اهل بیت قورآندا(مودت آیه‌سی)
((ای پیغمبر، مسلمانلارا دئ کی، من سیزدن پیغمبرلیک (ائتدیگیم مدتده امتین هدایت اولونماسی یولوندا چکیلن زحمت) مقابلینده اهل بیتیمی سئومکدن باشقا بیر شئی ایسته¬میرم (شورا سوره‌سی ۲۳-جو آیه).
عزیز پیغمبریمیز (ص) بو آیه‌ده کیملرین نظرده توتولدوغونو و کیملره اطاعت و دوستلوغون واجب اولدوغونو مسلمانلار اوچون ایضاح ائتمیشدیر.
تفسیر، حدیث و تاریخ کتابلاریندا قئید اولوندوغو کیمی، بو آیه¬ده مقصد علی فاطمه، حسن و حسین (ع) حضرتلریدیر. زمخشری اؤز »کشاف« تفسیرینده بئله یازمیشدیر: بیر گون مشرک‌لر: محمد اؤز رسالتی (پیغمبرلیگی) اوچون مکافات ایسته¬ییرمی؟–دئیه دانیشیردیلار کی، جواب اولا‌راق بو آیه نازل اولدو:
»ای پیغمبر (مسلمانلارا) دئ کی، من سیزدن پیغمبرلیک مقابلینده اهل بیتیمی سئومکدن باشقا بیر شئی ایسته¬میرم«
زمخشری اؤز سؤزونه دوام ائده‌رک یازیر: روایته گؤره بو آیه نازل اولاندان سونرا حضرت پیغمبردن (س) سوروشدولار: »یا رسول الله! بیزه دوستلوق و محبت‌لری واجب اولان یاخین آداملارین کیملردیر؟«
پیغمبر (ص) جوابیندا بویوردو:
»اونلار علی، فاطمه و ایکی اوغلانلاری حسن و حسین‌دن عبارت‌دیر.« علامه بهرانی بو حدیثی احمد ابن حنبلین »مسند« آدلی کتابیندان اورادا ذکر اولونان سلسله سندله ابن جبیردن و او دا ابن عباسدان بئله نقل ائدیر: مودت آیه‌سی نازل اولاندان سونرا پیغمبره (ص) دئدیلر: »ای آللاهین پیغمبری! بیزه دوستلوق و محبت‌لری واجب اولان یاخین آداملارین کیملردیر؟« او، حضرت (ص) بئله بویوردو: »علی، فاطمه و ایکی اوغلانلاری«
»تفسیر کبیر«ین مؤلفی فخر رازی زمخشری‌نین »علی-محمد« (پیغمبرین اهل بئیتی) حاقینداکی سؤزونو نقل ائتدیکدن سونرا بئله یازمیشدیر: منیم نظریمه گؤره »علی محمد« پیغمبرله (ص) رابطه‌لری داها سیخ اولان شخص‌لردیر.
بو رابطه نه قدر گوجلو و کامل اولسا، یاخینلیق دا بیر او قدر آرتیق اولار. شبهه‌سیز، علی، فاطمه حسن و حسینین (ع) حضرت پیغمبر (ص) ایله رابطه‌سی هامیدان آرتیق ایدی. بونون اینکار اولونماز بیر حقیقت اولدوغو هامی طرفیندن عینی جور سؤیلنیلمیش و ثبوتا یئتیریلمیشدیر.
نهایت، اونلارین یالنیز »علی-محمد« اولما‌لاری ضرورتی میدانا گلیر. البته »علی« کلمه‌سینین ترجمه‌سینده چوخلو مباحثه‌لر واردیر. بعضی‌لرینین فکرینجه، مقصد »قرابت« و بعضی‌لرینین نظرینجه »امت« کیمی معنا اولونور. اگر بیرینجی معنانی گؤتورسک، پیغمبرین (ص) عائله‌سی، (علی، فاطمه، حسن و حسین) »علی محمد« حساب اولونور.
اگر ایکینجی معنانی دا گؤتورسک، یئنه ده اونلار امتین ایچری‌سینه داخل اولورلار. چونکی اونلار دا پیغمبرین (ع) امتیندن ساییلیرلار. شوبهه‌سیز »علی« کلمه‌سینین معناسی علی فاطمه، حسن و حسینه (ع) شامل اولور. اما اونلاردان باشقا‌لارینین داخل اولماسیندا اختلاف واردیر. حقیقتده ایسه آیری شخص‌لری »علی« کلمه‌سینین معناسینا داخل ائتمک عقل، منطق و نقل اولونان روایت‌لره ضد گئتمک‌دیر.
یوخاریدا قئید اولوندوغو کیمی، زمخشری نقل ائتمیشدیر کی، بو آیه (مودت آیه‌سی) نازل اولاندان سونرا پیغمبردن(ص) سوروشدولار: »ای آللاهین پیغمبری! سنین یاخین آداملاریندان کیملرین دوستلوق و محبتی بیزلره واجبدیر؟« او حضرت بویوردو:
علی، فاطمه و ایکی اوغلانلاری، حسن و حسین.
