بوستانچی ایله شاه عباس

اوشاق ادبیاتی: بیر بوستانچی وار ایدی. بو بوستانچی عاییله‌سینی قارپیز-یئمیشله ساخلاییردی. هر ایل قارپیز، یئمیش، خییار اکیردی، بوغدایا وئریب دولانیردی. بیر ایل بوستان چوخ یاخشی بحره گتیردی.
بوستانچی آروادینا دئدی: بو ایل بوستانیمیز چوخ یاخشی بحره گتیریب، قارپیزین لاپ یاخشیسیندان بیر ائششک یوکو توتوب شیخ اوغلو شاه عباس-ا آپاراجاغام.
آروادی دئدی: لاپ یاخشی اولار.
بوستانچی قارپیزین لاپ یاخشیسیندان بیر خورجون ییغدی، ائششگین بئلینه آشیریب توش‌هاتوش – ایصفاهانا یولا دوشمکده اولسون شاه عباس‌لا وزیر آللاهوئردی خان دا درویش پالتار اولوب یول ایله گئدیردیلر. اونلار کیشینین قاباغینا چیخدیلار.شاه عباس اوندان سوروشدو:– آ کیشی، یوکون ندی؟بوستانچی دئدی:– آغا درویش، قارپیزدی.پادشاه سوروشدو:– هارا آپاریرسان؟بوستانچی دئدی: آغا درویش، بو ایل بوستانیم چوخ یاخشی بار گتیریب. بونو شاه عباس-ا آپاریرام.شاه عباس دئدی:
رحمتلیگین اوغلو، جاماعات شاه عباس-ا لعل جاواهیر آپاریر، قیزیل آپاریر، سن ده قارپیز آپاریرسان. قارپیز شاهین نَیینه لازیمدی؟
بوستانچی دئدی:آغا درویش، اونلارین گوجو لعل، جاواهیر، قیزیلا چاتیر. منیم ده گوجوم آنجاق قارپیزا چاتیر.
شاه عباس دئدی:بوشونا اؤزونو اینجیدیرسن آخی شاه اونو گؤتورمز.
بوستانچی دئدی:آغا درویش، جانین ساغ اولسون، گؤتورر گؤتورر، گؤتورمز ائششگی یوکلو-زادلی سوخارام اونون گؤزلرینه، چیخیب گَلَرم.
آللاهوئردی وزیر ایسته‌دی کیشینی وورسون شاه اونون الینی توتدو. کیشیدن آیریلدیلار.
باشقا کسه یول‌لا گئری قاییتدیلار. شاه عباس قیرمیزی گئیینیب تاختا چیخدی. امر ائله‌دی، ائششگی یوکلو بیر کیشی گله‌جک، اونو ائششکلی-زادلی یانیما گتیررسینیز. بلی، یوللاری کسدیلر، کیشی گلیب چیخاندا، اونو ائششکلی‌ زادلی پادشاهین سارایینا آپاردیلار. شاه عباس اوندان سوروشدو:– آ کیشی، یوکون ندی؟بوستانچی دئدی:
– قادان آلیم، شاه، قارپیزدی. بو ایل بوستانیم چوخ یاخشی بحره گتیریب.بیر یوک سنه هدیه گتیرمیشم.شاه عباس دئدی:آ کیشی، دلی-زاد اولمامیسان، سن منی کیم حساب ائدیرسن؟ خالق منه لعل، جاواهیر، قیزیل گتیریر، سن ده قووون قارپیز گتیریرسن؟
بوستانچی دئدی: شاه ساغ اولسون، اونلارین گوجو جاواهیر، لعل، قیزیلا چاتیر، منیم ده گومانیم، گوجوم یئمیش، قارپیزا چاتیر.شاه عباس دئدی:– قارپیز منه لازیم دئییل، قایتار، گئت یوخسا سنی بوغازیندان آسدیرارام.
بوستانچی دئدی:
– شاه، تا نییه آجیغین توتور. گؤتورورسن گؤتور، گؤتورمورسن، یولدا دئدیگیم اولسون.
شاه عباس دئدی:دئ گؤروم یولدا نه دئمیسن؟
بوستانچی دئدی: شاه، هئچ نه، سؤز ایدی آغزیما گلدی دئدیم.
شاه عباس دئدی:
– کیشی، اگر یولدا نه دئمیسن، دوزونو دئسن جددیم حاقی سنه هئچ زاد ائلمییه‌جییم.
اگر دوزونو دئمه‌سه ن واییندی.
