ایتیریلمیش گون‌لـَر
کؤچورون آیهان میانالی
آنادیلیمیز:إرنئست کازیررا گؤرسه‌دیش‌لی مالیکانه‌یه صاحیب اولدوق‌دان بیر نئچه گون کئچمیش ایشدَن گئری دؤنـَرکن اوزاق‌دان گؤردو کی، بیر نفر کوره‌گینـده ایری کارتون قوتو، مالیکانه‌نی دؤورله‌یـَن حاصارین آرخا قاپی‌سینـدان چیخاراق قوتونو یوک ماشینی‌نـا قالدیریر. او اؤزونو یئتیرمه‌گــه ماجال تاپمامیشدی کی، تانینمامیش بیری‌سی یولا دوشدو. کازیررا ماشینیندا او آدامی تعقیب ائتمه‌گـه باشلادی. یوک ماشینی شَهَرین اوجقار یان یؤوره‌سینده‌کی بؤیوک بیر دَره‌نین یانی‌نـا چاتانا’جان چوخ یول گئتدی. کازیررا ماشیندان دوشدو کی، گؤرسون نه باش وئریر. تانینمامش بیری‌سی، قوتونو ماشیندان آشیریب بیر نئچه آددیم آتدیق‌دان سونرا اونو میلیون-میلیون عئینی جور قوتولار اولان دره‌یه تولازلادی.
کازیررا او آداما یاخینلاشیب سوروشدو:
– من سنی بو قوتو ایله بیرلیکـده حَیَطیمــدن چیخان گؤرموشم. اونون ایچینده نه وار؟ و بوتون بو قوتولار نه دئمک دیر بئله؟
تانینمایان آدام اونا نظر سالیب گولومسه‌دی:
– توللانمالی بو قوتولاردان ماشینیم‌دا هله کئفین ایسته‌یـَن قـَدَر ده وار. بیلمیرسَن؟ بونلار گون‌لر دیر.
– هانسی گون‌لـَر؟
– سَنین گونلـَرین.
– منیم گون‌لـَریم؟
– بلی، سَنین ایتیریلمیش گونلـَرین! او گون‌لـَر کی، سَن اونلاری ایتیرمیسَن! سَن اونلاری گؤزله‌ییردین، إلـه‌می؟ ایندی اونلار گلیبلر. سن اونلار’لا نه إتمیسَن؟ بیر باخ، اونلار هله ده توخونولمامیش قالیبلار.
کازیررا قوتولارا نظر سالدی. بو، حدسیز سای‌دا کارتون توپاسی ایدی. او، إنیش’له آشاغی دوشوب قوتولاردان بیرینی آچدی.
اونون ایچـه‌ری‌سینده بیر پاییز یولو، بیر قـَدَر ایره‌لی‌ده ایسه اوندان همیشه‌لیک آیریلان نیشانلی‌سی “قراتسیئلا” گؤرونوردو. و او، نیشانلی‌سینی هئچ سَس‌لـه‌میردی ده…
او، باشقا بیر قوتونو آچدی. اورادا بیر خسته‌خانا پالاتاسی، یاتاق‌دا ایسه آغیر دورومـدا اونون یولونو گؤزله‌یـَن دوغما قارداشی کوزو واردی. او ایسه ایش‌لـَری ایله ایلگی‌له‌نـَن شَهَرلری دولاشیردیی…
کازیررا اوچونجو قوتونو آچدی. کؤهنه، کاسیب بیر إوین قارشی‌سینـدا آرتیق ایکی ایل دیر یولونو گؤزله‌یـَن صادیق کئشیک‌چی ایتی – بیر دری، بیر سوموک دیک اوتورموشدو. او ایسه قاییتماق باره‌سینده هئچ دوشونموردو ده…
کازیررا حیس إتـدی کی، اوره‌گی آغزی‌نـا گلیر. قوتو داشییان دره‌نین قیراغینـدا جللاد کیمی شاخ دایانمیشدی.
– سینیـیور! – دئیه کازیررا اوجادان سؤیله‌دی. – قولاق آسین. قویون، بو گون‌لـَردن هئچ اولماسا اوچونو اؤزوم’له آپاریم. سیزه یالواریرام، هئچ اولماسا بو اوچونو. من چوخ وارلی‌یـام. سیزه، نه ایسته‌سه‌نیز وئـره‌رَم!
قوتو داشییان، سانکی هانسی’سا أل‌چاتماز بیر نؤقطه‌نی گؤرسه‌دیرمیش کیمی، إلـه بیل “آرتیق چوخ گئج دیر، داها هئچ نه إتمـَک مومکون دَگیل” ،– دئمک ایسته‌یـه‌رَک، ساغ ألی ایله نَسه ایشاره إلـه‌دی. سونرا بیر گؤز قیرپیمینـدا یوخا چیخدی و نهنگ، سیرلی قوتولار توپاسی دا بیرددن-بیره گؤزدن ایتدی.
آرتیق گئجه‌نین قارانلیغی یئره چؤکمکـده ایدی… یئنی قاپینین یایدیغی معلومات اساسیندا آرازآذربایجان راپورونا گوره.
نوشته شده توسط admin در چهارشنبه, ۲۵ بهمن ۱۳۹۶ ساعت ۷:۴۷ ق.ظ
