سون رومان
سعید فیوضات
آنادیلیمیز: بیر وار آدامین گله‌جه‌یه اومودو اولسون، اوندا راحت یاشاماق اولور. آما منیم اصلاً اومودوم یوخدور.
– نییه اومودون یوخدو مهندس انشاالله گله‌جک یاخشی اولاجاق.
– ائله سؤز بورا سیندا‌دیر‌دا. بیز جماعتله ایشله‌ییریک. قاباق جماعتله ایشله‌مک چتین دئییلدی آما ایندی چوخ چتین اولوب.
– نییه مهندیس؟
– به گورمورسن؟ جماعت گئده گئده میندار اولولار. من بئله باشا دوشدوم کی بعضیلر ایسته‌ییردی جماعت میندار اولا، جماعتده میندار اولدو. مثلاً او گده‌نین ائوینه ائله بیر ایزمیر نقشه‌سی چکدیم کی بالاجا بیر حرارتله ائوی قیزدیرا. یانی اول یاتیریم چوخ اولور آما زامان کئچدیکجک طبیعی گازین آز ایشله‌مه‌یینده او خرج چیخیر هئچ سونرالار دا ائله گاز پولو آز گلیر. آما او نئیله‌دی؟ بیزه تهمت ووردو کی چوخ لوله ایشلتمیشیککی چوخ پول آلاق!
– هه، اوبیزله چوخ پیس دانیشدی، اللریز وار اولسون یئرینه بیزه تهمت ووردو.
– بیلیرسن، د… دئییر کی گون او گون اولاجاق کی بیز اوشاق لارا فلسفه درسی دئیک!
– آی مهندیس ابتدایی اوشاق هارا، فلسفه هارا؟
– بیلیرسن فلسفه دونیانی آیدین ائلمه‌مه‌یه چالیشیر، آما ایدئولوژیلر بو شرایطلری ایله دونیانی مبهم ائله‌مه‌یه اللَشیرلر.– آما مهندیس منجه بو ایشلره قاریشمایاق. ائله چالیشاق تزه ایش دوتاق.– اؤزون بیلیرسن دای قاباقکی دئییل. تزه ایش دوتماق چوخ چتین اولوب. چوخدا ایش قاباغیندا تهاتور ائدیرلر. بو زاماندا دا تهاتور ائله‌ییب بیر بازار دا فیلان قدر خشله‌ییب عوضینده توکان آلماق چوخ ریسکلی ایش‌دیر.
– مهندیس سنه بیر سؤز دئییم اینجیمه. ماشااله بو قدر تانیشین وار. هر یئرده سنی تانیرلار آما هئچ واخت بیری ایله اَل اَله سورتمه‌ییبسن. نییه امتیازلاریندان یارالانماییبسان؟
– سن بونو ایستیرسن؟ آما من بوندان قاچیرام! سن دئدیگینین معناسی بودور، قدرته یاخینلاشماق. هرزامان ایسته-سن کی قدرته یاخینلاشیب یا قدرتی اؤزونه ساری چکه‌سن بونو بیل. بو آلیش وئریشده اوتوزاجاقسان.
– نه‌یی اوتوزاجاغام؟
– شخصیتین و کفیل لیگینی. چون بازاردا، عدالته اولان رقابتی قیراغا قویوب تئچه سینین حقینی یئمکله و اونلارین باشینا آددیم آتماقلا یوخاری لارا یئتیشه‌جکسن. آما ائله همان لار کی یوخاری ایلا اَل اله سورتوب، اؤزلرینی یوخاری چکیبلر، هامینین یانیندا احتراملاری وار!
– اول گرک بونو اؤزونه آیدین ائله‌یه‌سن کی جماعتین احترامیلا اؤز کیملیگینی اؤلچه‌جکسن یوخسا دوغرو دوزگونونه گؤره شخصیتینی اَت داش ائله‌یه‌جکسن. ایندی گؤرورسن کی او بینا دوزلیب ساتان، بنیالار دوزلدیب آما ایشیندن کسیر.– دئمک او ائولری آلانلارا بیر ایش ساتیرکی یوزده اللیسینی گؤرمه‌ییب! ائله همان آدام جماعتین گؤزونده حرمت قازانیر. آما نه‌دن؟ بو جماعت اؤز حقینی یئینیدن زهله‌لری گئتمیر. نییه؟
– چون قورخورلار اونلارین حقینی‌دیر‌یلدنلره قوشولوب اوندان قدرتین گؤزوندن دوشه لر. آما او بیریلر گودورلر او وارلی آدامدان اونلارا بیر تیکه یئتیشه. بلگه‌سَللره باخسان گؤررسن. آصلان اوولاییب یئنیده کافتارلار و قوزقون-لار گودورلرکی او یئییب چیخیب گئده، اوندان اونلار او لئشدن بیر تیکه پای گؤتوره لر.
