قیزیل خوروز

حاضیر لایان:اکبرسعادت
باشقاسینی آلدا‌دان اوزو ده آلدانار
آنا دیلیمیز: بیری وار ایدی، بیری یوخ ایدی، کئچمیش زامانلاردا ایکی اوزاق قوهوم وار ایدی. بونلارین بیری یوخسول ایدی کی مئشه‌ده، بالاجا بیر داخمادا قالاردی. او، بیریسی دوولتلی ایدی، شهرده، قشنگ، بویوک بیر ائوده یاشاییردی.
گونلرین بیر گونو یوخسول، مئشه ایله گئدیردی، بیردن آغاجین آلتیندا پاریلدایان قیزیل بیر له لک گوردو. باشینی قالدیریب یوخاری باخدی، گوردو کی، آغاجدا قویروغو قیزیل بیر خوروز اوتوروب. یوخسول قیزیل له له یی گوتوروب بیرباش شهره، دوولت‌لی قوهومونون یانینا گتیردی.دوولت‌لی قیزیل له له ‌یه باخیب دئدی:
– گوزل شئی ‌دیر!آنجاق دگری چوخ آزدیر.من سنه بو له لک اوچون بیرجه مانات گوموش پول وئررم.
یوخسول ایسه عومرونده قیزیل گورمه میشدی، اونا گوره ده بیلمیردی کی، بو له لک خالص قیزیلدان‌دیر. او ائله بیلیردی کی بو نه ایسه قشنگ پاریلدایان بیر شئی ‌دیر. اونا گوره ده او ائله بیلدی کی، اونون قیزیل له له یی اوچون گوموش پول یاخشی قیمتدیر.
یوخسول کیشی او بیری گون یئنه ده مئشه ‌یه گئتدی، همین آغاجین آلتیندان یئنه ده قیزیل له لک تاپدی. اونو گوتوروب دوولتلی‌نین یانینا آپاردی، یئنه ده عوضینده گوموش پول آلدی. بیر نئچه گون دالبادال بو احوالات بئله باش وئردی.
بیر دفعه ده یوخسول همیشه کی کیمی آغاجین آلتینا گلدی، گوردو کی، قیزیل قویروقلو خوروز برکدن بانلاییر:
– کیم منیم اوره گیمی یئسه، او آدام هر گون بالیشینین آلتیندان ایکی قیزیل یومورتا تاپا‌جاق! کیم منیم اوره گیمی یئسه، او هر گون بالیشینین آلتیندان ایکی قیزیل یومورتا تاپا‌جاق!
یوخسول بو ایشه لاپ مات قالدی، تئز شهره قاچیب احوالاتی دوولت‌لی و آجگوز قوهومونا دانیشدی. او ایسه جاوابیندا دئدی– اگر سن او خوروزو منیم اوچون توتا بیلسن سنه اونون اوچون مین گوموش پول وئررم!یوخسول اونونلا بئله شرط کسدی:– سنین پولون منه لازیم دگیل! یاخشیسی بودور کی، منیم ایکی اوغلومو اوز یانینا آپاریب اونلارا اوز اوشاقلارین کیمی باخ. من ایسته ییرم کی، اونلار عاغیل‌لی و ساوادلی اولسون‌لار. دوولتلی او ساعت سؤز وئردی کی، یوخسولون اوشاقلارینی یانینا آپارار و اونلاری اوخوماغا قویار. بونون عوضینده ده یوخسول کیشی دوولتلی یه سؤز وئردی کی قیزیل قویروقلو خوروزو اونون اوچون توتسون. یوخسول سحر تئزدن مئشه‌یه، همین آغاجین آلتینا گلدی. قشنگ خوروز دینمه ‌دن یوخاریدان اونا باخیردی.
یوخسول نیشان آلیب اوخلا قیزیل قویروقلو خوروزو ووردو. یوخسول کیشی خوروزو گوتوروب اوغلانلارینا وئردی، اونلاری شهره، دوولتلی قوهومونون یانینا گوندردی.
دوولتلی قیزیل قویروقلو خوروزو گوروب سئوینجیندن آتیلیب-دوشدو. او، اوزو خوروزون قیزیل له لک ‌لرینی بیر-بیر یولدو، سونرا اونو یوخسولون اوغلانلارینا وئردی کی، خوروزو بیشیریب ناهارا اونا وئرسینلر. او، اوزلوگونده بئله قرارا گلمیشدی کی، یوخسولون اوغلانلارینی درسه گوندرمه ‌یه‌جک: قوی اونون یانیندا قالیب نوکرچی ‌لیک ائله ‌سینلر!
