تانری آددیملایان گونش
اکبر سعادت
آنا دیلیمیز: گؤزله ریم یومولان همین، علویه نین توی پالتاریندا کی شکیلی گؤزومون قاباقینا گلیردی. دایانا بیلمیردیم کوچوکون قولاقی کئسیک سسلرینه. بینیمده یئریردی او سس لر. گولؤمدن کئچیردی اینه کلره آغاج وئردیقیم کیمی قیشقیرام. اله قیشقیرام کی آخشام باشیلار کیمی بوتون کند بیله کی منیم سسیم دی. اله قیشقیرام کی توت آغاجینین بوینوندان آسلانان یارپاقلار، قان ایچمه گی بوشلیالار. اله قیشقیرام کی.. علویه بیله، من گلمیشم. آشاقیدان قیزلارین سسی گلیردی و ساهات سککیز دوره سی دی. یئرین ایچیندن دوروب اندیم آشاقیا. دهلیزه چاتاندا. بالاجا اتاقین بوروندن کئچنده آغامین سیگارینین توسدوسینی گؤردوم.بیلدیم کی ننم یاتیب و آغام قبریستانین دالیندا کی اوزاق داغا باخیر و سیگارینین توستوسینی بئغینین آلتیندا اوینادا اوینادا چوله پیله ییر. آستا آستا ائودن چیخیب، ایواندا قئلوشومو ایاقیما گئیب قولاقی کئسیک کوچوکو یانیما چاغیردیم. یئکه دئمیر قاپینین بوریندن سوشیب، طوله نین بورینده کی تاختا قاپیدان چیخدیم کندین خیاوانیا. کوچوک دالیمجان گلیردی.بیرنئچه قدم قاباقلیق چیچک بی بی گیلین قاپیسیدی. قاپینین بوریندن سوشوب کندین میدانیا طرف یئریدیم. شئخ عاباس. قفه نی تئزه تئزه باغلاییردی. گؤزلرینه باخیب سالاملاشاندان سونرا، اللریم جئبیمده بورینده سوشدوم و کندین میدانیندا، مَچیدین قاباقیندا اوتوردوم. شئخ عاباس کندین مَچدینین خوددامی دی. بئرنی اوزون آغ ساققالی، بئلی بوکولمیش بیر کیشی. باشیندا کی پاپاقینی نئچه آیدا بیر سئری یودوقونا خاطیر ایت اولوسونون ایسین وئره ردی پاپاقی، تیر سیگاری چئکدیگینه خاطیر ده هر بئش آلتی دیقادا بیر، بوغاضین صافالداردی.خئریلدیا خئریلدیا دانیشاردی. آغامین اؤگه عمی سی اوغلی اولاردی شئخ عاباس. دده دن بیر ننه دن آیری.
” أیه قارداش اوغلو، خیر اولا گئجه نین بو واقتی بوردا “. اله دئدی گئجه نین بو واختی من دئدیم به ساهتلار قاچا قاچ گئدیب گئجه یاریسینی سووشدوروبلار. جوابلاندیم ” ایکی ده سو نوبامیزدی، یوخوم آپارمادی دئدیم گئلیب یر هاوامی تئزه له ییم “. ” یاخشی اوندا دور گئدک بیزه؟ ” . ” ساغول شیخ عمی آللاه آباد اله سین “. ” آغان گیله سالام دئنن. گئجه ن خیر “. بوغازین سافالدیب یولا توشدی.
قولاقی کیسیک کوچوک بورومده هوره ر هورمه ز اؤزومه گلدیم. ساهات سکگیز دوره سی اولاردی آغلیمدا. ایاقیمی قوزاییب کوچوگین بؤرونه بوتون زوریملا تئپیکی وئریب یامانلیا یامانلیا ایاقا دوردیم.. قاچا قاچ یوخاریا گئلیب تاختا قاپیدان حیته کئچدیب اورتا قاپیدا ایچئری سوزوب توت آغاجینی بؤرونه چاتدیم. اویانلارا آتدیغیم آغاج آتیم یدیما توشدو و او گیزلین اؤپوشلر. توت آغاجینین بوروندن سوشاندا، قوجا قارا ایت مئریلداماقا باشلادی. ایچیمده بوغولموش سئس نن قورخا قورخا دئدیم ” آی ایت یئری “.. ائله بیل کی سسیمی تانیدیقدان سونرا ایت ده او گونی یادینا سالیب منه اؤزونو اثباتلاماقا باشلادی…. چیچک بی بی م پنجره نین اورتاسیندان باشین چوله چیخاردیب اویان بویانا باخاندان یورا قیشقیردی: ” آی ایت یئری..” انبارین دوهارینی دالیندان چیخیب پنجره نین آلتینا سوزدوم. باشیمی بیر آز قوزادیم. علویه اوردایدی. چیچک بی بی نین بؤزونده یاتان قیز. گون یاندیرمیش یاناقی ایندی ده گؤزومون قاباقیندایدی. مین بیر فیکیرین ایچینده بوغولموشدوم. ائلیه بیلمه زدیم علویه نی بیرر آیریسینان پایلاشام.بونا فیکیرله شنده کی علویه مندن سونرا بیر آیریسینان دوداق به دوداق اولا آز قالا منی اولدورور دی ، آمما بیلمه لی دیم کی علویه اؤری ده ایسته ییر ار گئده یا یوخ. چیچک بی بی نین یوخوسو آغیر دییل دی. اوندا اویانا علویه نین ایکی قارداشی و بیر آغاسی دا ائوده دیلر. یوخ ائله یه بیلمه زدیم ائوه کئچم. بارماقیمی پنجره نین تورونا سورته له ییب علویه یه باخیردیم.
