بابالئیسان ایله ورقا
آشیق آسماعیل گؤردو بونون الیندهکی ساز کئچمهلی ساز دگیل. اودور کی اؤز – اؤزونه دئدی: بیر سؤز سوروشارام جوابین بیلمز الیندهکی سازی آلیب وئرهرم شاگردلریمین بیرینه_.
بونو فیکیرلشیب دئدی: اوغلوم! سن دئیهجکسن یا من؟ لئیسان دئدی: خئیر اوستاد! فرصت سنیندیر هر نه دئیهجکسن بویور! آشیق اسماعیل چوخ ناراحات اولدو. هامی ماجرایا باخیر. اودور کی آشیق اسماعیل، سازینی آلدی دؤشو اوسته و لئیساندان بو سؤزلری سوروشدو. گؤرهک لئیسان اونلارا جواب تاپاجاق یا یوخ؟ سندن خبر آلیم بالاجا آشیق کیم اوّل اگنینه گئیدی قارانی ؟
هانسی گمی قالدی عمان اوزونده کیم ایدی قورتاردی او بینوانی ؟
حؤرمتلی دوستلار؟ بو سؤزلر آشیقلار آراسیندا درین و معنالیدیر بیر روایته گؤره قابیل هابیلی اؤلدوردو و آدم علیهالسلام اونون قاراسین گئیدی و آیری روایته گؤره حضرت آدم اوّل شخصدیر کی امام حسین علیهالسلامین قاراسین گئییبدیر البتده بونلارین تفسیری اوزوندور. اونا گؤرهده لئیسانین حقی وار ایدی بو سؤزلرین جوابین بیلمهسین آما اونلارین جوابی ائله بیل کی قاباقدان لئیسانین اورهگینه قویولموشدو آلدی گؤرهک آشیق اسماعیلا نه جواب وئردی؟ آل سؤزون جوابین ای اوستاد آشیق اوّلده آدمدی گئیدی قارانی جبراییل قالمیشدی عمّان اوزونده علی ایدی قورتاردی او بینوانی اسماعیل سؤزون جوابین ائشیدرکن اؤز – اؤزونه دئدی : بو جاوانا بیر شئیلر اولوب، آللاه ایشیمیزین آخرین خئیر ائلهسین آلدی ایکینجی بندی: او کیم ایدی خلل تاپدی سؤزونده او کیم ایدی نورو گؤردو گؤزونده کیمین گمیسی ایدی عمّان اوزونده کیم ایدی قورتاردی سودا قالانی دؤرد دؤوره جماعت دوروب تماشایا! لئیسان آلدی ایکینجی بندین جوابین بئله دئدی :
او شیطاندی خلل تاپدی سؤزونده محمددی نور گؤروندو اوزونده نوحون گمیسی ایدی عمّان اوزونده مولا ایدی قورتاردی سودا قالانی سؤزه جواب وئریلدی. آشیق اسماعیل ناراحاتدیر. اؤز اورهگینده دئییر: پروردگارا بو جاوان بو سؤزهده جواب وئردی. ایندی گلیب مندن سؤز سوروشا من جواب بیلمهیم بو جماعتین ایچینده لاپ پالچیغا باتارام اودور کی سونکو سؤزونو لاپ درین دئدی :
نهدیر اسماعیلین کؤنلونو سیخدی؟
کیمدیر ظاهر اولوب ائوینی ییخدی ؟
پیغمبر نه گونده معراجا چیخدی ؟
نه ایدی طعامی ائیله بیانی .
لئیسان بیر گولومسندی. دئدی اوستاد مگر سن بیلمیرسن کؤنلونو نه سیخدی ؟ ائوینی کیم ییخدی ؟ بس دوننکی سیلله یادیندان چیخیب ؟ لئیسان بوتا آلیب کؤنلونو سیخدی دوننکی سیلله ایدی ائوینی ییخدی پیغمبر جمعهده معراجا چیخدی شیر برنج وئردیلر بودور بیانی .
سؤز قورتاردی هامی لئیسانی آلقیشلادی. دؤورهدن سسلندیلر اسماعیل! ایندی نوبت لئیسانیندیر او سوروشسون سن جواب وئر .
