هِیوا
داود پیرعلیلو
آنا دیلیمیز:گونلرین بیرگونو بیر قادین خوی شهرینین کندلرینین بیرینده، پاییزین آخر آیینین اوزون گئجه‌سینده، دونیایا اوشاق گتیرمکده ایدی. هاوا شاققاشاق شاخیردی، ایلدیریم زیرولری منوّر تکین آغ آپباغ ایشیقلاندیریب، سونرا سسلنیردی. سانکی یئری گویو ترپه‌دیردی، هر ائشیدیب- گوره‌نین جانینا قورخو سالیردی. گویدن گاه یاغیش گلیردی، گاهدان دا قار ایله کولک. . آمما او قادینین بَرینده اوشاغی توتماق ویاردیم ائتمک اوچون بیر کس یوخ ایدی. هاوا دا کی سویوق. یئلین کوف ها کوفو دا بیر طرفدن،تاختا قاپیلاری بیر- بیرینه چالیب، قاپیلارین جیر ها جیری سکوتو سیندیریردی. قادینین زاریلتی سسی ده او سسلرین ایچینده ایتیردی. آمما آجی سانجیلاری قادیندان جان آلیردی. گئجه‌نین یاریسینا ائله بیر شئی قالماییردی، بیردن بیر اوشاغین اینقه- اینقه سسی او سسلره قاریشدی. بیر گوزل قیز اوشاغی دونیایا گلیب، گوز آچدی.
قادین آنا اولدو. بوتون آجیلی دردلر یادیندان چیخدی، بالاسینین دونیایا گوز آچماغینین سئوینجی بوتون جانینی بورودو. سانکی آنا دا دونیایا یئنیدن دوغولدو. آتا اولاجاغینی بیلن آما تام اولاراق هانسی گون اولاجاغینی بیلمه‌ین قادینین حایات یولداشی دا، ایکی گون اوندان اونجه بیر آیری کنده داوار آپارمیشدی ساتماغا، چونکی اونون ایشی مال داوار آل وئری ایدی.
او گون داوارلارینی ساتمیشدی. هاوانین خراب اولدوغونا گوره او کندده یاشایان یولداشی بونو او گئجه قوناق ائله‌ییب، اوز کندینه قاییتماغا قویمادی. هاوا سویوق پاییز هاواسی ایدی؛ بوران بیر طرفدن، جاناوارلارین خطری بیر طرفدن باعث اولدو کی، یولداشینین سوزونو قبول ائدیب، او گئجه‌نی قالسین و سحر اوز کندلرینه قاییتسین. آما حیات یولداشیندان نگران ایدی. هر بیر دقیقه‌سی بیر ایل گئچیردی. یوخو دا گوزلرینه گلمیردی. گئجه یاریسی گئچندن سونرا اونو بیر لحظه هوش آپاردی، یوخودا گوردو کی بیر قادین قالیب ایکی اوچورومون آراسیندا، قوجاغیندا بیر اوشاق وار. قادین جان آتیر اوزونو و قوجاغینداکی اوشاغی اوردان قورتارسین. او حالدا بیر بویوک قوش گلیب، قادینی اوشاق قوجاغیندا پنجه‌لرینده گوتوروب او یئردن چیخاردیب، بیر صاف داشین اوستونده یئره قویاراق ایکیسینین ده جانینی قورتاردی. آمما اوشاق ائله چیغیریر کی، یازیق آنا اونو اوودا بیلمیر.
کیشی‌نین آدی بالاخان ایدی. بالاخان اوشاغین سسینه یوخودان دیکسینیب آتیلدی، گوردو کی یوخو گوروب. بالاخانین باشینا قارا فیکیرلر گلدی کی گوره‌سن بو نه یوخودور گوروب. هلبت حیات یولداشی، هِیوا، اوشاغی دونیایا گتیریب. مین‌بیر خیال وورور بئینینه.
