دیلیمیز تاریخیمیز
کوچوره ن:اکبرسعادت
چیرپینیر پنجره لر
باغلانیب حنجره لر
بو نه طوفاندی گلیب
شهری آپارسین بو گئجه؟؟؟
نئجه جان سیزدی گئجه!!!
بیرجه یئل های سالیری بیرده بولوتلار باغیریر
آغ بولوتلار گوره سن
کیمسه نی جاندان چاغیریر
آنادیلیمیز:دیل چوخ جیددی و گئرچکدن ده آغیر بیر موضوع اولدوغو اوچون اونون فلسفه سینی آنلاماق دا اوزون زامان آلمیش، بشر ذکاسی نین داها دا درین ائوریم (تکامول) ائوره‌لری (مرحله‌لری) کئچیرمه‌سینی گرکدیرمیشدیر. بو ندنله ده یوزلاشمیش ایلاهییات کولگه سی آلتیندا بیر چوخ دیللر سؤمورولموشدور. آنجاق هر نوع سومورویه (ایستیثمارا) قارشی بوتون دیللرین گیزلین دیره نیشلری ده مووجود اولموشدور. اینسان عاغلی پوزیتیو بیلیملرین جیدییتینی آنلادیقجا دیلین ده اؤنمه می اورتایا چیخمیشدیر. آذربایجان دیلینین تاریخی عومومیلیکده تورک دیلی تاریخینین بیر حیصه سی اولدوغوندان اونون کئچمیشی حاقیندا تام معلومات آلماق اوچون تورک دیلینین تاریخینه دیقت یئتیرمک لازیمدیر.
سون دوورون آراشدیرمالارینا گوره، تورکلر و تورک بویلاری حاققیندا معلوماتلارا میلاددان اؤنجه اوچ-ایکی مین‌ایللیگین قایناقلاریندا راست گلینیر. آنجاق بیر سورو آرکئولوژی و پالئونتولوژی بیلگیلره گوره، تورکلر میلاددان اونجه دوققوز-سککیز عصرلرده آرتیق تاریخ صحنه‌سینه چیخمیشدیلار. تاریخه ده‌ییشیک بوی، قبیله، سوی آدلاری ایله چیخان، عئینی کوکه باغلی، دیل، دین، عیرق و مدنی بیرلیگینی قورویان بو ائتنوس(قومیت) طبیعی کی، تورک آدینی دا چوخ قدیمدن بری یاشاتماقدادیر. تام دقیق اولان بودور کی، تورک آدینی داشییان بو ائتنوس بئش-سککیز عصرلرده موعاصیر مونقولوستان توپراق‌لاریندا گوگ‌تورک خاقان‌لیغینی قورموشلار. مرکزی مونقولوستاندا اولان گوگ‌تورک خاقانلیغی باتی(غرب) طرفدن اورتا آسییانی بیرلشدیرن، سرحدلری قارا دنیزه قدر اوزانان بویوک خاقانلیق اولموشدور.تورکلره عایید تاریخی فاکتلاردان بیری‌ده بودور کی، اونلار داها چوخ بیرلشدیریجی و حاکیم فونکسییاسینی(تابع) یئرینه یئتیرن خالقین آدی ایله تانینمیش‌لار.
مَثلا، کیممئر، کئمئر (قمر)بویونون حاکیمیتی اله آلماسی‌ایلا کیممئر دوولتی، ایسکیتلرین کیممئرلری سیخیشدیریب قارا دنیز بولگه‌سینه چیخارتماسی ایله دوولت ایسکیت-سارمات دوولتی اولاراق تانینماغا باشلامیشدیر. هون دوولتینی قوران سولاله‌ده هم دوولت، هم ده میللَته اوز آدینی وئرمیشدیر. گوگ‌تورک‌لری سقوطا یئتیرن اویغورلار دا بو یوللا گئده‌رک تورک آدینین یئرینه اوز سوی آدلارینا اوستونلوک وئرمیشدیرلر. محض بونون سونوجوندا تورک دوولتچیلیگی آچیق شکیلده اوروپا، چین، ایران دوولتچیلیگیندن فرقلنمیشدیر. فرقلی سولاله‌لرین هون دوورونده، چین قایناقلاریندا سو،سی، آسسور،قایناقلاریندا آشغوزای، یونان کرونیکالاریندا ایسکیت، پارسلاردا ساکا شکلینده فرقلی آدلار آلمالاری سانکی هر بیرینین یئنی بیر خالق کیمی تاریخ صحنه‌سینه چیخماسینا سبب اولموشدور.تورک تاریخی ایله باغلی سون دوور تدقیقاتلاردا تورک آدینین چوخ قدیم اولدوغو بیلدیریلیر.
