گور با گور

مژگان صیامی
سون بولوم
آنادیلیمیز: الی قوینوندا آوارا قالدی، باشینا‌هارانین کولون اله‌یه‌جه‌یینی بیلمه‌دی. او قاپی – بو قاپی هر یئردن قوولدو. محله‌نین آغ ساققالی »سید تاغی«نین یانینا گئدیب، باشینا گلن بلالاری اونا آنلاتدی. نئچه گون باش دا دولاندیراندان سونرا، چیخارسیز قوجا، هئچ یول تاپا بیلمه‌ییب »الیمدن یالنیز دوعا گلر« دئدی…!!
زیور، اؤزونو اودا – سویا ویریب، اون ایکی امام دان بئله دخیل دوشدو، ساققاخانایا گئدیب شام یاندیردی، شیر – شیندیری چؤله تؤکولدویونده، »آللاوئردی«‌هارایینا چاتیب، گاراژی‌نین اوستونده کی بالاخانادا، یئر – یئتیمه یئر وئردی. او ایسه هر ایکی گوندن بیر چئشیتلی ماهنالارلا، اوشاق‌لارین آووجونا پول قویوردو.
بیر نئچه آی بئله‌لیک‌له سووشدو.
زیور، قاپی – قاپی دوشوب ایش آختاریر، قارشیسینا چیخان هر ایشی گؤروردو، حامام دا دئللک‌لیکدن، چای تؤکوب، قاب – قاشیق یویوب، مچیدلرده باشماق جوتله‌مکدن، قاری ساخلاماقدان… آنجاق قازاندیغی پول، بالالارینین قارنین دا دویونجان دویورموردو. آللاوئردی‌نین بیر الی اونلارین آغزیندا اولماسینا باخمایاراق، زیور اورکدن راضی اولماییب، گئت – گئده اوندان باشقا قوخولار آلیردی…
زیور دول اولوب، اللری آغیرلاشیب، شوم اولما ماهناسی ایله آرتیق کیمسه اونا ایپ آتدیریب، قاش گوتورموردو!قادین‌لار، اوندان آرا آچدیلار؛ ارلرینین اونا آغزی سولانماسین دئیه…
ناخوش، ائولی – سوبای، کور – شیل، قوجا – جاوان،‌هامی‌اونا آغیز آتیردی! زیور آه چکیب، قارغیش ائده‌رک اوزاقلاشیردی… کؤرپه‌لر گونو – گوندن، گؤزونون اؤنونده ارییب سولوردولار. ناخوشلیق‌لاری، توخ اولمالاری، اوستو باش‌لارینین قارما – قاریشیق وضعیتی، دده‌سیزلیک، همی‌ده مین بیر درد – چورلاری… عؤمرونده، یاشامین بو چیرکین اوزونه دوشونوب، هئچ آغلیندان بئله سووشمازدی! نه قده‌ر جان ویریشدیریردی، بیر شئی عاید اولوب، یاراماز زندگانلیغی‌نین چرخی فیرلانمیردی، یوزه بیر دردی درمان اولموردو…
بیر یانداندا جاماعاتین الیندن راحاتچیلیغی یوخ ایدی! آجی دیل‌لریندن، قیقاجی باخیشلاریندان، هئچ آمان دا دئییلدی. ایش – گوج‌لرینی بوراخیب، یاپیشمیشدیلار قارا یازی زیوردن… گئل – گئدین سوز ائدیب، پیچیلتی‌لاری ایله او باشی داشلینی دلی ائله‌میشدیلر! »زیور دوشوب آرالیقا«، »دونن قوز دابان گئیمیشدی گئدیردی…«،»آرسیز – آرسیز میری بئناوانین ایلی چیخمادان، قاش‌لارین دا گؤتوردو، آللاه آمان دیر آللاه«، »صوبح چاغ‌لاری گؤره‌سن‌هارا گئدیر! دیلیمه داش تورپاق، بلکه….«، »اؤلن اؤلمه‌سینه آآآ….ی باجی! ائله میرآغانین باشین بو شومچا یئدی…« و‌ها بئله سؤزلردن، آغیر بهتان‌لاردان…..