بو جهنم او جهنمدن داها یاخشیدیر!
سولماز جمالی
بیراینجی بولوم
آنادیلیمیز: »بو خارابا اوتاخدان بی چؤله چیخ دنه. گولسارا خالا گئنه سنی سوروشور. دای اوزوم ده گلمیر دئیهم کیتاب اوخویور. دئییر های دوشوب قیزون بوشانیر. گؤرورسن؟! سؤزلریمی قولاغوندا سیرغا ائلهمهدون، بو دا آخیری.«
آنام حیرصلی-حیرصلی یوخاریدان آشاغی منی سوزور. آجی باخیشلاریلا آز قالیر منی دئشیک-دئشیک ائلهسین… یان دؤورهمه نیفرتله گؤز گزدیریر. دیرسکلریمی سؤیکهدییم ماسانین اوزهریندن گؤتوروب اوتوراجاقدا دیک اوتورورام. گؤزومو اوخودوغوم کیتابین سطیرلریندن آلیرام. اللریمله هر ایکی یاندان ساچلاریمی ییغیب باشیمین آرخاسیندا توپالاییرام. او آرواد هئچ نهیین آغینی بوزونو بیلمهدی. همیشه قازانی قاریشدیریر، چاخناشما سالیر. غرورو، بیجلییی، سایقیسیزلیغی یئره گؤیه سیغمیر.»دئییرم.
– «دوشموشوک آغیزلارا؛ آنجاق سنین آغزیندان هله ده گولسارا خالا دوشمور. نییه باشا دوشمورسن؟ سودامر اوشاغدا بیلدی بونو، سن بیلمهدون.»
کورهیینی دایادیغی دیواردان گؤتوروب منه ساری گلیر. ماسانین اوزهریندن اوخودوغوم کیتابی قالدیریب اللرینی آلتدان اونون هر ایکی طرفینه قویور؛ شاپبیلتیلا باغلاییب ماسامین اوزهرینه توللاییر. اورهییمده اینجه-اینجه آغریلار دولاشیر.
– اؤزوزو آللاتمئیین، اورتادا منیم قیز دوغولماغیمنان باشقا بیر پروبلم یوخدو. سیز هله ده یوز ایل بوندان قاباغین دبینه اویوب اونون بونون سؤزینن قیزلاریزین گونون توتوسوز گؤی اسکییه. آلی قیزی اونو دئییر، اوروج قیزی بونو دئییر. اؤزل سؤزلریزی بئله اوننان-بوننان پایلاشیرسیز.
دانیشدیقجا ایچیمده اسیردیم. نفسیم گوجله چیخیردی.
–اوتوروب اونون بونون دالیجاق دانیشماق هونر دهییر. او آروادین بو آروادین باشماغیننان، دوْنوننان دانیشماغی ائله هامی باشارار.
ساغ الیمی آلنیما قویوب ائهمالجا اؤوکلهییرم. ال آتیب اؤزومو ساچلاماق ایستهییرم.
– بئش یاشیمدان هئی گؤزونو آغارتدین، دیلینی دیشلهدین. دئدین اوجادان گولمه؛ اوروج قیزی دووارین دئشیییندن گؤرر، حاج جلیل ائشیدر. اویناما! آلی قیزی نه دئیر آداما!!؟ اونو گئیمه، بونو گئیمه.
نه زامان آغلادیغیمی، گؤزومون یاشی نئجه اوزومدن بوینوما آخیب گئتدیینی بیلمیردیم.
– ساغ-سولومو تانیمادان منی بیبیم اوغلونا وئردیز؛ آنادان اولجاق بیزی دئییلگی ائتمیشدیز. من هله تزه- تزه، اوشاقلیغیمدا، قوهوملاریمیزین منله اونو بیر یئرده گؤردوکلرینده قاش گؤز اویناتمالارینین، شوخلوق دولو گولوشلرینین ندنین آنلئییرام…
گونش آلوولانمیشدی. یومشاق اسینتی باجانین طول پردهلرینی یونگول-یونگول ترپهدیردی.
– آروات آجی باغیرساق کیمی اوزاتدیقجا اوزادیر. قیرمیزی-قیرمیزی بئله سؤزون یئتیریر سانکی ایرضا سنه گؤره آروادین بوشئییر. او دا قورخور دنه یازیق آروات. ..»
آنام اللرینی اؤوکلهیه-اؤوکلهیه تیترک سسله داوام ائلهییر.
اوتوردوغوم یئرده ائلهجه قورویوب قالیرام. بیر نئچه آنلیق ماسامین اوزهرینده تیکانلی، یارپاقسیز، اتلی گؤودهسی اولان کاکتوس گولومه گؤزوم ساتاشیر. آچیق باجادان جیریلتیلاری ایچری دولوب اوتاغین سسسیزلییینی پوزان جیرجیرامالارین سسی، قفیل هؤنکورتومون ایچینده ایتیر. آنام ال_آیاغینی ایتیریر:
– قیزیم قیناما بیزی. بیز ده گؤزوموزو آچیب بئله گؤروب اؤرگشمیشیک. باشووا دؤنوم آی بالا دای سنه هئچ نه دئمییهجم.
قیوراقجا قاپیدان چیخارکن:-آیناز باخ آغلاما ها، ایهم بیرده سنه بی سؤز دئدیم، نه دئسن دئ. دئییب گئدیر.۲قارداشیملا آنامین پیچیلتیلارینی دویورام. منی گؤرونجه سسلری اوجالیر:
– هله باشی آچیق عکسین قویور اینستایا، تئلگیراما! سنون اختیارون کئشگه منده اولوردو.
