چوخ محبّتدن مرض حاصل اولار
رقیه کبیری
سون بولوم
آنادیلیمیز:گؤزلریمین آلتی شیشیب. سحر ایشه گئدنده آغلادیغیمی هامی بیلهجک. هئچ کیمین اوزونه باخمییاجاغام. سوروشسالار نه دئییم؟ آچیب آغارتمالی دئییل کی. دئسم ده اینانمازلار. آنام دا اینانماز. هئی تعریفلهسین، دئسین احمد نجیب اوغلاندی. ائلچیلیک گونو تلفوندا، عمه خانیما بیر ساعات اونون نجیبلیییندن دانیشدی. او قدر دئدی کی، آخیردا یورولوب دئدیم: او قدر »نجیب- نجیب« دئییرسن کی، من اونو گؤررکن باغلار باغیندا بوینوندا تورباسی اولان آتلار یادیما دوشور. آنام حیرصلندی. دیلینی دیشله – دئدی. بویون-صاباح او سنین ارین اولاجاق آخی! هر شئیه ظارافاتلا یاناشما – دئدی.
بیر دفعه من ده او آتلارا میندیم. اؤلدوم اریدیم. آبیر-حیادان دوشدوم. آت ایکی آددیم آتمامیشدان دایانیب هامینین قاباغیندا شیر-هاشیر ایشهدی. قوملارین اوستوندن ائله پیس قوخو قالخدی کی، اورهییم بولاندی. هله اورهکبولانما بیر یانا، منه باخان جماعتین یانیندا یئره گیرسهیدیم آت اوستونده اوتورماقدان مین قات یاخشی اولاردی. ائلهبیل او آداملارین گؤزونون اؤنونده اتهییمی قاوزامیشدیم. آت شاهه قالخیب منی یئره چالسایدی، بو قدر قانیم قارالمازدی.احمد دوغرودان دوغروسو بو گئجه آز قالمیشدی منی گؤتوروب یئره چیرپسین. هله نه یاخشی اوتانقاجدی. اؤزگهلرین یانیندا حؤرمت ساخلار. حیرصیندن دیرناقلارینی چئینر. بارماقلاریندا دیرناق قالماییب کی! دیرناقلارینین آلتینداکی قیپ-قیرمیزی ات ائشییه پیرتلاییب. ایندی بیلرم نییه دلی اولدو… گؤرهسن نه ائلیییر؟ یاتیب؟ یوخسا گئنه ده تلویزیونا باخا-باخا دیرناقلارینی چئینهییر؟
آینانی بیر آزجا آشاغی ائندیریر، بیر ده اؤزونه باخیر.رویا خانیم! آخی سنین عیبینی هئی باشینا قاخینج، اوزونه توخونج ائلهسهلر، خوشونا گئدر؟ ایندی ائوه دؤنمهیه هئچ اوزون اولاجاق؟ نه ائیلهدی کی! قولوندان توتوب کاناپهیه ساری چکدی داااا… نییه ائله دئدین آخی؟ سنه دئسهلر کی، دیرناقلاریندان چیمچهشیرم، منه الینی اوزالتما، خوشونا گلر؟ اگر ائوه دؤنسم دیرناقلارینا هئچ فکر وئرمهیهجهیم.آینایا باخیر. آرخا شوشهنین اتهییندهکی ایت، باشینی تیترهده-تیترهدیر، سانکی اونو حاقلاییر.
