سون قرار
ائلیار پولاد
آنادیلیمیز:سحرین حزین مئهی اونلارین گؤزلریندهکی گئجهدن قالان یوخونو قاچیریردی. ایشه رغبتله باشلامیشدیلار. اوستالاری یوبانسادا اونلار اؤز ایشلرینین عؤهدهسیندن گلمهیی یئترینجه باجاریردیلار. گونش یاواش-یاواش بویلانیر و بوتون جانلی و جانسیزلارا ایشیق و حرارت باغیشلاییردی.
او، پلان خریطهسینی ایش میزینین اوستونه سرهرهک، دؤرد بوجاغینا آرماتور تیکهسی قویدو کی یئل آپارماسین. اؤلچولری پلاندان اوخویوب مترین اوجونو کؤمکچیسینه اوزاداراق اؤلچولری آرماتورون اوزرینده آغ گجله نشانلاییردی. او بیری کؤمکچیده آرماتور کسن قایچینی ایشه سالاراق نشان وورولان یئردن کسیردی. اؤلچولر کسیلیب قورتاردی. اوستالاری هله گلمهمیشدی.
اؤلچویله کسیلن آرماتورلاری پلاندا چکیلن طرحه اویغون اییب بیر کناردا سیرایلا دوزوردولر. گونش بویلاندیقجا ایستیدن بدنلرینه تر گلیردی. تردن بویون بوغازلاری مونجوق-مونجوق اولموشدو. او، کؤمکچیلره اوز توتاراق “بیرآز اللی ترپهنین. بو گون آرماتورلاری توخویوب، قالیبلریده باغلامالییق. نسه دونن آخشام اوستو اوستانین حالی هئچ یاخشی دئییلدی. بو گوندهکی یوبانیر. اوستا گلینجه ایشی قورتارمالییق.” دئییب، الیندهکیF آچاری ایشه سالدی.
اوزاقدان ماشین سسی گلدی. اونلارین ظنیجه اوستا گلیردی. ماشین یئتشن کیمی اونلار سهولرینی آنلادیلار. باش مهندیس ماشیندان دوشوب اونلارا یاخینلاشدی. حال- احوال توتاندان سونرا اونا اوز توتاراق “سنینله صؤحبتیم وار. بیرآز بورادان اوزاقلاشاق” دئدی. او یولداشلارینین اوزونه باخاراق گولر اوزله “باغیشلایین ، منیم بونلارلا هئچ گیزلی صؤحبتیم یوخدور. ایر سیزه امکان یوخدورسا من حاضیر” دئییب گؤزنو باش مهندیسه تیکدی. باش مهندیس اللرینی اووشدوراراق ” اوندا قوی بونلاردا بیلسین. دونن من اوستانی ایشدن آزاد ائتدیم. بو گوندن اعتبارن سن باش اوستا تعیین اولورسان. ناهار فاصیلهسینده اوتاغیما گل بو بارهده اطرافلی دانیشیب، قطعی قرار امضالایاق”.
اونون آلین و بویون بوغازینی تر باسمیشدی. بوینوندان آسلادیغی دسمالین اوجون الینه آلیب آلین و بویون بوغازینین ترینی سیلرهک ” یوخ جناب مهندیس من اوستاما آغ اولوب اونون یئرینی توتا بیلمرهم ” دئیه الیندهکی آچاری کسیلمیش آرماتورلارین ایچینه تولازلاییب، کؤمکچیلره ” ایش تعطیل اولور” دئییب محکم آددیملارلا اوزاقلاشدی.
باش مهندیس یئرینده دایاناراق اونون مؤحکم و ایرادهلی آددیملارلا اوزاقلاشماغین سئیر ائدهرهک دیل آلتی اوزو ائشیده بیلهجک حدده پیچیلدادی” گؤرونور او حاخلیدیر. بلکه من سهو ائتمیشم”.
