من ایتن گون

بیرینجی بولوم
آنا دیلیمیز: منی تانیماق راحات ایش اولمالی. خیاواندا اوزون ایله گئن پالتو گئین بیر کیشی گؤردویونوزده، اوشاق قبیری باشماق آیاغیندا چوخ بوزوشموش شاپقالی بؤرک باشیندا اولان گؤزلوگونون بیر شوشه سی اولمایان، گونش ده ایسه چتیر گؤتورن بیر کیشی گؤردویونوزده، او منم، شک ائتمه یین: »پروفسور اشلمیل.«
قویون، اونودمامیش دئییم، منی تانیماغا، سؤزو اولمایان، باشقا بیر ایپ اوجو ایسه واردیر. جیب لریم تئیخا (همیشه) گونده لیک، درگی ایله کاغیذ لا دولودور. ال چانتاسی ایسه واریمدی.
اونوندا ایچی تیخیلی دیر. زیپی زور ایله باغلانیر. چوخ السیز- آیاقسیز ایله آوارایام. شهرین یوخاریسینا گئتمک ایسته دیگیم ده، اؤزومو شهرین آشاغیسیندا تاپیرام. دوغویا گئتدیگیم چاغدا ایسه، باتی دان باش چیخاردیرام. گون آللاهین گونو گئجیکیرم. یادیمدا، هئچ کیمسه نی ساخلایانمیرام.
تئیخا زاد- مادیمی یئرده قویورام. گونده یوز دؤنه اؤزومدن، »قلمیمی هارا قویدوم؟ پولوم هارادادیر؟ ای وای مندیلیم هانی؟ دفتریم هانسی قبیرده؟«- سوروشورام. من، آدلیم آشاغی حافظه لی، پروفسورلاردانام. فلسفه بیلیم یوردوندا، ایللردیر درس وئریرم.
درس کیلاسیمی تاپماقدا، هله ده سورون (دردسر) چکیرم. فاکولته نین (دانشکده نین) آسانسور ایسه من له دوز دئمیر. سون قاتا گئتمک ایسته ینده، منی یئر آلتینا آپاریر. گون لرین چوخوندا قاپیسی منیم اوزومه آچیق اولماییر. آسانسورون قاپیلاری منیم بؤیوک دوشمنیم ساییلیر.
داواملی گیجلیک ایله، اشیالاریمی ایتیرمک دن علاوه ایسه اونوتقانام(فراموشکارام). پالتو ایله قهوه خانایا کئچسمده، ائشیگه چیخدیغیمدا پالتو اینیمده اولمور. هله یادیما گلنده، هانسی قهوه خانادا اولدوغومو خاطیرلایانمیرام. بؤرک، کیتاب، چتیر، یاغمورلوق (بارانی) ایله هر نه دن پیس ال یازیلاریمی ساغ- سول ایتیریرم.
بیر گئجه، ائوه چاتاغیما تله سیردیم. تاکسی چاغیردیم. تاکسی سوروجوسو، »هارا؟« دئدی. من ائویمین هارادا اولدوغونو یادا سالانمیردیم.»ائوه گئدیرم!« دئدیم.ـ چاشقین لیق لا، »یاخشی، آغانین ائوی هاردادیر؟« سوروشدو.
ـ »نه دئییم، یادیما گلمیر!« دئدیم.ـ شریف آدینیز؟ـ پروفسور اشلمیل.سوروجو، »پروفسور، من سیزی بیر تئلفون کؤشکونون یانیناجان آپارارام. تئلفون باشقاریجی سینی (راهنماسینی) یارپاقلاییب، ائوینیزین آدرسینی تاپین.« دئدی.
سونرا، منی یول اوستونده اولان بیرینجی توختاجیلیغاجان (داروخانه یه جن) آپاردی. توختاجلیق دا بیر، هامیسال تئلفون کؤشکو وارییدی. ائندیگیمده، ایگیتلیگی اولمایان سوروجو، دایانمادان گازلاییب گئتدی. هله، توختاجلیغا گیرمه دیگیمده، چانتامین تاکسی دا قالدیغینی خاطیرلادیم. تاکسی نین دالیجا قاچدیم. باغیردیم: »چانتام! چانتام!«. آنجاق، تاکسی سسیمی ائشیتمه یه قه در اوزاقلاشمیشدی.
توختاجیلیق دا تئلفون کیتابچاسینی گؤتوروب، یارپاقلادیم. »ش« حرفین آلتینا باخدیغیمدا باشیمدان توستو قالخدی. یئددی- سگگیز اشلمیل-ی سیرالامیشدیرلار. آنجاق منیم آدیم آرالاریندا دئییل دیر.
