هر سحرین آچیلدیقندا
روح‌انگیز پورناصح
آنادیلیمیز:هرسحرآچیلدیقدا، هرایشدن اؤنجه گلیب اؤنونده دایانمیشدیم. سلام وئریب، دردلشمیشدیم سنینله. هله نه یاخشی کی اوزاق اولسایدین دا وارایدین.
او گون سحر یوخولاریمین داوامی اولان خولیالاریمدان، چتینلیکله آیریلاراق یئنه ده گلدیم، گؤرمه‌دیم سنی. هارا گئده بیلردین؟ یوخسا گئجیکمه‌ییمدن کدرلنمیشدین؟ سن کی کوسه‌ین دئییلدین. بلکه ده بیر سیرا ایشلردن اوتانیب گیرمیشدین یئره؟ آخی نئیله‌‌میشدین کی اوتاناسان دا؟
هئچ ایندی یئره گیرمک زاد دا موددان دوشوب، معلوم دا دئییل او آددا بیر زاد وار یوخسا یوخ. ]او گون قوناقلاری وارایدی، منی ده چاغیرمیشدیلار. آشاغی قاپیلاری آچیقایدی، پیلله- پیلله سسی اوجالیردی، قاپیلارینا یئتیشدیم، سسین آتمیشدی باشینا، قیچلاریم تیتره‌یه‌رک الیمی آپاردیم زنگه، سس بوندان آرتیق اوجالماسین دئیه دویمه‌نی باسدیم.
هامی گلنده‌ن سونرا، چایلار ایچیلیب ـ ایچیلمه‌میش آغزینی سیلدی و باشلادی دانیشماغا، سؤزلرینین اورتاسیندا »سایغی گؤسترمک، ان بؤیوک انسانی داورانیشلارداندیر…« جمله‌سینه یئتیشندن سونرا قالان سؤزلرینی ائشیتمه‌دیم.[ بلکه‌‌ده سؤزلریم داریخدیرمیشدی سنی؛ یوخ سن چوخ دؤزوملویدون.
اؤزومو بئله تکرارلانمیش سؤزلرله توولاسئیدیم ده، قورخومو دیرناق اوجوجا آزالدا بیلمیردیم. یاخشی کی ائولره سیغیشمازسان! سیغیشسایدین ایه‌ر، مود اولاردین، گونده‌لیکده یازاردیلار، تلویزیادا دیقه‌دن دیقه‌یه سنی گؤستریب سندن دئیردیلر، اس ام اس وورون، گؤندراخ یازاردیلار.
توکان ـ بازار دولاردی سنایله. هامی، گرکلی اولوب اولمادیغینا باخمایاراق، اؤزوندن ده چوخ اؤزونه اوخشایانلاردان بیر ایکیسینی آلیب قویاردیلار ائولرینین دووارلاری یئرینه؛ ائله کی اؤزون ده اؤزونو سئچنمزدین اونلارین ایچیندن. اونلاری اؤزون سانیب اؤزلویونو ایتیرردین.
بلکه ده هنده‌ورینه پرده چکیب، سنی آپاراندان سونرا، یئرینده اؤزونه تایین ایشله‌ییردیلر. بلکه ده باشقا یئرده دوزلتدیکلریله بوش یئرینی دولدورماق ایسته‌ییردیلر.
بیر گون، ایکی گون، اوچ گون، …، اون گون… هر گون گلرـ گلمز آیاقلاریملا گلیب، اؤنونده دایانیردیم، آمما هئچ نه گؤره بیلمیردیم. گومانیم یئله گئدیردی، او دا سنینله گئتمیشدی. نه گون چیخیردی، نه یاغیردی، نه ده بوداقلار ترپنیردی.
گئجه‌لر »سنی سحر گؤردوم بلکه« دئیه، گؤزلریمی یوموردوم، سحرلر ده سنی گؤرمک ایچون گؤزلریمی آچیردیم.
سنی گؤرمه‌دیییم گوندن، هر گون سنی گؤزومدن ایتیرنلری، سنی کدرلندیرنلری، قورخاـ قورخا قارغیییردیم، بیردن اؤز اته‌ییمی توتماسین دئیه. ]آرا وئرمه‌دن دیلیمی دیشله‌ییرم، آخی دئیرلر قارغیشلی باش سالامات اولار. سالامات اولار یوخسا سالامات قالار؟
اینترنتدن تورکی مثللری آختاردیم، او مثلی تاپمادیم، آز قالیردی باتام قالام مثللرین ایچینده. دیلیمی بتردن دیشله‌دیم »قارقشین ایکی باشی اولار« مثلین گؤرنده.[
بو گون سحر چاغی دا عادت اوزره گلیب اؤنونده دایاندیم. سئویندیییمدن نه ایش گؤره‌جه‌ییمی بیلمیردیم.
نئچه دؤنه گؤزلریمی یوموب، آچدیم. سن یئنه وقارلا، قارلی و دومانلی، اؤنومده دایانمیشدین. هیجانلاریمی کلمه‌ـ کلمه سنه باخاـ باخا بیر بیرینین دالیسینا دوزوردوم.
