دونیادا بایرام عنعنه لری
کوچوره ن:اکبرسعادت
آنادیلیمیز: آذربایجان و بیر سیرا تورک توپلولوقلاریندا یئنی ایلدن بیر آی قاباق، بایرام آیی ویا بوزآی آدلانیر. همین آیدا قدیم کوکلره مالیک اولان بیر سیرا عادت ـ عنعنه لر حیاتا کئچیریلیر. بوآی و یا بایرام آیی آذربایجاندا اولدوغو کیمی بیر سیرا تورک توپلولوقلاریندا دا اوخشار و اوزونه مخصوص فورمالاردا دوام ائدیر
کیریم تورک لرینده بایرام: بایرام عنعنه لری کیریم تورکلرینده ده چوخ یایقیندیر. ” کریم تورکلرینده گنج اوغلان و قیزلار آخشامدان سونرا قروپ ـ قروپ توپلاناراق کندین میدانیندا اود یاندیرارلار داها سونرا اودون اطرافینا توپلاشان گنجلردن بیر اوغلان سونرا بیر قیز، بیر ـ بیر هامیسی اودون اوستوندن آتیلارلار.
بایرام عنعنه لری کیریمدا بیر هفته دوام ائدر. اونلار بایرام مناسیبتی ایله قازانلاردا یومورتا قاینادیب مختلیف رنگلره بویارلار. بونلارین بیر حیصه سین اوزلری یئیر بیر حیصه سین ایسه نوروز بایرامی گوروشونه گله ن قوناقلارین اوشاقلارینا وئره رلر. کیریم تورکلرینده نوروز گولو ایله ده باغلی گوزل عادتلر واردیر. گنج قیزلار ساچلارینین اوزانماسی، کونوللرینین گنج قالماسی اینانجی اساسیندا ساچلارینا نوروز گولو تاخارلار.
بالکان تورک لرینده بایرام: بالکان تورکلریدنده ده یئنی ایل بایرامی ایله باغلی عمومی و بیر سیرا اوزه ل مراسیملر مووجوددور. ” بو گونون توره نلریندن بیری چول اگلنجه لریدیر. بیر گون قاباقدان حاضیرلیق گورولور بیر سیرا یئمکلر حاضیرلانیر، سوغان قابیغی ایله یومورتالار بویانیر و حاضیرلانان یئمکلر اگلنجه یئرینه گتیریلیر. اگلنجه لر دوزنله نیر، ماهنیلار اوخونور، گتیریلن یئمکلر یئییلیر. یومورتا قابیغی ایله عادته گوره دره و یا بولاقدان سو ایچیلیر.”
یوگوسلاویا تورک لرینده بایرام:کئچمیش یوگوسلاویا اراضیسینده یاشایان تورکلرده ده بیر سیرا اؤزه ل مراسیملر مووجوددور. باشقا تورک توپلولوقلاردا اولدوغو کیمی بونلاردا بایرام عادتلریندن مارتوفال آدلی اویون مووجوددور. بایرام قاباغی قیزلار نیت توتاراق بو اویونو حیاتا کئچیره رلر.
قاشقای تورک لرینده بایرام: قاشقای تورکلری ده نوروز بایرامینی طنطنه لی شکیلده قید ائدیرلر. نوروز بایرامی مناسیبتی ایله هامی تزه پالتار آلیر،بایراما حاضیرلیق گورور،بایرام آخشامی یاخشی یئمکلر بیشیریرلر و بایرام گونو بیر بیرلرینین گوروشونه گئدیرلر. ایلین تحویلیندن قاباق حنا ایسلادیب گئجه یاتمیش اوشاقلارین آیاقلارینا قویورلارو بایرام مناسیبتی ایله بیر ـ بیرلرینه هدیه لر وئریرلر.یئنی ایل بایرامی تورکوستان تورکلرینده ده چئشیدلی عادت عنعنه لرله کئچیریلیر. اویغور، قازان، اوفا و میشئر تورکلرینده نوروز گونو یاپیلان توپلاتیلاردا اولدوقجا ماراقلی بیر عادت گورونمکده دیر. یاز گلدیگی زامان اوزللیکله نوروز ـ ارگنه کون داستانی اوخونور. قازاق تورکلری نوروز بایرامیندا ائولرین باشدان باشا تمیزله ییر، هامی یئنی پالتارلارینی گئیینیر، او گونون سمبولیک یئمکلری بیشیریلیر و قوناقلیقلارا وئریلیر نوروز بایرمیندا مختلف اویونلار اوینانیر، اود یاندیریلیب اوستوندن آتیلیرلار و اسکی ایلین آغیرلیغی -خسته لیگیندن آیریلیرلار. بایرام بیر هفته دوام ائدیر.
سو ایله باغلی مراسیملر کئچیریلیر. قازاق قادینلاری گونشه سلام وئریر، بولاق باشینا گئدیب بولاغا یاغ توکوب، یئنی اکیلن آغاجلارا بویا چکیرلر. نوروز کوجه آدلی اوزه ل یئمک بیشیریرلر. -قیرقیزلار بایرامدا اود یاندیریب اوستوندن آتیلارلار، اوزلرین و اطرافداکی مال ـ قارانی اودون توستوسونه وئریب اسکی ایلین پیسلیکلری و خسته لیکلریندن تمیزلنمه لرینه دایر اینانج عادتینی حیاتا گئچیره رلر.
قیرقیز تورک لرینده بایرام:نوروز عادتلرینین اکثری قیرقیز تورکلرینده ده مووجوودور. اونلار نوروز گونو نوروز کوجه دئییلن بیر نوو یئمک بیشیره رلر. چینده یئرلشن شرقی تورکوستان اهالیسی ـ اویغور تورکلری ده یئنی ایلی طنطنه ایله قید ائدرلر. ایلین سونوندا خالق یئنی ایلین و باهارین شرفینه نوروزنامه دئییلن قوشقو و بیتلر حاضیرلار، بایرامین ایلک گونو بیر یئره توپلاشیب مختلیف اویونلار، دانس گوستریلری حیاتا کئچیریلر، شعرلر اوخونار، اوزه ل یئمکلر بیشیریلر.
اویغور تورک لرینده بایرام: اویغورلار آراسیندا گنج قیزلار نوروز صاباحی بولاق باشینا گئدیب، بورادا نیت توتار و گله جکلرینی آیدینلاشدیرماغا چالیشارلار.”آلتای تورکلرینده ده بایراملا باغلی ماراقلی مراسیملر مووجوددور. ” گون دوغماغا باشلایینجا انسانلاراوجاقلاریندا اود یاندیرار بایرام یئمکلرینی حاضیرلاماغا باشلار.”
قبرس تورک لرینده بایرام:قبرس تورکلری ده یئنی ایل بایرامینی مختلف عادتلرله گئچیریرلر. ایلک اوخول اوگرنجیلری معلیملرینین نظارتینده چول و باغلارا چیخیب، سو قیراقلارینا گئدیر و قدیم بایرام عادتلرینی یاشادیرلار. او گون اوچون سوغان قابیغی و چیچکلرله یومورتا قاینادیلیب بویانیر، مختلف یئمکلر بیشیریلیر و اوشاقلار دوزنلی سیرالارحالیندا ال-اله توتوشاراق ماهنیلار سویلر و تام بیر بایرام هاواسی ایچینده چول و باغ- باغاتا گئدیرلر.
نوشته شده توسط admin در چهارشنبه, ۲۶ اسفند ۱۳۹۴ ساعت ۶:۰۵ ق.ظ
