محبت دن یازیرام

حاضیرلایان: اکبرسعادت
آنادیلیمیز:بیر گون واریدی بر گون یوخویدو.آللاهدان سونرا هئچ کیم یوخویدو.
بیر محببت خانیم واریدی، بیر ده رحمت بهی.بونلارین ایکیسی ده، اوشاقلیقلاریندا چوووووخ یالقیز قالمیش ایدیلار.
تک قالماق اونلاری چووووخ اینجیتمیش ایدی. اونون اوچون ده آللاهدان چوخ اوشاق ایسته¬ییردیلر.ائولرینین شولوخ اولماغـینی چوخ سئویردیلر. اوشاقلاری دا چوخ ایدی. اونو دا، بیری بیریندن گوزل؛ بیری بیریندن؛ ایسته مه لی و شیرین.
بونو دا دئییم کی، یانی، اوشاقلارین چوخلوغـو باعیث اولموشدو، هـردن بیر دن، اونلارین، آدلاری، یادلاریندان چیخسین.
بیرینین آدی شیرین اولسایدی؛ اوبیریسینی گوزومون ایشیغی چاغیراردیلار.بیرین ده شکر.
بیرینی نئعمت سسله سه ایدیلر،یا دا مرحمت، بیرینین ده آدینی اونودسایدیلار، آغیزیمین دادی سسله یردیلر.
بیرین سئوینج ، او بیرین نازلی،بیرینی ائحتیرام، بیرینی ده روحوم سسله ییردیلر، او بیریسینین ده آدی دیلبر ایدی.
بیری آسلان، اوبیریسی گول بالا، باشقا بیریسی ده عدالت، بیرینی مارالیم چاغـیراردیلار، بیرین ده جئیران. بیرینی شولوخ، اوبیرینی ترلان. بو جور دا…
گونلرین بیر گونونده خبر گلدی، محببت خانیمین باجیسی مئهریبان خانیم، ناخوشلاییب دیر.
محببت خانیم ایسته میردی رحمت به ی اونلارین اولمایان چاغلاریندا کورلوق چکسین. اونا گوره ده هـرنه دن قاباق، نئچه گونلوک؛ یئمک- ایچمک دن اونا حاضیرلادی.
سونرا دا قاپ- باجانی رحمت به یه تاوشیردی.
رحمت بهی ده اونلارا،” آللاهین آمانیندا.” دئییب، مئهریبان خانیم گیله یولا سالدی،
بئله لیک له رحمت بهی، او گون، دوز؛ گون اورتایا کیمی باشی، ایشینه باغلی ایدی.
آمما ناهار دان سونرا، آخشامین چاتماغـینی خاطیرلاییب، ائو اوچون نه آلیب- آلمایاجاغینا فیکیرلشدی. اوندا دا یادینا دوشدو په هوووو! بالام بو گئجه ائولرینده یالقیز اولاجاقدیر.
اوولده اوز- اوزونه” بیر زاد دئییل جانیم! بیر- ایکی گونه گلیرلر دا!” دئیه، اوره یینی خوش ائتمه¬یه چالیشدی. آمما بیر آزدان! اوشاقلیق چاغلارینین تک قالمالارینی خاطیرلاییب، فیکیره جومدو.آمما! یئنه اوزونو او یولا ووردو.-هه یه واللاه! لاب دا یاخجی اولدو! بو گئجه نی، لاب بئله راحاتلیق دا یاتیب یوخلایاجایام…” گولومسه ییب:اوشاقلارین سسی مه یه ر قویورو آدام راحات یاتـسـین. واللاه دا!”آمما! گئجه نی تکـلیکده اوز یئرینه گیرییب یاتاندا، اوره یی یامان سیخیلماغا باشلادی.
هله! تازا دوشونوردو:هئچ ده بیلمه میش ایدیم آللاه! اوشاقلارین او سس- کووو، بیله مه گوزه ل بیر لای- لای کیمی دی.”
بیر دامجی دا گوزلرینه یوخو گلمه دی.نئجه دئمیشلر! “ایلان چالانلار یاتدی! آمما او، یاتا بیلمه دی.”
هئچ، شام دا یئیه بیلمه میش ایدی.آمما آج دا دئییلدی.بلکه ده آج ایدی آمما بیر زاد یئیه بیلمه میش ایدی.
اوزاندیغی یئرینین ایچینده دوردو اوتوردو.اوره یی یامان سیخیلیردی.نه آغلایا بیلیردی!نه ده گوله بیلیردی.نه ده یاتیب یوخلایا بیلیردی.
