زهری بدندن نئجه آلماق اولار؟
عبدالصمد ملکی
مختلف سمّ‌لر و هوا چیرکندیریجی مادّه‌لرین تولیدی بو گونکی صنعتی دنیاسی‌نین دغدغه‌لریندندیر. انسان و سایر موجوداتین یاشاییشینی خطره سالان زهرلی مادّه‌لر. صنعتی چیرکندیرنلری تصفیه ائله‌مک، قورقوشوم، جیوه مادیوم و آرسنیک کیمی مادّه‌لرین زهری‌نین تمیزلنمه‌سی اوچون اَن مناسب یولدور.
بو سمّ‌لر انسانین بدنینه نئجه داخل اولور؟ و اونلاری بدندن نئجه چیخارتماق اولار؟
اوست-اوسته بدنده اولان زهلری ایکی دسته‌یه بؤلمک اولار: بیتکی سمّ‌لری، حشره داوالاری هوا چیرکلیگیندن عمله گلن آغیر فلزّلر و مختلف دخانیات کیمی بو زهرلرین بؤیوک قسمی ائشیکدن بدنه داخل اولورلار.
زهرلرین آیری قسمی‌ده، غذا و داوالارین بدنده تجزیه اولماسیندان تولید اولورلار.
سیگار چکماق بدنه زهر داخل ائله‌مگین بللی یوللاریندان بیریدیر، آما آیری یوللار دا وار کی مختلف زهلری انسانین بدنینه داخل ائلیر. تنفّس ائله‌دیگیمیز هوا، یئدیغیمیز غذا، ایچدیکلریمیز و آتدیغیمیز داوالار بدنیمیزه زهر داخل اولماغین آیری یوللاریدیر.
هابئله جسمی و روحی فشارلار بدنده بیر سئری زهرلرین تولیدینه سبب اولور.
ترله‌مه قاباغینی آلان اسپری‌لر، فلورسنت لامپلار، تصفیه اولموش قند و بزک و بهداشتی لوازماتی، بو زهلرین منبعی ساییلیر. بعضی ایچمه‌لیلرده یوخاری قندین اولماسی، دیشلری آرادان آپارماقدان علاوه بدنه چوخلو مقداردا سدیم کربنات داخل ائلیرلر.
کنسرو اولونموش غذالاردا اولان آرتیریلمیش مادّه‌لر گونده‌لیک بدنه داخل اولان زهرلردن ساییلیرلار. آیری طرفدن، حشره داوالارینداکی فلوراید و کلر چوخ راحت شکلده سودا حل اولوب انسانین بدنینه جذب اولور.
هابئله موبایل کیمی وسیله‌لردن عمله گلن مغناطیس دالغالاری‌نین معرضینده اولماق، بدنه ضرر وورا بیلن بیر سئری زهلرین تولیدینه سبب اولور.زهرلر بدنه داخل اولان زمان، بیرینجی اولاراق قره جیگر و سونرا بؤیرکلر اونو جذب ائدیب دفع ائله‌مگه چالیشیرلار. بو عمل غذانین داها یاخشی هضمی و بدنه لازم اولان انرژینی‌نین تأمینی اوچون فایدالی اولور.
تازا میوه و تره‌وزلرین گونده‌لیک مصرفی بدنین زهرینی آلماقدا، یوخاری نقشی اولا بیلر. مثلاً فیبر، کربوهیدرات و آنتی اکسیدنلا دولو اولان مادّه‌لرین مصرفی، بدنه، سمّلرین دفیعینده کؤمک ائلر.
فیبرلر باغیرساقلارین حرکتینی آرتیرماقلا و آیری طرفدن باغیرساقلاردا اولان سمّ‌لره یاپیشماقلا بدنده‌کی سمّلرین دفع سرعتینی آرتیریرلار.