بوستانچی او ساعات باشا دوشدو کی، درویش بو اؤزو ایمیش، دئدی:
– شاه ساغ اولسون، یولدا بیر نفر درویش مندن سن سوروشدوغون سؤزلری سوروشدو. دئینده کی، شاه یئمیش-قارپیزی گؤتورمز، دئدیم گومانیم ائله بونا گلیر، گؤتورمز ائششکلی-زادلی سوخارام شاهین گؤزلرینه، قاییدارام.پادشاه خزانه‌داری چاغیریب دئدی:
– آپار بو کیشینین قارپیزینی بوشالت، تئرینی(آتا ائششگه باغلاردیلار) قیزیللا دولدور، وئر آپارسین.خزانه‌دار بوستانچینی خزانه‌یه آپاردی یئمیش-قارپیزینی بوشالتدی، تئری قیزیللا دولدوروب اونا وئردی. پادشاهین بو حرکتی آللاهوئردی خانین خوشونا گلمه‌دی، دئدی:
– شاه، سنین، بو حرکتین هئچ خوشوما گلمه‌دی. کندلی‌نین بیری سنی سؤیور، سن اونون تئرینی قیزیللا دولدوروب، بوراخیرسان.
شاه عباس دئدی:
– وزیر، او کیشینین گومانی قارپیزا چاتیر، اوندان دا منه نوبارلیق پای گتیریر. من اوندان جاواهیر لعل ایسته‌ینده اونون منه آغیر سؤز دئمه‌سی یئرینده‌دی.
وزیر دئدی:
– من گئدیب، اوندان قیزیلی آلاجاغام.
پادشاه دئدی:
– آللاهوئردی وزیر، او سن عاغیلدا آدام دئییل چوخ عاغیللی آدامدی، یونگول‌ساققال اولما، آلا بیلمزسن.وزیر دئدی: من آلیم، سن باخ بیزه.
پادشاه دئدی:یاخشی، گئت آل، گؤرک آلا بیله‌جکسنمی؟آللاهوئردی وزیر آتینی میندی باشقا یولدان گئدیب بوستانچینین قاباغینی کسدی، دئدی:– کیشی، سنه بیر نئچه سورغو سوروشاجاغام، بیلدین، جانین قورتاردی بیلمه‌دین، قیزیلینی آلاجاغام.بوستانچی دئدی:وزیر، بویور دئ.آللاهوئردی وزیر دئدی:
– گؤیده نئچه اولدوز وار؟بوستانچی دئدی:ائششگیمین توکونون سانی قدر.
وزیر دئدی:دوز دئمیرسن.بوستانچی دئدی: ائششگین توکونو ده سای، اولدوزلاری دا سای اگر دوز اولماسا بوینومو وور.آللاهوئردی وزیر گؤردو نه ائششگین توکونو سایماق اولار، نه ده گؤیده‌کی اولدوزو، دئدی: یاخشی، بونو بیلدین. ایندی او بیری سورغوما جاواب وئر. آللاه هاردادیر؟
بوستانچی دئدی: او چوخ آساندی. آنجاق ائششگین اوستونده اونو دئیه بیلمرم، آتدان دوش مینیم دئییم. ائششک اوستونده آللاهین یئرینی دئمک ادب‌سیزلیک دی.
وزیر او ساعات آتدان سیچراییب یئره دوشدو، دئدی:دی مین.
بوستانچی ائششکدن دوشدو، تئز سیچراییب آتا میندی، اَییلیب جلد ائششگین اوستوندن تئری گؤتوردو، آتا بیر بیز ووروب دئدی:وزیر آللاهوئردی خان، آللاه، باخ او تاغین دالیندادی.
وزیر ها قیشقیردی، باغیردی، کیشی دایانمادی آتا دَییب گؤزدن ایتدی.
آللاهوئردی وزیر ائششگین یانیندا قالدی.شاه عباس کوله‌فیرنگیدن باخیردی، او قدر گولدو کی آز قالدی قارنی ییرتیلسین.
بیر نئچه آدام گؤندریب دئدی: گئدین آللاهوئردی خانا دئیین کی، اوتانماسین گلسین.آداملار گئتدیلر، پادشاهین سؤزونو آللاهوئردی خانا دئدیلر.
آللاهوئردی خان کور-پئشمان آداملارین یانینا دوشوب گئتدی.شاه عباس بیر آز گولندن سونرا دئدی: آللاهوئردی خان، گؤردون آلا بیلمزسن؟
من عدالتسیزلیک ائلمیشدیم، قیزیل وئرمیشدیم، آت وئرمه‌میشدیم.آتی دا سن وئردین، چوخ ساغ اول.