ماشیندان یئره دوشور. پارکینگین قاپیسینی آچیب ائشییه گؤز گزدیریر. ایشیق دیرهیینین لامپاسینین بالونو یئکه بیر دوزداندیر سانکی. دوزو یئره سپهلهییر. یئر هله آغارماییب.قار آغیر یاغسا، گئده بیلمرم. قوی یوخاری قالخیم؛ قاپییا قولاق یاتیردیم؛ بلکه یاتیب!قاپینی ایشگیللهییب، آستا-آستا یوخاری قالخیر. ایکینجی قاتدا بوتون ائولرین ایشیقلاری سؤنوکدور. اوچونجو قاتدا اورتانجیل قونشونون ایشیغی، قاپینین باشینداکی شوشهدن پیللهلره دوشور. دؤردونجو قاتا چاتدیقدا گؤیرچین کیمی بارماقلارینین اوجوندا یئریییر. قولاغینی قاپییا دایاییر. تلویزیون سسی گلیر.هله یاتماییب. ائله آللاهیندان ایمیش من ائودن چیخیم. آغزیمی آچاندا دئییر، دینمه! اعصابیم خرابدی، دانیشما! بانک حسابلاریمی قاتمیشام. حساباتیم یئرسیز چیخیر، نه قدر سالیب-چیخیرام یئنه ده آز گتیریرم! هه، هامینین یانیندا آز گتیریر، بیر ائله منه آرتیق گلمهیی باجاریر. آنام هاردادی گلیب گؤرسون، همین نجیب اوغلان نئجه ده تکباشینا موسیقی ییغیناجاغی قوروب، چالدیریر!… باخ گؤر نئجه ده سس گلیر!دلی شیطان دئییر قاپینی آچ، ایچری گیر؛ گئت گؤر نهیی ایزلهییر بئله؟ یقین پورنو فیلمیدیهااا. آشپزخانادان یامان بویلانیردی، رکلامینا باخاندا گؤردوم. دئینه قیچین سینسین رویا!… ائودن نییه چیخیردین کی! سن خاراباندا اوتورسان، او دا اؤز بیلدییینی ائلهمزداا.پوسقودا دایانان پیشیک کیمی، بیر ده قاپییا قولاق یاتیردیر. ایچریدن گلن سسی یاخشی ائشیتمیر. آشاغیدان، پیللهلردن سس اوجالیر. دئیهسن یوخاری قالخان وار.سس ائلهمه! پیس ایشدی. ساخلا ائوه، قونشولار یاتیب دییهسن بو سس فریبا خانیمین سسیدیر. ایندی نه ائلهییم؟ منی بوردا گؤرسه، نه دئیر؟
بیر قاپییا باخیر، بیر ده اییلیب نردهدن یوخاری قالخانلارا باخیر. نه ائیلهسین، بیلمیر. باشماقلارین چیخاریب الینه آلیر. پیللهلرین اوجونو توتوب، اوغرون-اوغرون دام یولونا قاچیر. آشاغیدان گلن سس گئت-گئده اوجالیر، یاخینلاشیر. اونون ایسه آیاقلاری اوشویور.
کؤپه… قیزی! بیر-ایکی عاغیللی-باشلی آدام گؤرنده، اؤزوندن چیخیر. سنه کیم دئدی دور اوینا؟ ائله بیرجه کیشیلرین قاباغیندا قیرجانماغین قالمیشدی؟ ها دئییرم دینمیییم، اولمور کی، اولمور.سن آلـلاه دینمه. قونشولار یاتیب. قوی ائوه یئتیشک، نه قدر دانلایاجاقسان دانلا دا…گئنه ائوه یئتیشیریک، خانیم تویوق کیمی میسیر. دیل تؤکور، یالوار-یاخار ائلهییر، باااخ! آخشامدان اؤزگهلرین یانیندا شئر اولموشدون آخی؟!دینمه. سن آلـلاه دینمه. قونشولار ائشیدر.دام یولوندا دیوار دیبینه سیخیشیب. ائشیتدیکلرینه اینانا بیلمیر. فریبانی، آپارتمانین ان خوشبخت خانیمی ساناردی. فریبا همیشه یاراشیقلی، گولر اوزلویدو. بیر دئییب مین گولردی.
پیللهلردهکی سس کسیلدی. باشماقلاری الینده پیللهلری ائندی. یئنه قولاغین قاپییا دایادی. تلویزیون سسی کسیلمیشدی. کور-پئشمان پیللهلری آشاغی ائندی. اوچونجو قاتدا باشماقلارینی گئیدی. آیاقلاری سویوقدان دونموشدو. پارکینگه چاتدی، قاپینی آچیب دیوارا دایادی.ائله تصدیقسیز گئدهجهیم. گئجهنین بو ساعاتیندا پلیس- ملیس هاردایدی؟قار، پارکینگین آچیق قاپیسیندان ایچری سپهلهنیر. ماشیندا اوتوروب موتورو ایشلهدیر.
