سونامی

علیرضا ذیحق
آنادیلیمیز: ینا دئدی : سونونوندا حیاتیمی یازاجایام !ساغ اَلینی یازماق شکلینده یوخاری توتدی و اوجا سسی نن دئدی: بیر کامیل بیوگرافی!
پروانه کی یازیچی ایدی و بو گونلر مشهور اولموشدی دئدی: آخی سنین نه یین وار یازاسان؟ سنین بیر راحات یاشامین وارایدی. کامیونا مینیب سن؟ سوروجو بیله ن قاغزاییب؟ سن نه خلاف ائدیب سن که خلق اوچون ماراقلی اولا؟
مینا دئدی: منیم حیاتیم دولو ایدی آلچاق اوجالارینان.نرگیز کی اوتاغی سوپوروردی سسلندی: مامان! پیریز یئرندن چیخیب گئدیبدی پرسپکتیوه.پروانه پیریزه باخدی کی او دئیه ن کیمی یئریندن چیخمیشدی. دئدی: ای بابا ! نییه بو قَدَر بَرک چکیبسن؟
پروانه گئتدی پیریزی یئرینه سالا کی نرگیز دئدی: بیله ن برق توتماسین!
پروانه پیریزی یئرینه سالدی و دئدی: نرگیز ! بو قاریشقالاری دا سوپور . . . اوووف . . . نه برک جانلاری وار.الکتریک سوپورگه بیرداها ایشله دی. نرگیز اوجا سسی نن دئدی: هر یئری تئز توتورلار. تئزده اؤلورلر …آ.
مینا دئدی: سوپورگه نی سُوندور . . . ونگ ونگ. . . منیم اعصابیم یوخدی. هر نه ده واریم ایدی گئتدی. اوندا پروانه دئییر سنین نه یین وار کی یازاسان.
نرگیز الکتریک سوپورگه نی گئچیرتدی و دئدی: خالا ! او بوغو یوغون کیشی کیم ایدی کوروش عمی نین مراسیمینده؟
– کیمی دئییرسن؟
– همان کی دئدی لاپ اون ایل بوندان قاباقکی کیمی قالیبسان، هله بیر آزدا جوانلاشیبسان.
مینا بیر شئی ایتیره ن کیمی اولوب دؤره برینه باخدی و دئدی: اوووه .
پروانه دئدی: ایندی اونون حاققیندا یاز. سونرا قولاغینا دئدی: یازدیغین رومانین آدیندا قوی ” اونون بوغلاری ” .
نرگیز الکتریک سوپورگه نی یاندیردی و اوجا سسی نن دئدی: خالا گئدیبسن پرسپکتیو لره!
مینا دئدی: نه دئییرسن؟ قولاغیم ائشید میر؟
نرگیز دئدی: هئش زاد … هئش زاد.
– نییه، بیر سؤز دئدین.
– دئدیم پیریز گئچیبدی پرسپکتیوه.
– گئدیب هارا؟نرگیس قاه قاهینان گولدی و دئدی: پرسپکتیوه.مینا دئدی: قانمیرام پیریز نه جور گئده بیلر پرسپکتیوه.نرگییس هله گولوردی که پروانه ایشاره ائتدی مینایا.
چوخ فیکیرلشمه. بو اتفاقلار دوشه ر. نه سایاق اولسادا بونلار صنعتکاردیلار. هونر عالمینده پیریز ده بعضی واختلار گئده ر پرسپکتیوین ایچینه.
مینانین گؤزو ساتاشدی دووار دا کی تابلویا و دئدی: نرگیز ! سن رسیم لرینده نه قَدَر آیاق قابی چکیرسن . . . آیاق قابیلاران وورغونسان می؟
– بلی خالا ! گؤروبسن آیاق قابیلاردا بیر جوره آداملارین حیسی وار؟
مینا دئدی: خوش حالان کی دویغولارینی رسمه چئویریرسن. سونرا پیچیلدایاراق دئدی: منده بیر عجیب حیس وار کی گرَک یازام. او آغا کی نرگیز دئییر ، من عاشیقی دئییله م . آما احساس ائدیره م کی اگر آدام عاشیق اولا بیلمه سه ، بو اؤزو ائله بیر پیس درددی. بو لاپ پیس دردلردن بیری دی. ایستیره م بونو یازام و چوخلی باشقا شئی لری . . . مَثَلَن .
