حق آلان احمد و حق وئرمز احمد

حاضرلایان: شبنم_توحیدی
آنا دیلیمیز:بیر گون وار ایدی، بیر گون یوخ ایدی. تانریدان سونرا هئچ کس یوخ ایدی. گونلرین بیر گونونده، ایکی احمد عمی وار ایدی. بیری »حق آلان احمد عمی« ایدی، بیری »حق وئرمه‌ین احمد عمی«!
حق وئرمه‌ین احمد عمی‌نین، بیر عباسی حق آلان احمد عمی‌یه بورجو وار ایدی. بو حق آلان احمد عمی، نئچه دفعه بورجونو ایسته‌میشدی، بو وئرمه‌میشدی. چوخ یوبانمیشدی! بیر گون حق آلان احمد عمی بیکار ایدی، اؤز- اؤزونه دئدی: »دوروم گئدیم حق وئرمه‌ین احمد عمی‌دن بیر عباسی‌می آلیم.« حق آلان احمد عمی، اُلاغین مینیب، بو کند، او کند، گئتدی یئتیشدی حق وئرمه‌ین احمد عمی‌گیله… حق وئرمه‌ین احمد عمی، اوستدن پنجره‌دن باخیردی. گؤردو وای دده، بو حق آلان احمد عمی‌دی! خانیمیسینا دئدی کی:– دئنن گئدیب سفره، چیخیب گئتسین. منه دئیرلر حق وئرمه‌ین احمد عمی!
حق آلان احمد عمی قاپینی دؤگدو. خانیمی‌سی گلدی قاپییا. دئدی:– بلی؟!
حق آلان احمد عمی دئدی:– منم، احمدین قارداشی.خانیم قاپینی آچیب، دئدی:– احمد عمی! قارداشین گئدیب سفره، معلوم دگیل بیر آی چکر، اون آی چکر، ائوده دگیل!
حق آلان احمد عمی دئدی:– نه ائله‌یک! اؤزو ائوده دگیل، ائوی کی، ائوده‌دی!
اؤزو، اؤزونو قوناق چاغیریب، گئچدی حیطه. آپاریب الاغ‌ین باغلادی طویله‌یه، اؤزو ده، اوتوردو چایدان، سودان ایچیب، سرینلدی، دوروب دئدی:– زن‌داداش!دئدی:– بلی!دئدی:– کولونگ وار سیزده؟دئدی:– نییه یوخدور، بویور! نه ائدیسن؟
دئدی:– لازیمیمدی.گئتدی باشلادی طویله‌ده بیر آخیر قازماغا! حق وئرمه‌ین احمد عمی‌نین، خانیمیسی گئتدی گؤرسون بو نه ایش گؤرور طویله‌ده! گؤردو بیردانا آخیر قازیر! دئدی:– احمد عمی، آخیری نئیلیسن؟ آخیر واردی دا!
دئدی:– منیم اُلاغیمین بالاسی اولاجاقدی. قارداش دا، معلوم دگیل نه واخت گله، اون گون سونرا گله، بیر ایل سونرا گله، ایکی ایل سونرا گله، اونون بالاسینا آخیر قازیرام.
آرواد گئدیب، دئدی:– کیشی! گل اؤزونو گؤرست، بونون بیر عباسی‌سینی وئر گئتسین، بو هله ایندی، الاغینین اولمامیشدان بالاسینا، آخیر قازیر! سنین بیر عباسیندان اؤترو من نه قدر بونا چای، ناهار، شام وئریم!
حق وئرمه‌ین احمد عمی دئدی:– بس اوجور! منه دئیرلر حق وئرمه‌ین احمد عمی! آخشام من گلیم، گؤزه گؤرسنیم. اونونلا گؤروشنده، من اؤزومو چیرپارام یئره، اؤلرم یالاندان، سیز منی آپارین قویون مرده‌شورخانایا، یا کنددن ائشیگه! خلاصه بو گؤرسون من اؤلموشم، چیخسین گئتسین!آرواد دئدی:– یاخجی.
آخشام اولدو. حق وئرمه‌ین احمد عمی، قاپینی دؤگدو. خانیمی‌سی دئدی:– احمد قارداش! ائله¬بیل قارداشین گلدی، قاپینی دؤگمه‌سیندن تانیییرام.
بونلار دوردولار پئشوازینا، اؤپوش- گؤروش، حق وئرمه‌ین احمد عمی غش ائله‌ییب، اؤزونو یئره ووردو. خانیمی‌سی شیون سالدی»ای وای اریم، ای وای اریم!« بو یاندان دا، احمد عمی دئییر: »ای وای قارداشیم!«
حق وئرمه‌ین احمد عمینی آخشام- آخشام یویوب، کفنلدیلر، آپاردیلار کنددن ائشیگه، قویدولار بیردانا پَیه وار ایدی، اونون ایچینه! دئدیلر کی، صاباح آپاریب، بونو قویلاریق. خوش گلدیز!!