قارداشیمین گؤزلریندن نیفرت فیشقیریر.
– »ایندییهجک بئبیله کیتاب اوخویوبسان نولوب؟ بوینوننان میدال آسیبلار؟ جیبووی پولنان دولدوروبلار.«
آنام هر زامانکی کیمی سرت باخیشلارینی گؤزلریمه توشلاییر؛ گؤزلرینی برهلدیر. اللرینی اؤلچه-اؤلچه دوداغینی دیشلهییر:
– من اولسام کیتابنان اؤزومو اؤلدورمک یئرینه قشح دورارام ماهنینی قویارام قیزیمنان اوینئییب دینگیلدهرم. گئدیب گلیب میوهدن یییهرم، قیزیمی یئدیردرم. آااز ائله بیلئیسن آرواتسان؟ سن هئچ. .. دا دؤورسن.
اورهییمدهکی آغری، بوتون جانیمی دولاشیب آیاقلاریما آخیر. آشاغی سسله میزیلدانیرام:
– منی آسساز دا کسسز ده، او دئدیکلریزی سئومیرم.
چؤکوب اوتوردوغو یئردن سیچراییب اوز به اوزومده دورور. نفسینی درمهدن بیر دوزونه دانیشیر:
– آی قیز هامی سنین اوجوز، کتدی مودئل پال-پالتارینی دانیشیرئه. ..
آنامین آغزی کؤپوکلهنیردی، دامجیلاری اوزومه سیچراییردی. آماجی منی ساققالاماق اولدوغو اوچون ایستهدیکلرینی زورلا بئینیمه یئریتمک ایستهییردی. اونون بو حالینی گؤرنده اوشاقلیغیمدا منی قفسده ساخلادیغینی خاطیرلاییرکن، همن قورخو منی چولغاییردی… خاطیرهلر گؤرونتو کیمی گؤزومون اؤنونده بولانیب اؤزو-اؤزونه دالغالانماغا، ایتیپ تاپیلماغا باشلاییر.
بیرگون اولمادی آناملا قارداشیمین یئرینه اؤزوم بازارا گئدم. ایستهدیییم پال-پالتاری بیهنیب سئوهرک آلام. هئچ ائلهبیل، بیزلرله اونلارین آراسیندا بو بویدا زامان مسافهسی یوخایدی. آنجاق و آنجاق گئییملریمیز دهییشمیشدی.
۳
گون باتماق اوزرهدیر. یئر اوزو آلا-بولا اولور. گون عرضینده سسلری چیخمایان قارانقوشلارین قیوراق اوچوشلارینی سئیر ائدیرم. ائیواندا توپلانیب اوردان-بوردان دانیشیرلار. حیهطین ساغ بوجاغیندا دامی، دیواری چؤکموش تندیرخانایا ساری بویلانیب باخیرام. اوشاقلیغیمی خاطیرلاییرام؛ تندیرین باشیندا ایلهشیب آیاقلاریمی ایچینه ساللاماق ایستهییرم. یانان آغاجلارین چیرتا-چیرت سسی، اؤزل قوخوسو، تزه چؤرهیین اییسی هریانی بورویوب. تندیرخانانین دیوارینداکی میسمارلادان چوواللار، توربالار آسیلیب.
کئچمیشده گونش، چیی کرپیجله تیکیلمیش تندیرخانانین کیچیک دئشیییندن اوزون، ساری بیر قیلینج کیمی ایچری دورتولردی. پاییزدا تاوانیندان دامان یاغیشین ایزلری گؤرونردی. ایندی ایسه دیوارلاری چؤکموش تندیرخانا، کؤلگهسینی کول کوسون، اوتلارین اوزهرینه توتقون خالچا کیمی دؤشهمیشدی. گؤیلوک بؤجهکلری یام-یاشیل اوتلاری سارمیشدی. بیر واختلار همن او اوتلارین اوزهرینه اوزانیب کورهییمده، بوینومون دالیندا اینجه توخونوشلارینی حیس ائدردیم.
بعضن قانادلاری خاللی کپنکلر اوتلارین آراسیندا ائهمال حرکتلرله یوخوشلو ائنیشلی اوچوشاردیلار، اونلارا قیسقاناردیم. ائشیتدیییم آجی سؤزلر اوغولتوایله بئینیمه ایشلهییب قاسیرغا قوپاردیغی آن، حیطده گزیشیب گؤز یاشلاریمی سیله-سیله چیچک درردیم، یارپاق درردیم. ایچیمده بؤلوک-بؤلوک بولودلار دولوب_بوشالاردی. .. اوتلارین آراسیندان آجیلیقلا دولو یوخویا بنزر حیاتیمی هله ده دفعهلرله کابوس کیمی گؤرورم:– «آی بالا بئله ال آیاغووون سوموگو گؤرسهنیرئه. باشووو زیندگووه، ارووه، اوشاغووا قات. یالاننان نهیه دوروب گلیبسن؟»
یاشلیلیقدان قیریشمیش دوداقلارینین قیراغیندا آشاغیلاییجی بیر ایفاده واردی. ایری آیاغینی یانا چکیلمیش تومان کؤینهییندن گؤروردوم.
آردی وار
نوشته شده توسط admin در چهارشنبه, ۳۱ اردیبهشت ۱۳۹۹ ساعت ۱۰:۵۹ ق.ظ