بدنین زهرینی آلماقدا تأثیرلی اولان مادّه‌لردن بیتکیلرده اولان کلروفیلدیر کی بیتکیلرین فتوسنتز پروسه‌سینه کؤمک ائلر. بئله اینانیلیر کی، بو مادّه‌نین ملکول قورولوشونون هموگلوبینه اوخشاماسینا گؤره، او، انسان ساغلاملیغینا فایدالیدیر. کلروفیل قان آخیمی‌نین تمیزلنمه‌سینه آغیز ایی‌نین محو اولماسینا، سرطانلی مادّه‌لرین تأثیرسیز اولماسینا و دیشلرین چورومه‌سی‌نین قاباغینی آلماغا سبب اولا بیلر.
کلروفیل، استالید زهرلرینی (یورقونلوق عاملی) و هیستامینلری (آلرژی عاملی) دفع ائله‌مکله انسانین یاشاییشینا مثبت تأثیر قویور.
دنیانین کلروفیلدن لاپ غنی مادّه‌سی یاشیل یوسوندو، ائله بونا گؤره ژاپنلی‌لار بو مادّه‌نی چوخ مصرف ائلرلر. بو یوسونلاردا اولان کلروفیل، فیبر و پلی ساکاریدلی ترکیبات، بدنده اولان آغیر فلزّلر و حشره سمّلریندن قالان زهرلر و سایر چیرکلندیرنلرله قاریشیب، اونلاری مدفوع یولو ایله بدندن دفع ائلر.تحقیقلرین نتیجه‌سینه اساساً بیر آی بویوندا گونده‌لیک ۳-۲ گرم یوسون مصرفی، انسان بدنینی زهرلردن تمیزلیر.آیری طرفدن بیتکی فیبرلری، غذانین داها یاخشی هضمینه فایدالی اولورلار و باغیرساقلارین طبیعی حرکتینی آرتیرماقلا یبوست کیمی مشکل‌لری آرادان آپاریب هضم سیستمی‌نین داها ساغلام اولماسینا کؤمک اولورلار.
آشاغیداکی مناسب غذا رژیمی ایله هضم سیستمینی ساغلام ساخلاماق و اونا زهرلرین دفعینده کؤمک ائله‌مک اولار:
۱٫ فیبرلی غذالارین یئمه‌سی.
۲٫ گونده‌لیک یاشیل چای و تازا لومو سویو ایچمک.
۳٫ C ویتامینلی اولان مادّه‌لرین یئمه‌سی. بو ویتامین گلوتاتیون تولید ائله‌مکله بدن زهرلرینی دفع ائله‌مگه کؤمک ائلر.
۴٫ گونده‌لیک ۸ لیوان سوی ایچمک. چونکی سو طبیعی اولاراق بدنین زهلرین و لازم اولمایان مادّه‌لرینی سودوک و تر یولو ایله دفع ائلر. ترله‌مگی آرتیرماق اوچون سونا لاپ گؤزل یولدور.
۵٫ اضطرابسیز و مثبت انرژی ایله دولو یاشاییش.
۶٫ درین نفس آلماق و اکسیژنین بدنه داخل اولماسی.
۷٫ ورزش و فیزیکی فعالیت. گونده‌لیک بیر ساعت ورزش بدن زهرلری‌نین دفعینه لاپ گؤزل یولدور. ورزش زمانی نفس آلماق یئیینلشیر و قان آخینی آرتیر. نتیجه‌ده ترله‌مک و سودوک مقداری چوخالیر.
۸٫ ساریمساق، کلم، جعفری، کنگر، قند چوغوندورو و ساری کؤکون مصرفی، بدنه زهرلری مخصوصاً قورقوشوم و جیوه‌نی دفع ائله‌مکده کؤمک اولار.
۹٫ قیرمیزی رنگده اولان میوه‌لر بدن زهرینی آلماق اوچون اَن تأثیرلی مادّه ساییلیرلار. بو میوه‌لر پتاسیم‌دان دولو اولورلار و قارا جیگرین تمیزلنمه‌سینده تأثیرلیدیلر.
نوشته شده توسط admin در دوشنبه, ۰۵ اسفند ۱۳۹۲ ساعت ۵:۰۵ ق.ظ
