ایتگین اویون لار
کوچوره ن:اکبرسعادت
آنادیلیمیز:ایندیکی اوشاق اویونلارینی بیلمیرم(آزی ۱۸ ایلدی اوشاقلیغیمدان کئچیر) دوننکی اوشاق اویونلاری، اویون اولاراق بئینیمیزه یازیلیب. بئینیمیزه یازیلانلار، بو آسانلیقدا سیلینمزلر.
اوشاقلیقدا اوینادیغیم اویونلاردان یادیمدا قالانلارین یبیر نئچهسینی آشاغیدا سیرالاییرام. اوشاقلیقدا اوینادیغیمیز اویونلار بیزی بو گونه حاضیلادیقلاری گؤرونور، بیرلیکده باخاق:
گیزلنپاچ(گیزلن پانچ)؛ بیر نفر بیر یئرده(ابه) گوزلرینی یومور باشقالاری قاچیب گیزلهنیرلر. گوزلرینی یومان، اونلارین هاردا گیزلندیکلرینی آیارلاییب، آدلاریلار سسلهییب، ابهنین شوبهلهمهلیدی. بو اویوندا اولانلار آییق اولمالیدیلار، اولماسایدیلار هر دونه اونلار گوزلرینی یوممالی اولاجاق ایدیلار.
بو گون بیزلر گوزلریمیزی یومساق دا، یان یوورهمیزده اولانلارین هاردا گیزلندیکلرینی اویرنمهلیییک، یوخسا هر واقت گوزو یومولو قالیب، باشقالارینی آختارمالی اولاجاییق. ابه قولا بیر آنا ابه قازیلیب، سونرا بالا ابهلر قازیلیب، هره بیرینی یییهلهنیب، بیر نفر ایسه بیر قولا الینده اوزاقدا دوروب، اوردان اولان ابهلردن بیرینی قازانماق اوچون، چابالامالی دیر.
ابهلرین یییهلری قولاچینی اوزاقلاشدیرمالیدیرلار، یوخسا نه قدر یاخینلاشسا بیر ابهنی قازانماق ایمکانی چوخ اولاجاق. اوندا ابهسینی الدن وئرن کیمسه بیر عؤمور ابه دالیسیجا قاچمالی دیر. بو گون ابهلر بیزیم ائویمیز، کندیمیز، یوردوموز، یییهلندیییمیز هر بیر نه دیر.
الدن وئردیییمیز زامان، بیر داها قایتارماغیمیز چوخ چتین اولاجاق دیر. اوشاقلیقدا نئجه یییهلنمهییمیزی اوینامیشیق، ایندی ایسه اوینادیقلاریمیزی یاشاییریق.
بنوشه اویونو: اوشاقلار اؤزلرینه ایکی باشچی (موللا) سئچیرلر. »هالای _ هالای« گلمکله ایکی دستهیه آیریلیرلار. دستهلر بیر _ بیریندن یوز آددیم آرالی ال _ اله توتوشوب دایانیرلار. باشچیلاردان بیری او بیریسینه دئییر: بنؤوشه! او بیریسی جاواب وئریر:
بنده دوشه! اوّلکی موللا دئییر: بیزدن سیزه کیم دوشه؟ او بیری موللا اوشاقلارین بیرینین آدینی چکیب دئییر: بابک، یا دا آیسان دوشه! بابک، یا آیسان جرگدن آیریلیب یویوره _ یویوره ال _ اله توتوشموش اوشاقلارین صفینی یارمالیدیر. بورادا گوجلولوک اساس شرطلردندیر. اگر اویونچولاردان بیری گوج وئریب ال _ اله توتوشموش اوشاقلارین الینی بیر _ بیریندن آییرسا، او بیری طرفه کئچه بیلسه، بیر اوشاق دا گؤتوروب یئنه اؤز اوّلکی یئرینه قاییدیر. یوخ، اگر کئچه بیلمسه، اورادا قالمالی، او دستهیه قوشولمالیدیر. هانسی طرف اوشاقلارین هامیسینی اؤز طرفینده ساخلایا بیلسه، او دسته اویوندا غالیب گلیر، او بیری طرفی اودموش اولور.
آنا منی قوردا وئرمه؛ بو اویوندا بیری آنا اولوب اونده دوروب، باشقالاری بالا اولوب، آنانین دالینا دوزولورلر. آنا ایله اوز-اوزه بیر قورد دایانیر. قورد اویان-بویانا کئچیب، اوشاقلاردان بیرینی سیرادان چیخارتماغا چالیشار. آنا اوشاقلاری قورومالی دیر، هر اوشاقدا آنانی نظرده آلمالی دیر. آنادان اوزاق دوشدوکده، یا دا آنانین نئجه داورانماغین گورمهدیکده سورودن آیریلیب قوردا یئم اولا بیلر.
