بالاجا قیز
حاضیرلایان:اکبرسعادت
آنا دیلیمیز:قاردنه لری پامبیق گولو تکین هاوادا اوچا – اوچا اوردا – بوردا اوتوروردو . آمما اوتورمامیش یئنه یئل اونو گویه قالدیریب اوینادا – اوینادا داش قیه لره چیرپیردی . کیشی تیفتیک بورکونو قولاقلارینا قدر آشاغی چکیب ، بویون شالینی آغیز و بورنونو اوستونده برکیدیب ، گوزلرینی قیییب ، بیر قارا جیزیق کیمی گورولن گوزلرله اویان بویانی ایزلیه – ایزلیه یول گئدیردی . هردن بیر قار دنه سی کیرپیکلرینین اوستونده اوتوروب گوز قاباغینی توتودوقدا الجکلی الینین دالیسیلا گرزلرینی سیلمک زوروندا قالیردی و یولا دوام ائدیردی . بیر آز دینجلسین دئیه دوروب ، دورد یاشیندا اولان قیز اوشاغینین باغلیسینی بئلینده برکیدیب سییتمه سینی اله آلیب یئنه یول گئتمه یه دوام ائتدی . چولون اوزو ال ایچی تکین صاف گورونوردو . او قدر داش قیه دن و چوخور یوکسکلیکدن بیر گورونتو گورولموردو . کئچن ایکی گونده یاغان قار چولو صاف ائتمیشدی .صوبح آلاچرپوو ایشیقلانارکن قره گوز کندیندن ائشییه چیخدی . دونن گئجه قونشولار اونلارین ائوینده جومالاشیب هر بیریسی بیر اونری وئرمیشدی . نئچه گون ایدی کیچیک قیزی خسته لنیب باش قولاغی پورتوشوب قیب قیرمیزی اولموشدو . کندین یاشلی قادین لاری داوا – دووادان و چول – داغ بیتگی لریندن اللرینه هر نه گلسه گتیریب دمله ییب خسته کیچیک قیزین بوغازینا توکموشدولر آمما بیر فایدا گورمه میشدیلر . اوزللیکله دونندن اوشاغین حالی پیسله میش دای نفس چکمه سی زور اولموشو . اودور کی قونشولار کیشی نی زورا قویدولار صاباح اوشاغی شهرده حکیمه گوتورسون . بیر ایکی سی ده ایسته ییردی اونا یاردیم ائتمک اوچون شهره گلسینلر . آمما او قبول ائتمه میشدی . صوبح آروادی ایسته میشدی جاوان اوغلونو یوخودان قالدیرسین آتاسیلا برابر شهره گئتسین ، آمما کیشی نین اوره یی راضی اولمامیشدی .صوبح قالین پالتار گئییب شالوارین پاچالارینی یون جورابین آلتیندا دولاما کیمین برکیدیب آروادین آغلار گوزلرینه باخمایاراق ، اوشاغی بئلینه چاتیب بیر شال ایله موحکم باغلاییب سییتمه سینی اله آلیب یولا دوشموشدو . قاپیدا آروادی اوندان ایسته میشدی شهردن قاییداندا مومکون اولسا بایرام سوفره لرینه بیر آز نوغولدان – پولکدن و پوک شیرنیدن آلیب گتیره ، بیرده ایسته میشدی نابادا – نابادا اوشاغی خسته خانادا یاتیراسان ! اونلار اوشاغی اولدوررلر ، اودا اولسه من اوللم ؛ هر نه اولسا قایتار گتیر . کیشی بولاری دوشونه دوشونه کندی گئریده قویدو . اونلارین کندی ؛” لک “گون چیخان الینده بیر تپه نین اوستونده تیکیلمیشدی . اونجه لر کند ، اللی آتمیش ائوییدی ؛ آمما چوخو شهره کوچموش و ایندی یالنیز اون ائوه یاخین قالمیشدی .کند دن شهره ایکی یول واریدی . بیری قیسا یول ؛ دره طرفیندن کی ایندی بو قاردان سونرا اوردان گئتمک چوخ تهلیکه لیدی و ایکینجی یول داغ تپه باشیندان آیراندیبی کندینه و اوردان ماشینلا شهره گئتمک یولویدو . اونلارین کندلینه ماشین یولو یوخویدو و نورمالدا آیراندیبی یه چاتماق اوچ – دورد ساعات سورردی . کیشی ایکینجی یولو سئچیب آیراندیبی یه چاتماسین دئیه یولا دوشدو .
ایکی گون آرا سیرا قار یاغاندان سونرا دونن هاوا آچمیشدی آمما دئیه سن بو گونده قارلایاجاق . ایکی کند آراسیندا بیر کیچیک آیاق ایز یولو واریدی ایندی قار آلتیندا ایتمیشدی . گئتدیکجه قارین یاغاماسی کولک ایله برابر ؛ چوخالیردی . کیچیک قیز هردن بیر خفه سسیله اوسکوروردو و کیشی اونون ایستی نفسیندن آنلاییردی کی قیزین تبی چوخ یوکسکدیر . آللاه آللاه ائدیردی قار کسه کی او تئز آیراندیبی یه و سونرا شهره چاتیب قیزینی تداوی ائده . اوره یینده یئره گویه سویوش وئریردی کی نییه اونجه کی گونلر اوشاغی شهره گوتورمه ییب و داوا – دووا ایله اوشاغی تداوی ائتمه یه چالیشیبلار . قیزی اولسه آروادینا نه دئیه جک ؟! کاشکی اودا شهره کوچیدی . اودا ائلیه بیلردی شهرده فهله لیک ائده ، یاخود ال چرخینده میوه ساتیب ، قورو چورک توپلویا .چالیشیردی آیاغی بودوره مه سین ؛ آمما آددیملارینی اوجا گوتوروردو . کوله یین سسی کیفیر آهنگله قولاغینی آزارلاییردی . قار دنه لری بیر آغ پرده کیمین گویدن یئره چکیلیب ، اونون گورمه یین آزالدیردی .
