شعوروم اَل آیاغینی ایتیریب
آنادیلیمیز: گلین… گلین!من کی گلین دئییلدیم. فیکریم قالمیشدی. مندن قاباقدا گئدن کؤلگه‌‌مده. اونون دا چیین‌لری دؤشونه لنگر سالمیشدی. خبریم اولمادان، کؤلگه‌م ده من‌نن برابر قوجالیرمیش.
بئلیمی‌دیکلتدیم.کؤلگه‌م یئرده شاخ اوزاندی. گلین سسینی ائشیتمه‌میش کیمی‌باش آلیب یولومو گئتدیم.– گلین!… آی گلین، سنن‌نم‌هاااا.سس اوجالمیشدی.
اؤز- اؤزومه دئدیم: »آخی ۵۲ یاشیندا دا گلین اولار؟«ایسته‌دیم گلین سسی گلن طرفه دؤنوم قارانلیق کؤلگه‌م ایستی قیر کیمی‌یاپیشدی آیاغیما. بیلینج آلتیمین* سسی ایچیمدن قالخدی: »باشیوی سال یولوو گئت. دیلنچی‌دن زادداندی« دئدی.
دئیه‌سن گئنه کؤلگه‌مله بیلینج آلتیم اَل بیر اولموشدولار. منه گؤره بیلینج آلتی دا ذهنین آیریلماز کؤلگه‌سی‌دیر. منیم ذهنیم‌له جیسمیمین کؤلگه‌لری بیر- بیرلرینه بنزه‌ییرلر. بیلینج آلتیم یئر آلتیندان یاسا گئدنلردن، گؤلگه‌م ایسه، سامان آلتدان سو یئریدنلردندی. ایکیسی هیم‌له‌شنده شعوروم اَل- آیاغینی ایتیریب، ایکی‌هاوالی قالار.بئینیمده دینجه‌لن شعوروم یئرینده قایناشیب، دئدی: »تبریز دیلنچی‌سیز شَهردی. بوردا دیلنچی نه قئیریر؟!«بیلینج آلتیم شعورومون سؤزونو یاری کسیب، دئدی: »کئچلین آدینی قویارلار زلفعلی. سن هله کلاسیک دیلنچی‌ایله مدرن دیلنچینی بیر- بیریندن سئچه بیلمیسن!Kشعوروم سسینی اوجالتدی: »خطا اولمویوب کی او اتریش‌لی کیشی سنی نم‌هانسی دیب- بوجاقدان چیخاردیب، آدام اوزلو ائله‌دی! هر شئیی‌یین گؤتون- گؤده‌نه‌یین چیخارتدین. اولمویا دیلنچی‌لیک ده بیر ادبی ژانردی؟ نه دخلی وار مدرنیزم‌نن کلاسیکه؟«
شعورومون آتماجا سؤزو بیلینج آلتیما توخوندو. »اؤزوو لوغازا قوی« دئدی. کؤلگه‌م اؤنومده اوزانیب، اؤزونو گونشه وئرمیشدی. بیلینج آلتیم منی سس‌سیز گؤرونجه، مئیدان گؤتوردو. دیلی آچیلدی:«سن هله بولموسن بو شهرده نئجه دیلَنچی‌لیخ ائلیرلر! آیاغیوی قوی کره‌نی خانا آغزینا، ایستیرسن بیر کیلو میوه آلاسان، بیر قوجا آرواد، یا بیر قوجا کیشی اَییلیب قولاغیوین دیبنه پیچیلدییر: “بالا، بیر کیلو دا منه یئرآلما- سوغان آل. پیشیرمه‌یه ائوده بیر چؤپ بئله یوخومدی” . یا گؤروسن داواخانا قاباغیندا الینده نوسخه… سنین کیمی‌شعورا ائله یاراشیر گؤزنو یوموب، بوغازینی جیرسین، هئی دئسین کی تبریز دیلنچی‌سیز شَهردی!»منسه ایکی‌هاوالی قالدیم. شعورومون سؤزونه باخیم، یوخسا بیلینج آلتیمی‌دینله‌ییب، سسی ائشیتمه‌میش کیمی‌باش آلیب، گئدیم.– قیزیم، سنن‌نم‌ها… بورا بیر باخ!قیزیم سسی ائشیتدییمده، شکّ- شوبهه یاغ کیمی‌بئینیمده اَریدی. سسه ساری دؤندوم.
یاشلی بیر خانیم‌ایدی، اوتوبوس دوراغینین صندلیندن منه ساری اَییلمیشدی. خانیما ساری گئدنده، گؤلگه‌م تله‌سیک بؤیرومه دورتولوب منیم‌له برابر گلدی.خانیم الینده‌کی اسکناسی منه ساری اوزالتدی: »قیزیم قیچیم توتولوب یئریه بولمورم. منه بیر تاکسی چاغیر.«خیابانا ساری گئدنده، کؤلگه‌م اوتانیب، آرخامدا گیزلندی.
بیلینج آلتیم‌لا شعوروم لال اولموشدولار… بیلینج آلتی: فارسجا ناخودآگاه معناسیندا.
نوشته شده توسط admin در دوشنبه, ۱۲ شهریور ۱۳۹۷ ساعت ۹:۵۶ ق.ظ