حق آلان احمد عمی دئدی:– یوخ! من گئتمرم، من قارداشیمی هئچ واخت تک قویا بیلمرم. بو سؤزو دئییب، گؤردولر چاره یوخدور، بو قالدی قارداشی‌نین یانیندا، دئدی:– من بوردا قالیرم، بیردن شیطان گلر بونون ایمانینی الیندن آلار!احمد عمی گئچدی قدیم پیه‌لرده صاندیق اولاردی، گئچدی صاندیغین ایچینه، صاندیغی قویوبلار قبرین اوستونه!
گئجه‌نین بیر یاریسیندا، قیرخ حرامی‌لر، بیر خزانه کسیب، گتیریب بوردا بؤلوشوردولر. بونلار بؤلوشوب، قورتاردیلار. بیردانا یاخجی، قوّتلی قیلینج قالدی. او دئدی: »وئرین منه«، بو دئدی: »وئرین منه!« قیرخ حرامی‌باشی دئدی کی:
– هرکس بو تزه اؤلونو، بو قیلینجلا اورتادان بؤلسه، قیلینج اونوندور.دئدیلر:– ائله اؤزون بؤل!
قیرخ حرامی‌باشی قیلینجی قالخیزیب ووراندا، حق وئرمه‌ین احمد عمی گؤردو، بیر عباسی‌دن اؤترو جانی دا، گئتدی. قورخودان یاواشجا ایسته‌دی کی، او بیریسی احمد عمی‌ده اونا کمک اولسون! قیرخ حرامی‌باشی قالخیزاندا قیلینجی وورسون، بو دیبدن دئدی:– دوروم؟
او بیریسی احمد عمی کی، صاندیغین قاپاغینی آزجا قالخیزمیشدی باخیردی، دئدی:– دورماسان، بوین?و? ووروم.بو قیرخ حرامی‌باشی‌نین قیلینجی قورخودان الیندن دوشدو یئره! بونلار هر زادی یئره قویوب، دئدیلر:– قاچاق، اؤلولر خوتداییبدی، بو نه ایشدی!؟… قاچ کی قاچاسان…
احمد عمی‌گیل، ایکیسی‌ده دوردولار. شمع یاندیریب، ایشیغیندا خزانه¬نی آرالاریندا بؤلدولر. دؤنوب حق آلان احمد عمی دئدی:– احمد عمی، منیم بیر عباسیمی وئر!دئدی:– اوغلان! بو قدر سنی قیزیل، گوموش صاحیبی ائله‌میشم، نه بیر عباسی! منه دئیرلر حق وئرمه‌ین احمد عمی! وئرمییه‌جاغام.
او دا دئدی:– منه ده، دئیرلر حق آلان احمد عمی!
بونلار توتوشموشدولار، او یاندان قیرخ حرامیلرین بیری دئدی:– آی بالا، بیز ائله بیردن قاچدیق، من گئدیم گؤروم اوردا نه خبر وار؟!
قاییدیب، گلدی. باشینی اوزاتدی گؤرسون، نه خبردی، نئچه اؤلو دوروب؟!حق وئرمه‌ین احمد عمی گؤردو، بونون باشیندا قشنگ بیر بؤرکو وار، بؤرکو گؤتوروب، چیرپدی حق آلان احمد عمی‌نین قاباغینا، دئدی:– گؤتور بو دا سنین بیر عباسی‌ین! ال چک گؤرک!بو الینی یاخاسیندان چکدی. حرامی اونلاری گؤروب، قورخودان قاچ کی قاچاسان!..
گئتدی یئتیشدی یولداشلارینا. دئدیلر:– نه خبر؟
دئدی:– دورمایین، قاچین.دئدیلر:– نییه؟
دئدی:– او قدر اؤلو خوتداییب، او قدر اؤلو دوروب کی، او قدر خزانه‌نی بؤلموشدولر، بیرینه ده، بیر عباسی یئتیشمه‌میشدی، منیم بؤرکومو گؤتوروب اونا وئردیلر، قاچین، قاچاق.
بونلار قاچماقدان، احمد عمی‌‌ده بؤرکو گؤتوروب قویدو باشینا، خزانه‌نی ده اونون اوستونه، ایکیسی‌ده حق- حسابینی گؤروب، یئدی- ایچدی، مطلبینه یئتیشدی. آللاه سیزی ده، مطلبیزه یئتیرسین.