بیر گؤز قیرپیمیندا یئنه‌ده قاتی توتقون هاوادان باشقا بیر زاد گؤرمه‌دیم. ه‌ووله‌سک گؤزلریمی بیر داها یوموب آچدیم. یئل باشیندا کی بولودلارلا اویناییردی، قارلار اوینایاـ اوینایا یئره دوشوردولر، بوداقلار ترپه-نیردیلر. داها گؤزلریمی یوممادیم.
***
اوزونو یان توتوب، کئچدی! بلکه ده تانیمادی؟ اؤزو مه‌یر هامینی تانیییردی؟ چوخلاری گلیب سلام وئریب حالینی سوروشاندا آغزی آچیق باخمیشدی اونلارا.
آدلارینی، تانیشلیق یئرینی دئیندن سونرا دا آغزی باغلانمامیشدی. اوندا اونلار دئسینلر بو اوزونو یان توتوب کئچدی؟
بیر سیراسینا -باغیشلایین من آداملارین قییافه‌لرینی یاخشی یادیمدا ساخلایانمیرام، بیرینه -والـله من آد سیجیل یادیمدا قالمیر، -بیرینه داها کوت بئیین اولوب قالدیق اوردا، دئمیشدی.
ذهنینده او قدر دعواـ دالاش وارایدی کی هر کیمی، هر نه‌یی اونودوردو. بیر آن دا ساکینلیک اوزو گؤرموردو. هر نه، هر کیم گنه اولوب یاپیشیردی ذهنینه، ائشییه چیخماقدا بیلمیردی.
اؤزونه مشاور اولوب هر نه‌یی آچیقلاییردی، او بیریسی‌لره وظاییف کؤکلینمه‌سن، اؤزونو گؤزتلمه‌لیسن، دئیه دوشونوردو، آمما بیر، ایکی، اوچ اولمامیش هر نه‌یی اونودوب، تزه‌دن قاریشقانین اَیری گئتمه‌سیندن قانی قارالیردی.
هر دؤنه ذهنینه گیرنلری زورایله اؤتوروردو ائشییه، اونلاردا بیر آیاقلارینی ائشییه قویمامیش گئری دؤنوب، ذهنینین لاپ اورتاسیندا دوروردولار.
بونوندا ایشلرینین هامیسی بیرـ بیر گؤزونون اؤنونده رئژه گئدیردیلر، سان گؤرمکدن یورولماقدا، یئنه ال ـ آیاغا دولاشانلارین الیندن یاپیشیپ، ائشییه تولازلاماق ایسته‌ییردی.
الی هر یئردن اوزولن چاغلاری، تک اوز گتیردی ان یاخین اورک دوستونا. کیتابین اؤن سؤزونو اوخودو. »باروک« بؤلومونه باشلایاندا ذهنینده بیر قیغیلجیم ووردو.
ذهنینده اولان هر نه‌یی ائشییه بوشالداندان سونرا، یئرلی ـ دیبلی توزونو آلیب، قفسه ووردوراجاق، اوخودوقلارینین هره‌سینی بیر اؤزل قفسه‌یه یئرلشدیره‌جک. آیری بیر قونولار بو ایستمه‌دن ذهنینه گیرسه، اونو قفسه‌ده‌کیلرین بیرینه اوخشادیب، او مبحثی قفسه‌دن چیخاردیب گؤزدن کئچیرتدجک.
مثلن ذهنینه نادر گیرسه، نادر؟ نادر؟ آهان! ذهنینده‌کی قفسه‌لردن ناتورالیسمی تاپاجاق. چیخاردیب، اصوللارینی اؤز اؤزونه دئیه‌جک؛ یادینا گتیرنمه‌ینلری ده تزه‌دن اوخویوب اؤیرنه‌جک. همیشه دولانماقداسان‌دا! جومله‌سینی ائشیتمکده دولانماق؟ دولانماق؟
دئیه گؤزلری ایشیلداییب رولان بارتی قفسه‌دن چیخاردیب نظریه‌لرینین هامیسینی یادینا سالا بیلسه، تزه‌دن یئرینه قویاجاق؛ یادیندان چیخانی اولسا ایه‌ر یئنه اوخویوب، اؤنجه‌کیلرین اوستونه آرتیریب، قویاجاق یئرینه و هابئله… ایندی ائله یابانجی دیللرین سؤزجوکلرینی ده بو یولونان اؤیرنیرلر.
بو سایاق دا ذهنینین چاغریلمامیش قوناقلاری دا بونون اؤز ایشینده اولدوغونو گؤروب گئری دؤنه‌جکلر.
مشاورلردن نئچه دؤنه ائشیتمیشدی: ال – آیاغا دولاشان فیکیرلری زورلا اؤتورمه‌یین ائشییه، سیمیتنلشیب، یئرلرینی لاپ برکیدرلر. ایندیسه سس‌سیرـ کوی‌سوز اؤزلری سوزولوب گئده‌جکلر.
بو آندا یوباتمادان، بیر قفسه‌چی گؤروب ذهنینین قفسه‌لرینی وورمالیایدی.
نوشته شده توسط admin در دوشنبه, ۱۷ آبان ۱۳۹۵ ساعت ۶:۲۲ ق.ظ
