آقای تحریم
اکبرسعادت
آنا دیلیمیز:لاب دونما دادیر قیشدا کاسیب جان آراسیندا تیر-تیرتیتیریر،تور کیمی یورقان آراسیندا بوش وعده لری حب کیمی قویدوم دیلیم آلتدا سوردوم شیره سین آه ایله افغان آراسیندا آنا دیلیمیز:بو ایلی ده سونا یئتیردیک، بایراملیق اولسون دئیه نئچه سطیر اوره‌ک سوزو ایله نئچه خط یازی یازیب تقدیم ائده‌ک، اومود کی یئنی ایلینیز آیدین، بوللوق، برکتلی، موبارک، گوللو- چیچکلی اولسون.بو ایلیمیزی جور به جور سیاسی، اقتصادی هنری اوویلارلا سونا وئردیک. آجی – شیرین خاطیره‌لرله آز – چوخ یاناشدیق، امّا هئچ بیریسی دونیاسوییه سینده اوز وئره ن قانلی فاجعه‌لرده‌ن آجی اولمادی. بیز باهالیغا، تحریمه، ابرقدرتلرین ظولمونه دوزدوک،قیشی کومورون اوزو قارالیق قیمتینه قورتاردیق، اما قانلی فاجعه لرده آیاق آلتیندا قالان خیرداجا اوشاقلارین آغلار گوزلرینین دردلی باخیشلارینا دوزه بیلمه‌دیک. اونلارلا بیرگه آغلادیق، اونلارا ده‌ین یارا ائله بیلدیک بیزه ده‌یدی. بیزده اینسانیق، بیزیمده قلبیمیز وار.بیز جنگ یوخ، صولح، باریشیق، عشق، محبت عاشیقی ییک. بیزیم علم، هنر و صنعتیمیز صولح‌له باریشیق نامینه دیر. بیزیمچیراغیمیز تانریدان یاینر. هئچ کیمسه اونو سوندوره بیلمز.بیر طنز یازی محاوره دیلینده…تحریم لر اوچون…تدبیر و اومود دولتی،هر بیر نئچه آی دان،خلق اوچون بیر اینشا دئییر…و اونلاری یازماغا مجبور ائدیر.و بیر صمیمی رابیطه دولت و ملت آراسیندا یارادیر.تدبیر و اومود دولتی بو ۸۰ میلیون اوچون نئچه ایل بوندان قاباق بیر اینشا دئمیشدی کی …ایندی اکثرا یازیب لار و اوخوماغا حاضیردیلار.تحریم…بله تحریم…اینشا موضوعوسو تحریم دیربیز اوشاقلیقدان شانس طرفیندن یاریمامیشیق…بیزیم آدیمیز چیخدی لیست اوزونه کی گئدیب اینشانی اوخویاق…
الله هین آدیلا یازیمیزی باشلادیق:من،آتام،آنام و باجی لاریمنان بیرلیکده تحریم لری سئویریک…آتام تحریم آدی گلنده مجنون کیمی اوزوندن چیخیر…
تحریم آدی گلنده آتام بیزه دئییب کی اونو اؤز خلوتینده تک قویوب ائودن گئدک… ائوده بیر گوزل منظره یارانیر…تحریم لردن قاباق آتام مجبور اولموشدو آنامین،منیم و باجیلاریمین ایستک لرینی فراهم ائدسین…بو جریان آتانین بئلین سیندیرمیشدی…آمما ایندی تحریم لر گلن گوندن، ائوده بیراز دینجه گلیب…تحریم لر گلن گوندن بیز ۱۰ میلیون آرتیرمیشیق.نه تک بیز..قونشوموز دا بیر نئچه میلیون آرتیریبلار…دونن قونشوموز دئییردی کی:بیمارستان لار چوخ بوشالیب… آمما داوا درمان بازاری یامان شولوخدور…آخی بو تحریم لره گوره آوروپا دان گلن داوالار آزالیب لار.پول سوزلار تخت اوستونده جان وئریرلر…
آخی دونن آخشام بو تحریم لره گوره قونشوموزون اری بیمارستانا چاتمادی…ائله یولدا قورتاردی.الله رحمت ائله سین.عیبی یوخ سن ساغ قال…کاسیبلارا الله کریم دیر.نئچه گون بوندان قاباق،آتام تلویزیون دا بو تحریم لره گوره بیر خبر ائشدیب لاپ دلی اولدو…دئیه سن دان چوره یینه ربطی واریدی.ائله هیسلندی کی دوردو ووردو تلویزیون پارچالاندی…ایندی ائومیز لاپ دینج اولوب…آمما هردن بالاجا رادیوموزدا خبرلر باشلایاندا،بیزی تئز یوللور حیطه… آخی خبرلر وئرنده ائوده بیر پارا سوزلر اولور کی بیزیم ساوادیمیز چکمیر اونلاری.بله …تحریم لر گلن گوندن بیزیم تربیته چوخ اهمییت قائل دیر.بیزی آنام اوندا تئز بیزی آپاریر کوچه آغزینداکی بقالا…داش شکلات لاردان آلیپ گله ریک ائوه…اونلاری بیر نئچه ساعات آغیزدا ایسلاداندان سونرا ییریک.آخی تحریم لره گوره “اسکینر “شکلانی گلمیر.بقالین وضعی یامان گونه قالیب…بیزدن راضی دئییل او الله سیزدن راضی اولسون…آخی داش شکلات لار دونن دوستومون دیشین یئریندن اوزدو…اونا گوره ائله آل وئری یوخدو.دوستوم دونن بیر گولملی سوز دئدی:دئییر تحریم لره گوره ایستخدام یوخدو…او قدر گولدوم کی…
من ده دئدیم آخی الله سنی یوخ ائت سین،مگر بئله بیر ایش اولار؟؟؟بیز نجور گئچینیریک ؟؟؟والا…
حتما بیز هاوا چورک ییریک…فیکر ائله میرم اوجور بیر ایش اولسون.اولکه میزده هر گون آخشام جوانلار ایش دن چیخیب خیام دا آددیم آتیرلار.اما بیز تحریم دئییک…بیزی قویمورلار چیخاق ائشیه… آخی بیر عده جوانلار آخشام لار گئدیرلر اوغورلوغا…آتام دئییر آماندی سیزی ده یولدان ائلرلر.هر حالدا دئمه لییم کی:بیزیم وضع چوخ یاشی دیر.ائله الله ریضاسی چوخ خوشدوبیزه تحریم لر دوشوب.بو گون لر هر نه ده صرفه جویی ائلریک.
سیزده حتما رعایت ائله یین.بیزه تحریم لره گوره اینشا دا نمره وئرمه دیلر…ساغ قالین.
نوشته شده توسط admin در دوشنبه, ۲۴ فروردین ۱۳۹۴ ساعت ۴:۰۳ ق.ظ
