مَشقَت

علی اشرف درویشیان
سون بولوم
آنا دیلیمیز: اودون دؤوره سینده اوتوردولار و پالتارلاریندان بوغ قاغزاندی . خالو پیچاغینی سورتدو دیرناغی نین دالینا. اوغلان جیق تیتره ک ال لری له ، گؤلون او تایینی گؤستردی و قورخا – قورخا دئدی: ” اوردا نیزارین دالیندا …” خالو او طرفه باخدی .
” ها ! اوردا نه اولوب ؟ “
” اوردا شیکارچی لار ، چوخ اؤلدوردولر .”
خالو بالاجا اوغلانین اوزونه باخیب مات قالدی .
” نییه رنگین چیلوار کیمی آغاریب .گل گؤستر . نه اولوب قارداشیم ؟ “
او واخت کی او نوقطه یه یئتیریلر کی اوغلان نیشان وئریردی ، آیاقلاری آلتیندا قانلی یاغیشلی بیر آرخ آخیردی . خالو اَییلدی :
” شیکارچی لار ! اودا سحرین بو تئز لی یینده !؟”
اوغلان جیق اَسدی :
” گولله سسی گلدی … دالبادال ! سئیره لر و سو قوشلاری چوخ قورخدولار . اونلار …”
” حتمن مارال لاری ووردولر . بیر بؤیوک سورو ! “
اوغلانجیق هله ده حئیرانلیق ایچره ایدی .
” سگگیز نفر ایدیلر “
” کیم لر؟ “
” مارال لار . حتمن یوخو زاد گؤرموشم .”
و قیزدیرما توتموش گؤزلرینی آووشدوردی :
” بیر جور دانیشیردیلار کی هئچ قانمیردیم .”
خالو یئرده اوتوروب الی نن پالچیق لاری قاریشدیردی :
” بونلار ، آدام آیاق لاری نین ایزی دی . چوخ ایدیلار .مارال لاردان بیر ایز یوخدور .”
وشهادت بارماغی نان ، پامبوق تک آغ و گچ کیمی یوموشاق بیر شئیی آرخ دان گؤتوردو :
” باشلاریندان گولله ووردولار . یاخین دان ! “
آزجا دوشوندو و نیزارا باخیب تومدو :
” اونلاری بیردن بیره گیره سالیب لار . “
اوغلان جیق دئدی : ” حتمن “
هر ایکی سی قوجاق دولو نی له اودون کنارینا کی داها آلاوی سؤنوردی قاییتدیلار . خالو باشلادی ” دوزَله ” ** قاییرماغا و اوغلان جیق ، نی لرین باش آیاغی نی کی کسمیشدی مرتب ائتدی و چووالینا قویدی . خالو نی لرین بیرینه دقت له باخدی :
” باخ بورا نی لرین اوستونه قان سیچراییب .”
اوغلان جیق ، نی لری الینده فیرلاتدی :
” ننه م دئییردی کی هروقت نیزار دا ایلدیریم شاخسا ، نی لر دولارلار قان لکه سین دن .”
” دوز دئییب دی . منده ائشیت میشم . ” و بیر تیکه قیرمیزی اود گؤتوردی و اونو پوفله دی کی آلاولانسین و سونرا فاصیله – فاصیله نی ین صاف اوزونو یاندیردی و بیر ردیف ده اونو دلدی . دلینمیش نی لردن ایکی سینی یان یانا قویدو و موم لا بولاشان بیر ایپ له ، اونلاری محکم باغلادی . سونرا ایکی قیسا و نازیک نِیی ، پیچاق ایله قدده دی و اونلاری سالدی دلینمیش نی لرین آغزینا واِهمالجا دئدی : ” یاخشی دوزَله اولدی .” اللرینی اودون اوستونده قیزدیردی . باش اؤرتویونو کی هله نم ایدی باشینا باغلادی و ” دوزَله ” نی دوداغینا قویدو .
” دوزَله ” دن حزین بیر موسیقی سسی چیخدی و بیردن بیره نیزار و دونیا آرام اولدو تا سسی هر یئره چاتسین :
” نی چالان چال
چال کوچه باجادا
منی اؤلدوردولر نیزار دا .”
خالو ” دوزَله ” نی تئز دوداقیندان چکدی و اوغلان جیق دان سوروشدو ” بیر نفر نیزار دا ماهنی اوخویوری . ائشیدیرسن ؟ اوغلان جیق کی هویوخاراق گؤزلرینی خالو یا تیکمیشدی دئدی : ” سن اؤزون ایدین کی اوخوردون !”
” من … من فقط ” دوزَله ” چالدیم .” و ” دوزَله” نه چوخ دقت لی و سای سالماقلا باخیب یئنی دن دوداق لاری آراسینا قویدو .
” نی چالان چال
نه خوش چالیرسان
چال کوچه باجادا
منی اؤلدوردولر نیزار دا .”
خالو چوخ تئز ” دوزَله ” نی جیبینده گیزلت دی :
” دوزدی ، هن .کیمسه اوزاق دان منیم ” دوزَله ” م له ماهنی اوخویور . نه قدر ده غوصصه لی اوخویور .”
***
صاباحکی گون بالاجا اوغلان نی لری اوستادی نین ائوینه آپاردی و اونون اؤنونه قویدو . اوستاد اونون قیرمیزی و قیزدیرما توتان گؤزلرینه باخیب اونون نازیک و یوموشاق اللرینی الینه آلدی .
