ساواش چی
کوچوره ن:اکبرسعادت
آنادیلیمیز:گئجه یاریسی ایدی. بوتون قاریشقالار یاتمیشدی. یاغیزلار دا یورغونجا یاتمیشدیلار.
قاریشقالار اولکه سی لیملی نین مئیدانلاریندا بویوز گوزتچیلر دولاشیردی. آنا- بالا آغریدان یاتا بیلمیردیلر. اولگن آناسی نین یانیندا اوزانیب فیکره دالمیشدی. سسسیزجه آناسی نین قولاغینا «آنا، منیم آتام کیمدیر؟ آتام هاردادیر؟» دئیه پیچیلدادی. آناسی ائشیتسه ده، اوزونو ائشیتمزلییه ووردو. اولگن سسینی یوکسلدیب »آنا، سندن آتامین کیم اولدوغونو سوردوم. ندن بیزی ساوونماسیز بوراخمیش؟« دئدی. یئنه ده آناسیندان بیر جاواب گلمه دی. اولگن یئریندن قالخیب »آنا، منیم سورولاریمی جاوابلامازسان، اوزومو اولدوره جه یم. منیم آتام کیمدیر؟ منیم کیملیگیم حاققیندا دانیش!« دئدی.
آنا یاغیز دیکسینرَک قالخیب یئرینده اوتوردو. اوغلونون بوینونا ساریلیب »اولگنیم، اوزونو نییه اولدورورسن؟ من گئرچکلری گئج-تئز سنه دئیه جکدیم. دوشونوردوم کی، زامانی گلمه لیدیر. سنین اوز آتانی تانیمان حاققیندیر. نئجه ناموسلو بیر یاغیزین اوغلو اولدوغونو بیلمن سنین حاققیندیر اوغلوم« دئدی. اولگن: ایندی تام زامانیدیر. سویله آنا جان، سویله! کیمدیر منیم آتام؟ ندن آرامیزدا دئییل؟ ندن بیزی بویوزلار قارشیسیندا ساوونماسیز بوراخمیش؟ هاردادیر؟ آنا یاغیز: یاخین گل، قولاغینا سویله مه لی یم بونلاری. بویوزلار دویماسینلار. یاخین گل اوغلوم، آتانین کیم اولدوغونو بیلمه زامانین گلمیشدیر دئمک. آنا یاغیز اولگنی باغرینا باسیب یارالارینی اوخشایاراق، آتاسی حاققیندا گوندوغانا قدر بویله دانیشدی:
سئوگیلی اوغلوم، سنین آتان چوخ ناموسلو یاغیزدیر. آتانین آدی بیلآیدیر. آتان، یاغیزلار تاریخینده اولان آلپرنلردن بیریدیر. آلپَرَنلیک یاغیز توره سینده بیر چوخ اوزللیکلری اوزونده باریندیرماقدادیر. بیلگه لیک، ارَنلیک و دوغرولوق یولوندا ساواشچیلیق کیمی، اوستون اخلاق اوزللیکلری آلپرنلره اوزگودور. سنین آتان دا بیر آلپَرَن. لیملیده قاریشقالار آراسیندا باریش وار ایدی. بویوزلارلا یاغیزلار باریش ایچینده دوستجا یاشاردیلار. او دونمده اولکه نین یونه تیمی یاغیزلارین الینده ایدی. نه اولدویسا، لیملی نین یؤنه تیمی یاغیزلاردان بویوزلارا کئچدی. بویوزلار یاغیزلارا اوزگو نه وارسا، هامیسینی یوخ ائتمه یه باشلادیلار. اسکیلردن قالما بوتون یازیتلاریمیزی، اویقارلیقلاریمیزی سیلدیلر. آتان بیلآی دا یاغیزلارین آلپرن ساواشچیسی ایدی. اوزللیکله آلپرنلری تکله ییب اوردا-بوردا اولدوروردولر. اونلارجا آلپَرَن یاغیزین جسدلری لیملی نین گئنباجا، قوشاباجا، ایشیقچیخماز، باشباجا، سولوباجا کیمی اوروشلرینده تاپیلدی. آتانین چوخ یاخین دوستلارینی اولدورموشدولر. یاغیزلارین دا دوشونجه سینی، دویغولارینی دَییشیک یونته ملرله بویوزلاشدیریردیلار. بوتون آلپَرَن یاغیزلار گؤزَتیم آلتینا آلینمیشدی. آتانی دا گوزَتله ییردیلر. او زامان من سنه گبه ایدیم. آتان »بالامیزین کوله لر کیمی بویومه سینی ایسته میرم« دئییردی. بیر گئجه آتان منه بیز یئنیلدیک. بوتون آلپَرَن یاغیزلاری تکله ییب اولدوردولر. بونلار