قاپـی

توران قربانی صادق
آنا دیلیمیز: شَکر خالا اَلی قوینوندا، اونو گؤزله¬ییردی. ـ »دئدیک¬لریمی ائله¬دین؟«
کؤینه¬یی¬نین قول¬لارینی سالا – سالا دئدی: ـ »هه، دوریسینی قویدوم تاغا!«¬
آغزینی دولدوردو یئنه فلکدن گیلئی¬لَنسین، آنجاق شکر خالا دئدی: ـ »یاخشی… عزیز گونده اوشاق¬لارووی پئشمان ائله¬¬مه. گئت اینشاللاه دوشرگه¬لی اولسون! اونون بونون سؤزونه ده باخما، کیشی¬دی دای، آخیر کی ایشله¬یه¬جک!«
بئچه¬لر هله بانلاییب، ایلدیرسکی¬نین ساری لامپی¬نین ایشیغی حَیه¬طه یاییلیردی. اوزونو یاشماقلایان قادین یاواشجا سوزولدو ائوین ایچینه. اوتاقدا گؤز دولاندیردی؛ بیر تئشت ایسلانمش پالتار، سَریلمیش چؤرک خیرداسی، کؤرپه¬نین باتیق اسگیسی ایله دولو ایستامبول، کولَش خَکه¬سی و جینقلی جینقلی نئچه جوت للـه¬یین. یاشماغینی آچیب یاتان¬لارا باخدیغیندا، اودون پوچونون ایستی¬سی اوزونه دَیدی. کاسیبین بختی کیمی هامی یاتمیشدی. آتوشگه¬نین قاباغیندان ائوین آشاغا باشیناجاق، یورغان – دؤشک سالینمیشدی.
آیاق بارماق¬لاری اوسته کیشی¬یه ساری آددیملاییب، اوزونه پیله¬دی. کیشی خورولداییردی. بیر ده پیله¬دی. کیشی گَرنه¬شیب، یوخو هاواسی نسه میزیلداندی.
بؤیرونده¬کی یورغان – دؤشه¬یین ایچینده هئچ کس یوخ ایدی. قادین پیچیلدایا – پیچیلدایا دئدی: ـ »دور آیاغا!«
کیشی گؤزلرینی آچار آچماز، یانینداکی بوش یئره باخدی. ـ »نه اولوب صوبح ائرته¬دن خورتلادیرسان؟!«
قادین بیر آز اوجادان دئدی: ـ »باشی¬نین اوستونه بیر باخ.«
کیشی چؤنوب اونو گؤرجه¬یین، دیک دوروب یئرینده اَیلشدی. ـ »سـَ سـَ سن کیمسن؟!«
قادین گولومسویوب، لئچه¬یی¬نین دویونونو آچدی. گؤزلرینی سوزدوروب، اَته¬یی¬نین اوجوندان یاپیشاراق بیر دؤور فیرلاندی. دئدی: ـ »سنین قارا چوخان!«
کیشی یورغانی چیینینه چکیب، باشدان آیاغا اَسمه¬یه باشلادی.
ـ »نَدی؟ خوخان گؤروب¬سن؟«آتوشگه¬نین پرده¬سینی میخا سانجیییب، کیشی¬نین باشینا چیغیردی: ـ »سنه دئمه¬دیم دور آیاغا!«اونون سسی اوشاق¬لاری اویاتمادی. کیشی دئدی: ـ »نه قاییریرسان؟ قونشودان ائوین ایچی گؤرسه¬نیر… ایراق جاندان بیری سنی بوردا گؤرسه…«قادین پنجره یانیندان دئدی: ـ »قورخما! هئچ کیم سندن سونرا منی گؤره¬نمیر!«
گؤزلری آز قالا کاساسیندان چیخسین. دوروب کؤینه¬یینی گؤتوردو. اونو اَینینه گئیه¬رک، دئدی: ـ »ناغیل سؤزو ائشیدیرم… نه جور آخی؟«ـ »دئدیم کی، من قارا چوخایام!«
کیشی بیر آز اونا یاخینلاشدی. قارا چوخاسی یاشماغیمی آغزینا چکیب، قاش¬لاریمی دویونله¬دی. ـ »شالوارووی دا گئی گئده-ک«
کیشی ال آیاغینی ایتیریب، سؤزو دَییشدی. ـ »باخ خانیم! مستوره چؤره¬کدن قاییدیب یئریمی بوش گؤرسه …«
قادین اونون سؤزونو کسدی. ـ »من ائله خانیمووا گؤره بوردایام»، دئییب، اوشاق¬لارین یورغانینی چکدی اوست¬لرینه.
