شهید آشیق

شهید آشیق

(شهید آشیق احتشام مهری¬نین خاطره سینه)
احمد اسدی
بیر قارلی بورانلی قیش آخشامی دی. بیر قوجا کیشی کندین قهوه خاناسینین پنجره سیندن، قارلا بورونموش یولا باخیر. اونون باخیشیندا حسرت و انتظار آچیق و آیدینجاسینا بللی دیر. هر ماشین گلدیکجه، آیاغا دوروب، ائشیگه بویلانیر.
اؤز-اؤزونه دئییر:-گؤره سن حسن دی یا یوخ؟ بس هاچان گله جک؟ایکی هفته دی خبرسیزم!بو آندا، آشیق احتشام اونون سکوتونو پوزوب، بئله سسله نیر.
-حاجی نیه سوسوبسان؟ بیر دئ دانیش. بیلیرم نگرانسان. آما اؤزونو سیخما، انشاء الله اوغلون بو تئزلیکده عسگرلیگی بیتیریب کنده دؤنر. منده ائوینیزده اونا لایق اولان بیر شنلیک مراسمی قورارام. آما سؤز وئر، آیری آشیق گتیرمه یه سن ها!!!آشیق احتشام، بو سؤزلرله اؤتری ده اولسا حاجی محمدین دوداغینا گولوشو قوندوردو. حاجی محمد ایسه اوندان تشکر ائدیب، دئدی:
-آشیق، آللاه آغزیندان ائشیتسین. سنه سؤز وئریرم. آما بو گئجه بیر یوخو گؤردوم. او یوخو منی فکره جومدوروب. یوخودا، حسنی بیر گوللو چیچکلی باغدا گؤردوم.بو آندا، آشیق احتشام خیردی انشاءالله دئیه رک، سسلندی:
- آللاهدان گلنه، قاچیش یولو یوخدور. اوره گینی سیخما، گل بیر سنه مصری هاواسینی اوخویوم. آخی سنین اوغلون جبهه لرده ایندی کوراوغلوسایاق، بیر آسلان کیمی ساواشیر. یقین ایندی بیر چوخلو دوستلاری ایله برابر، الدن گئدن تورپاقلاریمیزی گئری قایتارا بیلیبلر. حاجی محمدده انشاء الله دئیه رک، آشیغین مصری هاواسینا کی سؤزلرینی، کوراوغلو داستانیندان سئچمیشدی، قولاق آسدی:
مرد اوغولون نیشانه‌سی
قانیندا گرک ایگیدین.
چکمه‌یه اؤزگه‌دن میننت
جانیندا گرک ایگیدین.
***
بیر ایگیدین اولسا سانی
وورار قیلینج، تؤکر قانی،
گورزو، نیزه‌سی، قالخانی
قولوندا گرک ایگیدین.
***
ایگید اودو اولا گوجو
آلا قالا‌لاری، بورجو
اووخارلی میسسی قیلینجی
بئلینده گرک ایگیدین.
***
کوراوغلونون بالاسییام
هر سؤزونو قاناسییام
دئدیگینی داناسییام
سؤزو دوز گرک ایگیدین.
***
من حسنم، قورداوغلویام
دوشمنیمه درد اوغلویام
نسیلجن، بیل، کوراوغلویام
آرخاسی گرک ایگیدین.
هاوا بیتندن سونرا، حاجی محمد غرورلاناراق،پاپاغینی باشینا قویوب آشیغا ساغ اول دئییب، قهوه خانادان آیریلدی.سحری سی گون، هاوانی قارا دومان آلمیشدی. ائله بیل طبیعتده بیلیردی، بوگون کندده آجی خبرلر یاییلاجاق. کندین کیشی لری قارا قیشین ایشسیز گونلرینده، اؤزلرینی مشغول ائتمک اوچون یئنه قهوه خانایا توپلانمیشدیلار. بو آندا ایدی. کندلی لرین بیری تله سیک اؤزونو قهوه خانایا یئتیریب بئله دئدی:
-ح…….سن….
-حاجی محمدین اوغلو حسن شهید ائدیلدی. ایکی گون اؤنجه، بیر عملیاتا باشلارکن، باشیندان دگن، مرمی ایشینی گؤروب. آرتیق اونون مطهر روحو جنتده گزیر. ایندی ده دئیه سن، جنازه سینی اؤز دوغما کندینه ساری گتیریرلر. بیر آزدان جنازه داشیان ماشین گلیب چاتار.بونلاری دئیه ر دئمز. آشیق احتشام آیاغا قالخیب، اورادا اولانلاری حاجی محمدله گؤروشوب اونونلا دردلشمک و شهیدین جنازه سینین استقبالینا گئتمگی مصلحت ائتدی.کندلی لر قالخیب حاجی محمدین قاپیسینا گئدیب، اونا باش ساغلیغی وئردیلر.حاجی محمدده، دردلی اوره کله، آغلار گؤزلرله کندلی لره باخیردی. گؤزو آشیق احتشاما ساتاشدی. اوره¬گی جوشا گلیب بیردن بیره هؤتکوتمه ووراراق، سسلندی:
-آشیق، به هانی، دئییردین شنلیک توتاجایام. تئزلیکله گله جک. آرتیق کوراوغلونو، چنلی بئلده باسدیرمالی اولدوم. یاغی لارین گولله سی ایله اوغلوم جنت رضوانا کؤچدو.
آشیق احتشام، اونو قوجاقلایاراق، دئدی:
-انا لله و اناالیه راجعون. سنین اوغلون بو تورپاقلارا و ائلیمیزه اولان بورجونو جوانمردلیکله اؤده دی. امین اول، آدی تاریخلرده قالارگی اولاجاق. گله جک نسیللر اونو افتخارلا آنیب آدینا شعرلر و ماهنی لار قوشاجاقلار.
بو سؤزلر، بیتر، بیتمز. شهیدین جنازه سی گلدی و کند اهالی سینین درین اوزونتولری ایله بیرلیکده، کندین مزاریستانینا ساری یوللاندی.
گونلر کئچدی، دای شهید حسنین سؤز-صحبتی بیر حماسی داستان کیمی کند اهالی سی طرفیندن دیلدن دیله گزیردی. آشیق احتشامدا هر یئرده اونون آدینی یاشاتماق اوچون، قوپوزونون تئللرینده جنگی و حماسی هاوالار ایله سسلندیریردی.
ائلیمیزین قوچ اوغلویدو
ممد اوغلو قوچاق حسن
یاغی لارین دودمانینا
طوفان کیمی اولدو اسن
آرتیق قارا قیش گئتمیشدی. قارلا بوز گونشین گوجونون اؤنونده دوام گتیره بیلمه ییب، اریییب و یئرلرینی گول-چیچگه وئرمیشدیلر. یاز اؤز طراوتینی گؤزل یوردوموزا بخش ائتمیشدی. قارانقوشلار گؤیلرده باهار نغمه سینی اوخویوردولار. بولبوللر باخچالاردا گول چیچکلره ناز ائدیردیلر.
گؤزل یاز گونلرینین بیرینده، آشیق احتشامی بیر تویا دعوت ائتمیشدیلر. گنج احتشام سازینی الینده توتوب، جیغاتی نین قیراغی ایله گئدیردی. دوستلارینین بیری اونو گؤره رک ،تله سیک اؤزونو یئتیریب، دئدی: -احتشام، مکتب دوره سینده اولان صنف داشیمیز حسینی دونن دوشمانلار جبهه خطینده اسیر توتوب، سونرادا اشکنجه ائدره ک اؤلدوروبلر، اونون قارداشینی دا اؤزلری ایله اسیر آپاریبلار. بو خبری ائشیدندن، دا گئجه گوندوز یوخومدو. او خوش خاطره لر بیر آندا اولسون، یادیمدان چیخماییر.-یادیندامی جیغاتی دا گئدردیک بالیق توتماغا؟ بو چای دا نه گونلریمیز اولدو؟ هله بیر دفعه آز قالمیشدی،سو منی آپارا، حسین منیم جانیمی قورتاردی.آشیق احتشام دریندن بیر آه چکرک، هئچ نه دئیه بیلمه دی. گؤزلری یاشلا دولاراق، اوره گی اودلاناراق یولداشی ایله ساغ اوللاشدی.آیاقلاری گلمه ییردی. ائله بیل وجودونون بوتون گوجونو الیندن آلمیشدیلار. بیر قدر چای قیراغی ایله گئدندن سونرا، اسیر دوستو یادینا دوشدو. چایین ساحلینده اوتوروب، سازینی سسلندیردی.
ائیواز دئییب چنلی بئلدن گلمیشم
ایندی بوردا محشر قورارام، پاشا!
دلی‌لریم توتدوغونو بیلمیشم،
گلرم زیندانین قیرارام، پاشا!
سونرا دوروب، سرت اراده ایله و یوموراقلانمیش اللرایله کنده ساری یولا دوشدو. کندین اصلی میدانینا یئتینجه ، بیر نئچه گنجی گؤردو کی بیر قاپی نین اؤنونده اوتورموشدولار.
اونلارین یانینا گئدیب، سازینین کؤینگین چیخاردیب ، باشلادی جنگی کوراوغلو هاواسینی چالماغا.