تکجه! اوشاقلارین سس- کووونو خاطیرلاییب، آه چکیب گولومسه ییردی:
کوپهی اوشاقلارین گورورسن آخی!…”بیردن بیره دونوب، آرتیق تعججوب ایله اوز- اوزونه دئدی:دوزونه باخساق، بو دونیا! محببت سیز! هئچ ایمیش واللاهی”قارا بیر پارچا ایله گوزلزینی باغلادی؛ بلکه بیله سینی یوخو آپارسین.آمما، او دا کار سالمادی. محبت اولمایان بیر ائوده، مرحمت ایله عدالت ده، بئله سئوینج ده اولماز، نئعمت ده، ائحتیرام دا اولماز…”آجی بیر گولومسه مه یه:محببت گئتسه! آغیزیمین دادی دا گئد ه ه ه ر، هله گوزومون؛ ایشیغینی دا اوزیله آپارار!..”داها هئچ بیر زادا فیکیرلشه بیلمه ییردی.
هئچ ده بیلمه ییردی بئله! زامان هارادان گلیب، هارایا گئدیر.
گوزلرینی قارا بیر پارچا ایله باغلاماغا اومود قالیب! اوزونو یوخلامیش حیسس ائدیردی.
بیر موددت، بو آلـداتماغـیلا سوروندو.
دوغوشدان دا ها! ائله؛ محببت اولماسا! بئله، آداما یئمک ده زهـریمار اولار! یاتماق دا خوش گلمز! اوتوردوغو یئرده آداماااا، جهننم اولار…”
اورکدن بیر آه چکیب،” یانی محببت اولماسا ها! رحمت ده بئله هئچ زاد دیر! واللاه هئچ زاد…”
“آهان!؟ دئیه سن قاپی چالیندی آللاه! یادا یوخو- موخو گورورم یانی!” دئیه، اوزاندیغی یئرینده یامان دیسگینیب! دیک قالخیب اوتوردو.قولاقلارینا اینانانمیردی.
کیم اولا بیلر می آی آللاه! یوخسا بیریسی گلیب! بو تکلییین الیندن! منیم یاخامی قورتارسین؟”قارا پارچانی گوزلریندن آچدی.زامانی ایتیرمیش ایدی.آرتیق تعججوب ایله هریانی ایشیغا بورونموش گوردو. نه زامان یانی گون چیخیبدیر آمما منیم هئچ خبریم اولماییبدیر ؟”بیر داها گوزلرینه اینانمادی.قاپینین بیر داها چالینماسی اونو اوزونه گتیردی.ساعاتا باخدی!وای ده ده م وای. ساعات دوز آخشام دورد- یاریمی نیشان وئریر! په ـه ـه ح!” ایسترسه- ایسته مزسه، توواراخ حه یه طه چیخدی.گیج قالمیش ایدی.
قاپییا ساری گئدیب قاپینی آچدی.”آی آللاه! ” دئیه! ائله بیلدی یوخو گورور.
گوزلرینی سیلیب، بیر داها آچدی.گوردویونه هئچ دا اینانمیردی.مین مین شوکورلر اولسون. چووووخ شوکور!” اوره یینده دئییب، گولوردو.نییه؟نه اولموش ایدی یانی؟
به ح- به ح! محببت خانیم! سئوینج ایله، نئعمت ایله، یانی بئله اوشاقلارین هامیسیلا بیرلیکده گوزلری قاباغیندا دایانمیش ایدیلار.گوزلرینی آچیب یومانا اونو آرالارینا آلدیلار.
اوشاقلار سئویندیکلریندن آز قالیردیلار رحمت به یین تپه سینه دیرماشسینلار!
محببت خانیمین دا گوزلری، سئویندیییندن، گولومسه یهرک، رحمت به یین! گولر- اوزونه باخا-باخا قالمیش ایدی…
محببت اولماسا آللاه دا یوخدو/قارانلیق دونیایا نیفرت دا چوخدو.
قارانلیقدا محببتلر یاراتدیق/محببتدن قارانلیق لار دا قوخدو.
قیزیل گولده تیکان حددن آشارسا/قیزیل گولدن قاچان بولبول دا یوخدو.
محببت اولماسا گوللر گول آچماز/محببت، نیفرته هر آن دا اوخدو.قیزیل گول بولبوله وئرمیردی مئیدان/اوزون بولبول، محببت آد دا سوخدو.محببت له یئمک تاب – تازه قالسا/محببت سیز یئمک تینجیخدی قوخدو.
محببت سیز آدامدا موخ تاپیلماز/محببتلی اولان هر آن دا موخدو.محببت اولسا هر بیر نمنه بال دیر/محببت اولماسا هر زاد دا پوخدو.
حجی بابا محببت ده تک اولسا/اونا آختارما تای! هئچ زاد دا یوخدو.