آشیق دهقان نفسلی آشیقدیر
حاضیرلایان:اکبرسعادت
آنا دیلیمیز:هئچ شوبههسیز، اثرین سوژئتینین عینی خط اوزرینده جریان ائتمهسی بو اولمز صنعت اثرینین اساس قایهسی کیمی بوتون واریانتلاریندا توخونولماز قالیر.دوغرودان دا آشیق دهقانین ایستر دانیشیق طرزی، ایستر ده اوخوماغی چوخ ماراقلییدی. او داستانی اوزونه¬مخصوص شیرینلیکله،هم ده چوخ بویوک هوسله دانیشاردی. هم سویلمهسینده، هم ده قوشقولاریندا معنا و مضمونون، او جملهدن ده حادثه¬لرین کدرلی و تبسسوملو آنلارینا اویغون حاشییهلر چیخاردی. صرف تبریز لهجسیله سویلنن بو داستانین اوخو طرزینده ده بیر فردیلیک حیسس اولونماقدایدی.بیز بونو تکجه آشیغین لهجهسینده، حادثهلره یاناشما نوقطه¬ی-نظرینده و قوشقولارین دوزومونده یوخ، هم ده اونون هاواجاتیندا گورموشوک. و بونونلا دا بئله قناعته گلمیشیک کی هله بیزیم آذربایجان آشیق ادبیاتیندا اویرنه بیلمه-دیگیمیز نئچه-نئچه صنعت اینجیلری، سیرلی-سئحیرلی نقطهلر، آزمان قایناقلار مؤوجوددور.آشیق دهقانین اوخومالاریندا چوخ ماراقلی دؤندرمهلر، هله بیزه تانیش اولمایان هاواجاتلار واردی. دوغرودور، بو گون آذربایجان آشیق صنعتینین قایناقلاری عینی کوکدن بهرهلنسه ده اونون بوداقلاری دا بئلهجه شاخهلنیر، یئنی-یئنی پوچورلار آچیر. بو اوستاد آشیغین دا اوخوماسیندا، چالدیغی هاواجاتلارا دقت کسیلنده بیر داها بونون شاهیدی اولموشدوک.دهقانین اوخوماسینداکی شوخلوق مقاملارینا قاریشان بیر داخیلی یانقی تاثیریله یاناشی، هم ده تبریز موغاملارینا میل واردی. اما آشیق هاوالارینین درین قایناقلاریندان بویلانان بو شیرین چالغیلارین آدلارینی آیری-آیریلیقدا تحلیل ائتمهیه چتینلشن آنلاردا یئنه کلاسیک آشیق بیلگیلریمیز کمکه چاتمیش اولور. و بیردن-بیره آداما ائله گلیر کی، ایلک دفعه ائشیتدیگی بو سسین ایفاسینداکی هاوانی هارداسا دینلییب میش.تکجه بیر شرطله کی، بونلارین شاخهلرینی دریندن صرفی-نظر ائتملییک کی اومروموزون صاباحیندا اونودولماسین. تورک آشیق مکتبینین اورمو قولونداکی بو سسلشمهلر بیزه بیر داها بو ائیلیگی تاپشیرمیش اولور. آشیق دهقانین بو اوخومالارینداکی هر هاوا بیر نؤع بیزه یئنی بیر علمی فاکتین اساسینی وئریردی. آذربایجان آشیق دونیاسیندا نئچه هاوا مووجوددور؟ فیکرینین مجررد جاوابی دا محض بو عاملدن میدانا گلیر. و بوردا ایستر-ایستمز همین سوالین سون جاوابینی بیر داها، بیز ده وئرمک ایستییریک. اونون سایینی هله هئچ بیر علمی آراشدیرمالار تام دقیقلشدیره بیلمه-میشدیر.آشیق دهقانی ساز چالماقدا دا خصوصی سرریشتهسی واردی.او، ترانه¬نی سیملره چکنده آداما ائله گلیردی کی بو آشیغین سازیندا تک بیرجه سیم واردی. اما بو سیم بوتون هاوالاری جمعلی حالینداکی سسین اینجهلیکلرینه قدر ائشیدنلره چاتدیرماغا قادیر ایدی.
حیسس اولونوردو کی اوخو مانئراسیندا اولدوغو کیمی چالغیسیندا دا دینامیک اوسلوبا میل ائدیردی. بئلهلیکله ده اونون عومومی ایفاچیلیق مهارتی ایستر اوخوماق، ایسترسه ده ساز چالماق باخیمیندان بیر-بیرینی تاماملامیش اولوردو.بورادا بیر عاملی خاطیرلاماق ایستردیک کی هر هانسی آشیغین عینی زاماندا هم داستان دانیشماسی، هم اوخوماسی و اونون موقابیلینده سؤیلهیه-سؤیلهیه سازدا اوزونو موشایت ائتمهسی بو صنعتین مرککب پروسئسلریندندیر. بئله کی بویوک داستانلارین باشلانغیجیندان تاپشیرماسینا قدر چالیب-اوخوماق و داستانی سویلمک آشیغی یورغونلاشدیریر. معیین باختدا بو اونون سسینه گرگینلیک، دانیشیغما آغیرلیق گتیریر. ایستر صنعت سیناقلاریندا، ایستر ده ائل مجلیسلرینده بئله وضعیتلر دفعهلرله تجروبهدن چیخیب.اما بوردان یئنه بوتون سونلوقلار آشیغین فرقلی صنعت باجاریغیندان، اونون سسیندن، نفسیندن و اوستادلیغ مهارتیندن آسیلیدیر. من همین اوستالیغا آشیق دهقانین سیماسیندا بیر داها شاهید اولموشدوم. ایکی ساعتدان آرتیق بیر واخت عرضینده ایبراهیمین داستانینی فاصیلهسیز سویلهین آشیق ازهلی اوستادنامه-لیگیندن نئجه باشلاییردیسا، داستانین تاپشیرمالارینی دا همین مهارتله تاماملاییردی. بو مدتده نه اونیم سسینده، نه اویناق هاوالارین چالغی مانئرالاریندا، نه ده دانیشیق طرزینده ذررجه یورغونلوق علامتلری دویولموردو. عکسینه، نئجه دئیرلر، دووران سوردوکجه صنعت عشقی جوشوب-داشیر، هوسی آخار چایلار کیمی کوکریردی.آشیق دهقان ائللریمیزین تانینمیش، اوستاد صنعتکارلاریندان بیریدیر. دقتله صرف-نظر ائدنده اوندا رحمتلیک کاماندار افندیئوین قاینارلیغی، سازلا سوزون وحدتیندن دوغان آیریلماز بیر کامیللیک دویولوردو.البته، هر ایکی اوستاد صنعتکارین اوزلرینه مخصوص یول-ارکانی واردی. لاکین سازین بالابانسیز موشایعتی بوتوو، کامیل چالغی اوخو وحدتینده بو علامت آز دا اولسا نظردن یاینمیردی.خالقیمیزین صنعتکارلارینین حیاتیندا اویرنمهلی جهتلر هله چوخدور. آشیق کاماندار کیمی ساز-سوز اوستادلاریمیز دا آشیق دهقان کیمی اونودولماز صنعتکارلاریمیز دا آذربایجاندا عینی حالدا دریندن اویرنمهلی، هم بو گونکو، هم صاباح کی نسیللریمیز اوچون قیمتلی اورنک اولمالی-دیر…
نوشته شده توسط admin در چهارشنبه, ۰۱ بهمن ۱۳۹۳ ساعت ۵:۴۵ ق.ظ