قارا باخت قادین، داها یئریدیگی یولدادا کاریخیردی: »میری سنی اوندان دا درینه باتاسان! قبرین اودلا دولسون! منی نه پیس گونه قویدون گئتدین…« دئیه، اؤز – اؤزونه دئیینیردی. بیر دری بیر سوموک، اللری تاختا کیمی، اوز – گؤزونون دری‌سینی گون یاندیرمیشدی؛ آللاها خاطیر بیر دوغرو – دوزگون آدام دا تاپیلمیردی بوندان باشقا شئی اوممادان یاردیمجی اولسون! اوره‌ک دولو درد ایله آرادا »نوبار« خالانین یانینا گئدیردی، دویونجان آغلاییب، سیزیلدایاندان سونرا، توپورجکلی خیر – دوعانی اوزونه پیله‌ییب، قاتلاییب، دوشلویونه قویوب اوتوروردو… گون‌لر چتین کئچدیینده، زیورین اوره‌یینه، کین – کدورت یول تاپیردی. بوتون وجودو غضب‌له اوفکه بوروموشدو؛ هر نه یین حسرتینده قالان سوچسوز اوشاق‌لارینا باخدیغیندا، گؤزلری دولوب، ایچینی چکیردی…
هر گون کئچدیکجه اؤزونو داها بالنیز، کیمسه‌سیز و چاره‌سیز حس ائدیردی! اوشاق‌لار هله هوله ایچین، بیر – بیری نین جانینا دوشوب، دیدیشیردیلر. گئجه – گوندوز دیغلاییردی. اونلار بؤیویرکن، ایستک‌لرینین داها چوخالدیقلارینی و ایشی‌نین آرتیق چتینلشدیینی بیلیردی…
قاپینی آللاوئردی‌نین اوزونه باغلادیغی گوندن بری، یاشامی‌نین زهرمار اولدوغونو یاخشی بیلیردی! بیر یاندان دا ائیلشدیکلری کومه‌نی الدن وئریردی، چونکو آللاوئردی کرایه ایسته‌ییب، زیور یئتیریب وئره بیلمه‌دیگی ایچین، اوردان چیخمالارینی ایسته‌میشدی!قارا یازی آرواد، کله‌فین اوجونو ایتیرمیش آدام کیمی‌معطل قالمیشدی.او ایسه، آرتیق زیورین ال – آیاغینا دولاشمیردی، آمما اورادان چیخمالارینا آیاق‌لارینی بیر باشماغا قیسمیشدیر…
بوتون قاپی‌لار اوزونه باغلانمیشدی، نه چکدیییندن، بالالاری‌نین کورلوق‌لا کئچیندییندن، تام یوخسوللوق‌لاریندان هئچ بیر کیمسه‌نین خبری یوخ ایدی!
جانا گلدی! اؤزونه قرارینی وئردی…….
بو گون آللاوئردی، کرایه ایچین گله‌جکدی؛ آیاغا قالخدی، قوللارینی چیرمالاییب، بئزه – دوزه‌یین گوتوروب، قیرمیزی چیچکلی کؤینه‌یینی گئییب، آغ چارشابینی اؤرتدو!
آللاوئردی نین گوزلری بره‌لمیشدی، حیرت دن آغزی آچیق قالمیشدی!
کرایه‌نی وئردیگی زمان، اوزونون بوتونو گورونمه‌ین زیور، ایندی گؤزل بیر رسیم کیمی‌اونون قاباغیندا دایانیب، شیرین بیر گولوشله کرایه‌نی الینده ساخلامیشدی.
آللاوئردی‌نین دومبا گؤزلری چه‌ره‌لیب، یوغون دوداق‌لارینا بیر جانلی گولومسه‌مه ائیلشدی، آلنی‌نین ترینی سیلیب، کرایه‌نی آلمادی!!بیر نئچه ساعات اوندان سونرا، شافاق قارالدیغیندا، دولو نایلون‌لارلا قاییدیب، اوشاق‌لارین الینه وئریب، قاییتدی…
زیورین گؤزلری دولو رضایت‌له، بالالارینین سئوینج سس‌لرینی دویاراق، بالاخانانین پیله‌کان‌لاریندان یوخاری چیخیردی!
او گوندن بری، زیورین زندگانلیغی، گئت – گئده یاخشیلاشدی…
Arazazarbaijzn.anadilimiz@gmail.com