سون رومان
سعید فیوضات
آنادیلیمیز: یاواش یاواش گؤزلریم آچیلدی. ایکی گول بوتاسی قاباغیمدا ایدیلار. یئل اسدیکجک گوللر تَرپهشیردیلر…
من داغین باشیندان هئللندیم. به نییه بو ساعاتا کیمین دوستلاریم منی تاپماییبلار؟ دؤنوب هئللندیـییم داغا ساری باخدیم. دوستلاریمدان هئچ خبر اَتر یوخ ایدی. ایستهدیم یئریمدن قالخام، آما آیاغیمین آغریسیندان قیشقیردیم. هله شَلَم چیـیینمده ایدی. شلهمی آچیب، ایچیندن یئمک گؤتورودوم. آغزیم آچیلمادی. اؤزومو آخارسویون قیراغینا یئتیریب باشلادیم ایمکلهمهیه. هر بیر آز قاباغا گئتدیگیمده ائله بیل آیاغیما قیییق سوخوردولار. یاواش یاواش هئیدن گئدیب باشیمی یئره قویدوم.
»باشینی قالخیز.«
باشیمی قالخیزیب گؤردوم بیر قارا چوخا گئیَن آدام قاباغیمدا دوروب.دئدیم:»سن کیمسن؟ «
دئدی: »همان قاراچوخا کی سن ناغیللاریندا یازیب سان!«دئدیم: »اگر منیم قاراچوخام اولسان اوندا گرهک منه گؤره هرنهیی بیله سن!«
دئدی: »هه، ائلهدیر«.
دئدیم: »اوندا دئی گوروم، من هانسی ایشی او بیری ایشلردن چوخ گؤرورم؟«دئدی: »هامیدان چوخ فیکیرلشیرسن«
دئدیم: »هامیدان چوخ فیکیرلشن اولاردیلار کی ایستیرلر پوللاری کور اولا. اوندان توپ دا وورسالار داغیلمایا«.
دئدی: » یاواش یاواش قاریشدیریرام! نئچهدنه ایشدیرکی بوتون ایشلردن چوخ گؤرورسن؟!«.
دئدیم:»داها دوغروسو ایکی ایشدیر.«
گئده دیشلرینی قیرچیلداتدی. اوندان توپانچا چیخاردیب دئدی: »ایکیسینی ده دئنن«
دئدیم: »وورمایان کیشی دئییل«.توپانچاسینی آشاغی سالیب دئدی: »حییف، تئز الیمه دوشسهایدین ساچینی یولوب قویاردیم قاباغینا، سنده هرنهیی منه دئییردین«
دئدیم: » ائله بو؟ بیلسَیدیم ائله اولده اؤزوم گلردیم یانینا. آما سن منیم الیمه دوشسَیدن بیلیرسن نئیلردیم؟«
دئدی: »نئیلردین؟«
دئدیم: »ال قولونو باغلاییب آتاردیم پیشیکلریمین قاباغینا. اولار سنی یئیردیلر سن ده اؤلردین«
دئدی: »دای بسدیر. بئینیم چارتلاردی او ایکی ایشی اؤزون دئنن. من تاپا بیلمهدیم«
دئدیم: »بیرینجیسی بودورکی ماوالا چوخ گئدیرم. یاخشی، بیرینجیسینی دئدیم، منه پول وئرهجکسن.«دئدی: »پولو نئیلیرسن؟«
دئدیم: »پولو وئرهجهیم اوغلوما«
دئدی:»به بوندان قاباق اؤلوب آخی«
دئدیم: »هه دئدین یادیما دوشدو. اوغلوم دوغولاندا اؤلموشدو. آما ائشیتمیشم کی رحم اجاره ائلیرلر. او پولو وئره-رم رحم اجاره ائلهرم اوندان دوققوز آی، دوققوز گون، دوققوز ساعات، دوققوز دقیقه، دوققوز ثانیه، دوققوز! داها قالانین بیلمیرم.«گده بیردن آتلاندی اوستومه. بوغازیمدان یاپیشدی. منی بوغوردو. اَلیمی قالخیزدیم. دئدی: »یاخشی اؤزون دئنن ایکینجی وردیشین نه دی؟«
دئدیم:»بورنومو چوخ قوردلاییرام«
گؤزومو یومدوم. گؤزومو آچدیغیمدا آخارسویون سسینی ائشیتدیم. گورولتوسو چوخالمیشدی. گینه باشلادیم ایمکلهمهیه. بیردن خورخور سسی گلدی. یئریمده دونوب قالدیم. خورخور سسی منه یاخینلاشدی. بوینومون کؤکوندن باخیب گؤردوم بیر آیی گلیر منه ساری. باشیمی یئره قویوب گؤزلریمی یومدوم. دوروب قاچماغا اینجاریم یوخ ایدی. آیی یاخینلاشیب باشلادی منی ایگلهمهیه. تهراندا اولان زمانیم یادیما دوشدو. عسگر اولان زمانیمی دئییرم. قارداشیملا بیرلیکده قصر میدانیندان سوووشوردوق. قارداشیم دئدی کی بوندان سونرا دای آتامیزین اوستونده حساب ائلهیهبیلمهریک. اونون داها بیزه اساس بیر کؤمهیی اولمایاجاق. او جار اؤزومو یالنیز گؤروب، چیگنیمده آغیر بیر یوکو حیس ائتدیم. داها قارداشیملا دئییب گوله بیلمهدیم. دؤنوب یان یؤرهمه باخدیم. گؤزوم توکانلارا دوشدو. منی یاندیران بیر حسرته توش گلدیم. دئدیم: »کاش او توکانلارین بیری منیم اولایدی!« یاواش یاواش خورولداماق سسی کسیلدی. باشیمی قالخیزدیم. آیی گتمیشدی..
