دلی خانا

دلی خانا

سعید فیوضات
آنادیلیمیز: ائله بیل گئنه ده چاش باش وورورام. آخی بو نه دئییم اولسون یئکه ساعات آمانیمی قیریب. تیق تیق تیق … بیلمیرم هانسی گون حیرصیمی یئمه‌‌ییب ووروب بو ساعاتی اوووق اووق ائله‌یه‌جه‌یم. اوندان آنام منه تپیله‌جک کی وای دده اؤکوزوم اؤلوب باشی قیزیلدان. بیر دؤنه بو ساعاتین باشینا قیشقیریب هده بیچیردیم:
– سنی بئله بئله ائله‌یه‌جه‌یم، دوغرام دوغرام ائله‌یه‌جه‌‌یم، او منه باخان اوزونه بیر تپیک گئیدیره‌جه‌یم…
ائله اوندا بوینومون کؤکوندن باخیب گؤردوم وای ددم وای، آنام آستانادا دوروب منه باخیر. ساغ الینی سول الینین اوستونه چیرپیب دئدی:
– باشیما خئییر. بو لاپ دلی اولوب.
من ده دئدیم:
– سؤزوم گل گیر آغزیما.
اؤلومدن قورخمورام آما دلی خانادان قورخورام. آخی اورادا آدامی ژاکت‌له قولبند ائله‌ییرلر. ایندی بیردن بورنونون اوجو یا کوره‌ییین قاشیندی نئیله‌یه‌جکسن؟ کیمی باشا سالیم کی اورا ائله جهنمین سول تایی‌دیر؟ دئسم دئیه‌جکلر، یوخ شیطانا لعنت. اورا دلی خانا دئییل، اورا دا ائله بیر تَهَر مریضخانادیر.
بئله من سنه دئییم، ائله دلی خانانی اؤیه‌جکلر کی ائله بیله‌جکسن کمبریجدن، کالجدن زاددان‌دیر. اؤزو ده دیپلومی نه‌دیر؟ بو آغا دلی ایدی بوردا یاتمیشدی. یاخشی بیر نومره ایله بوردان ماذون اولدو…
سیزه بیر خاطیره دئییم: سون دؤنه دلی خانادا اولاندا، دلی‌لرین بیریسی گلیب اوتوردو منیم یانیمدا. منیم قلم دفتریم بؤیرومده ایدی. قلمی گؤتوروب اووجوندا توتوب منه دئدی:
– اووجومدا نه وار؟
قلمین یاریسی دا اووجونون ائشیگینده قالمیشدی. دئدیم:
– گامیش.
قلمی یئره آتیب دئدی:
– کوو دؤوور. گؤردون.
او زاماندان بویانا قلمه گامیش دئییرم. قوی بیرین ده دئییم آما یوخ دئمه‌سم یاخشی‌دیر. چون دئیه‌جکسیز پا آتاونان. گئنه ده بو دئیینگن گلیب باشیمیزین اوستونده اوروس آللاهی کیمین دوردو. آما من اؤلوم داها قالانین دئمه یین ها کی حتما آناسی انگ اتینه یئریکله‌ییب اؤزو ده گیروانکاسیلا. اؤزوم جهنم، قوی ننه مین حؤرمتی قالسین یئرینده. هردن اؤز الیمدن زارا گلیرم. او قدر دانیشیرام کی انگیم هئچ سول قولاغیم یورولوب مجبور اولورام اونو سوندوره‌م یانی تئرن آف ائله‌یم. سوروشساز به ساغ قولاغین نه اولور دئییم کی ساغ قولاغیم بئیار‌دیر. هئچ منی سایمیر کی یورولسون. ساغ قولاغیم فقط پول سؤزونو یاخشی سئچیر. بو بورادا قالسین، قاییداق ساعاتین مسئله‌سینه. سوروشورلار آخی سنین دردین بو ساعاتلا نه‌دیر؟
دئییرم:– بونون سسی باشیما دوشور. هر تیق تیقدا بیلیرم کی ایکی تیق تیق قده‌ر قوجالدیم، هئچ نمنه ده اولمادیم. بیر ده منی لاپ دلی ائله ین بودور کی او دقیقه عقربه‌سینه نه قده‌ر باخیرام، اونون ترپشمه‌سینی گؤرمورم!
دئییرلر:– بابام جان اونون حرکتینی هئچ کیم گؤرمز. سن نئجه اولوب کی بونو اؤزونه بیر درد ائله‌ییبسن؟
دئییرم:– به نجور اولور بارماق بویدا لی لی پوتون شاهی اونون حرکتینی گؤرور من بویدا ایگید گؤره بیلمیرم؟
سوروشورلار کی لی‌لی پوت نه‌دیر. دئییرم:
– گالیوئرین کیتابین دا اوخوماساز کارتونونو کی گؤروبسوز. (آها، گرک لی لی پوتون یئرینه دئیم فئرلتیشییا). فئرلتیشییا دئیینجک دئییرلر:
– آخی او کارتون دی!( باهو گؤر نه تئز یادلارینا گلدی).
