سوسیال خستهلیکلره کولتورل درمان‌لار گرک!
سوسن نواده‌رضی
آنادیلیمیز: سوسیال گووه‌ن‌لییین بیر چوخ بویودلاری واردیر.
بو گووه‌ن‌لییی قورویوب آرتیرماق اوچون ان اساس قایناق‌لاردان بیری، هر هانسی توپلوم‌دا، اویقون، گنه‌ل اجرا اولونا بیلن، و او توپلومون سوسیال احتیاج‌لارینا اویان قانون‌لارین وار اولوشودور.
جامعه‌نین عمومی روحونا آیقیری اولان قانون‌لار، جماعتین قارشی‌لیقلی داوارنیش‌لارینی تنظیم ائدیب دوزه‌نه سالماغا گوجو یئتمز، چونکی جماعت او قانون‌لاری نه مشروع بیلر، نه اعتبارلی سایار.
اویقون قانون- قایدالار، سوسیال یاپی‌نین فورمالاشماسی‌نین یاتاغی‌دیر.
توپلوم‌سال دوزهن اولدوقجا اهمیت‌لی‌دیر. هر جامعه‌نین دایانیق‌لیغی و داوامی اجتماعی دوزه‌نین قورونماسینا باغلی‌دیر.
هر بیر توپلومون گلیشیب بؤیومه‌سی، دوزهن و گووه‌ن‌لییه باغلی‌دیر؛ دوزهن و گووه‌ن‌لیک ایسه، اینسان‌لارین نورم‌لار، قایدالار و ده‌یرلره دایانان یاسال و دوزه‌ن‌لی داورانیش‌لاریندان دوغار.
قانون‌دان قاچینیب، قانون‌لاری دؤور ویریب، نورم‌لاری سیندیرماق اجتماعی بیرلییی، دایانیشمانی و گووه‌ن‌لی‌لییی پوزار.
قانون‌لار، هر کیمین طرفیندن گؤرمزلیک‌دن گلیب، چئینه‌نسه، قاریشیق‌لیق، هرج- مرج و عئیبه‌جرلیک‌لردن باشقا بیر سونوجا چاتماز، بئله بیر اولای ایله قارشیلاشان توپلوم ایسه، گلیشمه‌یه، اولغون‌لاشماغا، دینج‌لیک و باریشا یئتیشمک اوچون اولدوقجا چتین‌لیک‌لره دوشر.
ایکینجی موضوع ایسه، قانون‌لارین اویقولانماسی (اجرای قانون)دیر.
تصویب اولونان قانون، هر جامعه‌نین سیاسی- اجتماعی شرایطینده، کسین اولاراق اویقولانما قابلیتی اولمالی‌دیر، قانونو اجرا ائلمه‌یی مومکون‌سوز ائله‌ین هئچ بیر مانع اولمامالی‌دیر.
قانونو اویقولاماق (اجرا ائتمک)، و قانون قویان‌لارین اونا اصرار ائتمه‌سی، هابئله قانون اویقولایان‌لارین دا قانونا عمل ائتمه‌لری قانون‌لارا اعتبار قازاندیرار.
بیر قانونو تصویب ائدیب اونو اجرا ائتمه‌مک او قانونون مشروعیتینی شوبهه‌لر آلتینا آپاریب قانون‌لارا قارشی گووه‌ن‌سیزلیک یارادار.
بو ایسه، قانونون اعتبارسیزلاشماسی آنلامینا گلر کی، توپلوم حیاتیندا اولدوقجا قورخونج ائتگی‌لر بوراخا بیلر.
اؤلکه‌میزده، سوسیال گووه‌ن‌لیکده یارانمش اولان گرگین‌لیک‌لر قانون‌لارین یئترسیزلیییندن قایناقلانیر.
قانون‌لارا اساسن، احقاق حق پروسه‌سی ایران‌دا اولدوقجا اوزون و چتین‌دیر.
بو مسئله سوسیال گووه‌ن‌لییی هده‌له‌ییر.
بوندان علاوه، وطنداش‌لاری قانونا کؤتومسر (بدبین) و گووه‌ن‌سیز ائدیب، قانونی مرجع‌لردن حاق‌لارینی آلا بیلمیه‌جک‌لرینه ایناندیریر.
بو دا، اؤز اولومسوز اثرلری ایله، توپلومون ساغلام‌لیغینی خطره سالیر.سوسیال خستهلیکلره، کولتورل درمان‌لار گرک!
نوشته شده توسط admin در دوشنبه, ۲۲ دی ۱۳۹۹ ساعت ۱۰:۳۸ ق.ظ