بئله‌لیکله، معلوم اولور کی، بو دؤرد نفر حضرت پیغمبرین (س) یاخینلاری‌دیر و خصوصی تعظیم و احترام اونلار اوچون اولما‌لی‌دیر. بو سؤزوموزه بیر نئچه ثبوت واردیر:
۱٫ موددت آیه‌سی؛ یوخاریدا بو باره‌ده صحبت آچیلدی.
۲٫ هامیا معلوم‌دور کی، حضرت پیغمبر (ص) خانیم فاطمه‌نی چوخ سئوردی و بویوراردی: «فاطمه منیم وجودومون بیر پارچاسی‌دیر، اونو اینجیدیب ناراحات ائدن، منی اینجیدیب ناراحات ائتمیشدیر.
دئمه‌لی، بئله بیر شئی دوغرو اولدوغو حالدا پیغمبرین (ص) امّتینه ده اونلاری سئومک واجبدیر. چونکی، قورآن بویورور:
ای پیغمبر، مسلمانلارا دئ کی، اگر آللاهی سئویرسیزسه، منه تابع اولون (یعنی، منیم ائتدیک‌لریمی ائدین و دئدیک‌لریمی یئرینه یئتیرین)، او زامان آللاه دا سیزی سئور. (آل عمران سوره‌سی، آیه ۳۱)
»او پیغمبره تابع اولون، اولا بیلر کی، هدایت اولاسینیز« (اعراف سوره‌سی، آیه ۱۵۸(
»پیغمبرین امریندن چیخانلار (آللاهین عذابیندان) قورخما‌لی‌دیرلار.« (نور سوره‌سی، آیه ۶۳(
»ای مسلمانلار حقیقتاً پیغمبر سیزین اوچون یاخشی بیر نمونه‌دیر.« (احزاب سوره‌سی، آیه ۲۱)
بو آیه‌لردن معلوم اولور کی، پیغمبر (ص) علی فاطمه، حسن و حسینی (ع) سئودیگی و اونلارا فوق‌العاده اهمیت وئردیگی اوچون، مسلمانلار دا گرک پیغمبرین (ص) بو ایشینی تکرار ائده‌رک اونلاری سئوسینلر.
۳٫ حضرت پیغمبرین (ص) اهل-بئیتینه (ع) دعا ائتمک و صلوات گؤندرمگین واجب اولونماسی، اونلار اوچون یوکسک درجه و مرتبه‌دیر. بونا گؤره‌دیر کی، نامازدا تشهد اوخودوقدان سونرا اونلارا دعا ائتمک و صلوات گؤندرمک واجبدیر: »اللهم صل علی محمد و آل محمد.«
یعنی »ای الله! محمد و اونون اهل بئیتینه صلوات و رحمت گؤندر. محمد و اونون اهل بئیتینه رحمت ائت.« بو بؤیوک تعظیم و احترام اهل بئیتدن (ع) باشقا هئچ بیر کسین حاقیندا یوخدور. بوتون بو دئدیک‌لریمیز پیغمبرین (ص) اهل بئیتینی (ع) سئومگین واجب اولماسینا آشکار ثبوت‌دور. غیر شیعه طریقت‌لرینین بیرینین باشچی‌سی اولان شافعی اؤز شعرینده بئله دئییر:
مضمونو:
ای سواره اولان، »منا« قوملوغوندا بیر آز دور »خیف« بؤلگه‌سینده یاتمیشلارا، یاخود آییق اولانلارا ندا ائیله، سحر واختی حاجی‌لار منا‌دان کئچنده، بؤیوک بیر چای آخیب گئدنده، سؤیله. اگر محمدین اهل بئیتینی سئومک دینی ترک ائتمک حساب اولونسا، بوتون انسان‌لار و جین‌لر شاهد اولسونلار کی، من دینی ترک ائتمیشم.
همچنین، شافعی اؤز شعرینده او دؤورده اهل بئیتین (ع) دوشمن‌لرینه پیغمبرین (ص) دوست‌لاری، اونلارین دوست‌لارینا ایسه رافضی دئییلدیگینه اشاره ائدیب دئییر: »اگر منه اهل بئیتین دوست‌لوغونا گؤره رافضی دئسه‌لر، اوندا قورآن و اهل بئیتدن اؤنجه بونا شهادت وئرمه‌لی ایدی‌لر.« (حالبوکی، قورآندا و اهل بئیتین سؤزلرینده »رافضی« سؤزو ایشلنیلمه‌ییب، دئمه‌لی منه رافضی دئمک معنا‌سیزدیر.
