چوخ محبّتدن مرض حاصل اولار
رقیه کبیری
بیراینجی بولوم
آنا دیلیمیز:هیچقیرا- هیچقیرا پیللهلردن ائنیب، اورتا قاپیدان پارکینگه دوغرو گئدیر. ماشینا یئتیشمهمیش سیویچین دویمهسینی باسیر. تیققیلتی سسی گلمیر. بیر داها بارماغین دویمهسینه باسیر.
ایچینی چکیر. پالتوسونون جیبینی آختاریر. اپریمیش کیرلی کاغذ دسمالی جیبیندن چیخاریر. دسمال الینده پرن-پرن اولور. یئره تؤکولن دسمال قیرینتیلارینی آیاغییلا ماشینین آلتینا اؤتورور. پالتوسونون یئنگیسی ایله بورنونو سیلیر. قارا ماهوتی پالتوسونون اوستونده آغ بیر ایز بوراخیر. قولونا باخیب کیرلنمیش یئنگینی بؤیرونه سورتور. بورنونو چکه-چکه ماشینین قاپیسینی آچیب فرمان آرخاسیندا اوتورور. اؤز-اؤزویله دانیشیر.
»اؤلهسن رویا، اؤلهسن! بو نه زندگانلیقدی آخی! ائله دوز دئییبلرهاا، چوخ محبّتدن مرض حاصل اولار. بیلیرم. آرپاسی آرتیق دوشوب. یازیق عمهم. اری ایله ساواشاندا، یونجاسی آرتیق دوشوب دئیردی، هامیمیز گولردیک. ایندی بیلیرم نه چکیب؛ یازیق عمه خانیم! آرپایلا یونجانین بیر او قدر ده فرقی یوخدور کی! …ائله عمهمین ارییله، احمدین ده اینک ایله آت قدر فرقی وار. ایکیسی ده بیر بئزین قیراغیدیرلار.
آمما من اؤزوم ده آرپا چؤرهیینی، هم ده یونجانی چوخ سئویرم. قارنیم سانجیلانمایاناجان دسترخاندان قیراغا چکیلمرم. احمد یونجانین اوزونه ده باخماز. آخی نئجه دئییم یونجاسی آرتیق دوشوب. دئیه بیلمیرم کی! دئمهمیشم ائله بئله اولوبداا. هله یازدا یونجانی دوزلویوب یئینده منه گولر. هئچ اینک ده سنین کیمی شیرین-شیرین یونجا یئیه بیلمز – دئیر.
احمدین آرپاسی آرتیق دوشمهسهیدی ده، آت کیمی کیشنهییردی. دلی اولموشدو ائلهبیل. من نه دئدیم کی!
فقط دئدیم هامینین اوزونه گولورسن کی، مینیرلرداا سنی!
پیس دئدیم؟! مینمهسهلر، گونده او مامیلی-ماتان خانیم منیم ماشینیمدا نه پوخ یئییر؟ ماشینا وام گؤتورن من؛ آلان من؛ سن ده گونده خانیمی قاپیلاریندا ائندیر. من ده هر گون مجبور اولورام کمالینین ماشینییلا ائوه گلیم. هله نه یاخشی دئمهدیمها کمالی منی ماشینییلا ائوه چاتدیریر. یوخسا فیش-فیشا کیمی فیشیلداردی. اونون آجیغی توتسا دا توتسون. لاپ یاخشی ائلیییرم، گلیرم. کمالی قونشوموزدودااااا. یول اوسته منی ده گؤتوروب، یئتیریر قاپیمیزا؛ نه اولسون کی!«
باشینی صندله سؤیکهییر. گؤزلرینی یومور.
قوی بیر آز اؤزومو تاپیم، جهنّم اولوب گئدهرم. گؤروم صاباحدان هانسی ماشینلا خانیمی قاپیلاریندا ائندیرهجک؟
بیر داها او ائوه دؤنمهیهجهیم. قوی نه قدر تک باشینا های-کوی سالیر سالسین. هوشو چاتمیر کی! دوشونمور بو ساعاتدا قیشقیر-باغیر سالمازلار؛ قونشولار یاتیب. اؤزو ده بئله قوزو کیمی قونشولار، بیریسینین ده جینقیری چیخماز.
سحر فریبا خانیم سوروشسا نه های-کوی سالمیشدیز، نه دئییم؟! هئی اوزومو دیرناقلادیم. هئی دیزیمه چالدیم، پیس ایشدی، یواش دئدیم. مگر قولاق آسدی! قوی تک قالسین، باشی داشا دیسین.
باشینی فرمانا سؤیکهییر. آلنی اوشویور. گؤز یاشلاری دیزلرینه دامیر. بورونونو ائله چکیر کی، بیر آن نفسی قاپانیر. چرقدینین اوجویلا گؤزونو سیلیر.