کیشی کوبود بارماق¬لارییلا باشی¬نین توکونو پئیسه¬ری¬نین دالینا وئردی. قارا چوخاسی باشینی دیک توتاراق، حیَطه ساری یؤنه¬لدی. ـ »گل دالیمجاق!« …
کیشی¬نین آیاق¬لاری آددیملاماغا باشلادی. هاوا یاواش یاداش ایشیقلاناندا، چؤره¬کدن قاییدان کوچه آدام¬لاریندان بیر نئچه¬سی، اونو تئز– تئز یئرییه¬رک، اؤزویله دایشدیغی حالدا گؤردولر.
مستوره دسترخان دولوسو تزه چؤره¬یی آستانایا قویدو. الی آلنیندا، اوزونو آتوشگه¬یه دایادی. اوشاق¬لار یاتمیشدیلار، اَری آنجاق یئرینده یوخ ایدی. تئز دهلیز قاپی¬سینی آچیب، کفیشکنده ده باخدی. باشماق¬لاری دا یوخ ایدی.
اور¬ییندن بیر شئی قیریلیب، قارنینا دوشدو. ال ایاغینی سویوق تَر باسدی. آیاق یولونا ساری گئدیب، اوجادان سوروشدو: ـ »ایسی! اورداسان؟«
جاواب ائشیتمه¬دی.لئچه¬یی¬¬نین اوج¬لارینی بوینونون دالیندان گتیریب، آلنیندا دینگالان باغلادی. اوره¬یی چیرپینماغا دوشدو. بیر دقیقه حیه¬طین اورتاسیندا دایانیب، الینی الینه کئچیردیب، اوزونو گؤیه توتاراق سسی اَسه – اَسه دئدی: ـ »آی آللاه! اؤزون کؤمک ائله… طیفیل¬لریمه رحمین گلسین!«
تله¬سیک مطبخه گئتدی. هله ده سودلو پیلونون اییسی گلیردی. گؤزلرینه اینانانمادی. ایره¬لی گئدیب، بوش دورونو تاغدان گؤتوردو. ایچینده هئچ زاد قالمامیشدی. ائله بیل ایچینی ده پیشیک یالامیشدی.
مطبخین قاپی¬سینی تاق باتاق قویوب، قونشونون حَیه¬طینه بویلاندی. شکر خالا حوضون بوزلو سویویلا دستنماز آلیردی. اونو گؤرجک سوروشدو: ـ »یئییب هه؟«
مستوره¬نین دیلی توتار – توتماز، دئدی: ـ »هامیسینی!«شکر خالانین گؤزو پاریلدادی. ـ »آخشام یورغون، آمما اَلی دولو گله-جک!«
مستوره¬نین اور¬یی سؤزله دولو اولسایدی دا، دئمه¬یه آنجاق بیر زاد تاپانمادی. لئچه¬یی¬نین دویونونو بَرکدن سیخیب، دئدی: ـ »شکر خالا! باشووا دولانیم، او حَیه¬ط سوپورگه¬نی آت بیزه… اوشاق¬لار دوراناجاق، بیر آز بورالارا ال گزدیریم.« سون