بالاخان یولداشینا دئمه‌دن، یاواش گوزه‌م پالتوسونو گئییر، گوزه‌م‌دن اولان بورکونو باشینا قویور، یون الجکلرینی اللرینه تاخیر. سونرا قاپینین دالیندان بیر فانار گوتورور، بیر ده باشیندا دمیردن شِشپَری اولان بیر ال آغاجی گوتورور،کندلرینه ساری یولا دوشور. اوکند ایله اوز کندلرینین آراسی اون ایکی آغاج ایدی. او هاوادا هردن قار گلیر، هردن یاغیش. یئل ده کی کوف ها کوف اسیر، الینده‌کی فاناری سوندورور، بالاخان یئنیدن یاندیریب یولا دوشور. کنددن آلتی- یئددی آغاج آرا آچمیشدی، یاقلاشیق ایکی کندین آراسیندا ایدی، بیردن هاوا باشلادی شیرین یاغماغا. آنجاق یاغیش، بالاخانین قاباغینی آلا بیلمه‌دی، او یاغیشین آلتیندا، سازاغ و سویوقدا، یولونا داوام ائله‌‌دی. یاغیشین دامجیلاری ماجال وئرمیر، جوم جولاق سو اولوب اوزوندن دوداقلاریندان، گوزه‌م بورکوندن سو داملاییردی. او قویموردو فانارا یاغیش دَیسین، پالتوسونون آلتیندا فاناری قورویاراق گئدیردی. فانارین ایستیسی پالتوون آلتیندا بونا چوخ یاردیم ائدیر سویوقدان ساخلاییردی. گئدیکلردن دره لردن زیروه لردن جور به جور، تَهر به تَهر سسلر گلیردی، آمما بالاخان فقط یوخودا گوردویو اوشاغین سسینی ائشیدیردی. هئچ بیلمیردی نئجه یول گئدیر، هِیوادان نگران ایدی. گاه آیاغی داشا دَییب گوینه‌ییردی، گاهدان چالایا دوشوردو آز قالیردی ییخیلا، مین مصیبت ایله اوزونو کنده یئتیریب ائولرینه چاتدی. ائوین تاختا قاپیسینی آچجاق گوردو، کورسونون آلتیندا بیر اوشاق سسی گلیر “اینقه. . . اینقه. . . ” گوردو هامان یوخودا گوروب ائشیتدیگی سس‌دیر. چاغیردی “هِیوا؟. . . هِیوا؟. . . باشینا دولانیم جواب وئر. . . ” گوردو هِیوادان سئس چیخمادی. بالاخان اوزونو ایتیردی، تلَسیک اوشاغا ساری گئدنده آیاغی کورسونون یورغانینا ایلیشیب، کلله‌سی اوسته کورسونون اوستونه ییخیلدی. باشی کورسونون اوستونده‌کی قوقو چیراغینا دَیدی، چیراغ کورسونون اوستوندن آشیب یئره دوشدو. چیراغین شوشه‌سی سیندی، نفت یورغانین اوستونه جالاندی. هر یئر نفت اولدو. شانسدان چیراغ دوشنده سوندو، نفتلی یورغان اود آلمادی.
ائو اولدو زیل قارانلیق، گؤز گؤزو گؤرمه‌ییر، آما اوشاغین سسی هر یانی گؤتوروب. بالاخان اللرینی او یان- بو یانا چکرکن اوشاغین سسی گلن یئره ساری گئتدی و هئی “هِیوا، هِیوا، جاواب وئر” دئیه سسلنیردی. “هِیوا، نه اولوب، ندن دینمه‌ییرسن؟ باشینا دولانیم هِیوا، جواب وئر نه اولوب؟” گؤردو هِیوادان سس گلمه‌ییر. ائله او قارانلیقدا اللرینی چکرکن الی بیردن هِیوایا دَیدی، گؤردو هِیوا یاتیب، اوشاق دا سینه‌سینین اوستونده چیغیریر. بالاخان ال- آیاغینی لاپ ایتیرمیشدی. بیلمه‌ییردی نه ائیله‌سین. تئز اوشاغی هِیوانین سینه‌سیندن گؤتوروب قوجاغینا آلیب هاوار تَپیب دئدی، “آللاه ائویم ییخیلیب دا. . . ای گؤزل آللاه هِیوانین باشینا نه گلیب؟ نَدن جواب وئرمه‌ییر؟” اوجا سس ایله دئییب آغلاییردی.
بالاخان اوشاغی قوجاغینا آلدی، گتیردیگی، فانارا ساری گئتدی. فاناری یئل سؤندورموشدو. اوشاغی یئره قویوب اللری تیتررکن نئچه کبریت ئ سونرا فاناری یاندیردی. سونرا یئنیدن اوشاغی قوجاغینا آلیب فاناری دا گؤتوردو، ایشیغینی هِیوانین اوزونه سالیب یئنه ده سسلدی، “هِیوا؟ هِیوا؟ گؤردو یئنه سس وئرمه‌دی. اوشاغی آغلایا- آغلایا یئره قویدو، اوزو ده کی جومجولاق سویون ایچینده، گؤزلریندن یاش آخارکن الینی هِیوانین بیله‌یینده‌کی دامارین اوستونه قویوب گؤردو دامار وورور، آما نه وورور؟ چوخ ضغیف‌دیر. الینی هِیوانین آلنینا قویجاق گؤردو آنلی بوز کیمیدیر. تئز قولاغینی اورگینین اوستونه دایاییب گؤردو اورگی وورور، آما چوخ یاواش وورور. اوجادان هاوار تپدی. قونشولار بالاخانین سسینی ائشیتدیلر، تؤکولوب بالاخان گیله گلدیلر.
دئمه هِیوانین قانینین فشاری آشاغایا دوشوب، هوشدان گئدیبدیر. قونشولاریندا بیر یاشلی قادین وار ایدی، چوخ بیلیجی ایدی. یاشلی قادین اوشاغی بالاخانین الیندن آلیب، هامینی اوتاقدان ائشیگه اؤتوروب، بیر آیری قادینی دا یانیندا یاردیمجی ساخلاییب، دئدی:………..
نوشته شده توسط admin در دوشنبه, ۰۸ آذر ۱۴۰۰ ساعت ۱۰:۵۱ ق.ظ