میلاددان اؤنجه ۲۰۰۰-جی ایلده آککاد قایناقلاریندا اورمو گولونون یان یووره‌سینده یاشایان توروک‌لردن بحث ائدیلیر. اونلار آککادلارلا ووروشموشلار و آراتتا توپراق‌لاریندا یاشامیشلار. میلاددان اونجه بیر عصرده قافقازدا یاشایان و یونان قایناقلاریندا توروکئتئ شکلینده قئید اولونان تورکلردن صوحبت آچیلیر. گوستریلیر کی، اونلار هم گورونوشلری ایله، هم‌ده یاشام فورماسینا گوره پارسلاردان و ایبئر-قافقاز خالقلاریندان سئچیلیرلر.تورات‌دا او زامانکی خالقلارین آدلارینی گوسترن ائتنیک گوستریجیده(قومییت‌لرین شاخیص‌لری) (میلاددان اونجه سککیز عصردن عیسی‌نین دوغومونا قدر اولان دؤورو احاطه ائدیر) اورتا عصرلرده دشت-قیپجاق آدلاندیریلان ایندیکی روسییا چؤللرینده یاشایان خالقلار توکامار و یا توکارام آدلانیر. اییودایزمی (یهودیتی) قبول ائدن خزر تورکلرینین یوخاری طبقه‌سی‌ده توراتا صادیق قالاراق تورک آدینی توکارام شکلینده ایشلتمیش، اوزلرینی‌ده توکارام اوغوللاری آدلاندیرمیشلار. اون عصرده خزر خاقانی یوسیف یهودی هاسدای ایبن صافروتون سورغولارینا جاواب وئررکن خالقینین یافه‌سین اوغلو توکارامدان گلدیگینی سویله‌میشدیر.میلاددان اونجه اوچ عصر و ائرامیزین بیر-دورد عصرلرینه عایید گورجو و ائرمنی قایناقلاریندا قافقازدا یاشایان باشقا کیچیک ایبئر-قافقاز و هیند-اوروپا سویلو خالقلاری ایله برابر تورک قووملاریندان هایلانتورک‌لر، بون‌تورکلر، آیریجا اولاراق وارساقلار، بولغارلار، باییندلیرلار، آرساکیلار و باشقا… حاقدا بیلگیلره گئنیش یئر وئریلمیشدیر.اوزون عصرلر بویونجا تورکجه نین کولتور و بیلیم دیلی اولماماسی آشاغیلیق کومپلئکسی یاراتمیشدیر.
بویوک آتاتورکه قدر کیمسه تورک دیلی نین اوخول و بیلیم دیلی اولماسینا اینانمازدی. بو اینانجسیزلیق هله ده تام اولاراق اورتادان قالخمامیشدیر. روس زده لیگی، فارس زده لیگی دوغوران دا بو اینانجسیزلیق اولموشدور. بو آشاغیلیق کومپلئکسی میللی کیملیگیمیزین موختلیف عنصورلرینی منفی یؤنده دریندن ائتکیله میشدیر.
شرق میللتلری اوچون ۲۰ جی عصر چوخ اونم داشیماقدادیر. بو عصرده بوتون شهرلرده و کندلرده اوخوللار آچیلمیشدیر. بو سورَج ایچینده آنا دیلیمیزده بیر تک اوخول آچیلمامیشدیر. سونوج اعتیباری ایله ۲۰ جی عصرده دیلیمیز چوللشدیریلمیش، داها چوخ ضرر گؤرموشدور. بوتون تثبیتلر دیلله ائدیلدیگی اوچون میللی کیملیگین ده آلت قورومونو دیل اولوشدورماقدادیر. بو اوزدن ده هر اولوسون گله جگی اونون دیلیدیر. اولوسلارین کیملیکلری دیللرینه وئردیکلری اونَمه گؤره شکیللنمیشدیر. آنا دیلده یازیب-اوخوماغین دوغوردوغو اوزگووَندن(اعتیباردان) محروم ائدیلمیشیلیگیمیز هم کیملیک کریزی یاراتمیش، هم ده حیاتیمیزین درین آنلامینی اورتادان قالدیرمیشدیر. آنا دیلینده اوخومانین نه کیمی بختییارلیق اولدوغونو هئچ دئنمه دیک، تجروبه ائتمه دیک.
آیریجا آنا دیلینده یازیب- اوخومامانین، ائییتیم دوزئیینده آنا دیلیندن محروم اولمانین فرد و توپلوم میقیاسیندا دوغوردوغو درین پسیکولوژیک بونالیملار (بحرانلار) بیلیم آداملاری طرفیندن تثبیت ائدیلمیشدیر. دیل پلانیندا بوتون ائنئرژیمیز سومورولوب فارس دیلینه، فارس کیملیگینه یوکلنمکده دیر. آنا دیلده تحصیلین نه کیمی گووَنلیک و آرخایینلیق دوغوردوغوندان تامامی ایله خبرسیزیک. بو دوغرولتودا دئمک اولار کی، هئچ بیر توپلومسال تجروبه میز یوخدور. بو ندنله ده تورک دیلینده دوشونجه اورتمه یئته نَگیندن(قابیلییتیندن) یوخسون (محروم) بوراخیلمیشیق. چونکو دوشونجه نین دوللنمه سینده منطیقین رولو ندیرسه، دیل اوچون ده قرامرین وظیفه سی اوندان عیبارتدیر. دوشونجه نین جومله لر شکلینده یوغرولوشو دیل بیلگیسینه احتییاج دویار. بو دیل بیلگیسی ده آنا دیلده اولان ایلک و اورتا اوخوللاردا اویره نیلیر.
نوشته شده توسط admin در چهارشنبه, ۰۸ شهریور ۱۳۹۶ ساعت ۶:۴۸ ق.ظ
فایدالی و آنلاملی . ایکینجی دیلی لهجه ایله دانیشدیغیمیزا دا نه لردن محروم اولوروق تاسفله …