دئییرم:– به نئجه اولور کی بیر آز باشیم قال اولوب تزه‌دن دؤنوب باخینجا گؤرورم عقربه‌نین یئری ده‌ییشیلیب؟ هله هردن ساعاتین دا عقربه‌سی ده، بئله من گؤرمه‌میش، من بیلمه‌میش یئری ده‌ییشیلیر! آما او جینقیلی لی لی پوت شاهی اونو گؤرور؟
آخیردا اله عاغیل وئرسین دئییب چیخیب گئدیرلر.
هله بیرین ده دئییم. وای وای او تلوزیونون الیندن. بیر یالانلار دئییر کی آیاغیم یئره یاپیشیر. او ایره‌لی تروی فیلمینی وئریردی. ترویو هومر، ایکی مین ایلدن بیر آز چوخ قاباق، یانی میلاددان قاباق، ایلیاددا یازیب. ایکی مین ایلدی کی هامی بیلیر پریام اوغلو پاریس، منلائوسون یانی آگا ممنونون قارداشینین آروادی، یانی هلنی قاچیردیب. بیزیم تئلوزیوندا منلائوس گئتمیشدی هکتورون اوستونه کی نییه قارداشین منیم قیزیمی اوغورلاییب؟ هله اوشین قالسین. بابا اؤزومو ساخلایا بیلمیرم دا. هر دؤنه بو یالانلاری گؤرنده تلوزیونی یامانلاییرام. دؤنوب تلوزیونا ساری دیشیمین دیبیندن چیخانی دئییرم. دئییرم:
– یالان دئیه نین دده سینه لعنت.
خاطایا قالمیشام. گونده آذان واختی دورونجاق او تیق تیق‌لا تلویزیونون یالانلاری یادیما دوشوب یامان یوووزا باشلاییرام. خالق نامازین قیلیب کله پاچاسینی یئییب آغیز بورنونو تمیزله‌ییر هله منیم یامان یوووزوم قورتارمیر…
بیر گون گلیب منی دیوانا آپاردیلار. قاضی دئدی:
– اوغلوم سنین دردین نه‌دیر؟ نییه بئله ائلیرسن؟
سوسدوم. دئدی:
– اوندا یازیرام گئده‌سن دلی خانایا.
دئدیم:– باشینا دولانارام قاضی منی اورا یازما اوردا هامی دلی‌دیر.
دئدی:– سن نه دئییرسن اوردا یاخشی یاخشی دوقتورلار وار.
دئدیم:– اورادا بیر سؤزلر دانیشیرلار کی لاپ بئینیم قاریشیر.
دئدی:– مثلا نمنه دانیشیرلار.
دئدیم :– بیر گون او دئدیگین دوقتورلارین بیری، دلی لرین بیرینه دئییردی کی کئچمیشینی بوراخ گئتسین. هر نه اولوب قورتاریب گئدیب. ایندیکی زامانا گل. کئچمیشه کئچمیش دئیرلر. دلی دئدی، به نییه دئییرسیز اولاجاغا چاره یوخدور؟ دوقتور دئدی، بابا گله‌جه‌یی بوشلا، ایندی دن دانیشیرام سنه. دلی دئدی، آخی دوقتور، ائله لاپ الان منه دئدیگین کئچمیشه کئچدی قالدی کئچمیشده. کئچمیشی بوراخیم، گله‌جه‌یی بوراخیم به نه یی توتوم؟ دوقتور دئدی، حال حاضری توت. دلی دئدی، آخی من ایسته‌دیییم الان غایب‌دیر! اونو ائشیدن‌دن بیلدیییمی ده قاریشدیرمیشام. باشینا دولانارام جناب قاضی او گامیشی آل الینه منیم عفوی یاز گئدیم ائوه.
قاضی پؤرتوب دئدی:
– نه؟ نه گامیشی؟
دئدیم:
– من قلمه گامیش دئیه‌رم!
قاضی بیر آز منه باخیب سونرا دئدی:
– حقینده چوخ راپورتلار وار. تلوزیونی نییه یامانلاییرسان؟
دئدیم :
– آخی یالان دانیشیر.
قاضی جینله‌نیب دئدی:– به سن بیلمیرسن تلوزیون دولتین وکیلی، سؤزجوسودور؟ سن دؤلته یامان دئییرسن؟ هله ساعاتی نییه یامانلاییرسان به سن بیلمیرسن ساعات بیزیم شرعی واختلاریمیزی گؤرسه‌دیر. سن یا ضد انقلاب سان کی الان یازیرام سنی باسسینلار زیندانا یا دا دلی سن کی گرک اوندا یازام دلی خانایا!
زندان سسینی ائشیدینجک بوغازیم قورویوب بئینیم تاققیلدادی.
قاضی دئدی:– تئز اول دئنن سن نمنه سن؟ دلی سن یا یوخ؟
دئدیم:– یوخ، من دلی دئییلم، زیر دلی‌یم

نوشته شده توسط admin در دوشنبه, ۰۳ اردیبهشت ۱۴۰۳ ساعت ۹:۲۴ ق.ظ

دیدگاه


5 − = هیچ