مندن نه قالاجاق سنه؟

فرمان فرضی مولان
مندن نه قالاجاق سنه؟ بیلمیرم
بلکه بیر خاطیره، بلکه ده هئچ نه
سندن نه ایته جک منده؟ بیلمیرم
بلکه ایتن لرده گله جک یئنه
منیم تورپاغیمی سووران کولک
سنین تئل لرینی تومارلایاجاق
منیم گوزلریمه تیکان تک باتان
سنین باخیشینی خومارلایاجاق
بلکه ده آخشاملار سئوگیلین ایله
سازیمین سسی له سئویشه جک سن
بلکه ده بو قدر دوغما دردینی
بیر اوگئی وصال لا ده ییشه جک سن
مندن نه قالاجاق سنه؟ نه بیلیم؟
اوزومدن اوزومه نه قالیب مگر؟
من ائله بیلیردیم عشقین بیر آنی
مین ایللیک آغری یا عذابا ده یر
آمانسیز حیات دی،
آمان سئوگیلیم
گومان ائتمه دیگین گئرچه یه دونور
باخیرسان باخدیقین اولدوزلار آخیر
باخیرسان چیخدیقین زیروه لر یئنیر
حیاتا سئودیگین دونو بیچیرسن
حیات سن بیچدیگین دونا دون بیچیر
بیر زامان فیکریندن کئچمه ین لرده
واخت اولور گوزونون اونوندن کئچیر
سنی منه وئرن عومور قاطاری
نئجه گتیرمیشدی،
آپاریر ایندی
گلیشین جانیما جان وئرمه سه ده
گئدیشین جانیمی آپاریر ایندی
مندن نه قالاجاق سنه؟
بیلمیرم
بیر نئچه موسیقی، بیر نئچه غزل
بلکه اونلاری دا اونوتدوراجاق
بیر زامان قوینوندا یاتدیغین گوزل
گوروشدوک چوخ چتین، آیریلدیق هاساند
گوروش وار عوموردور، عومور وار گوروش
بیزدن نه قالاجاق بیزه؟ بیلمیرم
قالسا بیر قارا داش، بویو بیر قاریش