– مهندس آما ائله بیل سن هئچ کیمدن خوشون گلمیر!– هئچ اولماسا من بو تاریخده یاشاییرام. منی ائشیکدن ده یاندیریرلار، ایچریدن ده یاندیریرلار. امکداشلاریم کیمدیر؟ ائله سنه دئدیگیم آداملار. داها بیر جوره سینسیمیشم بو شهردن کی هئچ ائودن ائشیگه چیخماق ایستهمیرم.
– باری گزمه‌یه چؤلگو گئت! به قاباقلار کیمی نییه داغا گئتمیرسن؟
– نییه بیر گون هفته‌ده گئدیم چؤله اوندان قاییدیب همان مصیبتی شهرده باشلاییم یاشاماغا؟ بو بیر رادیکال سؤزدور آما دلوز دئییبدیر بو سؤزو!
– آما مهندس بورا اؤز آرامیزدی سن بو عنتیقه سؤزلر دانیشانلارا چوخ‌دیر وئریرسن اونون بونون سؤزلری ایله اؤزونه شکنجه وئریرسن! منجه بو سؤزلرین چوخو گرک اصلاح اولا.
– بهَیم اصلاح ائلیرلر؟ ایکینجی دونیا ساواشیندان سونرا فیلسوفلار علمه پیس باخدیلار. علمین وظیفه‌سی نه-ایدی؟بمب دوزلتمک؟ اتم بمبی دوزلتمک؟ سیاسی سورتوشمه‌لر یارادیب پولیسه آرخالانان حکومتلری یاراتماق؟ علم خلقین عوضینه باشلادی حاکمیتلره کؤمک ائله‌مه‌یه. علم قدرته ساری سمتیرله‌دی. دئمک بیر دَیه‌نک اولدو. کمپانیلر تولید ائدیرلر آما تولیدلرینین ایرادینی بیلندن سورا اونو اصلاح ائتمه‌یه چالیشیرلار می؟ منجه یوخ؟ نئیله‌ییرلر؟ تزه وئرژن آدیندا بیر محصول وئریرلر بازارا. من له ده سن گئدیب او یئنی وئرژنی ذوق ایله آلیریق. اوندان نئچه آیدان سورا تزه وئرژن گلیب بیز آلدیغیمیز محصولو سیره‌دن چیخاردیر. اوندا نه دئییرلر؟ دئییلر گلیشمیش مدلی وئردیک بازارا. بو گلیشمک دئییل، بو یالان دئمک‌دیر. بو کمپانیلر بئله دئمه‌لی‌دیر‌لر کی بیز بو محصولو اصلاح ائله‌دیک. قدیم محصولوزو وئرین، تزه محصولو آپارین بیر ده کی بو قدر حق الزحمه!
– آما مهندس منیم گله‌جه‌یه اومودوم وار. ایندی هامی دانشگاهدا درس اوخور. هامینین بیلدیکلری آکادمیک اولوب. اینترنت یاییلیب. منجه گئده گئده بونلارین هامیسینی باشا دوشجکلر.
– آی منیم دوستوم. نئچه ایلدیلر اینترنت وار؟ هئچ اولماسا اون بئش ایل. بو قدر اطلاعات بمبارانی اولوب آما جماعتین ذائقهسینه تأثیر قویوب؟ قدرتلره معطوف اولماق چوخالیب چوخالماییب؟ ریاکارلیق چوخالیب چوخالماییب؟ دوزدور قدیمکی مریض چیلیکلره واکسن تاپیلیب آما همان انسان اوغلو بوگونکو کرونانین قاباغیندا عاجیز قالیب. ایندی کرونانین واکسنی بیر سیاسی مسئله‌یه دؤنوب. اصلینه باخساق بو گون علم انسانین سدی اولوب.
– مهندس قوی سنی قورتاریم. بابا هرنه الله دئیه‌جک او اولاجاق نییه اؤزونو اینجیدیرسن.
– اوندا قوی سنه سنت آگوستیندن دانیشیم. یارادیلیش دستانی بوتون دینلرده وار و آزدان چوخدان بیر بیرینه اوخشاییرلار. تاری کیشی آلتی گون یارادیر و یئددی – جی گون دینجینی آلیر. اونا گؤره هفته‌ده بیر گون تعطیل اولور. بیز اینسانیق. بئله باشا دوشوروک کی تصمیم توتاندا تغییر تاپیریق. یانی انسان تصمیم دوتاندا تغییر تاپیر. الله سن ازلی و ابدی سن، انسانی یاراتماغا تصمیم توتاندا تغییر تاپیپسان؟ دونیانی یاراتماقدا تغییر تاپیپسان؟ بو بیر سوال‌دیر کی بیر قدیس سوروشور. ماتریالیستلر بئله بو سوالی سوروشا بیلمه‌ییبلر. دئییرلر سن ابدی و ازلی سن. سن بیلیرسن بیزیم کئچمیشیمیزی و گلهجه‌ییمیزی. سن اوندا نییه بیزدن امتحان آلیرسان؟ ابنسینا نین نه امتیازی وار؟ مهندس سن بیلیرسن؟ نه امتیازی وار؟ آردی وار
نوشته شده توسط admin در دوشنبه, ۱۹ تیر ۱۴۰۲ ساعت ۸:۵۶ ق.ظ