گؤزلریم دئمیر تورین اوستوندن سوزوب، حیت تورپاقلارینی آددیملایا آددیملایا، قبریستانلیقین بؤرونده کی اوزاق داغا چاتددی. الیه بیلمه زدیم علویه نی بیر اؤزگه سینین قولوندا گؤره م. توت آغاجینین بوریندن سوشوب طؤله میزه گیردیم. یوغون بیر جیئه واریدی اوردا. بئلی یارالمیش اینه گین ایاقلارین باغلامیشدیق. ال آتیب ایپی آچاندا، اینه ک گؤزلریمین ایچینه باخدی. بیلیردیم کی الیمدن ناراحات دئیر. بیلیردیم منی باشا توشیر.
بیلیردیم ایندی کی باخیشلاری دا ” سنی سئویرم ” معنا سینی وئریر. جیئه نی آچیب، طوله نین قاپیسینی باغلاییب توت آغاجینین آلتینا کئچدیم. قارا ایت دای دینمه ییردی.توت آغاجینین اوستونده، ایپی باغلایاندان سونرا، اوزاق داغا بیرده گؤزلریم توشدو قبریستانلیقین یانیندا. گویلوم اولمه دن قاباق بیرده او قوجاقلاری ایسته ییر دی.
ایپین آلتینا کئچیب ایاقلاریمین آلینا دا تاختا بیر میوه جعه سی قویدوم. بارماقلاریمنان ایپی یاپیشیب بوینوما سالدیم. اینه کین پیسلیگینین قوخوسواینجیدیردی منی. اینه ک دن ناراحات دئیردیم. ایسته میردیم اؤلن واخت بیرینین الیندن ناراحات اولام. گؤلوم ایسته ییردی گوله گوله گؤزلریم یومولا. گؤزلریمی یوموب، نفسیمی ایچیمده ساخلایب،جعبه نی ایاقلاریمین آلتیندان ایسته دیم کی زوروشدورم.
علویه گلینلیگینن بئینیمده اویان بویانا گئدیردی. دایاندیم. الیه بیلمزدم بئینیمده کی علویه نی، اؤزومنن اؤلدورم. گئرک بیله یدیم علویه اره گئدمک ایسته ییر یا یوخ. من اؤلوم ایسته ییردیم آمما اینامیرام بئینیمده کی سورو ایشاره تینن، اولموم منه راحات گله یدی.
ایپی بوینومدان آچیب اویانلیق گئدیب ال اتاقلارینین قاپیسینی ایته له دیم. نفسیم ایچیمده قارلمیشدی قاپینی ایته لیینده. اوقدر یاواش ایته له دیم کی ساهات سکگیز دوره سیندن سوشان کیمی اولدو. بارماقلاریمن اوجینا ایچه ری کئچیب علویه نین باشینین اوستونه چاتدیم. ساچلارینین ساری سی گؤزلریمده ایشیلداییردی.دالی منه ساری و اوزی چیچک بی بی سه باخیردی. بؤرینده اوزاندیم او گونلر کیمی. الیمین بیرینی یاواش اوزادیب قویدوم قولونون اوستونه، بوتون قادینلیقینی حیس اله دیم،یاددان چیخمیش کیشیلیگیمله. بیلمه لیدیم علویه نین اؤره گینین سؤزون، یاواش یاواش قولاقینا سسلندیم. ” علویه؟؟؟… منیم دنیز گؤزلو علویم؟؟؟ آچ گؤزلرینی…علویه م؟؟؟؟ ” قولاقینا سسله نه سسلنه دونیانین شیرینلیگلرین منه حیس اله تدیریردی، یوخو هاواسندا، یوموشاق نفس لری. بیلمیرم علویه گؤزلرین آچمیشدی یا یوخ آمما من چاغیراندان سونرا علویه قیشقیرماقا باشلادی.