الیندهکی جیب تلفونون یاندیریب، دویمهلری ایشه سالاراق ” اوستا، اولان اولوب- کئچن کئچیب. موطلق ایش باشیندا اولمالیسان. حورمتله: باش مهندیس” مساژینی اوستانین تلفون نمره سینه یوللادی
*** *** ***
گئجهنین قارانلیغینین آغیرلیغین چیینلرینده حیس ائدیردی. ائله بیل دونیانین آغیرلیغین اونا یوکلهمیشدیلر. قورغوشون دولو هاوا اونا نفس چکمهیی چتینلشدیریردی. هر آددیم گؤتوردوکجه سانکی چیینینده کی یوک بیر آزدا آغیرلاشیردی. دهشتلی آنلارین دؤزولممزلیگی اونو سارسیدیردی. ایندیهدک بو قدهر آیاقلارینین تابسیزلیغینی بیلمهمیشدی. هاراسا گئدیردی اؤزوده بیلمیردی؛ آنجاق ایندی فیکیر- خیال اونا حکم وئریردی.
سانکی گؤزلری باخار کورایمیش. اطرافیندا دولاشانلاری، کوچهده گلیب- اوتنلریده بئله هئچ گؤرموردو. نه ائدهجهیینی، هاراسا گئدهجهیینیده آنلامیردی، آنجاق بو آغیر یوکو بیر یئره داشیماق زوروندایدی. بو فیکیر زولاق- زولاق هاوانی دولاشان بیر سیگارئت توستوسو کیمین اونون ایچهری عالمینی بورویوردو.
هر آددیم آتدیقجا او سانکی اؤزوندن اوزاقلاشیر، منلییی- کیملییی شوبهه آلتینا دوشوردو. زامان – زامان دوشونهرک، اوزاقلارا گئدیر، باشی هرلهنیر، اویاخلیقلا –یوخو آراسیندا کابوس دولو آنلار کئچیریردی. هردن بیر وار گوجونو آووجلاریندا توپلاییب، اؤنه آپاریر نسه بیر یئردن توتوب، وار گوجویله ایستردی کی او یوکون آلتیندان خیلاص اولسون. آمما اونوندا نتیجه سیز اولدوغونو دویوب، ائتدیی حرکتدن پئشمانچیلیق چکیردی.
گؤزونون اطرافیندا یومشاق بیر یوخلوغون و ایتیرمهنین حیسسینه آلیشیردی. بو ایتیرمه اونون کیپریکلرینی آغیرلاداراق، قاپاماق زوروندایدی. آمما گؤزلرینین اؤنونده حرکته باشلایان “دومانلی فیرلاماجلار” کیپریکلرینین اؤرتولمهسینه مانعه تؤرهدیردی. هردن بیر دؤنوب، گئرییه هاراسا اوزاقلارا زیللهنهرک آجیلی- شیرینلی خاطیره آختاریردی. هارداسا بیر خوش خاطیره یادینا سالیر، نسه اطرافی بوروین “دومانلی فیرلاماجلار” اونو تئز فیکیر – خیالدان یاییندیریردی.
هر ایکی یانیندان آسلانان قوللاری او قدهر آغیرلاشمیشدی کی دیزلرینین تاب گتیرمهسینه گومانی گلمیردی. ائله بو ندندنده بیر یئره، بیرینه سؤیکنمهیی آرزولاییر کیمی اطرافی سوزدو. یاخینلیقدا ایللر بویو گؤرمهدیگی، گؤدهسی یوغون پلمهلره اوجالمیش، تاریخلردن قالمیش بیر چیناری گؤردوکده، اونا طرف یاخینلاشدی. آغاجا سؤیکنهرک دیزلری تاب گتیرمهدی، مولاییم سوروشمک حالیندا آغاجین دیبینده تورپاغا سریلدی.
ایندی بیر آز توختامیشدی. او فیرلاماجلاردا یوخ اولموشدو. یاواش-یاواش دان یئری سؤکولوردو. هارداسا اوزاقدان بیر قوش سسی ائشیدیلیردی.
دهشتلی گئجهنین اؤتمهسی و گونشین گلمهسینی دوشونوردو. او اوشویهرک، نسه ایچهریسنده بیرحیسسین قزینماغینی آنیردی. او گونش کیمین یئنیدن دوغولوردو؛ آلیشماغا، نورساچماغا…
نوشته شده توسط admin در دوشنبه, ۰۳ آبان ۱۳۹۵ ساعت ۶:۴۴ ق.ظ