آذربایجان ائل ادبیاتیندا ناغیل لار
محمد اشراقی
گروه آنادیلیمیز: ناغیل آذربایجان ائل ادبیاتی نین چوخ یاییلمیش و اسگی نوع لاریندان دیر.
ناغیل لار یوکسک کیشی لرله قادین لارین دوغروچو یا خیال ایله دئییلمیش معنالی ، تعجب لو ، دیریلیک له قهرمان لیق لاری نین اؤنملی حادثه لری ساییلا بیلر .
آذربایجان ناغیل لاری نوع باخیمیندان ایکی اؤنملی یئره بؤلونر :حماسه ناغیل لاری-محبت له سئوگی ناغیل لاری.
حماسه ایله قهرمانلیق ناغیل لاری آذربایجان خلقی نین تاریخی له باغلی دیر.
بو ناغیل لاردا ائل ایچیندن چیخمیش قهرمان لارلا رهبرلرین دیریلیک لری ترسیم ائدیلیر. کوراوغلو ایله قاچاق نبی ، ناغیل لاری آذربایجانین چوخ شیرین حماسه ناغیل لاردان دیرلار.
سئوگی ناغیل لاری آذربایجان خلقی نین یاخشی دیریلیک کئچیره ن چاغ – لارینا باغلی دیر. محبت ناغیل لاریندادا بیر سئون بیرده سئویلن ، دئمک سئوگیلی اولان ایکی قهرمانی واردیر. سئوگی ناغیل لاریندا قهرمان لار دوزگون ایشچی له یولداش لاردان دا فایدالانیرلار ، چوخ یئرده آرزی ایستک لرینه یئتیشرلر.
روایت لر ، حکایه لر ، قصه لر اسگی آذربایجان لا اوبیری ملت لرین بعضی سینده محبت ناغیل لاری نین قایناغی اولموشلار .محبت ناغیل لاری نین چوخو (استادنامه) ایله باشلایار. ناغیلین دئییشینده قیسا حکمتلی سؤزلر ، مثل لرله حکمت لی سؤزلر چوخ ایشله نر. بو ناغیل لاردا قافیه لی نثرین لاپ یاخشی نمونه لرینی ده گؤروروک.
محبت ناغیل لاریندا خارق العاده گوج لرله عامل لرده نقش اوینایارلار.
«اصلی له کرم» ، لیلی له مجنون ، فرهاد لا شیرین ، عاشیق غریب ، شاه اسماعیل ، قوربانی ، عباس لا گولگز و علی خان لا پری ناغیل لاری آذربایجانین آدلیم محبت ناغیل لاریندان ساییلیر.
ناغیل لاری قایناق باخیمیندان نئچه یئره بؤلمک اولار :سئحرلی ناغیل لار-حیوان ناغیل لاری-تاریخ ناغیل لاری-طنز و گولمجه ناغیل لار.
آذربایجان ناغیل لاریندا آراییر قوشمایلا نثرده گؤرونر. آذربایجان قصه لرینده کؤکسوز دوشونجه لر تنقید ائدیلیر. بو تنقیدلرین سون غایه سی آلدادیجی کیمسه لر ، اگری قاضی لر ، اجتماعین منفی شخصیت لری دیرلر. آذربایجان ناغیل لاریندا ائلین عادت لری ، معنویت لری ، دیریلیک له یاشاییش یول لاری آیدینجاسینا گؤسته ریلر.بو ناغیل لاردا وفا ، صمیمی لیک ، فداکارلیق ، عشق ، سئوگی ، یولداشلیق و بیراوزلولوک تبلیغ ائدیلر. ناغیل لار دا ایلکین انسان لارلا طبیعتین باغلی لیق لارینی تاپماق اولار. ناغیل لاردا حیوان لارین اهلی لشمه سی ، درمان لارین تاپیلماسی ، ایش له یاشاییش آلت لری نین اختراع ائدیلمه سی نئجه لیگی ایله تانیش اولوروق .ناغیل لار آذربایجانلی لارین گؤزه ل لیک سئور و یارادیجیل خیال گوجونو آچیق گؤستریر.
ناغیل لاردا انسانین آغیریوک لرینی یونگول لتمک ، تاخیلی آرتیرماق ، ییرتیجی حیوان لارا غلبه ائتمک ایستگی و سحر ، جادی و اووسون ایله طبیعی بلالارلا قاریشلاشمالاری عکس ائتدیریلیر.آذربایجان ناغیل لارینین اؤزه ل لیک لری :ناغیل لاردا عنصرلرله حادثه لره دیری موجودلار کیمی توخونولار.حیوان لار لا بیتگی لره انسان اؤزه ل لیک لری وئریلیر.حادثه لر خیالی اولسالاردا دوغروچو گوسته ریلر.عادی حادثه لر خارق العاده بیلدیریلر.آرزی ایستک لر چوخ یئرده سحرله جادی کومگیله دوغرولار.ناغیل لار مبالغه ایله دئییلر.ناغیل ین نثرینی عاشیق لار دئیرلر ، قوشماسینی عاشیق لار چالقی ایله اوخورلار.ناغیل لار توی لارلا شنلیک ییغیناق لاریندا دئییلر.ائل ناغیل لاری یازیلی ادبیات دا گؤرکملی تاثیرلر بوراخمیشدیر.
نوشته شده توسط admin در شنبه, ۰۸ آبان ۱۴۰۰ ساعت ۹:۰۲ ق.ظ
