ایسته ییرم آشیق اولام…

ایسته ییرم آشیق اولام…

احمد اسدی
گئجه یئرینی سحره وئرمک اوزره ایدی. بالاجا محمد شیرین یوخوسوندا، رویالار ایچینیده سئیر ائدیردی. بوگونده خیالیندا دولانان آرزیلارینی یوخودا گئرچکلشدیره بیلمیشدی. مجلس قورولوب، مجلسده کیلر بالاجا محمده، آشیق محمد دئیه خطاب ائدیردیلر. اودا یوخودا بولودلار قدر اؤزونو اوجا حس ائده رک، مجلسده او باشا گئدیردی، بو باشا گلیردی. بو آندا بیر چیغیرتی و قیشیقیریق سسی ایله یوخودان دیک آتیلدی. یئنه ده آتاسی و آناسی سؤزلشه رک، بیر-بیرلرینی یامان –یووزا توتموشدولار. اونلارین عائله سی داغیلماق اوزره دیر. آخی محمدین آتاسی اعتیاد آتشینه دوشندن بری، اونلارین باشینا بؤیوک درد آچمیشدی.
بیر یانداندا ائو-ائشیک و آرواد -اوشاغینی یاددان چیخارتمیشدی. محمدین آناسیدا اوشاقلاری ایله اوغراشان بیریسی اولمادیغی اوچون، محمد ایله باجی سینا ایلگی لنن یوخ ایدی.
محمد بو قیشقیریقلارا و چیغیرتیلارا عادت ائتمیشدیر. نیه کی آتاسی و آناسینین هر واخت گؤردوگو بیر ایش ایدی . بو سؤزلشمه لر اونو دریندن اینجیتسه ده دئمک ، بئله-بئله اولایلارا آلیشمیشدی.
هر واخت اولدوغو کیمی، بوگونده های-کوی ایچینده یوخودان دوروب، پالتارلارینی گئییب مدرسه یه ساری یوللاندی. محمدین مدرسه سی ائولریندن اوزاق اولدوغونا گؤره، هرگون یاریم ساعاتا یاخین یول گئدیب، سونرا مدرسه سینه چاتیردی.
بو آرادا مدرسه سینین یولو اوسته بیر ساز ساتان دوکانی وار ایدی. محمد هرگون مدرسه دن قاییداندا نئچه دقیقه حسرت ایله او سازلارا باخیب یولونون آردینی توتوردو. اؤز اوره گینده دئییردی،
- نه اولاردی بو سازلارین بیری منیم اولاردی؟ نه اولاردی منده بیر آشیغین یانیندا ساز اؤیره نردیم؟ آخی من…. آخی من ایسته ییرم آشیق اولام ؟
ائله بو سؤزلر ایله گونده حسرت دولو اوره ک و یاشلی گؤزلرله ائولرینه قاییدیردی. نئچه دفعه آتاسینا اوره گینین سؤزونو دئمیشدی،
- آی آتا منه بیر ساز آل، آخی ایسته ییرم، اؤیره نیب آشیق اولام.
آما هر دفعه آتاسی بعضاً عصبلی، بعضاً گولونجه یه توتاراق، “اوغول ائله من اؤزوم آشیغام به گؤرموسن؟” ” بونون کئفینه باخ!!! قوی قاش گئت گؤرخ بابا” بئله سؤزلرایله اوشاغین اوره گینی سیندیریردی.
گاهداندا سازلارین باها اولدوقلارینی اؤزونه قالخان ائدیب، پولو اولمادیغینی دئییردی.
گونلر بیر بیرینین آردیندان کئچیردی، بالاجا محمدده حسرتده…..
پاییز آخشامی ایدی. محمد مدرسه دن ائولرینه دوغرو گئدیردی. آیاقلاری آلتدا، خیش-خیش ائدن قورو یارپاقلارین سسی سانکی بیر گؤزل آشیق هاواسینا اوخشاییردی. ائله بو سببدن حسلرینین بوتونون بو خیشیلتی سسلرینه ییغیب، یولونا دوام وئریردی.بو آندا ساز دوکانینین قاباغینا چاتدی. گؤزلری ویترینده پلاستیکدن حاضرلانمیش سازلارا ساتاشدی.