اوغلانلار مطبخه کئچیب خوروزو بیشیرمه یه باشلادیلار. اونلار چالیشیردیلار کی، خورک دادلی اولسون، دوولتلی قوهوملاری راضی قالسین. آنجاق بختلری گتیرمه ‌دی: خوروز بیشیب لاپ حاضر اولانا یاخین، اتین سویو بیردن قازاندا پیققاپیق قاینادی، خوروزون اوره یی سیچراییب بیرباش دوشه مه‌نین اوستونه دوشدو!
– وای، بو نه بلا‌دیر باشیمیزا گلدی! – دئیه بویوک قارداش دیللندی. – ایندی گرک خوروزون اوره گینی توللایاق. بیر باخ ها لاپ چیرکلی دوشه مه‌نین اوستونه دوشوب. ایندی اونو گوتوروب آغامیزا وئره بیلمریک… کیچیک قارداش ایسه یالواردی:
– خوروزون اوره گینی توللاما! من سحردن هئچ بیر شئی یئمه میشم. یاخشیسی بودورکی، گل اونو گوتوروب یویاق، اوزوموز یئیه ک.قارداشلار بئله ده ائله ‌دیلر: خوروزون اوره گینی یویوب ایکی یئره بولدولر، هره بیر پارچاسینی یئدی. سونرا دا بیشمیش خوروزو دوولتلی قوهوملارینین یانینا آپاردیلار.
دوولتلی او ساعت باشلادی بوشقابین ایچینی قورددالاماغا کی، خوروزون اوره گینی تاپسین. آختاردی، آختاردی، خوروزون هامیسینی یئدی، آنجاق اوره گی هئچ یئرده تاپمادی. اوندا دوولتلی، اوزونو قارداشلارا توتوب سوروشدو:
– خوروزون اوره گی هانی؟ اونو نئیله میسینیز؟قارداشلار بو واخت احوالاتی اولدوغو کیمی اونا دانیشدیلار.
تاماهکار دوولتلی اونلارین الیندن ائله هیرسلندی کی، آغاجی گوتوروب اونلارین ایکیسینی ده ائودن قوودو. قارداشلار آغلایا-آغلایا مئشه‌ یه، اوز یوخسول، بالاجا کوما‌لارینا قاییتدیلار. اونلار هئچ باشا دوشه بیلمیردیلر کی، بیر خوروزون اوره گی نه دیر کی، اونون اوستونده دوولتلی بو قدر هیرسلنیب اونلاری ائویندن قوودو.
گئجه کئچدی، سحر قارداشلار هره‌سی اوز بالیشینین آلتیندان بیر قیزیل یومورتا تاپدی. اونلار قیزیل یومورتا‌لاری دا گوتوروب آتا‌لارینین یانینا گئتدیلر و باشلارینا گلنی اونا دانیشدیلار.
آتاسی اونلارا دئدی:– منیم او دوولتلی قوهومومدان اوره گیم برک اینجیدی، سیزی ائویندن قوودوغو اوچون من بو پاریلدایان یومورتا‌لاری هر کس اولسا ساتارام، تکجه اونا یوخ.
ائله بو واخت یاخینلیقدان گزرگی بیر تاجر کئچیردی. یوخسول کیشی یومورتا‌لاری گوتوروب اونون یانینا گئتدی. تاجر دئدی:– آ، بو یومورتا‌لار کی، خالص قیزیلدیر! من بو قیزیل یومورتا‌لارا گوره سنه یاخشی پول وئررم.
تاجر بونو دئییب یوخسولون اتگینه او قدر پول توکدو کی، او، هئچ عومرونده بو قدر پول گورمه میشدی.
یوخسول کیشی آنجاق ایندی باشا دوشدو کی، دوولتلی قوهومو اونو همیشه آلدادیرمیش، – قیزیل له لک اوچون اونا گوموش پول وئریردی. “عیبی یوخدور! – دئیه یوخسول اوز-اوزونه دوشوندو. –
بیزلرده بیر مثل وار دئیرلر کی، باشقاسینی آلدا‌دان اوزو ده آلدانار. ائله بئله ده اولدو.او گوندن بری قارداشلار هر گون اوز بالیشلارینین آلتیندان هره‌سی بیر دنه قیزیل یومورتا تاپیردیلار. آتاسی بو قیزیل یومورتا‌لاری یاخشی قیمته ساتیردی. اونلار ایندی لاپ یاخشی دولانیردیلار. آنجاق ان باشلیجاسی او ایدی کی، قارداشلار اوز آرزولارینا چاتمیشدیلار: ایندی اونلارین ایکیسی ده علم اویرنیردی و خیلی شئی ده اویرنه بیلمیشدیلر.