بو گون آنامیزی تاپیب، اونون دالیسیندا دالدالانیب، نه ایش گوردویون گورمهلیییک. یوخسا سورودن آیری دوشدوکده قورد قوشلارا یئم اولا بیلهریک. قئییش قویدو(قایینج قاپدی)؛ بیر جیزیق چکیلیب، بیرلری جیزیغین ائشییینده، باشقالاری جیزیغین ایچینده اولورلار. جیزیغین ایچینده اولانلار قایینجلاری یئره سریب، بیر باشینی جیزیغا(توققاسینی) طرف قویوب، اوزلری اونو قورویورلار. قایینج ائشدهکیلرین اللهرینه کئچمهمهلی دیر، یوخسا ایچهریده اولانلاری یاندیریب یاخارلار. بو اویوندا وارلیقلاریمیزدان یییهلنمهیی اویرنیردیک. وارلیقلاریمیزی یییهلنمهسک، اوزوموزدن آلیب اوزوموزو وورارلار. چیرتی چیرتی: اوشاقلاردان بیری باشچی سئچیلیر. باشچی اورتادا دایانیر، قالان اوشاقلار ایسه دایروی دوزولورلر. باشچی الینده چوبوق اویونا باشلاییر. اول _ اول ساغ طرفده اولان اوشاقلارا دئییرلر: چیرتی، چیرتی! ساغداکی اوشاقلار جاواب وئریرلر: جان چیرتی! سولداکی اوشاقلار دئییرلر: بیزیم چیرتی سیزین چیرتییا یالان دئدی. ساغداکی اوشاقلار دئییرلر:
کیمین ساققالینا یاراشیر؟ سولداکی اوشاقلار دئییرلر: هر کس آیاغینی چپ قویسا، اونون ساققالینا یاراشیر. بوتون جرگه ده اولان اوشاقلار سولدان ساغا بیر _ بیر آیاقلارینی ایرلی چیخاریرلار .
باشچییا چاتانا قدر ایرلیلهییرلر. باشچی یئنه اولکی سوزلری تکرار ائدیر؛ سول آیاغینی ساغ آیاغینین بارماقلاری اوزرینه قویوب، ایکی دفه فیرلانیر. اوشاقلار اوّلکی قایدادا گئری چکیلیرلر. باشچی ساغ الینی آیاغینین چئچله بارماغینین اوستونه قویور. هامی باشچی کیمی ائدیر، باش بارماقلارینین اوجو ایله باشچینین یانینا گلیرلر. باشچی الینی باش بارماغینی بورنونون اوجونا قویوب دئییر: چیرتی، چیرتی! اوشاقلار اونا جاواب وئریرلر: جان چیرتی! اوشاقلار یئنه گئری چکیلیرلر. بو دفه باشچی سول الینین باش بارماغینی قولاغینا وئریر. اوشاقلار دا اونون کیمی ائدیب باشچییا یاخینلاشیرلار. باشچی دئییر: چیرتی، چیرتی! ساغ طرفده کی اوشاقلار جاواب وئریرلر: جان چیرتی! باشچی دئییر: بیزیم چیرتی سیزین چیرتییا یالان دئدی. ساغداکی اوشاقلار دئییرلر: کیمین ساققالینا یاراشیر؟ باشچی دئییر: هر کس تئز قاچماسا، اونون ساققالینا یاراشیر. هامی نیشان قویولموش یئره قاچیر. کیم گئریده قالسا اونا دئییرلر: تیسباغا تیس، بوینونو قیس! اویون آخیرا چاتینا قدر هئچ کسین ایختییاری یوخدور اوزو ایستهدییی کیمی حرکت ائتسین. قایدانی پوزانلار اویوندان چیخاریلیر. هامی باشچینین امری ایله حرکت ائدیر، نیظام _ اینتیظاما تابع اولور.
دییرمان اویونو :اوشاقلار دایروی ایلهشیرلر. باشچی الینده چوبوق، باشی بورکسوز اورتادا دایانیر. قالان اوشاقلارین باشیندا بورک اولور. باشچی چوبوغو یئره ووروب اوشاقلاری قورخودور. هامی ال چالا_ چالا دئییر: تاغی _ تاغی، تاغباتاغی… بو سوزلری ۴_ ۵ دفه تکرار ائدندن سونرا باشچی ساغدان بیر اوشاغین بورکونو گوتوروب اوز باشینا قویور. بورکو گوتورولن اوشاق دا یانیندا اولان اوشاغین بورکونو گوتوروب اوز باشینا قویور.
بو حرکت دایرهنین سونونا قدر گئدیر. بو یول ایله بورک گوتورمه ۴_ ۵ دفه دووره وورور. بورکلر تئز فیرلانیر، اوشاقلار ال ووروب »تاغی _ تاغی، تاغباتاغ« دئییرلر. اویون قیزیشیر، بورکون فیرلانماسی بیر نوع دییرمان داشینین فیرلانماسینا بنزهییر. اویونون شیدتلی یئرینده باشچی الینی باشینا قویوب چاغیریر. ” داغغا… داغغ… بو زامان هر کس باشینداکی بورکو برک ساخلامالیدیر. باشی آچیق قالانا هره بیر چوبوق وورور. باشچی چوبوغو نه جور وورورسا، قالان اوشاقلار دا ائله وورمالیدیرلار.
بونلارا تای اویونلاری ایستهدیییمیز قدر سایا بیلهریک. اوشاقلیقدا اویون اولسالار دا، بو گون گئرچکلر دیرلر. اوشاق اویونو باخدیغیمیز اویونلار دئمک بویوکلویوموزه حاضیرلیقلاریمیشلار. آنجاق بیز اونلارا اویون باخمیشیق، قایینجلار جانیمیزا اوتوروب، قولا دالیسیجا قاچیب، اولانلاری گورمویوب چرلهدیییمیز زامانلار، تزه باشا دوشوروک آی بالام، اویون دئییلمیشلر. گئرچک ایدیلر!!!!
نوشته شده توسط admin در چهارشنبه, ۰۱ اردیبهشت ۱۳۹۵ ساعت ۵:۲۶ ق.ظ