بیرینجی قیشقیرتیسینا قولومو قولونون اوستوندن گؤتوروب، یئرینین ایچیندن قالخیب قاچاندا چیچک بی بی ده باشلادی های هارای سالماقا، کیشی لر اویانیب ال آغاجیلارین گوتوروب چیخمیشدیلار حیته چیچک بی بی نین سسینن. من اورتا قاپیا قاچان زامان منی گؤروب دالیما دوشدولر.قوجا قارا ایت ده های هارایا باخیب، هؤسه له سیز هورمه گه باشلادی. دالیمجاق قاچان کیشی لرین سسینه بیزیم ائوده اویاندی. بویوک اتاقین یالانچی کؤزه رن ایشیقی نی قاچا قاچا گؤردوم. یئکه ماوی دئمیر قاپیا چاتمیشدیم. بو زهرمار قاپینین توتماجاسی واریدی.ایکی دفعه زورنان ایته له ییب قاپینی چئکدیم.آز قالا یئتیشیردیلر منه چیچک بی بی نین ائوینین کیشیلری. اونلارین های هاراینا آغامدا اویانیب، آلا کال یوخو هاوسیندا ایاقلاری یالین دوشوب حیته بیر داش گؤتوروب اویان بویانا باخاندان سورا قاچیب قاباق حیته، ننه باجی سؤوشو وئریردی منه. یئکه ماوی دئمیر قاپینین آچماقینی ایکی سئری دن سورا باشاردیم. ائله قاپینی آچیب قاچان زامان، یوخودان آلا کال اویانمیش آغام الینده کی داشی ائله وئردی منیم کوره ییم کی نفسیم قارالدی، آمما دیلیمی دیشیمه توتوب کندین آشاغیسینا، قیشقیردیقیم یئرلره طرف قاچیب قارانلیقدا، زامان باغینین ایچینه آتیلب شاما طرف گئتدیم. یاریم ساهات کیمی اولاردی کی نه ساهات دان و نه اؤزومدن خبریم واریدی. یاریم ساهات اولاردی کی یانلیز علویه نین سسی قولاقیمدایدی. شام یولوندان کنده طرف دؤنوب مچیدین قاباقینا چاتدیم. بیر ایکی دیقا اوردا اوتورب اؤزومه گلمه یه چالیشدیم. هر یئر قارانلیقیدی و او قارانلیق اورتامی مچیدین قاپیسینین اوستونده یانان بیر لامپ ایشیقلاتمیشدی. قورخوردوم گئتمه گه. بینیمده سورو ایشاره لری بیر بیر جان تاپیردی، ” منی تانیسالار نئجه؟… ” اللریمی جئبیمه سالیب قورخا قورخا،کندین تک خیابانیندان یوخاریا قالخدیم. اوزاقدان قونشو کیشی لرینی گؤردوم ، اؤره گیمه قان دامدی قورخودان. هر آددیم یوخونلاشاندا علویه نین قیشقیرتی سسی، آچیق جا قولاقلاریما گلیردی؛ آروادلارین دانیشیقی و چیچک بی بی نین آغلاما سسی. کیشی لر قاپینین آغزیندا دایانمیشدیلار. سالام وئریب قورخا قورخا سورشدوم کی ” نه خبر اولوب؟؟ ” قاسیم، کندین شوراسی، قوروموش گؤی گؤزله رینن منه باخیب دئی ” اوغرو توشموشمیش ائولرینه بی بین گیلین.. ” سورا دا یالانچی بیر امیدنن داواملادی کی ” هئچ بیر شی آپارماییب لار، علویه بیر آز قورخوب کی اودا جورلانار.. سن هاردان گلیرسن؟؟ “. ” اوتورموشدوم مچیدین قاباقیندا، شئخ نان دا دانیشدیم، ایکی ده سو نوبامیزیدی، یوخوم آپارمیردی چیخدیم بیر آز هاوا آلام “. اویاندان حاجی قارا دئدی ” بیرینی گؤدمه دین اویانلاردان قاچا ؟؟ “. ” یوخ “. کئتیلرین بیری کی قارانلیقدا دایانمیشدی و یوخودان اویاندیقینا خاطیر سسین ده تانیا بیلمه دیم دئدی ” اؤزگه گئلیب ائوه کئچه بیلمه ز، هر کئسیمیش سه ، تانیشیمیش.. ” منه باخیردی. ایچه ری کئچدیم. آغام اوتورموشدو ایواندا سیگار چکیردی.علویه قیشقیریدی. چیچک بی بی آغلاییر دی. قولاقی کئسیک کوچوک باشین قوزایب منه باخیب بیرده باشین آشاقیا سالیب قویروقون اویناتدی. آروادلارین بیری ائودن چیخا چیخا دئدی ” اؤره گینه قان دامیب قورخودان…اینانمیرام جورلانا… ” منصورای دی. کندین تورکه سایا دوختورو.
بئلیمده کی داش یئرینین سیزیلتی سی کئسیلدی، ساهات صبحه یوخونلامیشدی. ایپ آغاجین قوجاقیندان آسلانان کیمی، نئچه ساری یارپاق هله ده توت آغاجینین یاخاسیندان یاپیشیب قانین سوروردیلار و گون تئزدن دوغولوردو. علویه هله ده قیشقیریردی و کیشی لر ائولرینه داغیلا داغیلا دئیردیلر ” اوره گینه قان دامیب قورخودان…دای جورلانماز… “.
نوشته شده توسط admin در جمعه, ۰۸ اسفند ۱۳۹۳ ساعت ۱۲:۱۶ ب.ظ