آخ ائئئی! ایشلهدی دئیهسن. گل ایندی بو دوه اؤلوسونو قاپیدان ائشییه چیخارت. بیر آز دقّتلی اولسام، بیر-ایکی فرمانا چیخاردارام. نهدیر کی؟ گؤرموشم، احمد ماشینی پارکینگدن نئجه چیخاردیر. دالی دندهیه آتیب، اوچ فرمان ساغا، ایکی فرمان سولا، سونرا دوم-دوز ائشییه چیخارام. قوی آینادان باخیم. اااااه! کئشگه او ایتی یئریندن گؤتورردیم. آرخایا باخاندا، باشینین تیترهمهسی فکریمی جایدیریر. آهان! بو بیر فرمان، بو ایکی…تاققیلتی سسی گلدی. آیاغینی ترمزا باسدی. ال ترمزونو قالدیردی.آاااا… نه اولدو؟ بو سس نه ایدی؟ اولمایا فریبا خانیمگیلین ماشینینا توققوشدوردوم؟ یوخهااا! اآللاه ائلهمهسین.قاپینی آچیب یئره ائندی. ماشینین آرخا گیلگیری، فریبا خانمگیلین بادمجانی مزدا-? لرینه دایانمیشدی.اؤلهسن رویا! اؤلهسن! ایندی نه دئیهجکسن؟ گونده یوز دفعه بو ماشینا داروگر فیسیلدادیرلار. سیله-سیله، پوفلهیه-پوفلهیه ساخلاییرلار. اوووف! گؤر نئجه ده جیزیق سالیب. ایندی نه ائلیییم؟
اوشویور. جانی گیزیلدهییر. گیزیلتی کورهکلریندن آیاقلارینا قدر یاییلیر. پارکینگین قاپیسیندان قار شوتویور. سویو سوزولموش کیمی گئدیب پارکینگین قاپیسینی باغلاییر. قار اوستونده، آیاقلارینین ایزی قالیر. ماشینا یاخینلاشدیقجا، یاش باشماقلارینین ایزی یئر اوزرینده گئت-گئده کیچیلیر. ماشینین ایچینده اوتورور.
گؤر سورمهمیشدین! هاچان هوش-باشینی بیر یئره ییغاجاقسان قیز آخی! هله منه تصدیقسیز ماشین سورور. آدام کیمی پارکینگدن چیخارتماغی اؤیرهن، سونرا احمده بوی دئ!… دوغرودان احمده نه دئیهجهیم؟ احمد جهنّم، فریبا خانیمگیله نه دئییم؟ اولماسا گئدیم احمدی چاغیریم. یووو. اونا یالوارمایاجام. دئسم، آجیق آچدین – دئیر. گئجهنین بو ساعاتیندا قیشقیر-باغیرا حوصلهم یوخدو. قوی ائله ماشینی یئرینه قایتاریم، سحر فریبا خانیمین ارینه دئیرم.
آیاغینی گازا باسیر. موتورون سسی پارکینگه دولور. ایندی ایسه فرمانی، عکس طرفه – سولا قایتاریر. داااااانق! آیاغینی ترمزا باسیر. ایکیاللی باشینا چالیر. ماشیندا اوتورارکن، قاپینی باغلاماغی اونودوب، ماشینین قاپیسی مزدانین شوفر قاپیسینا دایانیب. اؤزونو یامانلاییر.
عغیلسیزین بیری عغیلسیز! بو نه ایشدی؟ گلدین قاشین آلاسان، گؤزونو چیخارتدین؟
فرمانی بیر آزجا ساغا قایتاریر. ماشینین قاپیسی، مزدانین ازیلیب-جیزیلمیش قاپیسندان آرالانیر. بادمجانی رنگین اوستونده، آغ پرایدین ایزی قالیب. ماشینین موتورن سؤندوروب اوتورور.
آخی بوآداما دئین یوخ کی، یئر قورتولموشدو بو آت النگهسینی گتیریب بیزیم ماشینین بؤیرونه سوخموسان؟ ایندی باشیما نه داش سالیم؟
اوشویور. گؤزونون یاشی قورویوب، آغلایا دا بیلمیر. دالی صاندیقدان پتو گؤتوروب، ماشینین ایچینه قاییدیر. پالتوسونون جیبیندن موبایلینی چیخاریب بیر مئساژ یازیب احمدین نومرهسینه گؤندهریر.من تصادف ائلهمیشم!
باشینی صندله سؤیکهییر، پتونو بورنونا قدر چکیر. ایستی نفسی بورنونون اوجونو قیزدیریر.
قوش بئیین خانیم، رویا خانیم! بو دفعه دوغرودان دا اوتاناجاقسان. بو دفعه جماعت، آتین ایشهمهیینه دئییل، یول پلیسلریایله بیرلیکده سنه گولهجکلرهاا. دئدیقودولار باشلایاجاق. قونشولارین دیلیندن دوشمیهجکسن.
گؤزلرینی یومور. پلیس ماشینینین قیرمیزی ایشیغی گؤزلرینده یانیر، سؤنور. یانیر، سؤنور.
نوشته شده توسط admin در دوشنبه, ۱۵ آذر ۱۳۹۵ ساعت ۹:۴۴ ق.ظ