او آندا، نئچه آی بوندان اؤنجه یاشام یولداشیمین، تئلفون باشقاریجی دفتریندن (دفتر راهنمای تلفن)، آدیمیزی پوزماق تصمیمینین توتماسینی خاطیرلادیم. ندنی ایسه منطق لی ایدی. اؤیرنجیلریم، گئجه- گؤندوز تانیماییب، ایسته دیکلری ساعاتدا بیزی راحاتسیز ائدیردیلر. اوندان کئچسکده، باشقا اشلمیل لر له ایشلری اولانلار یانلیشجا بیزیم نمره میزی توتوردولار.
باشیما نه کول اله دیگیمده قالمیشدیم. نه ته هر ائوه دؤنوم. اولدوقجا، الیمه چاتان بیتیک (نامه) لری، یان جیبیمه قویاردیم. آنجاق پیس شانسیمدان اوگون جیب لریمی تمیزله میشدیم. آیریجا ایشی گتیردیگی بو گون دوغوم گونوم اولدوغو اوچون یاشام یولداشیم دوستلاریمیزی شاما چاغیرمیشدی.
بالاجیق، بؤیوک کئیک پیشیریب، اوستونه گؤزل شمع لر ایله بزه میشدی. یقین، یازیق قوناقلار، منه تبریک دئمه یه ایله شیب، گؤزله ییرلر. من ایسه بورادا توختاجیلیق دا دوروب، ائویمین تاپماغینا چالیشیرام. آنسیز(ناگهان)، یولداشلاریمین بیرینین تئلفون نومره سین خاطیرلادیم. »دوکتور مادرهه، ایندی اونا زنگ آچارام.« نومره سین توتدوم. بیر گنج قیز دسته یی گؤتوردو. ـ »دوکتور مادرهه بی ین تشریفی وار؟«ـ بالاجا قیز،»یوخ« دئدی.ـ خانیمی ایسه یوخدورلار؟ـ یوخ، ایکیسیده ائشیکده دیرلر.ـ هارادا تاپا بیلمک لرینی، بیلیرسینیز؟ـ من اوشاق باخیجی سییام (پرستارییام)، آقا ایله خانیم، پروفسور اشلمیل-ین ائوینه تشریف آپاریب لار. سؤزونوز اولورسا بویورون. اونلارا کیم تئلفون ائدیب دیر، دئییم؟ـ پروفسور اشلمیل.ـ آقا ایله خانیم، بیر ساعات اؤنجه، سیزین ائوه گئتمه یه، یولا دوشوبلر.ـ باغیشلایین هارا گئتدیکلرینی بیلیرسینیز؟ـ ایندی سؤیله دیم، اونلار، سیزین ائوه گئدیبلر. ـ منیم ائویمی تانیییرسینیز؟ـ آغا شوخلوق ائدیرسیز؟نئچه دقیقه دن سونرا باشقا یولداشلاریمدان نئچه سینین آد ایله تئلفون نومره لری یادیما گلدی.
اونلارین هامیسینا تئلفون ائتدیم. آنجاق هامیسی پروفسور اشلمیل-ین ائوینه گئتمیشدیرلر. گیج ایله مایماق لیق لا، خیاواندا دایانیب، نه ائتدیگیمی بیلمه ییردیم. آنسیز یاغیش یاغدی. چتیریمی آچماق ایسته دیم:»چتیریم هاردادی؟« بونودا سوروشارلار؟یادیما گلدی. اولا بیلر، بیر یئرده قویموشام!
یاواشجا، بیر ائوین قاپی اوستو تالواری-نین (سایبان) آلتینا سیغیندیم. ائله بیل گؤیون تاوانی (سقفی) دلینیب دیر. ایلدیریم باغیریب، پارلاییردی. بو شانسا لعنت! گونون بوتونو هاوا ایستی ایله گونشلی ایدی. ایندی ایسه من ایتمیشدیم، همده چتریمی ایتیرمیشدیم، توفان گلیب دیر.
ائله بیل یاغیش کسیلمک ایسته مه ییردی. اؤزومو مشغول ائتمک اوچون تویوق ایله یومورتانین اؤنجه لیک فلسفی قضیه سینین چؤزمه سینه، باشلادیم. هئچ باجاریقلی فیلسوف بو قضیه یه اویغون ایله دوزگون جاواب وئره بیلمه ییب دیر. قاچینماز (لابد)، تقدیریمیش من بو مسئله نی دوشونم. اولابیلر، بیر اویغون جاواب تاپام.
سویو گؤیدن دولچا ایله تؤکوردولر، سانیردیم. یاغیش سویو اوست- باشیما دامیب، منی ایسلادیردی. سویوق جانیمین کؤکونو بوروموشدو. بورنومون سویو آخیردی. آسقیریق، آسقیریق دالیجا.
بورنومو سیله جک (دستمال) ایله تمیز له مک ایسته دیم. آنجاق سیله جه گیمی ایسه باشقا یئرده ایتیرمیشدیم.
آردی وار