پروانه دئدی: نظریمه گرَک آدام هم مه شه واقعیتی یازمایا. گرَک بیر جور یازاسان کی روسوا اولمایاسان.
مینا اَل آتدی آغیر سیرقالارینا و دئدی: من سئویره م کی اگریازسام گَرچه یی یازام. مثلن من بیر قادین ایدیم ولی هئچ واخت … آدام چوخ شئی لری دئیه بیلمیر. ایستیره م گؤره م آدام او شئی لری کی ایستیر دئمه یه، یازا بیلر؟ قورخورام یازانمایام. بیر واخت کی دئییرسن ، جوانلار بیله ن گولورلر . اگرده یازسان ملت بیله ن گوله جک لر . بو آدامی اذیت ائدیر . من ییرمی ایل کوروشونان یاشامیشام آما او هئچ واخت منی… اینانا بیلیرسی نیز؟ او هئچ واخت …
الکتریک سوپورگه ایشله میردی. نرگیز ایندی سوسموشدو . پروانه ده بیر سؤز دئمیردی .
مینا دئدی: منیم نظریمه، قادین لار چوخ راق ازیلیرلر. چون چوخ شئی لری دئمیرلر. هرواخت دوشونوره م کی بونلاری گرَک یازام یوخودا گؤرورم کی قلمی مین جوهری قاتیشیبدی. بونلار منی اذیت ائدیر. شاید ده بیرگون هئچ زاد یازمادیم.
نرگیز دئدی: ائلییه بیلرسن یازاسان خالا. همین بونلاری کی دئییرسن، هَمَن بونلاری.
پروانه دئدی: قوی من بیله ن یازیم.
مینا دئدی: سن ائلییه بیلمزسن. منیم دردلریم اؤزومه مخصوصدی. اؤنمی اولان منه بودور.
نرگیز میزین توزون سیلیردی و مینا دقتله تابلولارا باخیردی کی بیردن بیره دوردی و دئدی: نرگیز ! بو ماکت دی چکیبسن یا آدامدی؟
– سیزین فیکریزجه ندیر؟
– بیلمیره م. گؤزلری نین اوستونده کی . . . اُریب شکلینده کی کسمه . . . چوخ قشنگ اولوب . سانکی منیم دویغومو چکیبسن .اَلین آتدی ساچلارینا و دئدی: من گرَک بیر جور احساسیمی رسم ائده م و یا یازام و یا . . . بیلمیره م. ایندی شاید چوخ بئواخت اولا، بئواخت دا اولوبدور. بوتون حیاتیمی کوروشا صرف ائتدیم.
پروانه دئدی: کوروش یاخشی کیشی ایدی. سنی هر یئره آپاردی. بو قدر سنه پول خشله دی. داها نه ایستیردین؟مینا دئدی: منیم ایکینجی یاریم دئییلدی.او بیرلشمه لحظه لری چوخ قیسا ایدی و گاهدان هئچ بیر واخت تاپانماسان. دونیانین قالانی بیر اویون ایدی. منیم او لحظه م هئچ یوخ ایدی.نرگیز توز آلان قوماشی سویون آلتینا توتدی. الینی یودی و دئدی: او مدینه فاضیله دیر خالا. اگر ایکینجی پارچان تاپسان دونیانین بیر دادی قالماز. وای … بیر واخت کی تاپانمیرسان اؤزون اودا سویا ویریرسان و هَمَن دونیانی ایره لی آپاریر.
مینا دئدی: بعضی آنلار گرک آدام بو دویغویا دالا کی هر زادا چاتیبدیر. بیلیرسن نه دئییره م نه تکجه فیزیکی . . . آدام فیکر ائده . . .
ایندی مینا اوتورموشدو صندلین اوستونده. من بیلیره م ائلییه بیلمه رم یازام. آما بو فیکیر بیله می اوزوری. بو فیکیرکی اینسان دردلری له گئدیر تورپاغین آلتینا منی اوزوری.
پروانه گئتدی موتباغا. ایکی بارداق چای بوشالتدی و دئدی: دا بونلاری قورتار. بو ایشلر دونیادا اوز وئره ن ایشلرین قاباغیندا بیر شئی دئییل . ایندی عراق دا … بیر مقاله اوخودوم، حامیله قادینلار سرطان توتوموش اوشاقلار دوغورلار عِینَن هیولا کیمی. کیم ایستیر جاواب وئره، اوندا سن هله ایکینجی یاریمی نین دالینداسان؟ اودا سن یاش دا بیر آدام . . . بیر یئرده دئمه گولرلر.
