سون دقیقه ده توی

مرتضی مجدفر
آنادیلیمیز: من بیلمیرم نییه بو جاوانلار رسم رسوماتی پوزورلار؛ تویون آراسیندا بیردن هامی غیب اولوب!
بو سؤزلری سخاوت کیشی، ائلین آغ ساققالی سؤیله ییردی. هامی اونو اؤزلرینه بؤیوک بیلیردی و اونون دئدیکلرینه و اؤیودلرینه قولاق آسیردیلار.
او، آراز قیراغیندا یئرله شن “خان قیشلاق” کندی نین، نئجه دئیرلر کندخوداسی ایدی. اوگونلر خان قیشلاق کندی نین شن گونلری ایدی: بایرام گونلری، طبیغتین یئنی دن چیچکلنمه سی، هم ده بیر یئرده اوچ توی.
آذربایجان، هم ده تهران و دیگر شهرلرین دؤورد بیر یانیندا یاشایان خان قیشلاقلی لار، اؤزلرینی کنده یئتیرمیشدیلر. کوره کنلرین ایکیسی تهراندا ایشله ییر، باشقاسی ایسه کندده یاشاییر و ایشله ییردی. گلین لرین بیری تهراندا، باشقاسی تبریزده و اوچونجوسو ایسه کندده اولوردولار.
بایرام گونلری اولدوغونا گؤره ، مدرسه لر تعطیله اوغرامیشدیر. ائله اونا گؤره، عائله لرین بیر چوخو مدرسه اوشاقلاری ایله برابر کنده گلمیشدیر. کند، هر بیر زاماندان های – کویلو و سس – سمیرلی ایدی.
یئنه ده سخاوت کیشی حیرصله دانیشماغا باشلادی: “قدیم زمانلار، یئددی گون، یئددی گئجه توی توتاردیق.
ایندی بیر گون، بیر گئجه یه ده داوام لاری یوخدور. آشیقلار یئددی گون، یئددی گئجه چالیب، اوخویاردیلار. ایندی بیر – ایکی ساعات چالاندان سونرا، دییرلر: “باشقا کندده تویوموز وارب، اورایا گئتمه لی ییک… منه باخ! گؤز نه لر اومورام… آشیقین حوصله سی اولمایاندا، جاوانلارین حوصله سی اولاجاقدیر؟!”
هئچ بیر کیمسه، سخاوت کیشی یه بیر زاد دئمیردی. او دا کندین مئیدانچاسیندا گؤزه ا فرشلر، گولدانلار و چؤل گوللری ایله بزه نن توی بساطیندا اوتوران اوچ – دؤورد قوجا کیشی – آروادین سؤزلری ایله بئزیکدیریردی:”توی دا قدیمکی تویلار. توی دا گره ک سحردن آخشاما قده ر، گئجه دن سحره قده ر زیرنا – بالابان چالینا، سازلارین جینگیلتیسی گؤیلره قالخا و آشیق خوش نغمه لری ایله اوره کلری صفالاندیرا. یئییب – ایچمه، دئییب – گولمه، دانیشیب – داورانماق دا باشقا بیر سؤز…”
توی ناهاری یئییلدیکدن سونرا، ائله ساعات اوچ حدودلاریندان، سخاوت کیشی دئدیگی کیمی، هامی بیردن غیب اولموشدولار و سس – سمیر هر بیر یئردن کسیلمیشدی. معلوم دگیلدی نئچه ساعات قاباق، کندین مئیدانچاسیندا قیمیلدایان جماعت هارایا گئدیبدیر؟!
-آی اوغلان اباصلت! داها من داریخدیم. بو جماعت قاییتمایاجاقدیر، توی بساطینی ییغیشذیرین…
بو سؤزلری اوغلو اباصلته دئین، یئنه ده سخاوت کیشی ایدی.
اباصلت دئدی: “آقاجان! داریخما، آللاه قویسا بیر آز سونرا شنلیکله بورادادیر…”
اباصلتین سؤزو آغزیندا قورودو. کندین ائولریندن “قول” سسی و گورولتولو آلقیشلار گؤیه قاخدی. اباصلت، ایکی اللرین گؤیلره قالدیریب، آللاها شوکورلر ائتدی.
بیر آز سونرا توی مجلیسی، یئنه ده قاباقکی جمعیتله دولدو. هامی شن و گولر اوزلو ایدیلر. خان قیشلاقلی آشیق حسین ده، جماعتین آراسیندایدی.
او، سازینی جینگیلده دیب، بئله دئدی:”اوچ کوره کن، اوچ گلینیمیزین تویو، تیراختوروموزون سون دقیقه ده کی تویا اوخشار قولو ایله داوام ائده جکلر.
بیلیرم هامینیزین ایش – گوجونوز واردیر و داها بو گونلر قاباقکی کیمی یئددی گون، یئددی گئجه توی توتا بیلمیریک. آنجاق سخاوت کیشی نین ساغلیغینا، بیگ و گلین لریمیزین صفاسینا و تراختورون غلبه تاپماسی اوچون، یورولماسانیز، صاباح سحره دک سیزه چالاجاغام.”
سخاوت کیشی نین اوزو و گؤزلری گولدو. او بئله دوشونوردو کی نئجه اولار آذربایجانلی لارین، توی – دوگون لری همیشه تیراختورون اویون گونلری ایله برابر اولسون.