آشیق اسماعیل دئیهنمهدی اولماز آما اورهگینده دئدی جانیم! بو نه سؤز بیلهجک؟ اونا باخما جوابین بیلدی سؤز سوروشانماز. اودور کی دئدی: بالاجا آشیق! سوروش گؤروم نهیین وار؟ آما لئیسانین بو حرکتی تبریزه بیر های سالدی تبریز اهلی ییغیلیب میداندا لئیسانین دالیندا دوروبلار لئیسان گؤردو دئمهسه اولماز دئیهرلر بیلمهدی. اودور کی سازین آلیب دؤشو اوسته اوزون توتوب آشیق اسماعیلا ایندی گؤرهک اوندان نه سوروشور .
اوّلیندن سن اوستاسان من شاگرد
من شاگردین سؤزلرینی آچ گؤرهک هارادا یاراندی مسجد الاقصی هاردان گتیردیلر اونا داش – گؤرهک آشیق اسماعیل بونو اوشاق حساب ائدیردی آما بو سؤزوندن بیلدی کی بو اوستاددا اولماسا بئلی برک یئرلره باغلیدیر.
اوزون توتدو شاگردلرینه دئدی: بو جاوانین جوابین وئرین او سازی آلیب سیزه وئرهجگم آما شاگردلرین هامیسی بیری – بیرینین اوزونه باخدیلار هئچ بیریندن سس چیخمادی. دؤرد دؤوره میداندا اولانلار دئدیلر. آشیق اسماعیل! سؤزون جوابین وئر! آشیق اسماعیل گؤردو اولمایاجاق سسلندی! قویون سؤزون قورتارسین هامیسینا بیر یئرده جواب وئرهجگم اودور کی لئیسان آلدی او بیری کلمهلری گؤرهک نئجه دئییر؟ و گؤرهک آشیق اسماعیل اونلارین جوابین بیلیر یا یوخ ؟
کیم وئردی اؤلچوسون کیم گهتدی داشین ؟
کیم اصلاح ائیلهدی رسولون باشین ؟
سندن خبر آلیم گاوماهین یاشین یاشی قالسین دانیش آغزین آچ گؤرهک کیم گهتدی کرپیجین کیم اونو قازدی کیم قلم قویوبان کیم اونو یازدی کیم اوخویانمادی حروفون آزدی ؟
دئدیلر ای اوزو قاره قاچ گؤرهک او هانسی نور ایدی یاقوت بیتیردی ؟
او کیم ایدی سیرر پردهنی گؤتوردو ؟
فقیر لئیسان عقلین هاردا ایتیردی سیرر ایشلری ائیلهگیلن فاش گؤرهک .
سؤز قورتاردی آشیق اسماعیل گؤردو اللی ایل چالیشام بونلارا جواب تاپانمارام اودور کی ماهانا یولو آختاریر کی بیر تهر قاچا. بیر فیکیرلشیب دئدی: جاوان! سنین سؤزونون جوابی بو ساز ایله اولماز. منیم ائوده بیر سازیم وار. ایندی گئدیب اونو گتیرهرم سؤزلرینین جوابین دئیهرم. اودور کی آشیق اسماعیل بونو ماهانا ائدیب میداندان چیخدی و هلهده وار کی آشیق اسماعیل ساز گتیرهجک و لئیسانین باغلاماسین آچاجاق. میداندا اولانلار اونون دالیجا یوللادیلار آما او تاپیلمادی کی تاپیلمادی هئچ بللی اولمادی چیخیب هایانا گئدیب. آشیق اسماعیلین ۱۲ شاگردی دئدیلر: ای آشیق سن بیزیم اوستادیمیزی باغلادین. او بیزیم باشیمیزی ییغمیشدی بیر یئره و بیزیم یئمگیمیز و دولاناجاغیمیز اوندان ایدی ایندی کی بئله اولدو گرک بیزه اوستادلیق ائلهیهسن بیز سندن ال چکمریک .
و بئلهلیکله لئیسان او گوندن اونلارا اوستاد اولدو و گئتدیکجه شهرتی آرتیب و بابا لئیسان آدیایله تانیلدی لئیسان ۱۲ شاگردی یانینا سالیب تبریزده دؤوران قوردو.