کیشی نین اوره یینده بیر گیزلین قورخو واریدی. هردن دونوب اویان – بویانا باخیردی . نییه کی یاخشی بیلیردی دره دیزین قوردلاری قافلان کیمین گوجلودورلر . اوره یینده دوعا ائدیردی اونلارلا راستلاشماسین ، آمما نه ائتسین کی بیردن گوزو بئش آلتی دنه لیک بیر قورد دسته سینه دوشدو کی اونون آردینجا سونجوخلویا – سونجوخلویا آددیملاییردیلار . کیشی نین اوره یی توکولدو . گوز آلتی قوردلارا باخا – باخا آددیملارینیاوجالدیب نهایت قاچماغا باشلادی . قوردلار اوندان توولو قاچیب اونونو کسدیلر . کیشی نین آیاغی بیر چوخوردا بوشا گئدیب اوزو اوسته قارارا سره لندی . قار اوستونده سورونوب اوزونو سیییتمه سینه چاتدیردی و تله سیک آیاغا قالخیب سییتمه نی موحکم اوووجلادی . قوردلار دایره نی داراتدیلار . اونلارین دیللری ائشیه ساللانیب آغیز بورونلاریندان بوخار چیخیردی . بیر – ایکی سی پنجه لریله قاری قازیب گویه سوووروردو .
کیشی عومرونده قورد چوخ گورموشدو آمما بو قدر قورخوب زهله سی گئتمه میشدی . قوردلارین بیری – ایکیسی کیفیر حالدا اووولدوردولار . کیشی ایسته میردی قوردلارلا چیرپیشا . آرزونو یاواش یاواش آیراندیبی یه ساریه چکیردی . بو حئین ده قوردلارین بیری سیچراییب گویه قالخدی کی کیشی نین اوستونه اوتورسون . کیشی دوزمه دن سییتمه نی قالدیریب قوردون قافاسینا چیربدی . قوردون قافاسی پارچالانیب قان ائشییه ووردو . قوردلار قانی گوررکن کیشی یه ساری یوگوردولر . کیشی یئنه قاچماغا باشلادی . بئل شالی بوشالمیشدی و بالاجا قیز اونون آرخاسیندا گویه قالخیب دوشوردو و اونون قاچیشینین تووونو آلیردی . قوردلارین بیری آرخادان گویه قالخیب کیچیک قیزین شالدان ائشییه دوشموش قیچینی آغزینا آلیب قوپارتدی .
کوچوک قیزین آغلاماغا جانی یوخویدو ، بیر ضعیف ناله ایله ائی وای دئییب ، آجیشمادان آتاسی نین تویلریندن یاپیشدی . قورد اونون اتینی آغزیندا اویان بویانا آتیب اوتدو . قیزین آیاغیندان قان یئریه سوزوردو . کیشی نین بویون شالی آچیلیب یئره دوشدو . چاره سیز کیشی اویان بویانا باخیردی کی بلکه بیر یاردیم تاپا بیله . آمما بیر شئی گورمه دن آغلاماقا باشلادی . اوره کدن چیغیردی یا ابوالفضل … سونرا سییتمه نی قالدیریب یاخینداکی قوردون بئلینین اورتاسینا چیرپماق زوروندا قالدی . هم قوردون بئلی قیریلیب یئره یاتدی هم ده اونون سیییتمه سی ایکیه بولوندو . کیشی بیر آز دا قاچدی . آمما بئلینده کی شال آچیلیب کیچیک قیز یئره دوشدو . قوردلار اوشاغی دووره له ییب دیدمه یه باشلادیلار . کیشی چیغیرا چیغیرا آغلاییردی . اوشاغ الدن گئتمیشدی . کیشی بیلمیردی نه ائتسین ، اوشاغی بوراخیب اوز جانینی قورتارسین یا اونون یاری لشینی .
پیچاغینی چیاخاردیب قوردلارا ساری یوگوردو . پیچاخلا قوردلارین بیری نین بویرونو سوکدو . قیزی یئرده چابالاییردی و ایستی قانی قارلاری اریدیب قیزاردیردی . کیشی دیزه چوکوب اوشاغین دیدیلمیش لشینی باغرینا باسدی . آغلییا – آغلییا اوزونو لشه سورتوب ، دوداق آلتی دئدی : قورخما قیزیم ؛ قورخما ، بوردایام …
قوردلارین بیری کیشی نین بئلینه آتلادی . کیشی بویرو اوسته قارلارا ییخیلدی . دبَشمه دن اوبور قورد کیشی نین خیرتلاغیندان یاپیشیب باشینی موحکم گئری یه چکدی . کیشی نین خیرتلاغی قوپوب قوردون آغزیندا قالدی . کیشی خیریلدیا – خیریلدیا بئلی اوسته یئره سره لندی . او زاماندا اوشاغی یانینا چکیب الینی اوستونه قویوب گویه باخدی .قار دنه لری رنگ به رنگ پولک شکلینده یئره دوشوردولر و و یئل له برابر اوینایا – اوینایا اوزلرین داش قیه لره چیرپیردیلار . بیر آزدان سونرا قانلاردان بیر ایز گورولموردو . قوردلارین اووولدوسو اوزاقلاشیردی . چولو آغیر بیر سکوت بوروموشدو .
نوشته شده توسط admin در چهارشنبه, ۲۱ بهمن ۱۳۹۴ ساعت ۶:۱۷ ق.ظ