آی آللاه، دا بونلار نه دیر؟ بو بالاجا سازلار ایله هاوالاری چالماق اولارمی؟ گؤره سن قیمتلری نئچه دیر؟
ائله بو فکرلری ائده رک، ساز دوکانینا گیردی “-سلام عمی
-آی علیکم سلام
-عمی بو نایلون سازلار نمنه دیر؟
-بالا بونلاری، تزه تبریزدن گتیرمیشیک. مخصوص اوشاقلار اوچون سفارش وئریلیبدیر همده قیمتلری اوجوزدور. باخ بو ساده لر ۳۰ مین بو کیفلی و میکروفونلولار ۵۰ مین تومن. ایسته سن آخشام آتان ایله گل، بیرینی ده سنه وئریم.
-یاخچی، بس گئدیم آتاما دئییم، گلرم.”
بو سؤزلر ایله ساز دوکانیندان آیریلدی. سئوینه رک، اؤز-اؤزونه دئییردی؛ دا بو دفعه آتام پول بهانه سی گتیره بیلمز. آخی بو سازلار ۲۰۰-۳۰۰ مین تومن یوخ ساده جه ۳۰ مین تومن دیر، آتامدا پول بابتیندن فشارا دوشمز. تله سیک، اؤزونو ائولرینه چاتدیردی، آتاسی همیشه کینه تای ایشسیزلیکدن ائوده ایدی. آتا، بوگون اوشاقلار اوچون ساز دوکانینا نایلوندان حاضرلانمیش سازلار گتیریبلر، همده اوجوزدولار. نه اولار بیرینی منه آل دا. ۳۰ مین تومندیر.
ائله سؤز آغزیندان چیخمامیش، آتاسی سؤزونو کسدی، اوغول سنده لاپ آزیبسان ، تئز گئت گؤزومون قاباغیندان ایتیل، منیم پولوم زادیم یوخدو. بیر داها ساز صحبتی منیم یانیمدا ائله¬مه ها. ساز آلما، چالما دولتلی لریندی، بیزیم کیمی آللاه وورموشلارین یوخ. بیلدین یوخسا بیلدیریم؟
-بیلدیم آتا، بیلدیم.
محمدین سون پارلایان اومود ایشیقجیقلاریدا سؤندو. آما بوتون بونلارا باخمایاراق، او یئنه ده هرگون مدرسه دن قاییداندا ساز دوکانین قاباغیندا نئچه دقیقه دایانیب، سازلارا باخدیقدان سونرا ائولرینه گئدیردی. اونون ان بؤیوک آرزوسو، بیر ساز آلیب، آشیقلار تک ساز چالماق ایدی. هرگون بو سؤزو آتاسی و آناسینین ساواشدیغی آنلاردا اؤز-اؤزونه دئییردی:
- نه اولار منه ده بیر دنه ساز آلاسینیز، آخی من ایسته ییرم آشیق اولام. نه اولار منه ۳۰ دنه مین تومنلیک قدر دگر وئره سیز. نه اولار…..نه اولار….. نه اولار……
آما هر بونلاری دئدیکجه کؤنلونده بیر اولو و مقدس دویغونو حس ائدیردی. اؤزو ایله پیچیلداشیردی:
- ایندی منه ساز آلماسالاردا بؤیویوب، پول قازانیب اؤزومه ساز آلاجایام. اوندا ساز اؤیره نیب، آشیق اولا بیلرم، آخی من ایسته ییرم آشیق اولام.
او واختلار کیمسه منیمله مخالفت ائتمه یه جک. بو یولدادا هئچ کیمین سؤزوایله گئری دؤنه سی دگیلم. بوگون آرزیلاریم منیم اولماسادا، گله جکده گئرچکلر منیم دیر…

نوشته شده توسط admin در چهارشنبه, ۲۱ اسفند ۱۳۹۲ ساعت ۴:۳۷ ق.ظ

دیدگاه


یک × 7 =