اونون شاگردلرینین بیرینین آدی ورقا ایدی ورقا او بیری شاگردلره گؤره چوخ زیرک، چوخ هوشلو – باشلی ایدی اونا گؤرهده بابا لئیسان اونا سؤز اؤیرهتمکده قیزیرقانمازدی. بوناگؤرهده ورقا اؤزلوگونده بیر اوستاد ساییلیردی .
بابا لئیسان ایله شاگردلری بورادا قالماقدا اولسونلار گلین گئدهک شیروانا .
شیروان شاهینین بیر قیزی وار پریزاد آدیندا. پریزاد خاچپرستدیر )مسیحیدیر( آما او قدر بیلیکلیدیر کی داغا، باغا، چؤله شعر قوشور گؤردوگونه سؤز باغلاییر. بو قیزین هر یاندان ائلچیسی وار آما هئچ بیری قیزین قورخوسوندان عشقلرین اوزه چیخاردانمیرلار. چونکی قیز دئییبدیر هر کیم اونو شعرده باغلاسا اونا گئدهجک ائله بونا گؤرهده هئچ کیم اورهک ائلهییب اونونلا باغلاشانمیر. تک – توک جرأت ائلهینلر وارسادا قیز اونلاری باغلاییب سازلارین اللریندن آلیبدیر اؤزلرین ده دوستاق ائدیبدیر بورایا قدر اونلارین سایی ۳۸ دیر. گؤزلهییر ایکی نفر ده گله سایلاری ۴۰ اولاندا اونلاری اؤلدورتدورهجکدیر. داحی شیرواندا هئچ کیمین قیز ایله باغلاشماق جسارتی یوخدور. بونا گؤره قیز وئریب رساملار عکسین چکیبلر او عکسی وئریب تاجرلره و دئییب: هانسی شهره گئتسز بو عکسی آپارین و احوالاتی دئیین هر کس حاضر اولا منلن باغلاشماغا گلسین شیروانا.
تاجرلر قیزین عکسین و یازیسین گؤتوروب هره بیر شهره یولا دوشور. همین تاجرلردن بیریده گلیب تبریزه. یوکون آچیب ماتاهین ساتیر. قضادان همان ساعت ورقا جنس آلماق ایچون بازارا گلیب دوز گلیر چیخیر تاجرلرین ییغینجاغینا ورقانی تانیانلار حؤرمت – احترام ائلهییب ” آشیق خوش گلدین” دئییرلر تاجر باشی بئله باخاندا گؤرور بیر جاوان اوغلاندی هامی بونون احترامیندادیر اؤزونهده آشیق دئییرلر. تاجرباشی اؤز – اؤزونه دئدی: یاخشی اولدو من ائله عکسیده یازینیدا وئررهم بونا. اودور کی جاوانی چاغیردی و اونا حؤرمت ائدندن سونرا دئدی: اوغلوم! سن آشیقسان؟
دئدی: بلی دئدی: منیم سنه وئرمهلی بیر مکتوبوم وار و کاغاذی عکسایله بیرلیکده چیخاردیب ورقایا وئردی
دئدی: اوغلوم! اگر مئیلین اولسا گئدیب او قیزی باغلایا بیلرسن اونداندا سونرا اونو آلارسان اؤزونده شیروانا شاه اولارسان ورقا بیر نامهیه باخدی بیر عکسه باخدی بیر مقاما باخدی بیر اؤز هنرینه باخدی گؤردو من بابا لئیساندان او قدر دالی دگیلم بس نه یاخشی کی اوستاد بیلمهمیش من اؤزوم گئدهرم اگر اوستاد بیلسه منی قویماز اؤزو گئدر بو مقاما صاحب اولار تاجردن وداعلاشیب گلدی ائوینه وسایلین گؤتوروب یولا دوشور یولو گله – گله فیکیرلشیب آلدی گؤرهک اؤز-اؤزونه نه دئییر
نوشته شده توسط admin در شنبه, ۲۷ مهر ۱۳۹۲ ساعت ۱۲:۰۳ ب.ظ