واغ قوشو
یازان: رضوان حاجیقاسملو
آنادیلیمیز:قونشو، قیزینین آدینی دنیز قویموشدو، من ده آسلانمیشدیم کی: – آدیمی دنیز قویمادیز، بس آپارین دنیزی گؤروم.
آتام دئییردی: – آی منیم تانریجا قیزیم، سنی آپاراجایام دنیزلرین لاپ آناسینی گؤرهسن!
من ده بو آرزویلا کی، دولانماغا گئدهجهیم گئجهم- گوندوزوم دنیز دوشونجهسییله کئچیردی.
بیر آخشام اوستو آتام گولومسهیهرک دئدی: – آی خانیم ییر- ییغیشیق ائلهیین، ایکی گون یولا چیخاق. آتیلیب توشدوم کی:
- دنیزه گئدهجهییک! دنیزه گئدهجهییک! سئویندیییمدن گئجهنی یاتا بیلمهدیم، او اوزدن ماشیندا اوتوردوغوم کیمی یوخو منی گیره¬لهدی… اوندا گؤردوم آنام دئییر:– دور قیزیم بودا دنیز! باخ نه اوجو وار نه بوجاغی!
سانکی دونیا منیم اولموشدو، قاچدیم ساحیله، بالیق قولاقلاری بئله گؤزل گؤرونوردو سانکی ایسلاق قوم گئجهدیر اونلار دا اولدوز، آنام گیل چادیر قوروب، اوتورموشدولار. بیرآز اویناقلاییب، گلدیم آنامگیلین یانینا، آخشام اوستو آناملا چیخدیق دولاناق، هر نه منیم ایچین چوخ ماراقلییدی؛ گاه آنامین ساغینا کئچیردیم گاه سولونا، بیردن گؤردوم داش اوسته قوش وار آما بئله باخیر دنیزه سانکی گؤزلریندن وای یاغیر بئله غمل ی اوتورموشدو کی، اولمایان کیمی آناما دئدیم:
– آی آنا بو نه قوشودو؟ نییه بئله باخیر سویا؟
آنام دئدی:
– گل اوتوراق، سن بالیق قولاغی ییغ من ده او قوشون ناغیلینی دانیشیم:
“ایل¬لر اؤنجه، گون¬لرین بیرینده، تام باهارین آستاناسیندا، داغ¬لارین قاری اَریییب، بولاق¬لار شاققیلداییب، آغاج¬لار چیچک¬لنیب، داغ¬لار یام- باشیل گئیینیردیلر.
هر داشین یانینا باخسایدین بیر گؤیرنتی وار ایدی. هاوا دا چوخ گؤزل ایدی، هردن بیر یاغیش چیلهییردی، هردن گون چیخیردی هردن بیر یئل اسیردی.
آنام دئییردی ائله هر آن بیر تهر اولدوغونا خاطیر آدینی «آغلار- گولر» قویوبلار. آی نه گؤزل اولور یازین گلمهسی. اوغلان¬لار داغا- اوچغونا گئدیرلر، قیزلار تره درمهیه. بیری سئل تاماشاسینا گئدیر، بیری آت چاپیر.
بیر گؤزل قیز گئدر چیچک درسین، کؤرپه- کؤرپه کهلیک اوتو درسین، تره¬لردن دریب گتیرسین. کولهش سبتین آلار چینینه گئدر داغا آی نه گؤزل اولور داغ¬لار، سرت قایا¬لاردا بئله چیچک¬لر بیتیب اوتلار گؤیریب.
قیز باشلار خوشونا گلن¬لردن درمهیه؛ چوخ چکمز کی، سبتی دولار؛ قایالیقدا بیر گؤزل چیچک گؤرر، گئدر اونودا دریب، سبته قویسون کی، اوزونه بیر دامجی یاش دوشر. باخار گؤرر وای یاغیش باشلادی، دییر “آی بولود باشینا دولانیم نه اولاردی بو چیچهیی درندن سونرا یاغایدین، ایندی من نئجه اونو دریم یئر یاش اولدو آیاغیم زویور!”
بیرآز چالیشار گؤرر کی، یوخ دا قایادان اوسته چیخماق ممکن دئییل . گلر سبتینی آلار چینینه دوشر یولا آما آیاق¬لاری هئی آخیردی. بیر دفعه ده دوشر، زورلا سبتی ساخلار کی، ایچیندهکیلر داغیلماسین.
آما پالتارلاری باتار. کنده ده سئل گلیرمیش، بیر اوغلان گلر سئل تاماشاسینا.
بیر داشین اوستونده اوتورار دالار سئلین بورولماسینا، سسینه… اوغلان بو فیکیرلرله سئله باخیردی کی، بیردن گؤرر بیر قیز سبت چیینینده گلیر کؤرپودن کئچسین “آی آمان بو قیز بو آغیر سبتله هاردان گلیر؟ سبتده نه گتیریر؟” دورار اونا کؤمک اوچون گئتسین کی، قیزین آیاغی آخار سبتییله دوشر سئله.
بیر آن ایچینده سانکی اوغلانین بوغازینا سورمه یاخیبلار سسی چیخماز، آما قاچار سئله دوغرو “آمان تانریم بس بو قیز نییه گؤرسنمیر؟” سئل دئیهسن بیر نهنگ اولدو قیزی اوتدو، نه سبتی گؤرسندی نه قیز! اوغلان سئل¬له آشاغی قاچار، یوخاری گلر، قیزی تاپماز آما دای اوگوندن بری سسی ده چیخماز و هئچ کیم دای اوغلانین سسینی ائشیتمز و هئچ بیرینه ده دانیشا بیلمز کی، ترهدن گلن بیر قیزی سئل قاپدی قاچدی…
آما اوغلان همئشهلیک گلر اوتورار قیزین سئله دوشدویو یئرده سودان دا ایچمز اورهیینده دییر “بلکه بو سودا او قیزین بیر ایزی وار ایچرسم ایز ایتر.”
ایل¬لر بئله¬سی کئچر بیر گون سحر تئزدن گؤررلر دای اوغلان یوخ اولوب و یئرینده بیر قوش اوتوروب کی، هردن بیر واغ دئییر.
او قوشون آدی «واغ قوشو» قالار. دئیرلر تانری هئچ اوندان اؤنجه بو قوشو یاراتمامیشدی!
Arazazarbaijzn.anadilimiz@gmail.com
نوشته شده توسط admin در شنبه, ۲۵ مرداد ۱۳۹۹ ساعت ۱:۳۹ ب.ظ