق ایسته میرم. گاهدان یاغیش یاغیر گاهدا قار. گاهدا چن دوشور بو قوجا شهرین اوستونه .
دومان آلیر اورمونون دورد بیر یانینی. ایچیمیزده کی دومانلار کیمی.
هامی بیلیر، او گول بیزیم وارلیغیمیزین اونملی سندلریندن دیر.او بیزیم کولتوروموزون بویوک نیشانه‌لریندن بیری ساییلماقدادیر.
آخی اوراسی بیزیم اوچون یالنیز دوز گولو دئییل. اوراسی بیزیم اوچون مین ایللیک تاریخ و کولتور دور.
اوراسی بیزیم اسکی تاریخیمیزین سمبولودور.اوراسی بیزیم یازیچیلاریمیزین شاعیرلریمیزین، ادبییارچیلاریمیزین ایلهام قایناغیدیر.
بوگون لر اولکه میزده یاشایان اینسانلارین اوره یی چوخ دولوب. گوره‌سن نییه دوغرو ایش گورمک یئرینه یالان وعده لرله اویدورما سوزلرله خالقین باشینی آلداتماغا ….. بیری دئییر، اویدو شکیللری اورمو گولونون دولماغا باشلادیغینی گوستریر.
بیری دئییر آرازدان سو چکیریک- قارشیداکی دئییر “اوندا موغان سوسوز قالار” او بیری دئییر خزردن سو چکیریک، او بیری دئییر گورجوستاندان سو آلیریق، بیر باشقاسی دئییر گوناه اکینچیلریندیر، او بیری دئییر گوناه هاوا نیندیر.
یوز آغیز بوش-بوش سوز سوهبت، بیر آددیم عمل یوخ.
بیز یوباندیق.نئچه ایللردیر کی الی بوش تکجه وعده وئریرک.آما داها گوره ر.بوندان آرتیق گئج قالماق بیر بشریت فاجعه سی یولا سالاجاق.کاش بیزیم مسئول لار بونا دوشون سون لر.
اورمو گولونه گوره دئییلن سوز و چیخیریلان قرار، چوخ تپگی‌لره ندن اولدو. بئله بیر تپگی‌لر قاچیلمازدیلار. آمما بو تپگی‌یه ندن اولان، سؤزلر و قرارلارا باخاندا بیر باشقا مسئله‌لر گوز اونونه گلیر بیرلیکده بونلارا باخاق. اورمو گولونون بو دوروما دوشمه‌یی، بو گونون ایشی دگیل چوخدان دیر اورمو گولونون قوروماق پروسه‌سی باشلانیلیب، آمما ایندی سسله‌نیب(داها دوغروسو هامی گوزون یومموشدو، بلکه ده گؤرنمیردی)
اورمو گولونون تکجه بیزیم یئرلرده یاشایان آدام‌لارین مسئله‌سی کیمی اوزونو گورسه‌دیر. هر دن خبرلرین ایچینده بیر خبری گئدیر، آنجاق بیر خبر کیمی باشقا خبرلرین ایچینده باتیب گئدیر. ائله بو اوزدن بوردا اولان تیتیزلیک، باشقا یئرلرده گورونمور.
ائله بو اوزدن، اورمو گولونون قیرغیندا یئرلردن سئوای، آذربایجانین باشقا یئرلرین ماراق‌لاندیرانمیر. یادیما گلیر، آمریکانین بیر نفت لوله‌سی دنیزده پاتلاماغی دونیانین ماراغینی قازانمیشدی. دونیا بیر چوخ اولکه‌لرینده بو مسئله چوزوم آختاریردیلار.
آذربایجانین میللت وکیل‌لری و یا باشقا سوروملو و سوزو کئچرلی آذربایجانلی‌لارین، بو مسئله‌یه گوره گرک باشقا یئتگی‌لی‌لری ماراقلاندیرالار.
داها دوغروسو تکجه بیر بولگه‌نین سورونو اولددوغوندان، بیر اولکه‌نین، بیر قاررانین، و دونیانین سورونو تک ماراقلاندیرمالی‌ییق. بوتون چالیشمالار، اورمو گولونو قورتارماق اوچون یؤنلمه‌لی‌دیر. یانی هر ایش گورولور سونوجدا گولو قایتارمالی اولمالی‌دیر. اورمو گولونه توکولن چایلارین قاباغیندا وورولان سد‌لرین سولاریندان فایدالانان اکینچی‌لر دیرلر.