طبری ابن عباسدان نقل ائدیر کی، »مودت« آیه‌سی نازل اولدوقدان سونرا، مسلمانلار سوروشدولار: »ای اللهین پیغمبری (ص)! بیزه محبت و دوست‌لوغو واجب اولان یاخین آداملارین کیملردیر؟« او حضرت (ص) بویوردو:
علی، فاطمه و ایکی اوغلانلاری، حسن و حسین بو حدیثی احمد ده »مناقب« کتابیندا نقل ائتمیشدیر.
ابن منذر، ابن ابی حاتم، ابن مردوئیه و طبرانی »معجم کبیر« کتابیندا ابن عباسدان بئله نقل ائتمیشلر: »مودت« آیه‌سی نازل اولاندان سونرا مسلمانلار دئدیلر: »ای اللهین پیغمبری! بیزه دوستلوق و محبت‌لری واجب اولان آداملارین کیملردیر؟« او حضرت (ص) بویوردو:
علی، فاطمه، حسن و حسین
یئنه »معجم کبیر« کتابیندا دوزگون بیر سندله امام حسن‌دن (ع) نقل اولونموش‌دور کی، او حضرت (ع) بیر گون خالقا مراجعت ائده‌رک بئله بویوردو:
بیز الله-تعالا دوستلوغونو بوتون مسلمانلارا واجب ائتمیش اهل بئیتدنیک
قورآن، تطهیر آیه‌سی ایله اهل بئیتین (ع) پاک‌لیغینی، بوتون پیس‌لیک‌لردن اوزاق اولدوق‌لارینی و بئله‌لیکله معنوی دگرلرینی و انسانلارین هدایت یولوندا اولان چوخ مهم روللارینی ثبوتا یئتیردی. ایندی ایسه »مودت« آیه‌سی ایله اهل بئیتین (ع) گئتدیگی یولون دوزگون اولدوغونو و انسانلارین اعتقادی مسئله‌لرده و شریعت حکم‌لری اؤیرنمکده کیمه مراجعت ائتمه‌لرینی معین ائدیر. بلی، قورآن بو آیه‌نین واسطه‌سی ایله امتی اهل بئیتین یولونا سؤوق ائدیر.
اگر اهلی بئیتین یولو دوغرو بیر یول اولماسایدی و اونلار امتی سعادت یولونا رهبرلیک ائتمگه قادر اولماسایدیلار، هئچ واخت قورآندا بو آیه‌لر نازل اولمازدی. همچنین حضرت پیغمبر (ص) زحمت‌لری‌نین قارشی‌سیندا اهلی بئیتی سئومگی امّتیندن ایسته‌مزدی. شوبهه‌سیز قورآنین بو آیه‌سی بیزه اهلی-بئیتین یولوندان آیریلماماغین و بوتون ایشلریمیزده اونلارا تابع اولماغین ضرورتینی و لازم اولدوغونو باشا سالماق اوچون‌دور. چونکی، قورآن او بؤیوک شخصیت‌لرین پاکیزه و هرطرفلی کیفیت‌لره مالک اولماغینا ضمانت وئرمیشدیر.
بئله‌لیکله قورآن بو کیمی آیه‌لرده اهلی-بئیتین یولونو توتماق و اسلامی اونلاردان اؤیرنمک حاقیندا امّته خاطرجمع‌لیک و ضمانت وئرمک ایسته‌ییر. بو، قورآن کریمین نظری ایدی. اما حضرت پیغمبرین (ص) نظرینی ایسه بو آیه‌نین تفسیری ایله علاقه‌دار حدیث و روایت‌لرده آیدین شکیلده نظرینیزه چاتدیردیق. بلی، بیزیم عزیز پیغمبریمیز (ص) اؤز مقدس کلام و تفسیرلری ایله اهلی-بئیتین محبتینی مسلمانلارین قلبینه و وجدانینا یئرلشدیردی.
او، مسلمانلارین اهلی-بئیت حاقیندا نئجه دوشونه‌جک‌لرینی، اونلارین دوست‌لاری و دوشمن‌لری ایله نئجه داورانا‌جاق‌لارینی و بیر داها اهلی-بئیتین حدیث، فقه و تفسیری دوشونجه‌لری، همچنین عقیده‌لری و دینی سیاسی رهبرلیک‌لری قارشی‌سیندا وظیفه‌لرینین نه‌دن عبارت اولدوغونو هامییا ایضاح ائتمیشدیر.
نهایت، بو آیه حاقیندا سون سؤزوموز بودور کی، بو آیه‌نین شرحینده بیان اولونان یوکسک درجه و مقامین اؤزونه مخصوص معنا و مقصدی واردیر. بئله‌لیکله، بوتون مسلمانلار تعصبو کنارا قویا‌راق، انصافلا اونو دوشونوب درک ائتمه‌لی‌دیرلر.
نوشته شده توسط admin در شنبه, ۱۸ آبان ۱۳۹۲ ساعت ۱۰:۳۴ ق.ظ
