قادین شعری

ح.م. صدیق
آنادیلیمیز: من هله ده مرحوم علی اکبر شعاری نژادین ۱۳۴۰ نجی ایلده تبریزین دانشسرای مقدماتی کلاسیندا بیزه روانشناسی رشد دئدیگی درسین جزوه سینی ساخلامیشام. کلاسدا بیزه بئله دیکته ائتمیش:
»ژان ژاک روسو عقیده دارد که زن برای تفکر و سیاستمداری آفریده نشده است. بلکه وظیفه دارد که مادر شود و با شیر خود فرزندش را تغذیه کند و از او نگهداری نماید و بعداً او را تحویل مرد بدهد … «سونرالار ژان ژاک روسونون اثرلرینی اوخودوم و اؤز یانیمدا او ایللرین ایرانداکی ساوادلی خانملارینا و شاعره‌لره حق وئریردیم کی بئله تربیه لره باخمایاراق، عذابلار آلتیندا یئنه ده اوغوللارین و کیشیلرین آییلمالارینا فکر ائدیردیلر:
نه رفتگان و نه آیندگان نمی دانند،
که قرن »پر هنر« ما چه سخت و سنگین است!
امیدهای نوین با عذاب های کهن،
به هر طرف نگری گرم جنگ خونین است.
و او ایللرین کؤرپه‌سی بو گونون ایسه شأنینده مقاله یازدیغیم سوسن ده دئییر:
ایسترم آتالار غمله دولماسین،
آنالار بیر داها قابیل دوغماسین.
یاخشیلیقدان سووای هئچ نه قالماسین،
درد نه دیر، انسانلار بیلمه سین آرتیق.
او، ایندی آنادیر. ژاله کیمی، پروین سایاغی آرزولاری واردیر. چون کی او قادیندیر.
قادین شعری یازیر و قادین شعری نین آرزولاری دا اؤزونه مخصوصدور:
ایسترم اؤزگورلوک آچسین قانادین،
یوخسوللارین الله دویسون فریادین.
خوشبخت لیک بوروسون انسان ائولادین،
بر دنیا ایسترم طاماح بیلمه سین.
تاریخین پوزماسین، ایزین سیلمه سین، ت
خریطه لرینه قییب ده یمه سین،
بیر دنیا ایسترم ساواش سیز اولسون.
تورکجه میزده شعر یازان قادین شاعره لر تمامیله اخلاق و انسانی آمال شاعره لریدیرلر.
بیر فضولی شناس عالیم یازیر:
»کلاسیک تورک شعریمیز، نسیمی و فضولی کیمی شاعرلریمیزده مجازی معشوقدان خبر یوخدور و معشوقدان مقصد، باری تعالی ذاتی دیر.«البته قادینلاریمیز عرفانی شعرلر یازمامیشلار. آچیق سئوگی شعرلری قوشموشلار. لاکن اونلارین یارادیجیلیغی نفسانی بولاشیقلاردان بری و تمیز اولموشدور. حتی چیگنینده ساز اولان قادین عاشیقلاریمیز بئله سئوگینی آلچاتماقدان چکینمیشلر. اونلار داها چوخ قادین مصیبت و دردیندن دانیشیشلار.