شه‌هر اوستومه یورویور……

شه‌هر اوستومه یورویور……

کریم قربانزاده
آنادیلیمیز: بوروق- بوروق کوچه‌لردن کئچمک منیم اوچون چوخ قورخولودور؛ خصوصیله ده هاوا بیر آز قارانلیق اولاندا، دئییرم بلکه آرخادان منی توتاجاقلار. هر بئش- آلتی آددیمدان بیر، دؤنوب آرخایا باخیرام.
یئل اسن واخت، آغاجلارین کولگه‌سی ده‌بردیکده دیلیم توتولور. اونلار اؤز حرکتلریله سانکی منه هجوما حاضیرلاشیرلار.
بعضن کوچه- باجادا ایت‌لره راست گلسم، دوروب منه باخاندا اؤز- اوزومه دئییرم: «گؤره‌سن بو کیمه اوخشاییر؟» آللاه- آللاه ائله‌ییرم منه یاخینلاشماسینلار. وای- وای‌دی دالیمجا دوشه‌لر؛ اؤدوم پارتلایار؛ بیلمیرسینیز نه حالا قالارام!
گئجه‌لر ائوده بیرکس اولمایاندا باغریم چاتلاییر؛ کیچیک بیر شیققیلتی ایله دئییرم به ایندیجه در- دوواردان بیریسی چیخاجاق. دوروب بیر به بیر اوتاقلارا باش چکیرم؛ حتتا بعضن کمدلارین دا قاپیلارینی آچیب، ایچینی یوخلاییرام.
گئجه‌لر سحره‌جه چیراقلاری سوندورمه‌رم؛ قورخودان گؤزلریمی یوما بیلمه‌رم. سحر هاوا ایشیقلاناندان سونرا هوشلانارام…….
***
کؤهنه ائویمیزین آشپازخاناسیندا عمیم خالاما سورتوشور. من قاپیدان ایچه‌ری گیریرم. منی سایان یوخدو.
آنام حیطده پالتار سریر. یئل شریطده‌کی پالتارلاری اوینادیر. او منیم آلت پالتاریمدی. آنام نه‌دن اونون اوستونه بیرزاد چکمه‌ییبدیر!
چانتامی گؤتوروب ائودن چیخیرام. ائله بیل بورا ترمینال‌دی. گئدیرم ماوالا. اوتورماق همان، ماوالاین قاپیسی‌نین آچیق اولدوغونو دویورام. ماوالین قاپیسی یوخدو؛ مندن سونرا باشقا بیریسی ده ماوالدا اوتوروب. تئز دوروب، اوردان قاچیرام. کیمسه‌لر منی قووالاییر؛ هوولجک پیلله‌لری ایکی بیر اوسته قالخیرام. اوره‌ییم آز قالیر آغزیمدان چیخسین. داما چاتیرام. منی قووالایانلار چوخالیبدی‌لار. او بیری داما آتیلماق ایسته‌ییرم. چوخ هوندوردو. آشاغی باخاندا باشیم فیرلانیر. جانیما قورخو دوشور. قووالایانلار آز قالیر منه چاتسینلار. گؤزلریمی یوموب، او بیری داما آتیلیرام.
تاکسی‌دایام. شوفئردن قورخورام. آینادان باخیر منه. جاناوار عمیمه اوخشاییر.
هاردا اولدوغومو بیلمیرم. بورا بؤیوک بیر سارای‌دیر. چوخ گؤزل پرده‌لری وار. قارداشیمن دوم آغ بیر پیشیگی وار. پیشیگین کمدی و اؤزونه مخصوص اوتاغی دا وار. او هر یئری قاریشدیریر، من سهمانلاییرام، آنجاق یئنی‌دن اونلاری داغیدیر و قاریشدیریر.