»عمهم دئیردیهاا کیشینین وفاسی اولماز. هئچ بیر دئمهدی گئجهنین بو ساعاتیندا هارا گئدیرسن؟ “گئتمه!” دئسهیدی، ائودن چیخمازدیم. بو سویوقدا بوردا نه غلط ائلیرم آخی. ها آددیملاریمی آستا آتدیم، ها باشماق یئرینده قوردالاندیم، بلکه او بیری دفعهکی کیمی “گئتمه!” دئسین؛ نامرد اوغلو آغزینی بئله آچمادی.«
بورونونون سویو آخیر. باشینی فرماندان قالدیریب، سینهدهکی دسمال قوطوسونو گؤتورور. قوطو، بوم-بوش. حیرصیندن قوطونو آرخایا آتاندا دالی شوشهنین قاباغینداکی ایته دییب، صندلین اوستونه دوشور. ایت قولچاغین باشی، گورا تیترهین باش کیمی ترپهنیر.
چرقدینین اوجویلا بورنونو سیلیر. بورنونون سویو چرقدین اوجوندا آغ لکه بوراخیر. چرقدین لکهلی اوجونو پالتوسونون آلتینا ییغیر. سیویچی سالیب ماشینی ایشلتمهیه چالیشیر. ماشینین موتورو تیر-تیر تیریلداییب، سونرا سسی کسیلیر. فرمانین آلتینداکی میلچک بویدا ایشیق وار؛ ایشیغا باخیر. یاشیل ایشیق یانیر.
»هله اون ایلدیر تصدیقیم وار دئییر. هوشو چاتمیر کی، ماشین گاز ایله ایشلهینده موتورو سؤندورمزلر. بو دا اونایللیک شوفر!«
یاشیل ایشیغی سؤندورور. قیرمیزی ایشیق یانیر. یئنیدن ماشینین موتورونو ایشلتمهیه چالیشیر. موتور کهلیک کیمی قیققیلداییر. او ایسه استهزایلا گولومسهییر.
»بیلیرمدااااا،… ایندی پنجره قاباغیندا دوروب گودور. دئییر بس عاجزم، گئده بیلمرم. بس بو تصدیقی نهدن اؤترو آلمیشام؟ کیفیمده ساخلاییب، چوروتمیهجهیم کی! تصدیق؟… هله قوی یوخلاییم گؤروم کیفیمده؟«
موتورو سؤندورور. کیفینی یوخلاییر، قوردالاییر. ایچیندهکیلری بیربهبیر صندلین اوزرینه تؤکور. سونوندا کیفی ترسینه چئویریب قوجاغینا سیلکهلهییر. بیر-ایکی سکّه، جولو بارماق بویدا گؤز مدادی، قاپاقسیز بیر ماتیک آیاغینین آلتینا دوشور. یئنه اؤز-اؤزویله دانیشیر.
»گیجسن، قوشبئیین خانم، گیج! بس دئمهدین تصدیقسیز سیویچ نه درده دَیر؟ هوشون باشیندان چیخمیشدی؟ ائله شیشدین، ائله سیویچه ال آتیب،گئدیرم دئدین، ایندی بویور گئت! گؤرهک نئجه گئدهجکسن؟ اولماسا بیر آز گودوم یاتسین. آستاجا قاپینی آچیب ائوه گیریب، تصدیقیمی گؤتوررم. او یاتاندا، مین ایلین اؤلوسودور ائلهبیل. داش کیمی دوشور یاتیر. ائوه قاییتدیغیمی بیلمز. آمما بیلمیرم کی، تصدیقیمی هارایا قویموشام. گرهک بیربهبیر کمدلاری آختاریم«.
صندلین اوستوندهکی قیویر-زیویرلاری کیفینه قایتاریر. آیاغی آلتینداکی سکّهلری گؤتوروب، باشینا دولاندیریر. سونرا دندهنین یانینداکی تصدّق قوطوسونا سالیر. سکّهلر، ماشینین سسسیزلییینده جینگیلدهییر.گؤز مدادینی دیزینه سورتوب قاپاقسیز ماتیکی بورور. لوله، بوش-بوشونا بورولور. لولهنین ایچینی پوفلهییب، بیر ده ترسینه بورور. ایکیسینی ده کیفین کیچیک زیپلی یئرینه قویور. ماشینین آیناسینی اؤز اوتوروشو و بویونا اویغون دهتلهییر. قاشلارین یوخاری قالدیریر. گؤزگوده گؤزلرینه باخیر. الینی قاشلارینا، گؤز قییقلارینا چکیر.
»گؤزلریمین آلتی شیشیب. سحر ایشه گئدنده آغلادیغیمی هامی بیلهجک. هئچ کیمین اوزونه باخمییاجاغام. سوروشسالار نه دئییم؟ آچیب آغارتمالی دئییل کی. دئسم ده اینانمازلار. آنام دا اینانماز. هئی تعریفلهسین، دئسین احمد نجیب اوغلاندی. ائلچیلیک گونو تلفوندا، عمه خانیما بیر ساعات اونون نجیبلیییندن دانیشدی.
او قدر دئدی کی، آخیردا یورولوب دئدیم: او قدر »نجیب- نجیب« دئییرسن کی، من اونو گؤررکن باغلار باغیندا بوینوندا تورباسی اولان آتلار یادیما دوشور. آنام حیرصلندی. دیلینی دیشله – دئدی. بویون-صاباح او سنین ارین اولاجاق آخی! هر شئیه ظارافاتلا یاناشما – دئدی.
نوشته شده توسط admin در شنبه, ۱۳ آذر ۱۳۹۵ ساعت ۷:۱۷ ق.ظ