سازین سسی اوجالاندیقجا کند اهالی سی ائولریندن ائشیگه چیخاراق آشیغین دوره سینه توپلانیردیلار. آشیق یانیقلی اوره کله، هارای، چکیب بیر وولکان تک قایناییردی. اوخودوغو سؤزلردن، حماسه دؤیوش ، وطنی و تورپاغی قوروماق حسی طغیان ائدیردی. کند اهالی سینین چوخو گلندن سونرا، آشیق احتشام سازی دایاندیریب. دانیشماغا باشلادی.-ای گؤزل کندیمین اهالی سی, ای قوچاق کوراوغلولارین شاه اسماعیللارین اولادلاری, نوه لری و وارثلری…
گنجلریمیزین شهادت خبرلرینی ائشیتمک گؤزلریمیزین یاشینی سئله چئویریب. دای جیغاتیمیز داغلارین قارلاری ایله یوخ، آنالارین گؤز یاشلاری ایله جوشوب داشیر. آتالارین آنالارین آهلاری, ناله لری هر گئجه یوردوموزدا گؤیلره یوکسلیر. گئجه نین ساکت واختلاریندا هردن ائشیگه چیخیرام, آغلاشما سسلری اوره گیمی پارچالیر.ایندی ایسه بو کندین اهالی سینین یانیندا، گنجلره سسله نیرم:مجلسلرده کوراوغلونون, شاه اسماعیلین شجاعتلرینه به به آفرین دئیه نلر،هارداسینیز؟ کوراوغلونون غیرت بولاقیندان سو ایچنلر هارداسینیز؟ بیلین من سحر چاغی یولا دوشورم. گئدن وارسا منیمله گلسین. آرتیق بو وضعیتدن بئزمیشیک, دوشمنده ائشیتدیگمه گؤره, سون گونلرده آزدا اولسا اوغورلار الده ائدیب.
آشیق احتشام بو سؤزلری دئییب، ائولرینه ساری یولا دوشدو.
او گئجه سحره کیمی بیر آندا اولسون یوخو گؤزلرینه گلمه دی. بیر یاندان وطن اوچون گئتمه لی ایدی. بیر یاندان ایسه قوپوزوندان آیریلماق ایسته میردی. بو سببدن قوپوزونو باغرینا باسیب اوجا سسله بایاتی سؤزلری ایله قره باغی هاواسینی باغیردی:
گنج احتشام سحر گونشدن تئز ائودن ائشیگه چیخدی و کندین میدانیندا، اؤزونون بو قوتسال یولداکی, یولداشلارینی گؤزله دی. یاواش یاواش کند اهالی سی، اؤز اولادلارینی یولا سالماغا توپلانیردیلار. گلنلرین آراسیندا، بیر پیچیلتی سسی قووزاندی:
-گؤره سن، احتشام سازینی نیه گتیریب؟
-حتما گئتمه یه جک؟
-یوخ حتما ایسته ییر چالا!
-واللاه بیلمیرم, اؤزو بیلر. دؤزسک معلوم اولار.بو سؤزلر کند اهالی سی آراسیندا آغیزدان قولاغا قولاقدان آغیزا گزیردی.
بو آندا، کندین ایچینه بیر مینی بوس گلیب کؤنوللو دسته نی جبهه لره طرف گؤتوردو. آما آشیق احتشام یئنه سازینی باغرینا باسیب اؤزو ایله آپارماق ایسته ییردی. ماشین جبهه لره ساری یولا دوشدو. حربی حسه یه یئتینجه، آشیق احتشام سازی ایله سون دفعه وداعلاشدی. اونو اؤپه رک چیگنیندن چیخاردیب، سلاحینی تاخدی.
کوراوغلونون سیرداشی ایدی
بیر زمانلار تئللی سازیم
ایگیدلرین قارداشی ایدی
بیلین چنلی بئللی سازیم
حربی باشچی لار، یوردوموزون آیری بؤلگه لریندن گلن کؤنوللولری ده بیر یئره توپلاییب. عاشورا لشکری عنوانیندا, ائییتیم و جبهه لره یولا سالماق اوچون ایلگیلی قوروملارا تاپشیردیلار.
آرتیق هر نه دگیشیلمک اوزره ایدی. ایگیدلریمیز دوشمنه آردی آردیجا غالب گلیب اونو باشلادیغی ساواشدان پئشمان ائدیردیلر.
آردی وار

نوشته شده توسط admin در یکشنبه, ۲۴ فروردین ۱۳۹۳ ساعت ۴:۳۱ ق.ظ

دیدگاه


× یک = 5