اونلارا ، مسئله‌نین نه قدر اونملی اولدوغونو وورغولانمالی‌ دیر.
سولاردان فایدالانان اکینچی‌لر ده بو مسئله‌نی اونمسه‌مه‌لی‌دیرلر. سدلرین دالینا ییغیشان سولارین، ایندی یوخ، بلکه هر زامان بیر میقداری گولون پایی اولاراق اوتورولمه‌دیرلر. آذربایجانلی‌لار، بیرینجی اوز یئرلرینده اولان سورون‌لاری گوروب، حل ائله‌مه‌لی‌دیرلر، سونرا باشقالارینا باش اوزالتمالی‌دیرلار.
چوخ اولوب ائشیتمیشیک، تئهرانین ترافیکینه افغانیستانین اویوشدوروجو اکین‌لرینه، سیبرینین سویوق‌لارینا چوزوم سونموشوق(بونا باخمایاراق کی، چوزوموموز اوزوموزده قالیب)
قوروماق‌لارا آلیشقانلیغیمیزی ایتیرمه‌لی‌ییک. آرال قورودو، قوخوننو(گاوخونی) قورودو هامون قورودو دئیه اورمو دا قورویا بیلری ائشیتمه‌مه‌لی‌ییک. اورمونون قورومازلیغینی هر کسه ایناندیرمالی‌ییق!
آرتیرمالی‌یام، بو ایشدن ائتگی‌لنن بیز اولساق دا، باشقالارینی (آذربایجاندان باشقا یئرلی‌لری) دا ائتگی‌له‌ییب، بو مسئله‌یه قاتمالی‌ییق.
گله‌جک ده اورمو گولوندن بوخارلاشما یولو ایله اوچان سو میقدارینی آزالدیب، راحاتجا بالانس یاراتماق اوچون اونون اوز اؤلچوسونو آزالتماق لازیمدیر. گولون اطرافیندا،باتلاق اولمویان یئرلرد، میثال اوچون ( قوشچو- زنبیل داغی، خان کندی- شرفخانا- بویوک آدا قوشاچای- عجبشیر- بویوک آدا)نورمال سو سوییه‌سیندن ۳ مئتیر یوکسکلیکده دیکئ “توپراق سئد” ووراراق،بوخارلاشما سطحینی مومکون قدر آزلالتماق گرکمکده‌دیر.
ان اساس و اوزون مودتلی تدبیر ایس، او اراضیلرده سو مودیرییتینین کئیفییتینی آرتیرماق و مودئرن سولاما سیستملریندن فایدالانماقدیر. سووارما سیستمینی یئرینه و اکیله‌جک بیتگییه گوره یاغمور ویا دامجی سیستمینه چئویرمکل اکینده ایشله‌دیلن سو میقداری %۷۵ نیسبتینه قدر آزالدیلا بیلر.
بو عملییاتین آغیر سرمایه و اوزون زامانا احتییاجی اولسادا،اونسوز گولون قالیجی نجاتی غئیری مومکوندور.
قوتور چایینین خوی اوواسینا گیرن یئرینده و آقچایین، تبریز- بازئرگان ترانزیت یولونو کسیشدیگی یئرده سو پومپالاماق اوچون ایکی پومپ ستاسیون دیکیلمه‌لی.
اکینچیلرین سویا احتییاجی اولمویان زامانلاردا بو سولار پومپلاناراق قارا تپه‌یه قدر آیری آیری بورو ختلری ایله داشینمالیدیر. اورادا بیرلشدیریله‌رک گدیی آشیریب اورمو گولونه آخیدیلمالیدیر.
بیز هامینیز اورمو گولونون قورتارماق اوچون مسئولییت داشاییریق.بیز، گله‌جک نسیللرین قارشیسیندا جاواب وئرمه مسئولییتینی داشاییریک.
آتا بابالاریمیز اورمو گولون بیزلره یادیگار قویوب گئدیب لر.اونلار اورمو گولون بیزه دالغالی تحویل وئریب لر.گوز یاشلاریمیز دا اولمالی اولسا گرک اونو دولو قایتاراق گله جک نسیل لره…
اومودوموز وار اورمو گولو بیر داها گئچمیش دورومونا قاییدارکن اونون ایستکلی لری اوجامان دالغالارینین موسیقیایی سسلرینی دورنالارین قانادچالماق لارینی ، آدالارین یئنی دن دیرچه لیش لرینی و ان اونملی سی بولگونون ان بویوک اولاییندان قورتولوشونو ائشیدیب و گورسونلر.