***
آرخاسی اوسته دؤنوب گؤیه باخدیم. آی الله نه قدر اولدوز وار ایمیش گؤیده. گوزلریم پارلادی. بیردن گؤردوم قارداشیم یانیمدادی. دئدی: »قارداش بسدیر اؤزونه گل. والله اؤزونه گلمهسن سنی سیلیب پوزارام یاشاییشیمدان«
دئدیم: »آی قارداش یاشاییشیمی بیر کوپن کیمی وئریبلر الیمه. من او کوپنی اود ووروب یاندیرمیشام. ایندی سن کیمین کوپئنین پوزاجاقسان؟«
اوجار آتام یادیما دوشدو. اونون هئچ بیر دوستو یوخ ایدی. اون دؤرد یاشیمدا ایکن بیرینجی رومانیمی یانینا آپاردیغیمدا منیم سئوینجیمی گؤروب دئدی:
»انسانین آیدینلیغی بو دونیایا بیر چاره قیلا بیلمهدی. گوجلولر، آیدینلارین سؤزوندن فایدالانیب فقط اؤز گوجلرینی چوخالتماغا چالیشدیلار. یادیندان چیخماسین کی چوخ بیلن چوخ چکر. چوخ بیلسن هئچ کیمله دانیشا بیلمهیه جکسن. بو جماعت فقط پوللولارا حؤرمت ائدیرلر یوخسا صاباح دئیهسن من یازیچییام یا شاعیرم فیلان، اوندا سنین دؤرَن یاواش یاواش بوشالار. یادیندا قالسین چوخ بیلن تک قالار.«
بیردن چوخ مؤمین اولان دوستوم گؤزومون قاباغینا گلدی. دئدی: » آللاها توکل ائله«
دئدیم: » من هل البت آللاها توکل ائلیرم آما بیلیرسن نه وار. ائله بیلیرم بوگونکو دونیادا تاری کیشیدن بو قالیب کی تکجه وار«.
شیخ فضل الله نوری گلمیشدی مشروطهچیلرین ایچینه. دئدی: »درس اوخوماق آزاددیر. اوغلان اوشاغی اولسون قیز اوشاغی اولسون گرهک درس اوخویالار.«
من آز قالدیم بوینوز چیخاردام.
دئدی: »هر کیم بیریله دالاشیب یوخسا مال ملک داعواسی وار داها بیزیم یانیمیزا گلمهسین. گئتسیسن مشروطه یاراتدیغی محکمهیه. محکمه مستقل اولمالیدیر. بیرینه باغلی اولمامالیدیر.«
اویاندان بورخئسی گؤردوم. گولوب دئدی:» خاورمیانهنین تاریخی دوّاردیر«.
بیر ده گؤردوم بلانشو قیشقیریر: »سن دانیشما! قوی ایچیندهکی فاجعهلر دانیشسینلار. حتی سکوت ایلا!«
اوندان سونرا گؤردوم کی خیام بیر قدح گؤتوروب. منه باخیب دئدی: »اوخودوقلارینی و بیلدیکلرینی حیاتا اوزلَشدیر. اوزامان دوغرو و یانلیشی آییرا بیلرسین.«
دئدیم: »آی عمر خیام قارداش بونو احمد کایا دئییب«دئدی: »فرقی یوخدور او دا بیزدندیر«.
نوشته شده توسط admin در دوشنبه, ۱۲ تیر ۱۴۰۲ ساعت ۸:۱۵ ق.ظ