قوش قووان
آیدین دومان
آنادیلمیز : بیر گون ییه میزین حیه‌طینه، تارلادان تازا بیچیلمیش بوغدا گتیریب تؤکدولر. بیز بوغدالاری یوخ اونون ایچینده کی اینجه قوردلاری برک سئویردیک.
اونا گؤره ده آرادا ییه‌میزین گؤزونواوغورلاییب بوغدایا حمله ائدیب قارنیمیز دولو قورد یییه ردیک بوغدانی دا دارماداغین ائدردیک.
گون اورتا چاغی هاوا ایستی ایدی بیز کوللارین دیبینده کؤلگه ده دینجه‌لمک ده ایدیک. ییه میزین قورخوسوندان بوغدایا یاخینلاشا بیلمیردیک. ییه میز ناهار یئییب دینجه لمه یه ائوه دؤندو. بیز سئوینیب بیربیریمیزه خبر وئردیک . بوغدایا ساری گئتمک ایسته ییردیک کی ییه میزی گؤردوک کی یانیندا بیر آدام سایاق (سونرابیلدیم اونون آدی قوش قووان ایمیش ) قاییتدی بوغدایا ساری . آدام سایاغی قویدو بوغدانین اورتاسیندا اوزو ائوه گئتدی.
اولدوقجا حالیمیز پوزولدو. او دوغروداندا قورخولو ایدی. بیز قورخوموزدان بوغدایا ساری بیرجه آددیم دا اتا بیلمه دیک. گؤز آلتی ادام‌سایاغا باخیردیق. بیرنئچه دیقه سووشدو او نه ترپه‌نیردی نه ده کی اوندان بیر سس چیخیردی. بوغدانین ایچینده قیمیلدایان قوردلارسا گوجلو ماقنیت کیمی بیزی اؤزونه ساری چکیردی.یاواش- یاواش بوغدایا یاخینلاشدیق اوره ییمیز یئریندن چیخیردی.آنجاق قوش قووان یئرینده دونوب قالمیشدی. بیز ائله دوشوندوک او بیزی آلدادیر. ایسته ییریاخینلاشدیقدا بیزی بیرد ن توتا یادا وورا. بونودا بیر-بیریمیزه یئتیردیک.بوآندا بیر قوش گلیب قوندو اونون تپه سینه.
بیر آیری قوشدا قوندو اونون چیگنینه اوبیری ایسه قولونا بیر آیریسی قوندو دوز آیاغینین قاباغینا باشلادی ائشینمه یه. بیز اوره کله ندیک بوغدایا یاخینلاشدیق قیراقلاریندان بیرنئچه قورد تاپدیق آدام‌سایاق هله ده سس سیز – حرکت سیز قالمیشدی. گئتدیک بوغدانین اورتاسینا دویونجا قورد یئدیک سونرا آتیلدیق اونون باشینا چینینه قوللارینا چیخدق. اونو دیمدیکله دیک ها دیمدیکله دیک. آی اوینا دیق اوگون …..آی اوینادیق
نوشته شده توسط admin در دوشنبه, ۱۰ اردیبهشت ۱۳۹۷ ساعت ۱:۱۰ ب.ظ