منی ده اولدوره جکلر. آلپَرَن یاغیزلار اولدورولدوکچه، یاغیزلارین تاریخ بیلینجی ده یوخ اولاجاق. من لیملیدن قاچماق ایسته ییرم. ایده لی اولکه سی ایله لیملی آراسیندا چَرَنبیل آدیندا بیر داغ وار. اوردا گئدیب یاشایاجاغام. اوغلوم دونیایا گلیب بویودویونده منیم اوردا یاشادیغیمی اونا سویلرسن. بویوزلارین آشاغیلامالارینا اوغرادیغیندا منی آختاریب تاپسین. تکباشیما ساواشسام دا یئنیله جه یم. یاغیزلارین قورتولوش دوشونجه سی اولان آلپَرَنلیک، سویوموزدان سیلینسه، بویوزلاشیب یوخ اولاجاغیق. چَرَنبیل داغیندا آلپَرَنلیک دوشونجه سینی یاشاداجاغام. یاغیز گنجلرین گلیب منی آراییب تاباجاقلارینا امینم. اوغلوموز اولدوغوندا آدینی اولگن قوی. اسکی یاغیز توره سینده اولگن قوتسال آد اولموش. اولو تانری نین آدلاریندان بیری اولموش. اولگن بویودویونده یاغیزلارین تاریخدن سیلینمه سینی اونله مک اوچون بویوک ساواشا قاتیلمالیدیر. اولگنه سویلرسن آتان بویله ایسته میشدی. بویله اولمازسا، آتالیق حاققیمی اونا باغیشلامارام سویله دی آتان» دئدی. اولگن آناسی نین قوینونا گیرمیش، آناسی نین پیچیلدایاراق سویله دیکلرینی دیقتله دینله ییردی. دینله دیکچه، ایچینده سانکی ایلدیریملار چاخیردی. بویله آتاسی نین اولدوغونو اویرندیکچه، ایچینده غورور دویغولاری دالغالانیردی. گنج اولگنین، سانکی دیلی توتولموشدو. اویرنمه سی گرکن نه قدر بیلگیلر وار ایمیش. آتاسینی گورمه ایسته یی ایچینی یاخیردی. یارالاری نین آغریلارینی اونوتموشدو. آتاسی حاققیندا داها دا گئنیش بیلگی اویرنمک ایسته ییردی. آناسی نین بوینونا ساریلیب قولاغینا »آنا، آتامدان دانیش. سونرا نه اولدو؟« دئدی. آنا دا اوغلو اولگنه آتاسی بیلآی حاقدا دانیشماق ایسته ییردی. سانکی آنانین ایچیندن بیر سس »اوغلونا آتاسینی آنلات!« دئییردی. بو اوزدن ده آنا، اولگنین آتاسی حاقدا درین ایلگی ایله دانیشیردی. آنا داوام ائتدی: آتان بیلیردی گئج-تئز اونو دا توتوقلاییب اولدوره جکلر. چونکو بویوزلار یاغیزلارین تاریخی آنیلارینی بیلن بوتون آیدین آلپَرَنلری اولدورمگی عاغیللارینا تاخمیشدیلار. آتان ساواشچی آلپَرَنلیگینی بوراخیب بویوزلارا یوک داشییان کوله اولا بیلمزدی. بونا اونون آلپَرَنلیک بیلینجی و اردمی ایذن وئرمزدی. بو اوزدن ده لیملیدن اوزاقلاشیب داها اوزاقلاردا یاشاماق ایسته ییردی. آنجاق لیملیدن نئجه اوزاقلاشاجاغینی بیلمیردی. چونکو بوتون یوللاری بویوزلار گوزَتمَکده ایدیلر. آلپَرَنلیک توره لرینی بیلن یاغیزلاری گوزَتیردیلر. بویوزلارین باشآلان آدیندا باشچیلاری آلپَرَن یاغیزلارین اولدورولمه سینه بویوروق وئرمیشدی. بیر چوخ یاغیزین باشینی قوپاردیغیندان دولایی اونا »باشآلان« لقبی تاخیلمیش. ایندی ده باشآلان آلپَرَنلرین اوغوللارینی، تورونلارینی اولدورمکده. بویوزلار دوشونورلر کی، آلپَرَنلیک آنیسی یاغیزلاردا یئنیدن باش قالدیرا بیلر. اونا گوره ده آلپَرَن سویوندان اولانلاری گوزَتیم آلتیندا ساخلاماغا چالیشیرلار. بو اوزدن ده گوزل اوغلوم سنین ده یاشامین تهلوکه آلتیندا. اولگن: آنا، آتامدان دانیش، داها چوخ دانیش..