” قیزدیرمان وار اوغلوم . ال لریندن اود یاغیر .”
اوغلان جیق اِهمالجا دئدی : ” دونن گئتمیشدیم نیزارا مشقت کسه م .ایلدیریم و یاغیش آلتیندا گیره دوشدوم . “
اوستاد باشینی دَبه دیب اوغلان جیقا سر مشق یازدی :
” بودا سرمشق ….نئچه گون قال ائوده تا حالین دوزه لسین . یازدیغین مشق لری نن باشینی دوموک ائله . “
اوغلان جیق بیر هفته ائوده قالدی و تب ایچینده یاندی . کئفی کی دوزَلدی ، یاتاقیندا اوزاناراق مشق لرینی یازدی و ایشی بیته رک گئتدی اوستادی نین یانینا و مشق لرینی اونا وئردی . اوستاد اونون خطّینی گؤره رک تعججوب دن آغزی آچیق قالدی :
” محشر ائلی ییب سن اوغلوم . بونلاری … بو خط لری سن یازیب سان ؟ “
اوغلان جیقین اینجه قولاق لاری مرجان رنگینه دؤندو :
” بلی اوستاد .”
اوستاد ین کی گؤزلری حئیران لیق لا کاغاذ اوستونده دولانیردی قاش قاباغین ساللایاراق دئدی : ” آما … بو …او …او سرمشق لر دئییل لر کی من وئرمیشه م . بونلاری هاردان …”
بالاجا اوغلان دئدی : ” تَبیم وارایدی . سانکی اؤز الیم ده دئییل دی … مَشقَت اؤزو کاغاذ اوستونده زویوردی . “
اوستاد گؤزلویونو گؤزونون اوستونده یئر به یئر ائتدی و گؤزون تیکدی اوغلان جیقین یازی لارینا :
” منیم قورخوم م م م یوخدور ر ر ر…
اگر بو رویا پریشان بیر یوخو تک ک ک ک کئچیرسه
یا بیر قیزدیرمانین هذیانی تک ک ک…
یا آچیق گؤزونن ن ن ن
یا غملی ی ی بیر جانی نان ن ن “
توزا بورونموش گؤزلری نن صفحه یه باخدی :
” نئچه یول لار ر ر ر ربیزی قانا بورودولر
یادا سال ل ل ل ل سال ل
و و و قیرقین لارین تکجه نتیجه سی ی ی ی…
بیر تیکه چؤره ک ک ک ک ایدی .کی یوغورتسوز ایدی و بیزیم برکت سیز ز ز ز سوفره میزین باشیندا ا ا ا “اوستاد بیردن بیره اؤزوندن چیخدی و بَتَر هیس لندی :
” من سنه دئمیشدیم کی هئچ واخت تب لی ووجو دونلا خط یازما گینا .”
اوغلان جیق بیر نِی ین دورولوغولا ، ناله ائتدی :
حالیم یاخشی ایدی اوستاد ، توختامیشدیم اوستاد .”
اوستاد چیغیردی :
” تب و هذیان !”
اوغلان جیق سئیره نین تیتره ک کوره یینه و آیاق لاری نین اَسَن تئله ک لرینه فیکیر لش دی و قو رخا قورخا دوداق لارینی ترپت دی :
” آللاه حققی اوستاد حالیم یاخشی ایدی . فقط آزجا حالی … حالیم … شاید … “
بالاجا اوغلانین سیماسی ائله صمیمی و معصوم ایدی کی اوستاد ین اوره یی یومشاندی و گؤزلرینی یازی لارا تیکدی . اوزاق کوچه لردن بیر زمزمه اوستادین قولاغینا یئتیردی . سانکی دونیانین بوتون قوشلاری ،” دوزَله ” نین موسیقی سی له اوخویوردولار :
” نی چالان چال
نه خوش چالیرسان
چال کوچه باجادا
منی اؤلدوردولر نیزار دا .”
اوستاد بو ماهنی نی ائشیده رک اوره یی سیخیلدی :
” مجبورام یئنه سنه سرمشق یازام . مشقَتین وئرمنه !” بالاجا اوغلان مشْقَت قلمی نی اوستادا وئردی . اوستاد اَیییلیب باشلادی خط یازماغا . ایشی کی قورتولدی قویدو اوغلانین اؤنونه :
” او جا سسی نن بیله مه اوخو .”
اوغلان جیق مخمل کیمی یاتیملی سسی له اوستادین ال یازماسینی اوخودو :
” منیم قورخوم یوخدور.
اگر بو رویا پریشان بیر یوخو تک کئچیرسه “
اوستاد چیغیردی : ” او سرمشق کی من یازمیشام اوخو.نه اؤز یازدیغین !”
اوغلان جیق اَسَن کیمی اولدی :
” بو … بو سرمشق سیزین دی اوستاد !:
اوستاد غضب له ورقه نی اوغلانین الیندن آلدی و اؤز ال یازماسینی گؤرجک ، دیکسه نن کیمی اولدو و مشقت قلمی نه کی الینده تیتریردی باخاراق حیرته دالدی :
” بو مشقت ! قا نا بله شمیش !”
اوغلان جیق تب لی گؤزلری له اوتاق دا کی کیلیمین رنگی سولموش قوشونا باخدی :
” ننه م دئیه ردی کی هرواخت نِیزاردا ایلدیریم ویرسا و دولو یاغسا ، نی لر …”
Arazazarbaijzn.anadilimiz@gmail.com