مینا اوجا سسی نن دئدی: بویور بی یوم!
پروانه دئدی: سن ائله دوشونورسن کی کامیل بیر قادین ایدین؟ من بیر یول کوروشونان دانیشدیم. سنین سماجت لرین اونون عصب لرینی پوزوردی. سن اونون دالیجا ْدین کی نه جور اولمالی دی اؤز سؤزون یئریده سن. بیلیرسن او قدر سؤزون اوستونده دایانیردین کی آخیردا او قبول ائدیردی. داها سنه حؤوصله سی یوخ ایدی. حؤوصله سی یوخ ایدی سنله بحث ائده. هئش ایندی یه جان فیکیرله شیبسن کی نییه اؤزوندن ال چکدی؟ او بیلیردی قانی نین یاغی چوخدور. قانی نین شکری ده . . . بیر تَهَر ساکیت اینتحار … اؤزونو بوراخدی.
مینا گئتدی آدام بویوندا اولان آینانین قاباغینا. سیرقاسینی قولاغیندان چیخارتدی و دئدی: معلوم دی سنله چوخ راحات ایدی.
پروانه دئدی: احتیاجی یوخ ایدی او، او سؤزلری دئیه، بیز گؤروردوق.
– آما سن دئدین سنله دانیشیبدی.نرگیز دئدی: من کی سیزی هم مه شه شاد و شن گؤروردوم. سیز آداملار قوجالدیقجا فیکر ائدیرسیز هر زادی اودوزوبسوز. حتتا خوش آنلاریزدا سس کووسوزدور. خالا! آلبومونو من گؤردوم . . . چین اؤلکه سی . . . ونیز . . . ایتالیا . . .. هم مه شه گولوش دوداقیندادی. مگر اولارمی آدام هم مه شه ادا چیخارتمیش اولا. او دا سیز؟
تر بولاغ کیمی مینانین اوز گؤزوندن یاغیردی. سیله جک له اوزونو قورولادی و دئدی: قادینلار چوخ تئز یالنیز قالیرلار.
نرگیز دئدی: کیشی لرده چوخ تئز اؤلورلر. کوروش عمی نی من چوخ ایستردیم. بئینین ده بؤیوک دوشونجه لر وار ایدی. سئوه ردی کی داغا گئتسین. بیر دؤوره انقلابی ایدی. آما سیز هئش واخت اونونلا داغا گئتمزدیز.
مینا دئدی: هر زامان کی کیشی لر انقلابی اولماق دالیجا گئده رلر، یقین بیل کی ایسترلر بیر پارا سورون لاری بویونلاریندان آتسینلار. من دؤولت مأمورویْدوم، اودا قورخوردی ائوین و اوشاقلارین بیر پارا مسئولیت لرین بوینونا آلا. . . اوشاق، آرواد و کیشی نین دی. کیشی هامیسینی تاپشیریر آروادا. سورا گئدیر اؤز ایسته دیک لری نین دالیجا. قادینلار قالیرلار و اوشاقلار. هی یو، هی پیشیر، هی نیگران قال . . . بیر عؤمور . . .
پروانه دئدی: من گؤروردوم کی کوروش، ائوین توزون آلیب یاردیم ائده ردی.
مینا دئدی: یئته ر داها . . . هر زادی ویریردی بیر بیرینه سورا توزون آلیردی. او قدر اوکیشی ندیر، چه گورادان آجیغیم گلیردی کی شکلین ده ویرمیشدی دووارا . . . بو کیشی نین منفی انرژی سی واردی . . . داها او دؤوره لر قورتولوب کی بیری گئدیردی چه گورا اولوردی . . . قورتولوبدی. بیر سیرالار اوتوروب دونیانین سرنوشتینه طرح تؤکورلر. قالان آداملار دا قاریشقا کیمی دیلر. قاریشقالاری گؤروبسن ییغیشارلار قاب یویان سینکین دؤوره سینه و بیر دقیقه سو تؤکرکن گئده رلر قویویا . . . دونیا بو جور اولوبدی.
Arazazarbaijzn.anadilimiz@gmail.com