آنا: بله اوغلوم، آتان بیر گئجه لیملیدن اوزاقلاشماغا قرار وئردی. قیلیجینی آلیب سسسیزجه، قارانلیقدان یارارلاناراق یووادان چیخدی. لیملی نین دوغوسوندا بایقوشیوواسی آدیندا قورخونج بیر دره وار. آتان بایقوشیوواسینا چاتدیغیندا آی دوغموش. آیدینلیقدا بویوز گوزَتچیلر آتانی گورموشلر. آنا قاریشقا کوکس اوتوروب بیر آز سوسدو. صبیرسیزلیکله اولایلارین آخیشینی بیلمک ایسته ین اولگن»سویله، داها نه اولدو، آنلات آنا جان، آنلات. آتامین باشینا بایقوشیوواسیندا نه لر گلدی؟« دئدی. آنا: بایقوشیوواسیندا بویوزلار آتانا «یاغیز بیلآی، قیلیجینی بوراخ تسلیم اول!» دئمیشلر. آتان دا »«آلپَرَن یاغیزلار تسلیم اولمازلار. گوجونوز یئترسه، گلین تسلیم آلین« دئمیش. بویوزلار آتانا سالدیرمیشلار. آتان بویوک ساواشلارین اوغورلو باشچیسی اولموشدو اوزون زامانلار. بایقوشیوواسیندا ساواش باشلامیش. بویوزلار آتانا سالدیرمیشلار. آتان اوچ گون اوچ گئجه بویوزلارلا ساواشمیش. لیملی نین اورتاسیندا باشآلان بویوزلاری توپلاییب اونلاری آتانلا ساواشا گوندردی. لیملیده اولاغان اوستو دوروم اولوشدورموشدولار. بایقوشیوواسیندان قیلیج سسلری لیملیده ائشیدیلیردی. یاغیزلارین آلپَرَنلیک اینانجیندا بویوز بیله اولسا، قاریشقا اولدورمک دوغرو دئییلدیر. اونا گوره ده آتان، یالنیز بویوزلاری یارالاییر، اونلارین قیلیج و سونگولرینی ووروب سالیرمیش. یوزلرجه یارالی بویوزو لیملی نین اورتا یووالارینا داشیییردیلار. یارالانانلاردان اولنلر ده اولوردو. لیملیدن بایقوشیوواسینا بویوز عسگرلر آپاریلیردی. بایقوشیوواسیندا ساواشین اوچونجو گونونده آتانین آرخا آیاغینی یارالاییرلار. آلپَرَنلیک ساوونماسیندا، یالنیز اولومونو اونله مک اوچون قاریشقا اولدورمک اولار. آتان بو دفعه بویوزلارلا اولوم-دیریم ساواشینا گیریر. یارالانمیش آتان بویوزلاردان یوزلرجه سینی اولدورور. آنجاق آتانین یاراسیندان قان آخدیقجا گوجسوزلشیرمیش. اوچونجو گونون سون ایدی. گون لیملی نین قاراوول تپه لری نین آرخاسیندا باتماق اوزره ایکن، دوغودان دا قارا بولودلار گویلرده یاییلیردی. قورخونج ایلدیریملار چاخدی. بایقوشیوواسیندا ساواش داوام ائدیردی. آنجاق ایلدیریملارین شاققیلتیسی قیلیج سسلری نین ائشیدیلمه سینی اونله میشدی. سرت یاغمور یاغماغا باشلادی. لیملی نین هر طرفینده قاریشقالار یووالارینا سوخولدولار. بایقوشیوواسینداکی ساواش دا دورموشدو. داها سونرا نه اولدوغونو بیلمیرم. آتان بو یاغمور توفانیندان یارارلاناراق، اورتادان چیخیب چَرَنبیل قایاسینا گئتمیش. من بویله دویدوم. نئجه چیخماسی، چَرَنبیل قایاسینا یارالی اوالاراق، نئجه چاتماسی ایله باغلی بیلگیم یوخدور. ایندی آتان اوردا یالنیز یاشاییر. دئییلنه گوره ساریتیکانلاردان قوتسال قیلیجلار دوزلدیرمیش. بویوزلارین دا تک قورخدوقلاری آتاندیر. چونکو آلپَرَنلیک توره سی نین نه اولدوغونو ان دوغرو بیلن اودور. باخ بویله بیر کیشیدیر سنین آتان اولگنیم. آنا، اولگنین آتاسی حاقدا گرکن بیلگیلری اوغلونا وئرمیشدی. اولگن صاباحا قدر یاتا بیلمه دی. گوزلری قارانلیقدا پارلایان اولگن سورکلی چَرَنبیل قایاسیندا یالنیزباشینا یاشایان آتاسینی دوشونوردو.
نوشته شده توسط admin در چهارشنبه, ۳۰ تیر ۱۳۹۵ ساعت ۳:۵۹ ق.ظ
