عزادارلیق و اونون فلسفه لری
معصومه اسدی
اسلام شهیدلری، خصوصیله “کربلا شهیدلری” اوچون کئچیریلن عزادارلیق مراسیم‌لری اونلارین خاطره‌لری‌نین ابدی قالماسی، اسلام دینی اوغروندا ائتدیگی فداکارلیقلارین دایم یاشاماسی اوچوندور. ائله بونا گؤره ده، عاشورا ایامیندا (محرم آیی‌نین ایلک اون گونو)، یعنی امام حسین (ع)-این، بهشت جاوانلاری‌نین سروری اولان امام علی (ع) ین و پیغمبرین (ص) عزیز قیزی فاطمه زهرا (س)- ین اولادی اوچون یاس ساخلاییر، عزادارلیق مراسم‌لری کئچیریریک. اونلارین حیاتینی، نه اوچون و نئجه شهید اولدوق‌لارینی تحلیل ائدیریک. اونلارین پاک روح‌لارینا دعا‌لار اوخویوروق. بنی امیه طایفه¬سی قورخونج و ظالم بیر حاکمیت یارادا‌راق پیغمبرین (ص) سنتینی آیاق آلتینا آلیر، دینه مختلف بدعت و خرافاتلار قاتیر، اسلامین معنوی دگرلری‌نین محوینه چالیشیردیلار.
امام حسین (ع) هجرتین ۶۱-جی ایلی یزیدین علیهینه قیام ائتدی. یزید فاسق، تکبرلو و اسلاما دوشمن، یاد اولان بیر آدام ایدی. تأسف‌لر اولسون کی، زامانین گردیشی اونا پیغمبرین (ص) منبرینده یئر وئرمیشدی. امام حسین (ع) اؤزونون بوتون اصحابی ایله بیرلیکده عراقین کربلا چؤلونده شهید اولدوسا دا، عائله‌سی و یاخین‌لاری اسیر دوشدوسه ده، لاکن اونلارین بو عملی، یزید درونون غفلت یوخوسونا دالمیش مسلمانلارینی آییلتدی. مسلمانلار دینین مدافعه‌سینه قالخا‌راق، آردیجیل اولا‌راق قیام‌لار یاراتدیلار. بنی-امیه حاکمیتینی کؤکوندن لاخلاتدیلار. اونلار زامانین هئچ‌لیگینه یووارلاندیلار. ماراقلی‌دیر کی، عاشورا حادثه‌سیندن سونرا باش وئرمیش بوتون قیام‌لار “آل محمدین راضی‌لیغی نامینه! حسینین قانی نامینه!”?عنوانلی شعارلارلا باش وئریردی. و یا بو شعارلارین بیر چوخو حتی بنی عباسین ظالم و دین‌سیز حکومتی دؤورونده ده سسله¬نیردی.
امام حسین (ع)ین قانلی قیامی بوتون مسلمانلار اوچون، حتی غیر مسلمانلار اوچون ده، بیر نمونه اولا‌راق قالماقدا‌دیر. اونون “ذلت بیزدن اوزاق‌دیر!”، “حیاتین حقیقتی ایمان و جهاددیر!” کیمی شعارلاری، ظلمدن و آزغین دوشمندن قورتولوش یولوندا، وطنین و دین دوشمن‌لرینین مقابلینده مقاومت یولوندا ان گؤزل ایدئیا‌لاردیر. بیز امام حسین (ع)-دان مردلیک غیرت، ایثار، شهادت، شجاعت، عقیده، ایمان و س. بو کیمی اهمیت‌لی عبرتلر آلدیق. بیز حضرت حسین (ع)-دان باشی اوجا یاشایا‌راق، ظلمه و دوشمنه بویون اگمه‌دن مردانه حیات سورمک یاخود مرد کیمی اؤلمگی اؤیرندیک!
ممکن‌دور بعضی شخص‌لر “کربلا شهیدلرینه” کئچیریلن عزادارلیق مراسم‌لرینی صرف اولوب کئچیلمیش تاریخی بیر حادثه کیمی تصور ائتسین‌لر. بیز ایسه بو فاجعه¬نی اونوتماماقلا اؤز دینی وظیفه‌میزی یئرینه یئتیره‌رک، اونون یاشاییشیمیزین مختلف زامان‌لاریندا نئجه اهمیت داشیدیغینی بیلیریک. بو ایشین دینی جهتدن دوزگون اولوب-اولمادیغینا گلدیکده ایسه، تکجه بوتون مسلمان دونیاسیندا مشهور اولان –“حضرت محمدین (ع) اصحابی‌نین سیدالشهدا حمزه‌یه (ع) یاس ساخلاماسی، عزادارلیق مراسم‌لری کئچیرمه‌سینی یادا سالماق کفایت‌دیر. بوتون مشهور تاریخ کتاب‌لاریندا یازیلمیش‌دیر: “آللاهین رسولو محمد (ص) انصاردان بیرینین ائوی‌نین یانیندان کئچرکن آغلاماق و وای-شیون سس‌لری ائشیتدی. گؤزلری یاشلا دولان پیغمبر (ص) بویوردو: “لاکن حمزه اوچون آغلایان یوخدور!” بو سؤزو ائشیدن سید ابن ماز “بنی عبدالاحمد” طایفه¬سی‌نین قادین‌لارینا پیغمبرین (ص) عمی‌سی حمزه‌نین ائوینه گئتمگی و اونون اوچون عزادارلیق ائتمگی تاپشیردی!” آیدین‌دیر کی، عزادارلیق تکجه حمزه اوچون دگیل دوغروسو بوتون مسلمان شهیدلرینه عایید ائدیلیر. بیز شهیدلرین خاطره‌سینی دایم ایندیکی و گله‌جک نسیل‌لر اوچون قورویوب ساخلامالی¬ییق.
نوشته شده توسط admin در چهارشنبه, ۱۵ آبان ۱۳۹۲ ساعت ۵:۱۸ ق.ظ