جاناوار عمیم خالامی چکه- چکه کؤهنه ائویمیزده کی آرا کسدی‌نین ساغ طرفینده‌کی اوتاغا آپاریر. من هرنه قیشقیریرام کیمسه سسیمی ائشیتمیر. سانکی سسیم یوخدور، جاناوار عمیم شیطان گولوشو ایله منه باخیر. ذهلم گئدیر اونون یئکه اللریندن، یوغون اودون کیمی بارماقلاریندان، ایرنج نفسیندن. قاچا- قاچا گلیرم ائویمیزه، اؤزومو بیر بوجاقدا گیزله‌دیرم.
سنین اوچ آروادین وار: بیری منیم قدیمی همکاریمدی، او بیریسی کوله‌بوی، ایکی اوشاقلی آریق بیر قادین‌. اوچونجوسو ایسه تئز- تئز سنه یاپیشماق ایسته‌ین بیریسی. ایکینجی آروادین اوشاقلاری‌نین بیریسینی آپاریر ماوالا. اوچونجو آروادین دا آغ دونوندا، گلیب سنه یاپیشماق ایسته‌ییر. اوندان قاباق تئز سنی قوجاقلاییرام؛ اوزوندن اؤپورم. الیندن یاپیشیب چکیرم اوتاغا. من اونلارا غالب گلیرم. سن اصلن دینمیرسن. همکاریم قاپینی آچیر، ایچه‌ری گیریر. سنی اؤپمه‌ییمی گؤرور. تلسیک اؤزوموزو ییغیشدیریریق. آنام حیطده دوروب، بیزه باخیر. سانکی سنی تانیمیر. شمسی مامان منه دیلینی چیخاردیر؛ آغاجان قوجا جاناوارا اوخشاییر؛ او جاوانلیقدا ییرتیجی بیر جاناوار کیمی ایدی. حیطه‌تین او باشیندان سوله‌نه- سوله‌نه گئدیر ائوه.
چوخداندی آنامین قبیری اوسته‌یم. هاوا قارانلیقلاییب؛ قبریستاندا مندن باشقا کیمسه یوخدور. قبیرلردن قورخورام، قورخورام آیاغیمی قویام قبیر داشی‌نین اوستونه، قبیر شوملویا، دوشم قبیرین ایچینه. تئز قبریستاندان چیخیرام ائشییه. قاپی قاباغیندا بیر ماشین دایانیب.
اوره‌ییم گلیر یئرینه. ماشیندا اوتورماق همان، حرکت ائله‌ییر. چوخ سرعتله شه‌هردن ائشییه چیخیر. یالواریرام، آغلاییرام، سسیم بیر یئره چاتمیر. هاوا کامیل قارانلیقلاییب.
شوفئر پوتا بیر اوغلاندی. ماشینی چول یولوندا ساخلاییر. پیچاغینی دایاییر بوغازیما. گؤزومون اؤنونده بالام دایانیب: »اوغلوم، بالام، کؤرپم! سنی کیم ساخلایاجاق؟ سن آناسیز نه ائده‌جکسن؟« شوفئر گؤز یاشلاریمی، یالوار- یاخاریمی، ال- ایاغینا دوشمه‌ییمی سایماییر. جانیما بیر جاناوار دوشوب، روحومو سؤکور. گؤز یاشلاریم امان وئرمه‌ییر. وارگوجومله قیشقیریرام…..
***
باشیم فیرلانیر؛ بئینیمده کوشولتو وار؛ اوره‌ییم بوغازیمدا چیرپینیر. قولومدا سئروم وار… دوکتورون نه واخت باشیم اوستونه گلمه‌سینی بیلمه‌میشم…
من بوروق- بوروق کوچه‌‌لردن، قارانلیق ائودن، گئجه شیققیلتی‌لاریندان، تنها یاتماقدان، اوزومه باخان ایت‌لردن، یئل اسنده آغاج کؤلگه‌سیندن، آغ پیشیک‌دن، یئیین گئدن ماشینلاردان، جاناوارا اوخشایان آداملاردان قورخورام. دووارلار اوستومه گلیر؛ شه‌هر بوتون دولانباج کوچه‌لری ایله اوستومه یورویور…

نوشته شده توسط admin در دوشنبه, ۱۵ اسفند ۱۴۰۱ ساعت ۷:۴۹ ق.ظ

دیدگاه


نُه − 3 =